Esther 6

Shan

← Chapter 5 Jump to: Chapter 7 →

1ၼႂ်းၶိုၼ်းၼၼ်ႉ ၶုၼ်ႁေႃၶမ်းၼွၼ်းဢမ်ႇလပ်းလႆႈလႄႈ မီးဢမိင်ႉႁႂ်ႈဢဝ်လိၵ်ႈရႃႇၸဝၢင်ႇဢၼ်မၢတ်ႈမၢႆတႅမ်ႈဝႆႉၸွမ်းၵူႈဝၼ်းၼၼ်ႉမႃးလႄႈ ၶဝ်ဢွၼ်ၵၼ်ဢဝ်ၽတ်းၵႃႈတီႈၽၢႆႇၼႃႈ ၶုၼ်ႁေႃၶမ်းဢေႃႈ။-

2မိူဝ်ႈဢၼ်ထူပ်းႁၼ် ဢၼ်တႅမ်ႈဝႆႉလွင်ႈဢၼ် မေႃႇတၵႄး ၽုၺ်ႇဢွၵ်ႇၼႄပျႃး လွင်ႈဢၼ် ပီႉၵသၼ်ႇ တင်း တေႇရိတ်ႉ ဢၼ်ပဵၼ်ၵူၼ်းထိင်းၼၢင်းၵႃႈၼႂ်းႁေႃၸဝ်ႈလႄႈ ပဵၼ်ၵေႃႉဢၼ်ပႂ်ႉၽၵ်းတူသွင်ၵေႃႉၼၼ်ႉ ၵျၢမ်ႇပွင်ႁႂ်ႈလႆႈဢဝ်ၶုၼ်ႁေႃၶမ်း ဢႃႇသူၺ်ႇရူႉ တၢႆၼၼ်ႉၼၼ်ႉၸိုင်၊-

3ၶုၼ်ႁေႃၶမ်းထၢမ်လႄႈဝႃႈ၊ ၵွပ်ႈပိူဝ်ႈလွင်ႈၼႆႉလႄႈ လႆႈပၼ်သူးလၢပ်ႈၵႃႈသင်။ လႆႈပၼ်ဢရႃႇၵႃႈသင်တီႈ မေႃႇတၵႄး ၼၼ်ႉယဝ်ႉ၊ ဝႃႈၼင်ႇၼႆလႄႈ၊ ၶႃႈၵူၼ်းၶုၼ်ႁေႃၶမ်းဢၼ်ၶႃးၸႃးယူႇၸိူဝ်းၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ဢမ်ႇပႆႇလႆႈပၼ်သူးလၢပ်ႈၵႃႈသင်တီႈမၼ်းလႃးလႃးတီႈၶႃႈ၊ ဝႃႈၼင်ႇၼႆဢေႃႈ။

4ၶုၼ်ႁေႃၶမ်းၵေႃႈထၢမ်လႄႈဝႃႈ၊ ၽူႈလႂ်မီးၵႃႈၼႂ်းတမ်ႇတိူင်းၼႆႉ၊ ဝႃႈၼင်ႇၼႆသေယဝ်ႉ၊ ႁႃႇမၢၼ်ႇ ၼၼ်ႉၶဝ်ႈၵႃႈၼႂ်းတမ်ႇတိူင်းဢၼ်ၵႃႈၼွၵ်ႈ ႁႂ်ႈလႆႈလဝ်ႊယွၼ်းဢၶႂၢင်ႉတီႈၶုၼ်ႁေႃၶမ်း၊ ႁႂ်ႈလႆႈဢဝ် မေႃႇတၵႄး မတ်ႉႁွႆႈၵႅၼ်ၶေႃးတူၵ်း ၵႃႈတီႈသဝ်ဢၼ်မၼ်းႁဵတ်းဝႆႉႁႅၼ်းဝႆႉထႃႈၼၼ်ႉလႄႈ၊-

5ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ႁႃႇမၢၼ်ႇ ၸုၵ်းယူႇၵႃႈၼႂ်းတမ်ႇတိူင်းၸဝ်ႈတီႈၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ ႁႂ်ႈမၼ်းၶဝ်ႈမႃးၵႃႈၼႂ်းသေ၊ ဝႃႈၼင်ႇၼႆဢေႃႈ။-

6ႁႃႇမၢၼ်ႇ ၶဝ်ႈၵႃႈၼႂ်းသေယဝ်ႉ၊ ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊ ထုၵ်ႇလီႁဵတ်းၸိူဝ်ႉၼင်ႇႁိုဝ်တီႈၵေႃႉဢၼ်ၶုၼ်ႁေႃၶမ်း မီးဢလူဝ်ႇၶႂ်ႈယုၵ်ႉယွင်ႈၼၼ်ႉ၊ ဝႃႈၼင်ႇၼႆသေယဝ်ႉ၊ ႁႃႇမၢၼ်ႇ ၶုၵ်းၸႂ်လႆႈၶႆႈၸႂ်ထူပ်းၼႂ်းၸႂ်မၼ်းလႄႈဝႃႈ၊ လိူဝ်သေၵဝ်ၼႆႉ ၶုၼ်ႁေႃၶမ်းယင်းမီးဢလူဝ်ႇၶႂ်ႈယုၵ်ႉယွင်ႈၽူႈလႂ်ၼႃႇသေၵဝ်ၼႆႉလူးၵွၼ်ႇ၊ ဝႃႈၼင်ႇၼႆသေလႄႈ၊-

7ႁႃႇမၢၼ်ႇ ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ပုၼ်ႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉၸိုင်၊-

8လီဢဝ်ၶိူင်ႈၼုင်ႈတၢင်းမႆ ဢၼ်ၶုၼ်ႁေႃၶမ်းယၢမ်ႈၼုင်ႈမႆယူႇ၊ မႃႉဢၼ်ၶုၼ်ႁေႃၶမ်းယၢမ်ႈၶီႇယူႇ၊ ရႃႇၸႃႉသရၽူႇဢၼ်မၼ်းၸဝ်ႈတိုဝ်းယူႇၼၼ်ႉမႃးလႄႈ၊-

9ဢဝ်ၶိူင်ႈၼုင်ႈတၢင်းမႆၸဝ်ႈ ဢိၵ်ႇတင်းမႃႉၸဝ်ႈၼၼ်ႉ ဢၢပ်ႈပၼ်ၵႃႈၼႂ်းမိုဝ်းမူးမၢတ်ႈၽွင်းမိူင်းၸဝ်ႈ ၵေႃႉဢၼ်မုၼ်ၽုင်းယႂ်ႇပႃးၼိုင်ႈၼၼ်ႉသေလႄႈ ႁႂ်ႈဢဝ်ၼုင်ႈပၼ်ၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉလႄႈ ႁႂ်ႈမၼ်းၶီႇမႃႉၸဝ်ႈၸွမ်းသဵၼ်ႈတၢင်းလူင်ဝဵင်းၸဝ်ႈၼၼ်ႉသေလႄႈ ႁႂ်ႈႁွင်ႉပၢဝ်ႇႁွင်ႉလၢတ်ႈၵႃႈတီႈဢွၼ်တၢင်းမၼ်းလႄႈဝႃႈ၊ လႆႈႁဵတ်းၸိူဝ်ႉၼင်ႇၼႆတီႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉဢေႃႈ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

10မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈ ႁႃႇမၢၼ်ႇ လႄႈဝႃႈ၊ မႂ်းၵႂႃႇၶၼ်ၶၼ်ၽႂ်းၽႂ်းလႄႈ ဢဝ်ၶိူင်ႈၼုင်ႈတၢင်းမႆၸဝ်ႈ ဢိၵ်ႇတင်းမႃႉၸဝ်ႈ ၸွမ်းၵႃႈၼင်ႇဢၼ်မႂ်းလဝ်ႊလၢတ်ႈၼၼ်ႉလႄႈ ႁဵတ်းတီႈ မေႃႇတၵႄး ၵူၼ်း ယူႉတႃႉ ဢၼ်ၼင်ႈယူႇၵႃႈတီႈၽၵ်းတူႁေႃၸဝ်ႈၼၼ်ႉတႃႉ။ ယႃႇပေႁႂ်ႈၵႃႈဢၼ်မႂ်းလဝ်ႊလၢတ်ႈၼၼ်ႉ လႆႈလုတ်ႈလႆႈယွမ်းသေၸိူဝ်ႉသေပိူင်၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ ႁႃႇမၢၼ်ႇ ဢဝ်ၶိူင်ႈၼုင်ႈတၢင်းမႆၸဝ်ႈ ဢိၵ်ႇတင်းမႃႉၸဝ်ႈလႄႈ ၼုင်ႈပၼ် မေႃႇတၵႄး သေယဝ်ႉ၊ ႁႂ်ႈမၼ်းၶီႇမႃႉၸဝ်ႈ ၸွမ်းသဵၼ်ႈတၢင်းလူင်ဝဵင်းၸဝ်ႈယူႇသေလႄႈ ႁွင်ႉပၢဝ်ႇႁွင်ႉလၢတ်ႈၵႃႈတီႈဢွၼ်တၢင်းမၼ်းလႄႈဝႃႈ၊ လႆႈႁဵတ်းၸိူဝ်ႉၼင်ႇၼႆ တီႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

12ႁဵတ်းၸိူဝ်ႉၼင်ႇၼၼ်သေယဝ်ႉ၊ မေႃႇတၵႄး ၶိုၼ်းမႃးၸူးတီႈၽၵ်းတူႁေႃၸဝ်ႈသေဢေႃႈ။ ႁႃႇမၢၼ်ႇ ၸမ်ႉ၊ ၶၢင်းၶီၶၢင်းၽၢၼ်ယူႇ၊ ႁူမ်ႇသုမ်ႇႁူဝ်မၼ်းယူႇသေလႄႈ ၶိုၼ်းမိူဝ်းၵႂႃႇၸူးၵႃႈတီႈႁိူၼ်းမၼ်းၶၼ်ၶၼ်ၽႂ်းၽႂ်းသေယဝ်ႉ၊-

13ႁႃႇမၢၼ်ႇ ၶိုၼ်းမွၵ်ႇလၢတ်ႈ လွင်ႈတၢင်းၵႃႈဢၼ်ပဵၼ်တီႈမၼ်းၸိူဝ်းၼၼ်ႉ တီႈမေးမၼ်း ၸေးရိတ်ႉ ဢိၵ်ႇတင်းၵေႃႉသေႈမၼ်းၵႃႈမီးၸိူဝ်းၼၼ်ႉဢေႃႈ။ မိူဝ်ႈၼၼ်ႉပိင်ႇၺႃႇသီႉမၼ်းတင်းလၢႆ ဢိၵ်ႇတင်းမေးမၼ်း ၸေးရိတ်ႉ ၼၼ်ႉ ဢွၼ်ၵၼ်ၶိုၼ်းလၢတ်ႈလႄႈဝႃႈ၊ ပေႃး မေႃႇတၵႄး ဢၼ်ၸဝ်ႈႁဝ်းၸႃႉတူၵ်းသုမ်းၵႃႈတီႈၽၢႆႇၼႃႈမၼ်းၼၼ်ႉ ပဵၼ်မဵဝ်း ယူႉတႃႉ ဢမၢၼ်ႇၶၼ်ပဵၼ်ၸိုင်၊ ၸဝ်ႈႁဝ်းတၵ်းဢမ်ႇပႄႉဢမ်ႇၼႅင်ႇမၼ်းလႆႈ။ တၵ်းတူၵ်းသုမ်းၵႃႈတီႈၽၢႆႇၼႃႈမၼ်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။

14ၼႂ်းမိူဝ်ႈဢၼ်ၶဝ်ယင်းတိုၵ်ႉလၢတ်ႈတေႃႇမၼ်းၸိူဝ်ႉၼင်ႇၼၼ်ယူႇၼၼ်ႉၸိုင်၊ ၵူၼ်းထိင်းၼၢင်းၵႃႈတီႈႁေႃၸဝ်ႈၸိူဝ်းၼၼ်ႉဢွၼ်ၵၼ်မႃးလႄႈ ႁွင်ႉဢဝ် ႁႃႇမၢၼ်ႇ ၵႂႃႇၵႃႈတီႈပွႆးဢၼ် ဢေးသတႃႇ ပွင်ႁဵတ်းပွင်ႁႅၼ်းဝႆႉၼၼ်ႉ ၶၼ်ၶၼ်ၽႂ်းၽႂ်းဢေႃႈ။

← Chapter 5 Jump to: Chapter 7 →