bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Shan
/
Shan
/
Esther 3
Esther 3
Shan
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 4 →
1
လိုၼ်းၼၼ်ႉ ၶုၼ်ႁေႃၶမ်း ဢႃႇသူၺ်ႇရူႉ ၼၼ်ႉ ယုၵ်ႉယွင်ႈ ႁႃႇမၢၼ်ႇ လုၵ်ႈၸၢႆး ႁမ်ႇမေႇတႃႇသႃႉ မဵဝ်း ဢႃႇၵတ်ႉ လႄႈ ႁႂ်ႈမၼ်းပဵၼ်ဢၼ်ယႂ်ႇဢၼ်သုင်သေလႄႈ ပၼ်တီႈယူႇတီႈၼင်ႈဢၼ်မျၢတ်ႈသုင် လိူဝ်တွၼ်းၼႃႇသေမူးမၢတ်ႈၽွင်းမိူင်းဢၼ်မီးတီႈမၼ်းတင်းသဵင်ႈတင်းလူင်ၼၼ်ႉ တီႈမၼ်းၼၼ်ႉဢေႃႈ။-
2
ၶႃႈၵူၼ်းၶုၼ်ႁေႃၶမ်း ၵႃႈဢၼ်ႁွတ်ႈထိုင်ၵႃႈတီႈၽၵ်းတူႁေႃၸဝ်ႈၼၼ်ႉ ဢွၼ်ၵၼ်ၵူမ်ႈႁူဝ်ၵွမ်းႁူဝ် ဝႆႈသႃ ႁႃႇမၢၼ်ႇ ၸွမ်းၵႃႈၼင်ႇဢၼ် ၶုၼ်ႁေႃၶမ်းမီးဢမိင်ႉလူၺ်ႈလွင်ႈမၼ်းဝႆႉၼၼ်ႉဢေႃႈ။ မေႃႇတၵႄး ၸမ်ႉ၊ ဢမ်ႇၵူမ်ႈႁူဝ်ၵွမ်းႁူဝ် ဢမ်ႇဝႆႈဢမ်ႇသႃ။-
3
မိူဝ်ႈၼၼ်ႉ ၶႃႈၵူၼ်းၶုၼ်ႁေႃၶမ်းဢၼ်ႁွတ်ႈထိုင်ၵႃႈတီႈၽၵ်းတူႁေႃၸဝ်ႈၸိူဝ်းၼၼ်ႉ တွင်ႈထၢမ်ပၼ်သတီႉတီႈ မေႃႇတၵႄး လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းတွပ်ႇထဵင်ပူၼ်ႉလိူဝ်ဢမိင်ႉၶုၼ်ႁေႃၶမ်းၼင်ႇႁိုဝ်။ ဝႃႈၼင်ႇၼႆလႄႈ၊-
4
ပိၵ်ႉသမ်ႉၶဝ်ဢွၼ်ၵၼ်လၢတ်ႈၸိူဝ်ႉၼင်ႇၼႆတီႈမၼ်းၵူႈဝၼ်းသေၵေႃႈ မၼ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉလႄႈ ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈတီႈ ႁႃႇမၢၼ်ႇ ႁႂ်ႈလႆႈႁူႉလွင်ႈဢၼ် ၵႂၢမ်း မေႃႇတၵႄး ၼၼ်ႉ တႄႉႁိုဝ် ဢမ်ႇတႄႉႁိုဝ်ၼၼ်ႉဢေႃႈ။-
5
လွင်ႈမၼ်းၸမ်ႉ မေႃႇတၵႄး လႆႈလၢတ်ႈလွင်ႈဢၼ် မၼ်းပဵၼ်ၵူၼ်း ယူႉတႃႉ ၼၼ်ႉ တီႈၶဝ်ၼၼ်ႉဢေႃႈ။ မိူဝ်ႈဢၼ် ႁႃႇမၢၼ်ႇ ႁူႉႁၼ်လွင်ႈဢၼ် မေႃႇတၵႄး ယင်းဢမ်ႇၵူမ်ႈႁူဝ်ၵွမ်းႁူဝ်လႄႈဝႆႈသႃၼၼ်ႉၸိုင် မၼ်းၸႂ်မႆႈၶႆႈၸႃႉၼႃႇလူင်လၢင်လႄႈ၊-
6
မၢတ်ႈတၢင်းဢၼ်ဢဝ် မေႃႇတၵႄး တၢႆၵေႃႉလဵဝ်ၵူၺ်းၼၼ်ႉ ပဵၼ်ဢၼ်ဢမ်ႇၶိုတ်းၸႂ်ပဵင်းၸႂ်မၼ်း ၵွပ်ႈပိူဝ်ႈဢၼ်ၶဝ်လႆႈၽုၺ်ႇဢွၵ်ႇၼႄပျႃး မဵဝ်း မေႃႇတၵႄး တီႈမၼ်းၼၼ်ႉဢေႃႈ။ ပိူဝ်ႈၼႆလႄႈ ႁႃႇမၢၼ်ႇ ၵျၢမ်ႇႁႃႁႂ်ႈလႆႈယႃႉၽဵဝ်ႈ ၵူၼ်း ယူႉတႃႉ ၵႃႈတီႈဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢႃႇသူၺ်ႇရူႉ ၵူႈတီႈၵူႈလႅၼ် ဢၼ်ဝႃႈၵူၼ်းမဵဝ်း မေႃႇတၵႄး ၸိူဝ်းၼၼ်ႉပႅတ်ႈဢေႃႈ။
7
ပိူဝ်ႈၼႆလႄႈ ၼႂ်းပီႊဢၼ် ဢႃႇသူၺ်ႇရူႉ ၸၢမ်ႇႁၢင်ႈၸၢမ်ႇႁေႃသိပ်းသွင်ပီႊ လိူၼ်ပထမႃႉ ဢၼ်လႆႈၸိုဝ်ႈ ၼီႉသၼ်ႇ ၼၼ်ႉ လႆႈဢွၼ်ၵၼ်တူၵ်းၸႃႇၵွၵ်ႈ ပူႉရႃႉ ၵႃႈတီႈၽၢႆႇၼႃႈ ႁႃႇမၢၼ်ႇ ဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ ၵႃႈၼင်ႇဢၼ်ၸႅၼ်ႇတၢမ်းၵၼ် တေႃႇထိုင်ႁွတ်ႈလိူၼ်တႂႃႇတႃႉသမႃႉ ဢၼ်လႆႈၸိုဝ်ႈ ဢႃႇတႃႇ ၼၼ်ႉဢေႃႈ။-
8
မိူဝ်ႈၼၼ်ႉ ႁႃႇမၢၼ်ႇ လဝ်ႊလၢတ်ႈတီႈၶုၼ်ႁေႃၶမ်း ဢႃႇသူၺ်ႇရူႉ လႄႈဝႃႈ၊ မီးမဵဝ်းၵူၼ်းဢၼ်ၽၢတ်ႇၽႄၵၼ် ယူႇၵူႈတီႈၵူႈလႅၼ်လႄႈႁွတ်ႈထိုင်ၵႃႈၼႂ်းၵူၼ်းဝၢၼ်ႈၵူၼ်းမိူင်းၵူႈၸိူဝ်ႉၵူႈမဵဝ်း ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈႁဝ်း ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈလႄႈ ဢၼ်ထုင်းၸၢမ်ႇတၢင်းဢၼ်ၶဝ်ၵမ်ၶဝ်ၵျၢင်ႉၼၼ်ႉ ဢမ်ႇမိူၼ်ၵၼ်တင်းထုင်းၸၢမ်ႇ ၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီး ဢၼ်ယင်းဢမ်ႇထွမ်ႇဢမ်ႇဢဝ် ဢူႉပတေႇဢၼ်ၸဝ်ႈၶုၼ်လူင်ၸီႇယၢင်ႇဝႆႉလႄႈယူႇၼၼ်ႉမဵဝ်းၼိုင်ႈတီႈၶႃႈဢေႃႈ။ ပိူဝ်ႈၼႆလႄႈ လွင်ႈဢၼ်ၸဝ်ႈၶုၼ်လူင်ပၼ်ဢၶႂၢင်ႉတီႈမဵဝ်းၼၼ်ႉၼၼ်ႉ၊ ဢမ်ႇမီးၵျေးၸူးၵႃႈသင်လႃးလႃးတီႈၶႃႈ။-
9
ပေႃးၸဝ်ႈၶုၼ်လူင်မီးဢလူဝ်ႇၸိုင် ၶႅၼ်းတေႃႈႁႂ်ႈတႅမ်ႈလိၵ်ႈဢမိင်ႉ ႁႂ်ႈယႃႉၽဵဝ်ႈမဵဝ်းၼၼ်ႉပႅတ်ႈသေၵမ်းတီႈၶႃႈ။ ၶႃႈၸဝ်ႈတၵ်းဢဝ်ငိုၼ်းမိုၼ်ႇ တလၢၼ်ႇတၢၼ်ႇ ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ၵိုတ်ႉႁၢပ်ႇဢမူႉၸဝ်ႈၶုၼ်လူင်ၼၼ်ႉ ႁႂ်ႈၶဝ်လႆႈဢဝ်သႂၢင်းၶဝ်ႈၵႃႈၼႂ်းတိူၵ်ႈၽၼ်ႇတႃႇၸဝ်ႈၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-
10
ၶုၼ်ႁေႃၶမ်းၵေႃႈထွတ်ႇဢဝ်လၢၵ်ႈၸွပ်ႈၸဝ်ႈသေလႄႈ ပၼ်တီႈ ႁႃႇမၢၼ်ႇ လုၵ်ႈၸၢႆး ႁမ်ႇမေႇတႃႇသႃႉ မဵဝ်း ဢႃႇၵတ်ႉ ဢၼ်ပဵၼ်ရၢၼ်ႇသူႇ မဵဝ်း ယူႉတႃႉ ၼၼ်ႉဢေႃႈ။-
11
ၶုၼ်ႁေႃၶမ်းမီးဢမိင်ႉတီႈ ႁႃႇမၢၼ်ႇ လႄႈဝႃႈ၊ ငိုၼ်းၼၼ်ႉၸိုင်ၵဝ်ပၼ်တီႈမႂ်းဢေႃႈ။ ၵူၼ်းမဵဝ်းၼၼ်ႉၵေႃႈ ၵဝ်ဢၢပ်ႈပၼ်တီႈမႂ်း ႁႂ်ႈမႂ်းလႆႈႁဵတ်းၵႃႈၼင်ႇဢၼ် မႂ်းၶႂ်ႈႁဵတ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
12
မိူဝ်ႈၼၼ်ႉ ၼႂ်းလိူၼ်ပထမႃႉသိပ်းသၢမ်ဝၼ်းၼၼ်ႉ ၶဝ်ႁွင်ႉဢဝ်ၸရေးလူင်ၸဝ်ႈတင်းလၢႆလႄႈ တႅမ်ႈၸွမ်းၵႃႈၼင်ႇဢၼ် ႁႃႇမၢၼ်ႇ သင်ႇလၢတ်ႈဝႆႉတီႈၸဝ်ႈၽႃႉလႂ်၊ မဵဝ်ႉဝုၼ်ႇဢၼ်ဢုပ်ႉၵႃႈၼိူဝ်ၵူႈသိုင်ႇၵူႈမိူင်း၊ ၵူႈဢိူင်ႇၵူႈၵျၢၵ်ႈလႂ်၊ ၶုၼ်ဢၼ်ၸီႇယၢင်ႇၵႃႈၼိူဝ် ၵူၼ်းၵူႈၸိူဝ်ႉၵူႈမဵဝ်းလႂ်၊ ၵႃႈတီႈၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ၸွမ်းလူၺ်ႈလိၵ်ႈၽႃႇသႃႇမိူင်းၽႂ်မိူင်းမၼ်း ဢိၵ်ႇတင်းတီႈၵူၼ်းၵူႈၸိူဝ်ႉၵူႈမဵဝ်း ၸွမ်းလူၺ်ႈၽႃႇသႃႇၽႂ်ၽႃႇသႃႇမၼ်းၼၼ်ႉသေလႄႈ ဢဝ်ၸိုဝ်ႈဢဝ်သဵင်ၶုၼ်ႁေႃၶမ်း ဢႃႇသူၺ်ႇရူႉ သႂ်ႇလႄႈ ဢဝ်လၢၵ်ႈၸွပ်ႈၶုၼ်ႁေႃၶမ်းတွၵ်ႇတၼ်းသိၵ်ႈဢေႃႈ။-
13
ၶဝ်ဢဝ်ၵူၼ်းဢွၼ်ႇ ဢၼ်သူင်ႇလိၵ်ႈတင်းလၢႆ ဢဝ်လိၵ်ႈဢမိင်ႉၸဝ်ႈၼၼ်ႉ ပၼ်ၵႂႃႇသိုင်ႇၸိုင်ႈဝၢၼ်ႈမိူင်းၸဝ်ႈ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ႁႂ်ႈဢွၼ်ၵၼ်ၶႃႈၽၼ်းဢဝ်တၢႆပႄႇၽဵဝ်ႈၵူၼ်း ယူႉတႃႉ ၸဵမ်ၼုမ်ႇၸဵမ်ထဝ်ႈ လုၵ်ႈဢွၼ်ႇ မႄႈယိင်းၵႃႈမီးပႅတ်ႈလႄႈ ၼႂ်းလိူၼ်တႂႃႇတႃႉသမႃႉဢၼ်လႆႈၸိုဝ်ႈ ဢႃႇတႃႇ ၼၼ်ႉ သိပ်းသၢမ်ဝၼ်းၼၼ်ႉၵမ်းလဵဝ်သေလႄႈ ႁိမ်ႁူင်ႇသိမ်းဢဝ်ဢုၵ်ႉၸႃႇၶဝ်ဢေႃႈ။-
14
လိၵ်ႈဢမိင်ႉၸဝ်ႈဢၼ်လႆႈမွၵ်ႇလၢတ်ႈၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈၼၼ်ႉ လႆႈၵျေႃႇၺႃႇတီႈၵူၼ်းၵူႈၸိူဝ်ႉၵူႈမဵဝ်း ႁႂ်ႈၶဝ်မႄးႁႅၼ်းမီးဝႆႉထႃႈပုၼ်ႈဝၼ်းၼၼ်ႉဢေႃႈ။-
15
ၵူၼ်းဢွၼ်ႇဢၼ်သူင်ႇလိၵ်ႈၸိူဝ်းၼၼ်ႉ ၸွမ်းၵႃႈၼင်ႇဢၼ်ၶုၼ်ႁေႃၶမ်း ၸီႇယၢင်ႇဝႆႉၼၼ်ႉသေလႄႈ ႁိပ်ႈၼႅတ်ႈၵႂႃႇၶၼ်ၶၼ်ၽႂ်းၽႂ်းလႄႈ ဢမိင်ႉၸဝ်ႈၼၼ်ႉသႃႈၸွတ်ႇၵႂႃႇၵႃႈၼႂ်းႁေႃၶမ်း သူႉသၼ်ႇ ၼၼ်ႉဢေႃႈ။ ၶုၼ်ႁေႃၶမ်းဢိၵ်ႇတင်း ႁႃႇမၢၼ်ႇ ၸမ်ႉ၊ ၼင်ႈၵႃႈတီႈပွႆးသူတ်ႉပွႆးၵိၼ်ၼမ်ႉၸပိတ်ႈယူႇလႄႈ ဝဵင်း သူႉသၼ်ႇ ၼၼ်ႉ ႁွတ်ႈထိုင်တၢင်းဢၼ်ယၢပ်ႇၸႂ်ယုင်ႈၸႂ်ဢေႃႈ။
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 4 →
All chapters:
1
2
3
4
5
6
7
8
9
10