Esther 5

Shan

← Chapter 4 Jump to: Chapter 6 →

1ၼႂ်းဝၼ်းဢၼ် ထူၼ်ႈထိုင်သၢမ်ဝၼ်းၼၼ်ႉ ဢေးသတႃႇ ၼုင်ႈမႆႁၢင်ႈၶိူင်ႈၶူဝ်းၼုင်ႈတၢင်းမႆၼၢင်းႁေႃၶမ်းသေလႄႈ ၶဝ်ႈၸုၵ်းယူႇၵႃႈၼႂ်းတမ်ႇတိူင်းႁေႃၸဝ်ႈ ဢၼ်ၵႃႈၼႂ်းဢၼ်မီးသိုဝ်ႈၵၼ်တင်းႁေႃလူင်ၼၼ်ႉဢေႃႈ။ ၶုၼ်ႁေႃၶမ်းၵေႃႈၼင်ႈယူႇၵႃႈၼိူဝ်ရႃႇၸႃႉပလၢင်ႇၵႃႈၼႂ်းႁေႃၸဝ်ႈ ဢၼ်မီးသိုဝ်ႈၽၵ်းတူႁေႃၸဝ်ႈၼၼ်ႉဢေႃႈ။-

2မိူဝ်ႈဢၼ်ၶုၼ်ႁေႃၶမ်း ႁၼ်ၼၢင်းႁေႃၶမ်း ဢေးသတႃႇ ၸုၵ်းယူႇၵႃႈၼႂ်းတမ်ႇတိူင်းၸဝ်ႈၼၼ်ႉၸိုင်၊ မၼ်းလႆႈၼႃႈလႆႈတႃတီႈၶုၼ်ႁေႃၶမ်းလႄႈ ၶုၼ်ႁေႃၶမ်းဢဝ်ၵၼ်းႁွၵ်ႇရႃႇၸႃႉၶမ်း ဢၼ်မီးၵႃႈၼႂ်းမိုဝ်းၸဝ်ႈၼၼ်ႉယိုၼ်ႈၸူးတီႈ ဢေးသတႃႇ လႄႈ ဢေးသတႃႇ ၼၼ်ႉ သုတ်ႉၸပ်းသုတ်ႉၸူးသေလႄႈ တိူဝ်ႉသႂ်ႇပၢႆလႅမ်ၵၼ်းႁွၵ်ႇရႃႇၸႃႉၼၼ်ႉဢေႃႈ။-

3ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ ၼၢင်းႁေႃၶမ်း ဢေးသတႃႇ ဢိူၺ်း၊ မႂ်းမီးဢလူဝ်ႇၶႂ်ႈလႆႈၵႃႈသင်။ မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ ၵဝ်တၵ်းပၼ်ၵႃႈဢၼ်ၶႂ်ႈယွၼ်းဢဝ်ၼၼ်ႉ တေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊ ဝႃႈၼင်ႇၼႆသေယဝ်ႉ၊-

4ဢေးသတႃႇ လဝ်ႊလၢတ်ႈလႄႈဝႃႈ၊ ပေႃးၸဝ်ႈၶုၼ်လူင်မီးဢလူဝ်ႇၸိုင်၊ ဝၼ်းမိူဝ်ႈၼႆႉ ၶႅၼ်းတေႃႈၸဝ်ႈၶုၼ်လူင်ဢိၵ်ႇတင်း ႁႃႇမၢၼ်ႇ မႃးတီႈပွႆးဢၼ်ၶိင်းပဵၼ်ၶႃႈပွင်ႁဵတ်းပွင်ႁႅၼ်းဝႆႉ ပုၼ်ႈၸဝ်ႈၶုၼ်လူင်ၼၼ်ႉသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

5ၶုၼ်ႁေႃၶမ်းမီးဢမိင်ႉလႄႈဝႃႈ၊ ႁႂ်ႈ ႁႃႇမၢၼ်ႇ မႃးၶၼ်ၶၼ်ဝႆးဝႆး ႁႂ်ႈလႆႈႁဵတ်းၸွမ်းၵႃႈၼင်ႇဢၼ် ဢေးသတႃႇ လဝ်ႊလၢတ်ႈၼၼ်ႉသေ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းဢိၵ်ႇတင်း ႁႃႇမၢၼ်ႇ မႃးၵႃႈတီႈပွႆးဢၼ် ဢေးသတႃႇ ပွင်ႁဵတ်းပွင်ႁႅၼ်းဝႆႉၼၼ်ႉဢေႃႈ။

6ၶုၼ်ႁေႃၶမ်းမီးဢမိင်ႉတီႈ ဢေးသတႃႇ ၵႃႈၼႂ်းပွႆးၼမ်ႉၸပိတ်ႈၼၼ်ႉလႄႈဝႃႈ၊ မႂ်းမီးဢလူဝ်ႇၶႂ်ႈလႆႈၵႃႈသင်။ ၵဝ်တၵ်းပၼ်ၸွမ်းၵႃႈဢၼ်မႂ်းမီးဢလူဝ်ႇၶႂ်ႈလႆႈၼၼ်ႉဢေႃႈ။ မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ ၵဝ်တၵ်းပၼ်ၵႃႈဢၼ်မႂ်းယွၼ်းဢဝ်ၼၼ်ႉတေႃႇထိုင်ႁွတ်ႈ သိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊ ဝႃႈၼင်ႇၼႆသေယဝ်ႉ၊-

7ဢေးသတႃႇ လဝ်ႊလၢတ်ႈလႄႈဝႃႈ၊ သူးလၢပ်ႈဢၼ်ၶိင်းပဵၼ်ၶႃႈမီးဢလူဝ်ႇၶႂ်ႈလႆႈလႄႈ ၶိင်းပဵၼ်ၶႃႈၶႂ်ႈယွၼ်းဢဝ်ၼၼ်ႉ တီႈၶႃႈၸမ်ႉ၊-

8ပေႃးၶိင်းပဵၼ်ၶႃႈထုၵ်ႇၸႂ်မႅၼ်ႈၸႂ်ၸဝ်ႈၶုၼ်လူင်၊ ပေႃးၸဝ်ႈၶုၼ်လူင်မီးဢလူဝ်ႇၶႂ်ႈဢဵတ်းလူပၼ်သူးလၢပ်ႈ ဢၼ်ၶိင်းပဵၼ်ၶႃႈမီးဢလူဝ်ႇၶႂ်ႈလႆႈၼၼ်ႉလႄႈ ႁဵတ်းၸွမ်းၵႃႈၼင်ႇဢၼ်ၶိင်းပဵၼ်ၶႃႈ ၶႂ်ႈယွၼ်းဢဝ်ၼၼ်ႉတီႈၶႃႈၸိုင်၊ ၸဝ်ႈၶုၼ်လူင် ဢိၵ်ႇတင်း ႁႃႇမၢၼ်ႇ သမ်ႉမႃးတီႈပွႆးဢၼ်ၶိင်းပဵၼ်ၶႃႈ တၵ်းပွင်ႁဵတ်းပွင်ႁႅၼ်းဝႆႉၼၼ်ႉထႅင်ႈသေၵမ်းတီႈၶႃႈ။ ဝၼ်းမိူဝ်ႈၽုၵ်ႈ ၶိင်းပဵၼ်ၶႃႈတၵ်းႁဵတ်းၸွမ်းၵႃႈၼင်ႇဢၼ် ၸဝ်ႈၶုၼ်လူင်မီးဢမိင်ႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

9ၼႂ်းဝၼ်းၼၼ်ႉ ပိၵ်ႉသမ်ႉ ႁႃႇမၢၼ်ႇ မီးၸႂ်ဢၼ်ၸူမ်းသိူဝ်းသႂၢင်ႇၵီႈသေလႄႈ ဢွၵ်ႇမိူဝ်းၵႂႃႇသေၵေႃႈ၊ မိူဝ်ႈဢၼ်မၼ်းႁၼ် မေႃႇတၵႄး ယင်းဢမ်ႇလုၵ်ႉၸုၵ်း၊ ယင်းဢမ်ႇတူင်ႉဢမ်ႇၼိုင်ၵွပ်ႈပိူဝ်ႈမၼ်းလႃးလႃးလႄႈ ယူႇၵႃႈၼႂ်းႁူးၽၵ်းတူႁေႃၸဝ်ႈၼၼ်ႉယူႇၼၼ်ႉၸိုင် မၼ်းမီးတၢင်းဢၼ်ၸႂ်မႆႈၶႆႈၸႃႉၼႃႇလူင်လၢင်တီႈ မေႃႇတၵႄး ဢေႃႈ။-

10ၼႂ်းဝႃႈၼၼ်သေၵေႃႈ ႁႃႇမၢၼ်ႇ ၶျုၵ်ႈၵၼ်ႈၸႂ်မၼ်းယူႇသေလႄႈ မိူဝ်းၵႂႃႇႁွတ်ႈထိုင်ၵႃႈတီႈႁိူၼ်းမၼ်းသေယဝ်ႉ၊ ပွႆႇၸႂ်ႉလႄႈ ႁွင်ႉဢဝ်မေးမၼ်း ၸေးရိတ်ႉ ဢိၵ်ႇတင်းၵေႃႉသေႈမၼ်းတင်းလၢႆမႃးလႄႈ၊-

11ႁႃႇမၢၼ်ႇ ၽုၺ်ႇဢွၵ်ႇၼႄပျႃးလွင်ႈဢၼ်မုၼ်ၽုင်းၸေးၸိမ်ႇမၼ်းယႂ်ႇၼႃႇ၊ လွင်ႈဢၼ်လုၵ်ႈလၢင်းမၼ်းၼမ်ၼႃႇ၊ လွင်ႈၵႃႈဢၼ်ၶုၼ်ႁေႃၶမ်းယုၵ်ႉယွင်ႈမၼ်းၼႃႇလူင်လၢင်လႄႈ ၶၢၼ်းမၼ်းဝႆႉၵႃႈၼႂ်းဢရႃႇဢၼ်မျၢတ်ႈလိူဝ်တွၼ်းၼႃႇသေမူးမၢတ်ႈၽွင်းမိူင်းၸဝ်ႈတင်းလၢႆ ဢိၵ်ႇတင်းၶႃႈၵူၼ်းၸဝ်ႈတင်းလၢႆၼၼ်ႉဢေႃႈ။-

12လိူဝ်သေၼၼ်ႉ ႁႃႇမၢၼ်ႇ လၢတ်ႈလႄႈဝႃႈ၊ ၼၢင်းႁေႃၶမ်း ဢေးသတႃႇ ၼၼ်ႉ၊ ၼွၵ်ႈသေၵဝ်ၼႆႉ ဢမ်ႇႁႂ်ႈၽူႈလႂ်သေၵေႃႉသေၵူၼ်းၸွမ်းလူၺ်ႈၵၼ်တင်းၶုၼ်ႁေႃၶမ်း ၶဝ်ႈၸူးၵႃႈတီႈပွႆးဢၼ်မၼ်းပွင်ႁဵတ်းပွင်ႁႅၼ်းဝႆႉၼၼ်ႉလႄႈ၊ ၵႃႈတီႈဝၼ်းမိူဝ်ႈၽုၵ်ႈၵေႃႈ၊ ၵဝ်သမ်ႉလႆႈၶၢမ်ႇတၢင်းဢၼ်ၽိတ်ႈပၢင်းၸွမ်း ဢိၵ်ႇလူၺ်ႈၵၼ်တင်းၶုၼ်ႁေႃၶမ်းဢေႃႈ။-

13ၵူၺ်းၵႃႈ ၸူဝ်ႈဢၼ်ၵဝ်ယင်းလႆႈႁၼ် မေႃႇတၵႄး ၵူၼ်း ယူႉတႃႉ ၼၼ်ႉၼင်ႈယူႇၵႃႈတီႈႁူးၽၵ်းတူႁေႃၸဝ်ႈၼၼ်ႉၸိုင်၊ ၵႃႈဢၼ်ၵဝ်လၢတ်ႈမိူဝ်ႈလဵဝ်ၼႆႉၸိူဝ်းၼၼ်ႉ ဢမ်ႇပွင်ႇလွင်ႈၵႃႈသင်တီႈၵဝ်၊ ဝႃႈၼင်ႇၼႆဢေႃႈ။-

14မိူဝ်ႈၼၼ်ႉ မေးမၼ်း ၸေးရိတ်ႉ ဢိၵ်ႇတင်းၵေႃႉသေႈမၼ်းၵႃႈမီးၼၼ်ႉ ဢွၼ်ၵၼ်လၢတ်ႈလႄႈဝႃႈ၊ ႁႂ်ႈပၵ်းသဝ်ဢၼ်မတ်ႉႁွႆႈၵႅၼ်ၶေႃးတူၵ်း ဢၼ်သုင်ႁႃႈသိပ်းသွၵ်ႇၼၼ်ႉသေၵမ်း။ ဝၼ်းမိူဝ်ႈၽုၵ်ႈ လဝ်ႊလၢတ်ႈတီႈၶုၼ်ႁေႃၶမ်းႁႂ်ႈလႆႈဢဝ် မေႃႇတၵႄး မတ်ႉႁွႆႈၵႅၼ်ၶေႃးတူၵ်းၵႃႈတီႈသဝ်ၼၼ်ႉပႅတ်ႈသေၵမ်း။ လိုၼ်းၼၼ်ႉၸင်ႇ မီးၸႂ်ဢၼ်သႂၢင်ႇသိူဝ်းသေလႄႈ ၶဝ်ႈပွႆးလူၺ်ႈၵၼ်တင်းၶုၼ်ႁေႃၶမ်းသေၵမ်း၊ ဝႃႈၼင်ႇၼႆလႄႈ ၵႂၢမ်းဢၼ်လၢတ်ႈဝႃႈၼၼ်ႉ ထုၵ်ႇၸႂ်ၵျိူၵ်ႈၸႂ် ႁႃႇမၢၼ်ႇ လႄႈ မၼ်းႁႂ်ႈႁဵတ်းႁႂ်ႈႁႅၼ်းသဝ်ဢၼ်မတ်ႉႁွႆႈၵႅၼ်ၶေႃးတူၵ်းၼၼ်ႉဝႆႉဢေႃႈ။

← Chapter 4 Jump to: Chapter 6 →