Esther 4

Shan

← Chapter 3 Jump to: Chapter 5 →

1မိူဝ်ႈဢၼ် မေႃႇတၵႄး ႁူႉလွင်ႈဢၼ်ႁဵတ်းၵႃႈမီးၼၼ်ႉၸိုင်၊ မေႃႇတၵႄး ၸၵ်ႉသိၵ်ႇၶူဝ်းၼုင်ႈမၼ်းလႄႈ ၼုင်ႈမႆၼင်ပေႃယူႇ၊ ၵူဝ်ႈတဝ်ႈယူႇသေလႄႈ ဢွၵ်ႇၸူးၵႃႈၼႂ်းၵၢင်ဝဵင်းလႄႈ ႁဵတ်းသဵင်ဢၼ်ယႂ်ႇၼႃႇ ၶီၸႂ်ၶူမ်ၸႂ်ၼႃႇလူင်လၢင် ႁွင်ႉႁႆႈဢေႃႈ။-

2မၼ်းႁွတ်ႈၵႃႈတီႈၽၢႆႇၼႃႈၽၵ်းတူႁေႃၸဝ်ႈလႄႈၵိုတ်းသဝ်းယူႇ ၵွပ်ႈပိူဝ်ႈဢၼ်ပေႃးၼုင်ႈမႆၼင်ပေႃယူႇၸိုင် ၽူႈလႂ်သေၵေႃႉသေၵူၼ်း ဢမ်ႇလႆႈၶဝ်ႈၵႃႈၼႂ်းၽၵ်းတူႁေႃၸဝ်ႈၼၼ်ႉဢေႃႈ။-

3ၵႃႈၼႂ်းၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈ ၵႃႈဢၼ်ဢမိင်ႉၸဝ်ႈ ဢၼ်ၶုၼ်ႁေႃၶမ်းပူင်ၼၼ်ႉႁွတ်ႈထိုင်ၼၼ်ႉ ပဵၼ်တၢင်းဢၼ်ၶၢင်းၶီၶၢင်းၽၢၼ် ဢၼ်ယႂ်ႇၼႃႇလူင်လၢင်၊ တၢင်းဢၼ်ၵမ်တၢင်းၵိၼ်၊ တၢင်းဢၼ်ႁႆႈဢၼ်ႁွင်ႉ၊ တၢင်းဢၼ်ပွင်ႉၶၢင်းပွင်ႉမိူၼ်ႇတီႈၵူၼ်း ယူႉတႃႉ တင်းလၢႆလႄႈ၊ ၵူၼ်းၼမ်ၼႃႇဢွၼ်ၵၼ်ၼွၼ်းၵႃႈၼႂ်းၶူဝ်းၼုင်ႈၼင်ပေႃတင်းတဝ်ႈဢေႃႈ။

4မိူဝ်ႈဢၼ်ၶႃႈမႄႈယိင်း ဢေးသတႃႇ ဢိၵ်ႇတင်းၵူၼ်းထိင်းၼၢင်းတင်းလၢႆ မႃးလႄႈလဝ်ႊလၢတ်ႈလွင်ႈမၼ်းၼၼ်ႉၸိုင်၊ ၼၢင်းႁေႃၶမ်းမႆႈၸႂ်ယၢပ်ႇၸႂ်ၼႃႇလူင်လၢင်ယူႇသေလႄႈ ဢဝ်ၶူဝ်းၼုင်ႈတၢင်းမႆပၼ်ၵႂႃႇ ႁႂ်ႈ မေႃႇတၵႄး ပႄႇပႅတ်ႈၶူဝ်းၼုင်ႈၼင်ပေႃသေလႄႈၼုင်ႈမႆသေၵေႃႈ၊ မၼ်းယင်းဢမ်ႇႁပ်ႉဢမ်ႇဢဝ်လႄႈယူႇဢေႃႈ။-

5လႆႈသမ်ႉ ဢေးသတႃႇ ႁွင်ႉဢဝ် ႁႃႇတိၵ်ႉ ၵူၼ်းထိင်းၼၢင်း ဢၼ်ၶုၼ်ႁေႃၶမ်းမီးဢမိင်ႉၸဝ်ႈဝႆႉ ႁႂ်ႈၶႃးၸႃးယူႇတီႈမၼ်းၼၼ်ႉလႄႈ ပွႆႇၸႂ်ႉမၼ်းၵႂႃႇတီႈ မေႃႇတၵႄး ႁႂ်ႈလႆႈတွင်ႈထၢမ်လွင်ႈဢၼ်ပဵၼ်ၵႃႈသင် ဢိၵ်ႇတင်းပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁဵတ်းၸိူဝ်ႉၼင်ႇၼၼ်ၼၼ်ႉလႄႈ၊-

6ႁႃႇတိၵ်ႉ ၼၼ်ႉ ဢွၵ်ႇၸူးတီႈ မေႃႇတၵႄး ၵႃႈၼႂ်းတီႈပၢင်ႇၵၢင်ဝဵင်း ဢၼ်မီးၽၢႆႇၼႃႈၽၵ်းတူႁေႃၸဝ်ႈၼၼ်ႉလႄႈ၊-

7မေႃႇတၵႄး ၼၼ်ႉမွၵ်ႇလၢတ်ႈလွင်ႈတၢင်း ၵႃႈဢၼ်ႁွတ်ႈထိုင်တီႈမၼ်း ဢိၵ်ႇတင်းလွင်ႈငိုၼ်းၵႃႈႁိုဝ်ဢၼ် ႁႃႇမၢၼ်ႇ ဝႆႉၵတီႉ တၵ်းဢဝ်သႂၢင်းၶဝ်ႈၵႃႈၼႂ်းတိူၵ်ႈၽၼ်ႇတႃႇၶုၼ်ႁေႃၶမ်း ပုၼ်ႈဢၼ်တၵ်းမီးဢၶႂၢင်ႉ ဢၼ်လႆႈယႃႉၵူၼ်း ယူႉတႃႉ တင်းလၢႆပႅတ်ႈၼၼ်ႉသေလႄႈ၊-

8ဢဝ်လိၵ်ႈလၢၵ်ႈၶၢမ်ႇဢမိင်ႉၸဝ်ႈ ဢၼ်ထုတ်ႇဢွၵ်ႇၵႃႈတီႈႁေႃ သူႉသၼ်ႇ ႁႂ်ႈလႆႈယႃႉၽဵဝ်ႈၶဝ်ပႅတ်ႈၼၼ်ႉ ပၼ်ၵႂႃႇပုၼ်ႈဢၼ်တၵ်းၼႄပျႃး တီႈ ဢေးသတႃႇ ႁႂ်ႈမၼ်းလႆႈႁူႉလႆႈငိၼ်းလႄႈသင်ႇလၢတ်ႈၵႂႃႇ ႁႂ်ႈမၼ်းၶဝ်ႈၸူးတီႈၶုၼ်ႁေႃၶမ်းလႄႈ လဝ်ႊယွၼ်းပုၼ်ႈမဵဝ်းတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈၸဝ်ႈၼၼ်ႉဢေႃႈ။-

9ႁႃႇတိၵ်ႉ ၼၼ်ႉၵေႃႈမႃးလႄႈ ႁႃဢဝ်ၵႂၢမ်း မေႃႇတၵႄး ၶိုၼ်းလဝ်ႊလၢတ်ႈတီႈ ဢေးသတႃႇ ဢေႃႈ။

10မိူဝ်ႈၼၼ်ႉ ဢေးသတႃႇ ၼၼ်ႉ မီးဢမိင်ႉတီႈ ႁႃႇတိၵ်ႉ လႄႈ သင်ႇလၢတ်ႈၵႂႃႇတီႈ မေႃႇတၵႄး လႄႈဝႃႈၸမ်ႉ၊-

11ၶႃႈၵူၼ်းၶုၼ်ႁေႃၶမ်းတင်းသဵင်ႈတင်းလူင် ဢိၵ်ႇတင်းၶႃႈဝၢၼ်ႈၵူၼ်းမိူင်းၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈ ၵူႈသိုင်ႇၵူႈမိူင်း ၵူႈဢိူင်ႇၵူႈၵျၢၵ်ႈၸိူဝ်းၼၼ်ႉ ႁူႉလွင်ႈဢၼ်ပဵၼ်ၵူၼ်းၸၢႆးသေဢမ်ႇဝႃႈ၊ ပဵၼ်မႄႈယိင်းသေဢမ်ႇဝႃႈ၊ ၵေႃႉဢၼ်ၶုၼ်ႁေႃၶမ်းယင်းဢမ်ႇႁွင်ႉလႄႈၶဝ်ႈၵႃႈၼႂ်းတမ်ႇတိူင်းတီႈမၼ်းၸဝ်ႈမႅၼ်ႈၼၼ်ႉ၊ ပေႃးမၼ်းၸဝ်ႈယင်းဢမ်ႇဢဝ် ၵၼ်းႁွၵ်ႇရႃႇၸႃႉယိုၼ်ႈပၼ်ႁႂ်ႈမၼ်းလႆႈ ၵတ်းယဵၼ်ၶျၢမ်းသႃႇၸိုင် မီးတြႃးပႃးလဵဝ်ၵူၺ်း တီႈမၼ်းၼၼ်ႉလႄႈ မၼ်းၼၼ်ႉတၵ်းလႆႈတၢႆဢမၢၼ်ႇၶၼ်ပဵၼ်ၼၼ်ႉယူႇဢေႃႈ။ ၵဝ်ၶႃႈၼႆႉ ၶုၼ်ႁေႃၶမ်းယင်းဢမ်ႇႁွင်ႉဢဝ်ၶဝ်ႈၸူးတီႈမၼ်းၸဝ်ႈလႄႈ ယူႇလႆႈသၢမ်သိပ်းဝၼ်းတဵမ်တဵမ်ယဝ်ႉ၊ ဝႃႈၼင်ႇၼႆလႄႈ၊-

12ၶဝ်ဢဝ်ၵႂၢမ်း ဢေးသတႃႇ ၼၼ်ႉ ၶိုၼ်းလၢတ်ႈတီႈ မေႃႇတၵႄး သေယဝ်ႉ၊-

13မေႃႇတၵႄး သမ်ႉၶိုၼ်းသင်ႇလၢတ်ႈၵႂႃႇတီႈ ဢေးသတႃႇ လႄႈဝႃႈ၊ ပေႃးဢသၢၵ်ႈၵူၼ်း ယူႉတႃႉ တင်းသဵင်ႈတင်းလူင်ဢမ်ႇလွတ်ႈၸိုင်၊ ပိၵ်ႉသမ်ႉမႂ်းယူႇၵႃႈၼႂ်းႁေႃၸဝ်ႈသေၵေႃႈ ယႃႇပေထၢင်ႇဢသၢၵ်ႈမႂ်းတၵ်းလွတ်ႈ။-

14ပေႃးမႂ်းယူႇတဵတ်ႇတဵတ်ႇယဵၼ်ယဵၼ်ယူႇမိူဝ်ႈလဵဝ်ၼႆႉၸိုင် တၢင်းဢၼ်ဢသၢၵ်ႈလိပ်း၊ တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ တၵ်းလုၵ်ႉတၢင်ႇတီႈတၢင်ႇလႅၼ်ပေႃႇမႃးတီႈၵူၼ်း ယူႉတႃႉ တင်းလၢႆလႄႈ၊ မႂ်းဢိၵ်ႇတင်းမဵဝ်းၸိူဝ်ႉၶိူဝ်းပေႃႈမႂ်း တၵ်းလူႉတၵ်းလႅဝ်ဢေႃႈ။ ၽူႈလႂ်တၵ်းႁူႉလွင်ႈဢၼ်မႂ်းလႆႈဢရႃႇ ၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼႆႉ တၵ်းပဵၼ်ပုၼ်ႈၶိင်ႇမိူဝ်ႈလဵဝ်ၼႆႉၼၼ်ႉႁိုဝ်။ ဢမ်ႇပဵၼ်ႁိုဝ် ၼၼ်ႉလႆႈ၊ ဝႃႈၼင်ႇၼႆဢေႃႈ။-

15ဢေးသတႃႇ ၵေႃႈသင်ႇလၢတ်ႈတီႈၶဝ် ႁႂ်ႈလႆႈၶိုၼ်းမွၵ်ႇလၢတ်ႈတီႈ မေႃႇတၵႄး လႄႈဝႃႈ၊-

16ၵႂႃႇလႄႈ ႁႂ်ႈၵူၼ်း ယူႉတႃႉ ၵႃႈဢၼ်မီးၵႃႈၼႂ်းဝဵင်း သူႉသၼ်ႇ ၼႆႉၸိူဝ်းၼၼ်ႉ ၸူႉၵၼ်တုမ်ၵၼ်သေလႄႈ ယင်းဢမ်ႇၵိၼ်ဢမ်ႇၶူပ်းယူႇ ဝၼ်းဝၼ်းၶိုၼ်းၶိုၼ်းဢမ်ႇထၢတ်ႇသၢမ်ဝၼ်းတဵမ်တဵမ်လႄႈ ဢွၼ်ၵၼ်ၵမ်တၢင်းၵိၼ်ပုၼ်ႈၵဝ်ၶႃႈသေၵမ်း။ ၵဝ်ၶႃႈၵေႃႈဢိၵ်ႇလူၺ်ႈၵၼ်တင်းၶႃႈမႄႈယိင်းၵဝ်ၶႃႈတင်းလၢႆ တၵ်းဢွၼ်ၵၼ်ၵမ်တၢင်းၵိၼ် မိူၼ်ၸိူဝ်ႉၼင်ႇၼၼ်ဢေႃႈ။ လိုၼ်းၼၼ်ႉပိၵ်ႉသမ်ႉလႆႈပူၼ်ႉလိူဝ်ၼႄးဢူႉပတေႇၸဝ်ႈသေၵေႃႈ ၵဝ်ၶႃႈတၵ်းၶဝ်ႈၸူးတီႈၶုၼ်ႁေႃၶမ်းဢေႃႈ။-

17ပေႃးလႆႈႁွတ်ႈထိုင်တၢင်းလူႉတၢင်းလႅဝ်ၵေႃႈ၊ တၵ်းလႆႈႁွတ်ႈထိုင်တၢင်းလူႉတၢင်းလႅဝ်ဢေႃႈ၊ ဝႃႈၼင်ႇၼႆလႄႈ မေႃႇတၵႄး ၵႂႃႇလႄႈႁဵတ်းၸွမ်းၵႃႈၼင်ႇဢၼ် ဢေးသတႃႇ သင်ႇလၢတ်ႈဝႆႉၼၼ်ႉဢေႃႈ။

← Chapter 3 Jump to: Chapter 5 →