Leviticus 10

Shan

← Chapter 9 Jump to: Chapter 11 →

1လုၵ်ႈၸၢႆး ဢႃႇရုၼ်ႇ ၼႃႇတပ်ႉ တင်း ဢၽီႉႁူႉ ၸိူဝ်းၼၼ်ႉ ဢွၼ်ၵၼ်ဢဝ်လၢင်ႇပၢၼ်းသွင်ၶႃႁင်းၽႂ်ႁင်းမၼ်းလႄႈ ဢဝ်ၽႆးသႂ်ႇသေယဝ်ႉ၊ ဢဝ်ၼၢမ်ႇသႃႇတၢင်ႇသႂ်ႇသေလႄႈပုၵ်ႈၸေႃႇၽႆး ဢၼ်ဢမ်ႇၸၢပ်ႈဢမ်ႇသႅင်ႇ ဢၼ်ထႃႇဝရႃႉၽြႃးဢမ်ႇသင်ႇလၢတ်ႈဝႆႉၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

2ၵမ်းၼၼ်ႉ ၽႆးဢွၵ်ႇသေၵႃႈတီႈထႃႇဝရႃႉၽြႃးႁုပ်ႇမႆႈသွင်ၶႃလႄႈ၊ သွင်ၶႃၼၼ်ႉ တၢႆၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။-

3မိူဝ်ႈၼၼ်ႉ မူဝ်းသေႇ လၢတ်ႈတီႈ ဢႃႇရုၼ်ႇ လႄႈဝႃႈ၊ ဢၼ်ၼႆႉၸမ်ႉ၊ ပဵၼ်လွင်ႈတၢင်းဢၼ် ထႃႇဝရႃႉၽြႃးမီးဢမိင်ႉလႄႈဝႃႈ၊ ၵဝ်တၵ်းလႆႈမီးတၢင်းဢၼ် ၶဝ်ၸိူဝ်းဢၼ်သုတ်ႉၸပ်းသုတ်ႉၸူးတီႈၵဝ်ၼၼ်ႉ မၢတ်ႈပဵၼ်ဢၼ်မူတ်းၸၢင်ႇလႄႈ၊ ၵဝ်တၵ်းႁႂ်ႈမုၼ်ၽုင်းၵဝ်ထၢင်ႇသႃးၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ၊ ဝႃႈၼင်ႇၼႆၼၼ်ႉယဝ်ႉ၊ ဝႃႈၼင်ႇၼႆလႄႈ ဢႃႇရုၼ်ႇ ယူႇတဵတ်ႇတဵတ်ႇယူႇဢေႃႈ။

4မူဝ်းသေႇ ႁွင်ႉဢဝ် မီႉသေႇလႃႉ တင်း ဢေႇလၸႃႇၽၢၼ်ႇ ဢၼ်ပဵၼ်လုၵ်ႈၸၢႆး ဢေႃးၸေးလႃႉ ပေႃႈလုင်း ဢႃႇရုၼ်ႇ ၼၼ်ႉသေလႄႈလၢတ်ႈဝႃႈ၊ မႃးတႃႉ။ ဢဝ်ပီႈၼွင်ႉၸိူဝ်ႉၶိူဝ်းသူၼႆႉ ဢွၵ်ႇသေၵႃႈတီႈၽၢႆႇၼႃႈထႃႇၼႃႉတီႈမူတ်းၸၢင်ႇၼႆႉၵႂႃႇၵႃႈၼွၵ်ႈတပ်ႉပုၼ်ႉသေတႃႉ၊ ဝႃႈၼင်ႇၼႆသေယဝ်ႉ၊-

5သွင်ၶႃၼၼ်ႉမႃးလႄႈ ဢဝ်တူဝ်တၢႆသွင်ၶႃ ပႃးလူၺ်ႈၵၼ်တင်းသိူဝ်ႈပုတ်းသွင်ၶႃ ဢွၵ်ႇၵႂႃႇၵႃႈၼွၵ်ႈတပ်ႉသေဢေႃႈ။-

6မူဝ်းသေႇ လၢတ်ႈတီႈ ဢႃႇရုၼ်ႇ တင်းလုၵ်ႈၸၢႆးမၼ်း ဢေးလႃႇၸႃႇ တင်း ဢီႉသမႃႇ ၸိူဝ်းၼၼ်ႉလႄႈဝႃႈ၊ ၵွပ်ႈပိူဝ်ႈ ဢၼ်ၵူဝ်သူတၵ်းတၢႆလႄႈ တၢင်းၸႂ်မႆႈၸဝ်ႈတၵ်းတူၵ်းႁွတ်ႈၵႃႈၼိူဝ်ပရဵၵ်ႈသၢတ်ႈတင်းလၢႆၼၼ်ႉလႄႈ သူယႃႇပေၽႄႇၶူၼ်ႁူဝ်သူ၊ ယႃႇပေသိၵ်ႇၶူဝ်းၼုင်ႈတၢင်းမႆသူ။ ၵူၺ်းၵႃႈ ႁႂ်ႈပီႈၼွင်ႉသူ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၶၢင်းၶီၶၢင်းၽၢၼ် ႁွင်ႉႁႆႈလူၺ်ႈလွင်ႈတၢင်းဢၼ်ၽႆးမႆႈ ဢၼ်ထႃႇဝရႃႉၽြႃးႁဵတ်းၼၼ်ႉတႃႉ။-

7ၵွပ်ႈပိူဝ်ႈဢၼ်ၵူဝ်သူတၵ်းတၢႆလႄႈ ယႃႇပေဢွၵ်ႇၵႃႈၼွၵ်ႈၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ။ လွင်ႈမၼ်းၸမ်ႉ ၼမ်ႉမၼ်းၽိၵ်ႈသိၵ်ႈထႃႇဝရႃႉၽြႃး မီးယူႇၵႃႈၼိူဝ်သူဢေႃႈ၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်ႁဵတ်းၸွမ်းၵႃႈၼင်ႇဢၼ် မူဝ်းသေႇ ဝႃႈၼၼ်ႉဢေႃႈ။

8ထႃႇဝရႃႉၽြႃးမီးဢမိင်ႉတီႈဢႃႇရုၼ်ႇလႄႈဝႃႈ၊-

10မႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼႆႉ၊-

11ဢိၵ်ႇတင်းလွင်ႈၼင်ႇႁိုဝ် တၵ်းၸၢင်ႈၸႅၵ်ႇၽႄ လွင်ႈတၢင်းဢၼ်မူတ်းၸၢင်ႇလႂ်၊ လွင်ႈတၢင်းဢၼ်ဢမ်ႇမူတ်းၸၢင်ႇလႂ်၊ လွင်ႈတၢင်းဢၼ်မူတ်းသႂ်လႂ်၊ လွင်ႈတၢင်းဢၼ်ဢမ်ႇမူတ်းသႂ်လႂ်ၼၼ်ႉ ဢိၵ်ႇတင်းလွင်ႈၼင်ႇႁိုဝ် တၵ်းၸၢင်ႈသင်ႇပၼ်သွၼ်ပၼ်ပိင်းၺၢပ်ႈ ဢၼ်ထႃႇဝရႃႉၽြႃးဢဝ် မူဝ်းသေႇ သင်ႇလၢတ်ႈဝႆႉၵႃႈမီးၼၼ်ႉတီႈၵူၼ်းမဵဝ်း ဢီႉသရေႇလႃႉ တင်းလၢႆၸိုင်၊ ယႃႇပေၵိၼ်ၼမ်ႉၸပိတ်ႈတင်းၼမ်ႉလဝ်ႈမိူဝ်ႈဢၼ်သူၶဝ်ႈၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉ၊ ပဵၼ်ပိင်းၺၢပ်ႈဢၼ်တႃႇသေႇတီႈၸူဝ်ႈလုၵ်ႈပၢၼ်လၢၼ်သူ သိုပ်ႇသိုပ်ႇတၢမ်းတၢမ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

12မူဝ်းသေႇ ၵေႃႈလၢတ်ႈတီႈ ဢႃႇရုၼ်ႇ တင်းလုၵ်ႈၸၢႆးမၼ်းဢၼ်ယင်းၵိုတ်းယင်းၵျၢၼ်ႇ ဢေးလႃႇၸႃႇ တင်း ဢီႉသမႃႇ ၸိူဝ်းၼၼ်ႉလႄႈဝႃႈ၊ ဢဝ်တၢင်းပုၵ်ႈၸေႃႇၽေႃးၸဵၼ်ႇဢၼ်ယင်းၵိုတ်းယင်းၵျၢၼ်ႇတီႈတၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉ၊ ယင်းဢမ်ႇပႃးၸိူဝ်ႉပႅင်ႈလႄႈ ၵိၼ်ၵႃႈတီႈႁိမ်းယိတ်ႈပလၢင်ႇတႃႉ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။-

13တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၵွပ်ႈပိူဝ်ႈဢၼ်ပဵၼ်ပုၼ်ႈဢၼ်မႂ်း ဢိၵ်ႇတင်းလုၵ်ႈၸၢႆးမႂ်းတင်းလၢႆ ထိူၵ်ႈၶၢမ်ႇဢဝ်ၵႃႈၼႂ်းတၢင်းပုၵ်ႈၸေႃႇဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၼၼ်ႉဢေႃႈ။ ၵဝ်လႆႈၶၢမ်ႇဢဝ်ပိင်းၺၢပ်ႈၸဝ်ႈၸိူဝ်ႉၼင်ႇၼၼ်ယဝ်ႉ။-

14ဢူၵ်းဢၼ်ယွင်ႈၵႂႆ ဢိၵ်ႇတင်းၶႅပ်းၶႃဢၼ်ယုၵ်ႉယွင်ႈၼၼ်ႉၸမ်ႉ၊ မႂ်းဢိၵ်ႇတင်းလုၵ်ႈယိင်းလုၵ်ႈၸၢႆးမႂ်းတင်းလၢႆတၵ်းလႆႈၵိၼ် ၵႃႈၼႂ်းတီႈဢၼ်မူတ်းသႂ်ဢေႃႈ။ ပဵၼ်ပုၼ်ႈဢၼ်မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ ထိူၵ်ႈၶၢမ်ႇဢဝ်ၵႃႈၼႂ်းယိတ်ႈမိၵ်ႉသႃႇႁႃယႃႉ ဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ပုၵ်ႈၸေႃႇၸိူဝ်းၼၼ်ႉဢေႃႈ။-

15ၶႅပ်းၶႃဢၼ်ယုၵ်ႉယွင်ႈ ဢိၵ်ႇတင်းဢူၵ်းဢၼ်ယွင်ႈၵႂႆၼၼ်ႉၸိုင်၊ ၶဝ်တၵ်းလႆႈဢဝ်မႃးပႃးလူၺ်ႈၵၼ်တင်း ၵွၼ်ႈၶႆၵွၼ်ႈမၼ်းတူဝ်ယိတ်ႈဢၼ်ဢဝ်တင်းၽႆးပုၵ်ႈၸေႃႇၸိူဝ်းၼၼ်ႉ ႁႂ်ႈလႆႈယွင်ႈၵႂႆပုၼ်ႈတၢင်းပုၵ်ႈၸေႃႇ ဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊ မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆ တၵ်းလႆႈထိူၵ်ႈပိူင်ႇဢဝ်ယူႇသေႇသေႇ ၸွမ်းၵႃႈၼင်ႇဢၼ် ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ၊ ဝႃႈၼင်ႇၼႆဢေႃႈ။

16ၵမ်းၼၼ်ႉ မူဝ်းသေႇ ၵျူဝ်းၸႃးလႄႈ ႁႃပႄႉဢၼ်ဢဝ်ႁဵတ်းယိတ်ႈဢၼ်ၽေႇဢပႅတ်ႈၼၼ်ႉသေၵေႃႈ ဢမ်ႇထူပ်းဢမ်ႇႁၼ်။ တုတ်ႇၽႆးပႅတ်ႈယဝ်ႉ။ ပိူဝ်ႈၼႆလႄႈ မၼ်းၸႂ်မႆႈၶႆႈၸႃႉတီႈလုၵ်ႈၸၢႆး ဢႃႇရုၼ်ႇ ဢၼ်ယင်းၵိုတ်းယင်းၵျၢၼ်ႇ ဢေးလႃႇၸႃႇ တင်း ဢီႉသမႃႇ ၸိူဝ်းၼၼ်ႉသေလႄႈဝႃႈၸမ်ႉ၊-

17ၵွပ်ႈပိူဝ်ႈဢၼ်ယိတ်ႈဢၼ်ၽေႇဢပႅတ်ႈၼၼ်ႉ မူတ်းၸၢင်ႇၼႃႇလူင်လၢင်လႄႈ မၼ်းၸဝ်ႈပၼ်ယိတ်ႈၼၼ်ႉ ပုၼ်ႈလွင်ႈၼင်ႇႁိုဝ် သူတၵ်းၶၢမ်ႇဢဝ်ဢပႅတ်ႈပရဵၵ်ႈသၢတ်ႈတင်းလၢႆလႄႈ ႁဵတ်းတၢင်းဢၼ်ၽေႇဢပႅတ်ႈ ပုၼ်ႈၶဝ်ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇၵိၼ်တူဝ်ယိတ်ႈၼၼ်ႉ ၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၼင်ႇႁိုဝ်။-

18တူၺ်းလူး၊ လိူတ်ႈတူဝ်ယိတ်ႈၼၼ်ႉၵေႃႈ ယင်းဢမ်ႇဢဝ်သႂ်ႇၵႃႈၼႂ်းထႃႇၼႃႉတီႈမူတ်းၸၢင်ႇလူင်ပႄႇ။ သူလီလႆႈၵိၼ်ယိတ်ႈၼၼ်ႉ ၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉဢမၢၼ်ႇၶၼ်ပဵၼ် ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉမႃးယဝ်ႉၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

19ဢႃႇရုၼ်ႇ လၢတ်ႈတီႈ မူဝ်းသေႇ လႄႈဝႃႈ၊ တူၺ်းလူး၊ ဝၼ်းမိူဝ်ႈၼႆႉ ၶဝ်ၼၼ်ႉဢွၼ်ၵၼ်ဢဝ်ယိတ်ႈဢၼ်ၽေႇဢပႅတ်ႈၶဝ် ဢိၵ်ႇတင်းယိတ်ႈဢၼ်တုတ်ႇၽႆးၶဝ်ပုၵ်ႈၸေႃႇၶႃႈယဝ်ႉ။ လွင်ႈတၢင်းဢၼ်ပဵၼ်ၸိူဝ်ႉၼင်ႇၼၼ်ၸိူဝ်းၼၼ်ႉ ႁွတ်ႈထိုင်ၵႃႈတီႈၵဝ်ၶႃႈယဝ်ႉၶႃႈယဝ်ႉ။ သင်ၵဝ်ၶႃႈၵိၼ်မႅၼ်ႈယိတ်ႈဢၼ်ၽေႇဢပႅတ်ႈၼၼ်ႉ ဝၼ်းမိူဝ်ႈၼႆႉၸိုင် တၵ်းထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးၶႃႈႁိုဝ်။ ဝႃႈၼင်ႇၼႆဢေႃႈ။-

20မူဝ်းသေႇ ငိၼ်းၵႂၢမ်းၼၼ်ႉသေယဝ်ႉ၊ ႁပ်ႉတုင်းဢဝ်ဢေႃႈ။

← Chapter 9 Jump to: Chapter 11 →