Leviticus 20

Shan

← Chapter 19 Jump to: Chapter 21 →

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈၸမ်ႉ၊-

2မႂ်းသင်ႇလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ၵူၼ်းမဵဝ်း ဢီႉသရေႇလႃႉ သေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈတီႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉသေဢမ်ႇဝႃႈ၊ ၵေႃႉဢၼ်ဢဝ်လုၵ်ႈလၢင်းၸိူဝ်ႉၶိူဝ်းမၼ်း သၢၵ်ႈၵၢပ်ႈတီႈၽြႃး မူးလွၵ်ႉ ၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။ ၵူၼ်းဝၢၼ်ႈၵူၼ်းမိူင်းတင်းလၢႆတၵ်းလႆႈဢွၼ်ၵၼ်ဢဝ်တင်းမၢၵ်ႇႁိၼ်ထိမ်ႈမၼ်းဢေႃႈ။-

3ၵွပ်ႈပိူဝ်ႈဢၼ်မၼ်းၼၼ်ႉႁႂ်ႈထႃႇၼႃႉတီႈမူတ်းၸၢင်ႇၵဝ်ၵူဝ်ႈၵိူၵ်ႇယူႇ၊ ဢဝ်ၼႃႇမႃႉၸိုဝ်ႈသဵင်ၵဝ်ဢၼ်မူတ်းၸၢင်ႇ ၶျႃးတူၵ်းတီႈတႅမ်ႇယူႇသေလႄႈ ဢဝ်လုၵ်ႈလၢင်းၸိူဝ်ႉၶိူဝ်းမၼ်းသၢၵ်ႈၵၢပ်ႈတီႈၽြႃး မူးလွၵ်ႉ ၼၼ်ႉလႄႈ ၵဝ်တၵ်းဝၢႆႇၼႃႈၵဝ်ပႅတ်ႈမၼ်းသေလႄႈ ပႄႇမၼ်းပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။-

4ပေႃးၵူၼ်းဝၢၼ်ႈၵူၼ်းမိူင်းတင်းလၢႆႁဵတ်းတၢင်းဢၼ်ႁႄႉၵင်ႈတႃၶဝ်ဝႆႉ တီႈၵေႃႉဢၼ်ဢဝ်လုၵ်ႈလၢင်းၸိူဝ်ႉၶိူဝ်းမၼ်း သၢၵ်ႈၵၢပ်ႈတီႈၽြႃး မူးလွၵ်ႉ ၼၼ်ႉလႄႈ ဢမ်ႇဢဝ်မၼ်းတၢႆၸိုင်၊-

5ၵဝ်တၵ်းဝၢႆႇၼႃႈၵဝ်ပႅတ်ႈသေၵေႃႉဢၼ်ယူႇၸိူဝ်ႉၼင်ႇၼၼ်ၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆလႄႈ ဢဝ်ၵေႃႉၼၼ်ႉဢိၵ်ႇတင်းၶဝ်ၸိူဝ်းဢၼ်ၸွမ်းမၼ်းသေလႄႈ ၽိတ်းပိူင်ႈႁႂ်ႈလႆႈဢွၼ်ၵၼ်ၽိတ်းပိူင်ႈလူၺ်ႈၵၼ်တင်းၽြႃး မူးလွၵ်ႉ ၼၼ်ႉၵႃႈမီးၸိူဝ်းၼၼ်ႉ ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းၶဝ်ဢေႃႈ။

6ၵေႃႉဢၼ်ဝႄႉၵႂႃႇလႄႈ သုတ်ႉၸပ်းသုတ်ႉၸူးၵႃႈတီႈၶဝ်ၸိူဝ်းဢၼ် ၽီၶဝ်ႈ ဢိၵ်ႇတင်းၶဝ်ၸိူဝ်းဢၼ်ႁဵတ်းၽိူဝ်ႉၼၼ်ႉ ႁႂ်ႈလႆႈၸွမ်းၶဝ်ၼၼ်ႉသေလႄႈ ၽိတ်းပိူင်ႈၼၼ်ႉၸိုင်၊ ၵဝ်တၵ်းဝၢႆႇၼႃႈၵဝ်ပႅတ်ႈသေလႄႈ ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။

7ၵွပ်ႈပိူဝ်ႈဢၼ်ၵဝ်ထႃႇဝရႃႉၽြႃး ၽြႃးပဵၼ်ၸဝ်ႈသူၼႆႉမူတ်းၸၢင်ႇလႄႈ သူႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလႄႈ မီးတၢင်းဢၼ်မူတ်းၸၢင်ႇတႃႉ။-

8သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တင်းလၢႆဢေႃႈ။ ၵဝ်ပဵၼ်ထႃႇဝရႃႉၽြႃး ဢၼ်ႁႂ်ႈသူမူတ်းၸၢင်ႇဢေႃႈ။

9ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆၵူႈၵေႃႉၵူႈၵူၼ်းဢမၢၼ်ႇၶၼ်ပဵၼ်ဢေႃႈ။ ၵွပ်ႈပိူဝ်ႈဢၼ်မၼ်းၵိၼ်ႇလႃႇပေႃႈမႄႈမၼ်းလႄႈ လိူတ်ႈမၼ်းတၵ်းလႆႈႁွတ်ႈထိုင်ၵႃႈၼိူဝ်မၼ်းဢေႃႈ။

10ၵေႃႉဢၼ်ၽိတ်းပိူင်ႈမေးပိူၼ်ႈဢၼ်ဝႃႈ ၵေႃႉဢၼ်ၽိတ်းပိူင်ႈမေးဢၼ်ၸၢပ်ႈသႅင်ႇၵၼ်တင်းပိူၼ်ႈတၢင်ႇၵေႃႉၼၼ်ႉၼၼ်ႉ၊ ၵေႃႉဢၼ်ၽိတ်းပိူင်ႈၼၼ်ႉ ဢိၵ်ႇတင်းမႄႈယိင်းဢၼ်ၽိတ်းပိူင်ႈၼၼ်ႉ၊ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-

11ၵေႃႉဢၼ်ၼွၼ်းလူၺ်ႈၵၼ်တင်းမေးပေႃႈမၼ်းၼၼ်ႉ ႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပေႃႈမၼ်းလႆႈယူႇတူဝ်ပူၺ်ၼၼ်ႉလႄႈ၊ မၼ်းၼၼ်ႉဢိၵ်ႇတင်းမႄႈယိင်းၼၼ်ႉတင်းသွင်ၵေႃႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။ လိူတ်ႈသွင်ၶႃတၵ်းလႆႈႁွတ်ႈထိုင်ၵႃႈၼိူဝ်သွင်ၶႃဢေႃႈ။-

12ပေႃးၵူၼ်းၸၢႆးၼွၼ်းလူၺ်ႈၵၼ်တင်းလုၵ်ႈပႂ်ႉမၼ်းၸိုင်၊ မၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၼ်ပဵၼ်ဢေႃႈ။ သွင်ၶႃၼၼ်ႉ ႁဵတ်းတၢင်းဢၼ်လေႃးလႄးၵၼ် ဢၼ်လီႁင်ႈဢဵတ်ႇသဵတ်ႇလႄႈ လိူတ်ႈသွင်ၶႃတၵ်းလႆႈႁွတ်ႈထိုင်ၵႃႈၼိူဝ်သွင်ၶႃဢေႃႈ။-

13ပေႃးၵူၼ်းၸၢႆးၼင်ႇၵၼ်ၼွၼ်းလူၺ်ႈၵၼ်မိူၼ်ၸိူဝ်ႉၼင်ႇဢၼ် ၼွၼ်းလူၺ်ႈၵၼ်တင်းမႄႈယိင်းၼၼ်ႉၸိုင်၊ သွင်ၶႃၼၼ်ႉ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇလႄႈ တၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၼ်ပဵၼ်ဢေႃႈ။ လိူတ်ႈသွင်ၶႃတၵ်းလႆႈႁွတ်ႈထိုင်ၵႃႈၼိူဝ်သွင်ၶႃဢေႃႈ။-

14ပေႃးၵူၼ်းၸၢႆးဢဝ်မႄႈယိင်း ဢိၵ်ႇတင်းလုၵ်ႈယိင်းမၼ်းႁဵတ်းမေးၸိုင်၊ ပဵၼ်လွင်ႈတၢင်းဢၼ်ဢမ်ႇတြႃးဢေႃႈ။ လွင်ႈၼင်ႇႁိုဝ် လွင်ႈတၢင်းဢၼ်ဢမ်ႇတြႃးတၵ်းဢမ်ႇလႆႈမီးၵႃႈၼႂ်းသူၸိုင်၊ တၵ်းလႆႈဢဝ်မၼ်း ဢိၵ်ႇတင်းသွင်ၶႃၼၼ်ႉ တုတ်ႇၽႆးပႅတ်ႈသေဢေႃႈ။-

15ပေႃးၵူၼ်းၸၢႆးၼွၼ်းလူၺ်ႈၵၼ်တင်းတရိၵ်ႈသၢၼ်ႇၸိုင်၊ မၼ်းတၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇၶၼ်ပဵၼ်ဢေႃႈ။ တရိၵ်ႈသၢၼ်ႇၼၼ်ႉၵေႃႈ တၵ်းလႆႈဢဝ်တၢႆသေဢေႃႈ။-

16မႄႈယိင်းၵေႃႈ ပေႃးသုတ်ႉၸပ်းသုတ်ႉၸူးၵႃႈတီႈတရိၵ်ႈသၢၼ်ႇ ႁႂ်ႈလႆႈၶၢမ်ႇတၢင်းဢၼ်ၼွၼ်းလူၺ်ႈၵၼ်တင်းမၼ်းၸိုင်၊ မႂ်းတၵ်းလႆႈဢဝ်မႄႈယိင်းၼၼ်ႉ ဢိၵ်ႇတင်းတရိၵ်ႈသၢၼ်ႇၼၼ်ႉတၢႆဢေႃႈ။ ၶဝ်တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။ လိူတ်ႈၶဝ်တၵ်းလႆႈႁွတ်ႈထိုင်ၵႃႈၼိူဝ်ၶဝ်ဢေႃႈ။-

17ပေႃးၵူၼ်းၸၢႆးဢဝ်ပီႈၼၢင်းမၼ်း၊ ၼွင်ႉယိင်းမၼ်း ဢၼ်ပဵၼ်လုၵ်ႈယိင်းပေႃႈမၼ်း၊ ဢမ်ႇၼၼ်ၵေႃႈ လုၵ်ႈယိင်းမႄႈမၼ်းလႄႈ ႁၼ်တူဝ်ပူၺ်မၼ်းၼၼ်ႉ မၼ်းၼၼ်ႉၵေႃႈ ႁၼ်တူဝ်ပူၺ်မၼ်းၸိုင်၊ ပဵၼ်လွင်ႈတၢင်းဢၼ်လီဢူၵ်းလီဢၢႆလီသႄႉလီသွမ်းဢေႃႈ။ ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ သိုဝ်ႈၼႃႈတႂ်ႈတႃၵူၼ်းမဵဝ်းၸိူဝ်ႉၶိူဝ်းလဵဝ်ၵၼ်ဢေႃႈ။ ၵူၼ်းၸၢႆးၼၼ်ႉ ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၼၢင်းမၼ်း၊ ၼွင်ႉယိင်းမၼ်း လႆႈယူႇတူဝ်ပူၺ်လႄႈ မၼ်းတၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။-

18ပေႃးၵူၼ်းၸၢႆးၼွၼ်းလူၺ်ႈၵၼ်တင်းမႄႈယိင်း ဢၼ်ႁွတ်ႈဢူႉတူႉၼၼ်ႉလႄႈ ႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမၼ်းလႆႈယူႇတူဝ်ပူၺ်ၸိုင် ၵူၼ်းၸၢႆးၼၼ်ႉ ႁႂ်ႈတၢင်းပဵၼ်ဢၼ်ထွၵ်ႇလိူတ်ႈမၼ်းၼၼ်ႉထၢင်ႇသႃးလႄႈ မၼ်းၼၼ်ႉႁႂ်ႈတၢင်းပဵၼ်ဢၼ်ထွၵ်ႇလိူတ်ႈမၼ်းၼၼ်ႉထၢင်ႇသႃးဢေႃႈ။ သွင်ၶႃတၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းသွင်ၶႃဢေႃႈ။-

19မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၼၢင်းပေႃႈ၊ ၼွင်ႉယိင်းပေႃႈ ဢိၵ်ႇတင်းပီႈၼၢင်းမႄႈ၊ ၼွင်ႉယိင်းမႄႈ လႆႈယူႇတူဝ်ပူၺ်။ ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၼွင်ႉဢွၵ်ႇမၼ်းလႆႈယူႇတူဝ်ပူၺ်ၼၼ်ႉလႄႈ၊ သွင်ၶႃၼၼ်ႉ တၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။-

20ပေႃးၵူၼ်းၸၢႆးၼွၼ်းလူၺ်ႈၵၼ်တင်းမေးပီႈၸၢႆးပေႃႈ၊ မေးၼွင်ႉၸၢႆးပေႃႈၸိုင်၊ ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၸၢႆးပေႃႈမၼ်း၊ ၼွင်ႉၸၢႆးပေႃႈမၼ်းလႆႈယူႇတူဝ်ပူၺ်ၼၼ်ႉလႄႈ သွင်ၶႃၼၼ်ႉ တၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇလႄႈ၊ ၸူဝ်ႈဢသၢၵ်ႈယင်းဢမ်ႇလႆႈလုၵ်ႈလႆႈလၢင်းလႄႈတၵ်းလႆႈယူႇဢေႃႈ။-

21ပေႃးၵူၼ်းၸၢႆးဢဝ်မေးပီႈၸၢႆးမၼ်း၊ မေးၼွင်ႉၸၢႆးမၼ်းၸိုင်၊ ပဵၼ်လွင်ႈတၢင်းဢၼ်ၵူဝ်ႈၵိူၵ်ႇဢေႃႈ။ ၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၸၢႆးမၼ်း၊ ၼွင်ႉၸၢႆးမၼ်း လႆႈယူႇတူဝ်ပူၺ်ၼၼ်ႉလႄႈ၊ သွင်ၶႃၼၼ်ႉ ယင်းဢမ်ႇလႆႈလုၵ်ႈလႆႈလၢင်းလႄႈ တၵ်းလႆႈယူႇဢေႃႈ။

22လွင်ႈၼင်ႇႁိုဝ်မိူင်းဢၼ်ၵဝ်ဢဝ်သူၵႂႃႇသူင်ႇႁႂ်ႈလႆႈၶျႃးတီႈယူႇပၼ်သူၼၼ်ႉ တၵ်းဢမ်ႇတူၼ်ႉႁၢၵ်ႈသူဢွၵ်ႇပႅတ်ႈၸိုင်၊ သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ် ဢိၵ်ႇတင်းတၢင်းဢၼ်ၵဝ်ၸီႇယၢင်ႇဝႆႉၵႃႈမီးၼၼ်ႉဢေႃႈ။-

23သူဢမ်ႇလႆႈၵႂႃႇမႃးၸွမ်းၽႃႇသႃႇထုင်းၽိင်ႈၵူၼ်းၵူႈၸိူဝ်ႉၵူႈၶိူဝ်း ဢၼ်ၵဝ်ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈသူၼၼ်ႉ။ ၵွပ်ႈပိူဝ်ႈဢၼ် ၶဝ်ႁဵတ်းလွင်ႈတၢင်းၸိူဝ်းၼၼ်ႉတင်းသဵင်ႈတင်းလူင်လႄႈ ၵဝ်လီႁင်ႈဢဵတ်ႇသဵတ်ႇဢေႃႈ။-

24ၵဝ်လႆႈလၢတ်ႈဝႆႉလႄႈဝႃႈ၊ သူတၵ်းလႆႈၶၢမ်ႇဢမူၺ်ႇမိူင်းၶဝ်ဢၼ်ဝႃႈ မိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉလႄႈ ၵဝ်တၵ်းပၼ်တီႈသူ ႁႂ်ႈသူလႆႈပိူင်ႇဢေႃႈ၊ ဝႃႈၼင်ႇၼႆဝႆႉယဝ်ႉ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်ၽႄဢဝ်သူ ၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတင်းမဵဝ်းတင်းလၢႆၼၼ်ႉဢေႃႈ။-

25ၵွပ်ႈပိူဝ်ႈလွင်ႈၼၼ်ႉလႄႈ သူတၵ်းလႆႈၸၵ်းၽႄဢဝ် တူဝ်ဢၼ်မူတ်းသႂ်၊ တူဝ်ဢၼ်ဢမ်ႇမူတ်းသႂ်၊ ၼူၵ်ႉဢၼ်မူတ်းသႂ်၊ ၼူၵ်ႉဢၼ်ဢမ်ႇမူတ်းသႂ်ၸိူဝ်းၼၼ်ႉပႅၵ်ႇပိူင်ႈၵၼ်ဢေႃႈ။ သူဢမ်ႇလႆႈႁႂ်ႈတူဝ်ၸဝ်ႈၵဝ်ႇ ပဵၼ်ဢၼ်လီႁင်ႈဢဵတ်ႇသဵတ်ႇ ၵွပ်ႈပိူဝ်ႈတူဝ်သတ်း၊ ၼူၵ်ႉ၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ် ဢၼ်ၵဝ်ၽႄဢွၵ်ႇဝႆႉ ႁႂ်ႈပဵၼ်ဢၼ်ဢမ်ႇမူတ်းသႂ်တီႈသူၼႆႉၸိူဝ်းၼၼ်ႉ သေၸိူဝ်ႉသေပိူင်။-

26သူတၵ်းလႆႈမူတ်းၸၢင်ႇပုၼ်ႈၵဝ်ဢေႃႈ။ လွင်ႈမၼ်းၸမ်ႉ ၵဝ်ထႃႇဝရႃႉၽြႃးမူတ်းၸၢင်ႇလႄႈ ၽႄဢဝ်သူၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတင်းမဵဝ်းတင်းလၢႆ ႁႂ်ႈလႆႈပဵၼ်ပုၼ်ႈၵဝ်ယဝ်ႉ။-

27ၵူၼ်းၸၢႆးသေဢမ်ႇဝႃႈ၊ ၵူၼ်းယိင်းသေဢမ်ႇဝႃႈ၊ ၵေႃႉဢၼ်ၽီၶဝ်ႈ၊ ဢမ်ႇၼၼ် ၵေႃႉဢၼ်ႁဵတ်းၽိူဝ်ႉၼၼ်ႉၸိုင်၊ တၵ်းလႆႈၶၢမ်ႇတၢင်းဢၼ် ဢဝ်တၢႆဢမၢၼ်ႇၶၼ်ပဵၼ်ဢေႃႈ။ ၶဝ်တၵ်းလႆႈဢွၼ်ၵၼ် ဢဝ်မၢၵ်ႇႁိၼ်ထိမ်ႈၵေႃႉၸိူဝ်ႉၼင်ႇၼၼ်ဢေႃႈ။ လိူတ်ႈၶဝ်တၵ်းလႆႈႁွတ်ႈထိုင်ၵႃႈၼိူဝ်ၶဝ်ဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

← Chapter 19 Jump to: Chapter 21 →