Leviticus 11 — Shan

4ၼႂ်းဝႃႈၼၼ်သေၵေႃႈ တူဝ်ဢၼ်သူဢမ်ႇလႆႈၵိၼ်ၼႂ်းတူဝ်ဢၼ်ၵဵဝ်ႉဢိူင်ႈ ဢိၵ်ႇတင်းတူဝ်ဢၼ်ၵိပ်ႇတႅၵ်ႇၸိူဝ်းၼၼ်ႉၸမ်ႉ၊ ၵလႃးဢုၵ်ႉၸိုင်၊ ၵွပ်ႈပိူဝ်ႈဢၼ်ၵဵဝ်ႉဢိူင်ႈသေၵေႃႈၵိပ်ႇဢမ်ႇတႅၵ်ႇၼၼ်ႉလႄႈ၊ ဢမ်ႇမူတ်းသႂ်တီႈသူ။-

5ပၢင်တၢႆးသၽၢၼ်ႇၸိုင် ၵွပ်ႈပိူဝ်ႈဢၼ်ၵဵဝ်ႉဢိူင်ႈသေၵေႃႈ ၵိပ်ႇဢမ်ႇတႅၵ်ႇၼၼ်ႉလႄႈ ဢမ်ႇမူတ်းသႂ်တီႈသူ။-

6ပၢင်တၢႆးၸိုင် ၵွပ်ႈပိူဝ်ႈဢၼ်ၵဵဝ်ႉဢိူင်ႈသေၵေႃႈ ၵိပ်ႇဢမ်ႇတႅၵ်ႇၼၼ်ႉလႄႈ ဢမ်ႇမူတ်းသႂ်တီႈသူ။-

7မူၸိုင် ၵွပ်ႈပိူဝ်ႈဢၼ်ၵိပ်ႇတႅၵ်ႇသေၵေႃႈ ဢမ်ႇၵဵဝ်ႉဢိူင်ႈၼၼ်ႉလႄႈ ဢမ်ႇမူတ်းသႂ်တီႈသူ။-

8ၼိူဝ်ႉတရိၵ်ႈသၢၼ်ႇၸိူဝ်ႉၼင်ႇၼၼ်ၸိုင်၊ သူဢမ်ႇလႆႈၵိၼ်။ တူဝ်တၢႆၶဝ်ၵေႃႈသူဢမ်ႇလႆႈတိူဝ်ႉလႆႈထုၵ်ႇ။ ပဵၼ်ဢၼ်ဢမ်ႇမူတ်းသႂ်တီႈသူ။

9တရိၵ်ႈသၢၼ်ႇဢၼ်ယူႇၵႃႈၼႂ်းၼမ်ႉလႄႈ သူမီးဢၶႂၢင်ႉဢၼ်လႆႈၵိၼ်တင်းလၢႆၼၼ်ႉၸမ်ႉ၊ ၼႂ်းတရိၵ်ႈသၢၼ်ႇၵႃႈဢၼ်ယူႇၵႃႈၼႂ်းၼမ်ႉပၢင်ႇလၢႆႇ ဢိၵ်ႇတင်းၼမ်ႉႁွင်ႈၼမ်ႉၵႄး တင်းၼမ်ႉတင်းလၢႆၼၼ်ႉ၊ သူတၵ်းလႆႈၵိၼ်တရိၵ်ႈသၢၼ်ႇဢၼ်မီးပိၵ်ႇဝီးတင်းၵဵတ်းၼၼ်ႉၵူၺ်းဢေႃႈ။-

10တရိၵ်ႈသၢၼ်ႇၵႃႈဢၼ်ဢမ်ႇမီးပိၵ်ႇဝီးတင်းၵဵတ်းသေလႄႈ ယူႇၵႃႈၼႂ်းၼမ်ႉပၢင်ႇလၢႆႇ ဢိၵ်ႇတင်းၼမ်ႉႁွင်ႈၼမ်ႉၵႄး၊ ၵႃႈဢၼ်တူင်ႉၼိုင်ယူႇၼႂ်းၼမ်ႉ၊ ၵႃႈဢၼ်ဢသၢၵ်ႈလိပ်းယူႇၼႂ်းၼမ်ႉၸိူဝ်းၼၼ်ႉ၊ တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။-

11တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢမၢၼ်ႇၶၼ်ပဵၼ်ဢေႃႈ။ သူဢမ်ႇလႆႈၵိၼ်ၼိူဝ်ႉၶဝ်။ တူဝ်တၢႆၶဝ်ၼၼ်ႉ တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။-

12တရိၵ်ႈသၢၼ်ႇၵႃႈၼႂ်းၼမ်ႉၵႃႈဢၼ်ဢမ်ႇပျေႉၸုမ်ႇတင်းပိၵ်ႇဝီးတင်းၵဵတ်းၸိူဝ်းၼၼ်ႉ တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။

13မဵဝ်းၼူၵ်ႉဢၼ်သူတၵ်းလႆႈလီႁင်ႈဢဵတ်ႇသဵတ်ႇလႄႈ ဢမ်ႇလႆႈၵိၼ်ၼၼ်ႉၸမ်ႉ၊ ပဵၼ်လၢင်းတႃႉၶမ်း၊ ႁုင်ႉလူင်၊ လၢင်းတႃႉပၢင်ႇလၢႆႇ၊-

14ယဵဝ်ႈၸွၵ်ႇမဵဝ်းႁုင်ႉၵူႈမဵဝ်း၊ မဵဝ်းၵႃလူင်ၵူႈမဵဝ်း၊-

16ၼူၵ်ႉၵလႃးဢုၵ်ႉ၊ ၼူၵ်ႉႁၢႆႉ၊ ၼူၵ်ႉယၢင်း၊ မဵဝ်းယဵဝ်ႈၵူႈမဵဝ်း၊-

17ၵဝ်ႉ၊ ၵႃၸႆး၊ တီးတုတ်ႈ၊-

18ၵဝ်ႉငိမ်၊ ၼူၵ်ႉဝမ်ႇပူဝ်ႇ၊ ၼူၵ်ႉၸဝ်ႉ၊-

19ၵွၼ်ႇ၊ မဵဝ်းၼူၵ်ႉယၢင်းလိူၼ်ႈၵူႈမဵဝ်း၊ ၼူၵ်ႉတွႆးၵိူဝ်ႇ တင်းဝိင်ႇၸိူဝ်းၼၼ်ႉဢေႃႈ။

20တရိၵ်ႈသၢၼ်ႇၵႃႈဢၼ်မီးပိၵ်ႇယူႇလႄႈ ၸၢင်ႈဢဝ်တင်းတိၼ်သီႇၶွၼ်ၵၢၼ်းၵႂႃႇတင်းသဵင်ႈတင်းလူင်ၼၼ်ႉ တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။-

21ၼႂ်းဝႃႈၼၼ်သေၵေႃႈ ၼႂ်းတရိၵ်ႈသၢၼ်ႇဢၼ်မီးပိၵ်ႇလႄႈ ၸၢင်ႈဢဝ်တင်းတိၼ်သီႇၶွၼ်ၵၢၼ်းၵႂႃႇ၊ ဢၼ်မီးမၢၵ်ႇၵၢဝ်ႈမၢၵ်ႇၶႃၵႃႈၼိူဝ်တိၼ် ပုၼ်ႈဢၼ်တၵ်းၵျွၵ်းဝႅၼ်ၸိူဝ်းၼၼ်ႉ၊-

22တၵ်းလႆႈၵိၼ်မဵဝ်းမႅင်းၵႅင်း ဢရႃႇၽႃႉ ၊ မဵဝ်းမႅင်းၵႅင်း သလွင် ၊ မဵဝ်းမႅင်းၵႅင်း ၶႃရႃၵႃႉ ၊ မဵဝ်းမႅင်းၵႅင်း ၵႃၵၢပ်ႇ ၸိူဝ်းၼၼ်ႉဢေႃႈ။-

23တရိၵ်ႈသၢၼ်ႇတၢင်ႇၸိူဝ်ႉဢၼ်မီးပိၵ်ႇလႄႈၸၢင်ႈဢဝ်တင်းတိၼ်သီႇၶွၼ်ၵၢၼ်းၵႂႃႇတင်းသဵင်ႈတင်းလူင်ၼၼ်ႉ တၵ်းလႆႈပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။-

24ၵွပ်ႈပိူဝ်ႈတရိၵ်ႈသၢၼ်ႇၸိူဝ်ႉၼင်ႇၼၼ်လႄႈ တၢင်းမူတ်းသႂ်သူၸၢင်ႈလူႉဢေႃႈ။ ၵေႃႉဢၼ်တိူဝ်ႉထုၵ်ႇတူဝ်တၢႆၶဝ်ၼၼ်ႉ ဢမ်ႇမူတ်းသႂ်ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

25ၵႃႈပဵၼ်ၵေႃႉဢၼ်ဢဝ်တူဝ်တၢႆၼၼ်ႉၵႂႃႇၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢမ်ႇမူတ်းသႂ်ယူႇ တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

26ၵႃႈပဵၼ်တရိၵ်ႈသၢၼ်ႇဢၼ်ၵိပ်ႇတႅၵ်ႇယူႇလႄႈတိၼ်ဢမ်ႇပဵၼ်ငၢမ်ႈဝႆႉ၊ ဢမ်ႇၵဵဝ်ႉဢိူင်ႈၸိူဝ်းၼၼ်ႉ ဢမ်ႇမူတ်းသႂ်တီႈသူ။ ၵႃႈပဵၼ်ၵေႃႉဢၼ်တိူဝ်ႉထုၵ်ႇတူဝ်တၢႆၶဝ်ၼၼ်ႉဢမ်ႇမူတ်းသႂ်။-

27ၼႂ်းတရိၵ်ႈသၢၼ်ႇၵူႈၸိူဝ်ႉၵူႈမဵဝ်း ဢၼ်ဢဝ်တိၼ်သီႇၶွၼ်ၵၢၼ်းၵႂႃႇၼၼ်ႉၸိုင် ၵႃႈပဵၼ်တူဝ်ဢၼ်ဢဝ်ၽႃႇတိၼ်ယဵပ်ႇၵႂႃႇၼၼ်ႉ ဢမ်ႇမူတ်းသႂ်တီႈသူ၊ ၵေႃႉဢၼ်တိူဝ်ႉထုၵ်ႇတူဝ်တၢႆၶဝ်ၼၼ်ႉ ဢမ်ႇမူတ်းသႂ်ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

28ၵႃႈပဵၼ်ၵေႃႉဢၼ်ဢဝ်တူဝ်တၢႆၶဝ်ၼၼ်ႉၵႂႃႇၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢမ်ႇမူတ်းသႂ်ယူႇတေႃႇထိုင်ႁွတ်ႈ ၶိင်ႇႁူဝ်ၶမ်ႈဢေႃႈ။ ၶဝ်ၼၼ်ႉဢမ်ႇမူတ်းသႂ်တီႈသူ။

29ၼႂ်းတရိၵ်ႈသၢၼ်ႇဢၼ်ၸၢင်ႈၵၢၼ်းၵႃႈၼိူဝ်လိၼ်ၸိူဝ်းၼၼ်ႉ တရိၵ်ႈသၢၼ်ႇဢၼ်ဢမ်ႇမူတ်းသႂ်တီႈသူၸမ်ႉ၊ ပဵၼ်တွၼ်ႇ၊ ၼူ၊ မဵဝ်းၸိူင်ႉႁိူၼ်း၊-

30တွၵ်ႉတႄႉ၊ လႅၼ်းလၢဝ်၊ ဢၢၵ်ႇလိူၼ်း၊ လႅၼ်း၊ ဢၢၵ်ႇၶၢင်ၸိူဝ်းၼၼ်ႉဢေႃႈ။-

31ၼႂ်းတူဝ်ဢၼ်ၸၢင်ႈၵၢၼ်းတင်းသဵင်ႈတင်းလူင်ၼၼ်ႉ၊ တူဝ်ၸိူဝ်းၼႆႉဢမ်ႇမူတ်းသႂ်တီႈသူ။ ၵႃႈပဵၼ်ၵေႃႉဢၼ်တိူဝ်ႉထုၵ်ႇတူဝ်တၢႆၶဝ်ၼၼ်ႉ ဢမ်ႇမူတ်းသႂ်ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

32ပေႃးတူဝ်တၢႆတရိၵ်ႈသၢၼ်ႇၸိူဝ်းၼၼ်ႉ တူၵ်းသႂ်ႇၵႃႈၼိူဝ်သေၸိူဝ်ႉသေပိူင်ၸိုင်၊ ၶိူင်ႈပိူင်ၼၼ်ႉဢမ်ႇမူတ်းသႂ် ပဵၼ်ၵွၵ်းမႆႉသေဢမ်ႇဝႃႈ၊ ပဵၼ်ၶူဝ်းၼုင်ႈသေဢမ်ႇဝႃႈ၊ ပဵၼ်ၼင်သေဢမ်ႇဝႃႈ၊ ပဵၼ်ထူင်သေဢမ်ႇဝႃႈ၊ ပဵၼ်ၶိူင်ႈပိူင်ဢၼ်ဢဝ်သုင်းသွင်ႇၼၼ်ႉသေၸိူဝ်ႉသေပိူင်သေဢမ်ႇဝႃႈ၊ ၶိူင်ႈပိူင်ၼၼ်ႉဢမ်ႇမူတ်းသႂ်။ တၵ်းလႆႈဢဝ်ၸုမ်ႇၼမ်ႉဢေႃႈ။ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ လိုၼ်းၼၼ်ႉ တၵ်းမူတ်းသႂ်ဢေႃႈ။-

33ၵႃႈပဵၼ်ၵွၵ်းလိၼ်ဢၼ်တူဝ်တၢႆၶဝ်တူၵ်းသႂ်ႇၵႃႈၼႂ်းမၼ်းၼၼ်ႉ မီးၵႃႈသင်ၼႂ်းမၼ်းသေဢမ်ႇဝႃႈ၊ ဢမ်ႇမူတ်းသႂ်လႄႈ၊ တၵ်းလႆႈဢဝ်တႅၵ်ႇပႅတ်ႈသေဢေႃႈ။-

34တၢင်းၵိၼ်တၢင်းၶူပ်းဢၼ်ဢဝ်ၼမ်ႉသႂ်ႇလႄႈ ႁဵတ်းၵႃႈၼႂ်းၵွၵ်းၼၼ်ႉ ဢမ်ႇမူတ်းသႂ်။ ၼမ်ႉပုၼ်ႈဢၼ်တၵ်းၵိၼ်ၵႃႈၼႂ်းၵွၵ်းလိၼ်ၼၼ်ႉၵေႃႈ ဢမ်ႇမူတ်းသႂ်။-

35ၵႃႈပဵၼ်ၶိူင်ႈပိူင်ဢၼ် တူဝ်တၢႆၶဝ်တူၵ်းသႂ်ႇၵႃႈၼိူဝ်မၼ်းၼၼ်ႉ ႁွတ်ႈထိုင်တၢင်းဢၼ်ဢမ်ႇမူတ်းသႂ်ဢေႃႈ။ ပဵၼ်ၽီးၽႆးသေဢမ်ႇဝႃႈ၊ ပဵၼ်ပုင်းၽႆးသေဢမ်ႇဝႃႈ၊ ၵွပ်ႈပိူဝ်ႈဢၼ်ႁွတ်ႈထိုင်တၢင်းဢၼ်ဢမ်ႇမူတ်းသႂ်လႄႈ တၵ်းလႆႈယႃႉပႅတ်ႈသေဢေႃႈ။ ဢမ်ႇမူတ်းသႂ်တီႈသူ။-

36ၵူၺ်းၵႃႈ ၼမ်ႉဢွၵ်ႇႁူး ဢိၵ်ႇတင်းၼမ်ႉမေႃႇဢၼ်ၶုတ်းမီးတၢင်းဢၼ်ၼမ်ႉၸူႉတုမ်ၼၼ်ႉၸိုင်၊ မူတ်းသႂ်ယူႇဢေႃႈ။ ၵေႃႉဢၼ်တိူဝ်ႉထုၵ်ႇတူဝ်တၢႆၼၼ်ႉၵူၺ်း ႁွတ်ႈထိုင်တၢင်းဢၼ်ဢမ်ႇမူတ်းသႂ်ဢေႃႈ။-

37ပေႃးတူဝ်တၢႆၶဝ်တူၵ်းသႂ်ႇၵႃႈၼိူဝ် ၸိူဝ်ႉၽၼ်းဢၼ်တၵ်းဝၢၼ်ႇတၵ်းပိုၼ်ၼၼ်ႉၸိုင်၊ ၸိူဝ်ႉၽၼ်းၼၼ်ႉမူတ်းသႂ်ယူႇဢေႃႈ။-

38ပေႃးတူဝ်တၢႆၶဝ်တူၵ်းသႂ်ႇၵႃႈၼိူဝ်ၸိူဝ်ႉၽၼ်းဢၼ်ၸေႈၼမ်ႉဝႆႉယဝ်ႉၼၼ်ႉၸိုင် ၸိူဝ်ႉၽၼ်းၼၼ်ႉဢမ်ႇမူတ်းသႂ်တီႈသူ၊-

39ပေႃးတရိၵ်ႈသၢၼ်ႇဢၼ်သူထုၵ်ႇလီၵိၼ်ၼၼ်ႉတၢႆၸိုင်၊ ၵေႃႉဢၼ်တိူဝ်ႉထုၵ်ႇတူဝ်တၢႆၼၼ်ႉ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

40ၵေႃႉဢၼ်ၵိၼ်တူဝ်တၢႆၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ၵေႃႉဢၼ်ဢဝ်တူဝ်တၢႆၼၼ်ႉ ၵႂႃႇၼၼ်ႉၵေႃႈ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-

41တရိၵ်ႈသၢၼ်ႇဢၼ်ၸၢင်ႈၵၢၼ်းၵႃႈၼိူဝ်လိၼ်ၵႃႈမီးၼၼ်ႉ ပဵၼ်ဢၼ်လီႁင်ႈဢဵတ်ႇသဵတ်ႇလႄႈဢမ်ႇလႆႈၵိၼ်။-

42တရိၵ်ႈသၢၼ်ႇဢၼ်ၸၢင်ႈဢဝ်တွင်ႉလိူၼ်ႈၵႂႃႇထူၵႂႃႇသေဢမ်ႇဝႃႈ၊ ဢၼ်ၸၢင်ႈဢဝ်တိၼ်သီႇၶွၼ်ၵႂႃႇသေဢမ်ႇဝႃႈ၊ ဢၼ်ၸၢင်ႈဢဝ်တိၼ်ၼမ်ၼႃႇၵႂႃႇသေဢမ်ႇဝႃႈ၊ ၵႃႈဢၼ်ၸၢင်ႈၵၢၼ်းၵႃႈၼိူဝ်လိၼ်ၸိူဝ်းၼၼ်ႉၸိုင် သူဢမ်ႇလႆႈၵိၼ်။ ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။-

43သူဢမ်ႇလႆႈႁႂ်ႈတူဝ်ၸဝ်ႈၵဝ်ႇပဵၼ်ဢၼ်လီႁင်ႈဢဵတ်ႇသဵတ်ႇလူၺ်ႈတရိၵ်ႈသၢၼ်ႇ ဢၼ်ၸၢင်ႈၵၢၼ်းသေၸိူဝ်ႉသေပိူင်။ သူဢမ်ႇလႆႈႁဵတ်းလွင်ႈဢၼ်ဢမ်ႇမူတ်းသႂ်တီႈတူဝ်ၸဝ်ႈၵဝ်ႇလူၺ်ႈၶဝ်ၼၼ်ႉ ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇ ၵွပ်ႈပိူဝ်ႈၸိူဝ်ႉၼင်ႇၼၼ်။-

44ၵဝ်ၼႆႉပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။ ပိူဝ်ႈၼႆလႄႈ သူၵေႃႈ တၵ်းလႆႈႁႂ်ႈတူဝ်သူမူတ်းၸၢင်ႇလႄႈ သူတၵ်းမီးတၢင်းဢၼ်မူတ်းၸၢင်ႇဢေႃႈ။ လွင်ႈမၼ်းၸမ်ႉ ၵဝ်မူတ်းၸၢင်ႇဢေႃႈ။ သူဢမ်ႇလႆႈႁႂ်ႈတူဝ်သူၵူဝ်ႈၵိူၵ်ႇလူၺ်ႈတရိၵ်ႈသၢၼ်ႇ ဢၼ်ၸၢင်ႈၵၢၼ်းၵႃႈၼိူဝ်လိၼ်သေၸိူဝ်ႉသေပိူင်ၼၼ်ႉ။-

45ၵဝ်ၼႆႉပဵၼ်ထႃႇဝရႃႉၽြႃး ဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးႁႂ်ႈလႆႈပဵၼ်ၽြႃးပဵၼ်ၸဝ်ႈသူဢေႃႈ။ ၵွပ်ႈပိူဝ်ႈဢၼ်ၵဝ်မူတ်းၸၢင်ႇလႄႈ၊ သူတၵ်းလႆႈမီးတၢင်းဢၼ်မူတ်းၸၢင်ႇဢေႃႈ။-

46ဢၼ်ၼႆႉၸမ်ႉ၊ ပဵၼ်တြႃးဢၼ်ၸၢပ်ႈသႅင်ႇၵၼ်တင်းတရိၵ်ႈသၢၼ်ႇ၊ ၼူၵ်ႉ၊ တူဝ်ဢၼ်ဢသၢၵ်ႈလိပ်းလႄႈ ၸၢင်ႈၵႂႃႇၵႃႈၼႂ်းၼမ်ႉ၊ တူဝ်ဢၼ်ဢသၢၵ်ႈလိပ်းလႄႈ ၸၢင်ႈၵၢၼ်းၵႃႈၼိူဝ်လိၼ်ၸိူဝ်းၼၼ်ႉ၊-

47ႁႂ်ႈလႆႈၸၵ်းၽႄဢဝ်တရိၵ်ႈသၢၼ်ႇဢၼ်မူတ်းသႂ် ဢၼ်ဢမ်ႇမူတ်းသႂ်၊ ဢၼ်လီၵိၼ် ဢၼ်ဢမ်ႇလီၵိၼ်ၸိူဝ်းၼၼ်ႉ ပႅၵ်ႇပိူင်ႈၵၼ်ဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။