Leviticus 18

Shan

← Chapter 17 Jump to: Chapter 19 →

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈၸမ်ႉ၊-

2သင်ႇလၢတ်ႈဝႆႉတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။-

3သူဢမ်ႇလႆႈၵမ်ၵျၢင်ႉၸွမ်းၼင်ႇတၢင်းၵမ်တၢင်းၵျၢင်ႉမိူင်း ဢေႇၵိပ်ႉတူႉ ဢၼ်သူယူႇမႃးယဝ်ႉၼၼ်ႉ။ သူဢမ်ႇလႆႈၵမ်ၵျၢင်ႉၸွမ်းၼင်ႇတၢင်းၵမ်တၢင်းၵျၢင်ႉမိူင်း ၶႃႇၼၢၼ်ႇ ဢၼ်ၵဝ်တၵ်းဢဝ်သူၵႂႃႇသူင်ႇၼၼ်ႉ။ ၵႃႈတီႈသဵၼ်ႈတၢင်းပိင်းၺၢပ်ႈတြႃးၶဝ်ၼၼ်ႉၵေႃႈ သူဢမ်ႇလႆႈၵႂႃႇလႆႈၸွမ်း။-

4သူတၵ်းလႆႈၵမ်ၵျၢင်ႉတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ပႂ်ႉႁဵတ်းႁႂ်ႈလႆႈၸွမ်းသဵၼ်ႈတၢင်းပိင်းၺၢပ်ႈတြႃးၵဝ်ၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။-

5ပိူဝ်ႈၼႆလႄႈ တၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵဝ် ဢိၵ်ႇတင်းတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉဢေႃႈ။ ၵေႃႉဢၼ်ၵမ်ၵျၢင်ႉ တၢင်းၵမ်တၢင်းၵျၢင်ႉၼၼ်ႉ၊ ၵွပ်ႈပိူဝ်ႈတၢင်းၵမ်တၢင်းၵျၢင်ႉၼၼ်ႉလႄႈ ဢသၢၵ်ႈတၵ်းလိပ်းဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။

6ၼႂ်းသူၼၼ်ႉ ၽူႈလႂ်ဢမ်ႇလႆႈသုတ်ႉၸပ်းသုတ်ႉၸူး တီႈၵေႃႉဢၼ်ထုၵ်ႇပဵၼ်ပီႈၼွင်ႉၸိူဝ်ႉၶိူဝ်းမၼ်းၼၼ်ႉလႄႈ ႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈၶဝ်လႆႈယူႇတူဝ်ပူၺ်။ ၵဝ်ပဵၼ်ထႃႇဝရႃႉၽြႃးဢေႃႈ။-

7မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပေႃႈမႂ်းလႆႈယူႇတူဝ်ပူၺ် ဢၼ်ဝႃႈႁႂ်ႈမႄႈမႂ်းလႆႈယူႇတူဝ်ပူၺ်ၼၼ်ႉ။ ၵွပ်ႈပိူဝ်ႈဢၼ်ပဵၼ်မႄႈမႂ်းလႄႈ မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမၼ်းလႆႈယူႇတူဝ်ပူၺ်။-

8မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမေးပေႃႈမႂ်းလႆႈယူႇတူဝ်ပူၺ်။ ပဵၼ်တၢင်းဢၼ်ပေႃႈမႂ်းလႆႈယူႇတူဝ်ပူၺ်ဢေႃႈ။-

9မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၼၢင်းမႂ်း၊ ၼွင်ႉယိင်းမႂ်း၊ ဢၼ်ပဵၼ်လုၵ်ႈယိင်းပေႃႈမႂ်း၊ ဢမ်ႇၼၼ်ၵေႃႈ လုၵ်ႈယိင်းမႄႈမႂ်း၊ ဢၼ်ၵိူတ်ႇလဵင်ႉႁိူၼ်းလဵဝ်ၵၼ်သေဢမ်ႇဝႃႈ၊ ဢၼ်ၵိူတ်ႇလဵင်ႉတၢင်ႇတီႈသေဢမ်ႇဝႃႈၼၼ်ႉ လႆႈယူႇတူဝ်ပူၺ်။-

10မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈလၢၼ်ယိင်းမႂ်းဢၼ်ပဵၼ်လုၵ်ႈယိင်းလုၵ်ႈၸၢႆးမႂ်း၊ ဢမ်ႇၼၼ်ၵေႃႈ ဢၼ်ပဵၼ်လုၵ်ႈယိင်းလုၵ်ႈယိင်းမႂ်းၼၼ်ႉလႆႈယူႇတူဝ်ပူၺ်။ ပဵၼ်တၢင်းဢၼ်မႂ်းလႆႈယူႇတူဝ်ပူၺ်ဢေႃႈ။-

11မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈလုၵ်ႈယိင်းမႄႈသိုပ်ႇ ဢၼ်ပဵၼ်ပေႃႈလဵဝ်ၵၼ်တင်းမႂ်းၼၼ်ႉ၊ လႆႈယူႇတူဝ်ပူၺ်။ ပဵၼ်ၼွင်ႉယိင်းမႂ်းဢေႃႈ။-

12မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇႁႂ်ႈပီႈၼၢင်းၼွင်ႉယိင်းပေႃႈမႂ်းလႆႈယူႇတူဝ်ပူၺ်။ ပဵၼ်ပီႈၼွင်ႉဢွၵ်ႇပေႃႈမႂ်းဢေႃႈ။-

13မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၼၢင်းၼွင်ႉယိင်းမႄႈမႂ်းလႆႈယူႇတူဝ်ပူၺ်။ ပဵၼ်ပီႈၼွင်ႉဢွၵ်ႇမႄႈမႂ်းဢေႃႈ။-

14မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈပီႈၸၢႆးၼွင်ႉၸၢႆးပေႃႈမႂ်းလႆႈယူႇတူဝ်ပူၺ်၊ မႂ်းဢမ်ႇလႆႈသုတ်ႉၸပ်းသုတ်ႉၸူးတီႈမေးမၼ်း။ ပဵၼ်မႄႈပႃႈမႄႈဢႃမႂ်းဢေႃႈ။-

15မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈလုၵ်ႈပႂ်ႉမႂ်းလႆႈယူႇတူဝ်ပူၺ်။ ပဵၼ်မေးလုၵ်ႈၸၢႆးမႂ်းဢေႃႈ။ မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမၼ်းလႆႈယူႇတူဝ်ပူၺ်။-

16မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမေးပီႈၸၢႆးၼွင်ႉၸၢႆးမႂ်းလႆႈယူႇတူဝ်ပူၺ်။ ပဵၼ်တၢင်းဢၼ်ပီႈၸၢႆးၼွင်ႉၸၢႆးမႂ်း လႆႈယူႇတူဝ်ပူၺ်ဢေႃႈ။-

17မႂ်းဢမ်ႇလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမႄႈယိင်းဢိၵ်ႇတင်းလုၵ်ႈယိင်းမၼ်းလႆႈယူႇတူဝ်ပူၺ်။ မႂ်းဢမ်ႇလႆႈသုတ်ႉၸပ်းသုတ်ႉၸူးၵႃႈတီႈလုၵ်ႈယိင်းလုၵ်ႈၸၢႆးမၼ်း၊ ဢမ်ႇၼၼ်ၵေႃႈ ၵႃႈတီႈလုၵ်ႈယိင်းလုၵ်ႈယိင်းမၼ်းၼၼ်ႉ ႁႂ်ႈလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမၼ်းလႆႈယူႇတူဝ်ပူၺ်။ ပဵၼ်ပီႈၼွင်ႉဢွၵ်ႇမႄႈယိင်းၼၼ်ႉဢေႃႈ။ ပဵၼ်လွင်ႈတၢင်းဢၼ်ဢမ်ႇတြႃးဢေႃႈ။-

18လွင်ႈၼင်ႇႁိုဝ်တၵ်းယႃႉယူၵ်ႉမေးမႂ်းၸိုင်၊ ၼႂ်းမိူဝ်ႈဢၼ်မၼ်းယင်းတိုၵ်ႉဢသၢၵ်ႈလိပ်းယူႇၼၼ်ႉ မႂ်းဢမ်ႇလႆႈသိမ်းဢဝ်ပီႈၼၢင်း၊ ၼွင်ႉယိင်းမၼ်း ႁႂ်ႈလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမႄႈယိင်းၼၼ်ႉလႆႈယူႇတူဝ်ပူၺ်။

19မႂ်းဢမ်ႇလႆႈသုတ်ႉၸပ်းသုတ်ႉၸူးတီႈမႄႈယိင်း ႁႂ်ႈလႆႈႁဵတ်းတၢင်းဢၼ်ၽုၺ်ႇပိုတ်ႇ ႁႂ်ႈမၼ်းလႆႈယူႇတူဝ်ပူၺ်ၼၼ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉဢမ်ႇမူတ်းသႂ် ၵွပ်ႈပိူဝ်ႈဢူႉတူႉဢၼ်ဢမ်ႇမူတ်းသႂ်ယူႇၼၼ်ႉ။-

20မႂ်းဢမ်ႇလႆႈၼွၼ်းလူၺ်ႈၵၼ်တင်းမေးပိူၼ်ႈ ႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇ။-

21မႂ်းဢမ်ႇလႆႈဢဝ်လုၵ်ႈလၢင်းၸိူဝ်ႉၶိူဝ်းမႂ်းသေၵေႃႉသေၵူၼ်းပၼ်လႄႈ ႁႂ်ႈၶဝ်လႆႈၶၢမ်ႇတၢင်းဢၼ်ဢဝ်ၽႆး ပုၵ်ႈၸေႃႇတီႈၸဝ်ႈၽြႃး မူးလွၵ်ႉ ။ မႂ်းဢမ်ႇလႆႈဢဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈမႂ်းၶျႃးတူၵ်းတီႈတႅမ်ႇ။ ၵဝ်ပဵၼ်ထႃႇဝရႃႉၽြႃးဢေႃႈ။-

22မႂ်းဢမ်ႇလႆႈၼွၼ်းလူၺ်ႈၵၼ်တင်းၵူၼ်းၸၢႆး မိူၼ်ၸိူဝ်ႉၼင်ႇဢၼ်ၼွၼ်းလူၺ်ႈၵၼ်တင်းမႄႈယိင်းၼၼ်ႉ။ ပဵၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢေႃႈ။-

23မႂ်းဢမ်ႇလႆႈၼွၼ်းလူၺ်ႈၵၼ်တင်းတရိၵ်ႈသၢၼ်ႇ ႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇ။ မႄႈယိင်းၵေႃႈ ဢမ်ႇလႆႈယူႇၵႃႈတီႈၽၢႆႇၼႃႈတရိၵ်ႈသၢၼ်ႇသေလႄႈ ႁႂ်ႈလႆႈၶၢမ်ႇတၢင်းဢၼ်ၼွၼ်းလူၺ်ႈၵၼ်တင်းတူဝ်ၸဝ်ႈၵဝ်ႇ။ ပဵၼ်တၢင်းဢၼ်လေႃးလႄး ဢၼ်လီႁင်ႈဢဵတ်ႇသဵတ်ႇဢေႃႈ။

24တူဝ်ၸဝ်ႈၵဝ်ႇဢမ်ႇလႆႈဢဝ်လွင်ႈတၢင်းၸိူဝ်းၼႆႉသေလႄႈ ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇ။ ၵူၼ်းမဵဝ်းဢၼ်ၵဝ်ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈသူၸိူဝ်းၼၼ်ႉ ႁဵတ်းလွင်ႈတၢင်းၸိူဝ်းၼႆႉတင်းသဵင်ႈတင်းလူင်လႄႈ ၵူဝ်ႈၵိူၵ်ႇၵူႈမဵဝ်းဢေႃႈ။-

25မိူင်းၶဝ်ၼၼ်ႉၵေႃႈ ၵူဝ်ႈၵိူၵ်ႇဢေႃႈ။ ပိူဝ်ႈၼႆလႄႈ ၵဝ်တၵ်းပၼ်တၢမ်ႇၵွပ်ႈပိူဝ်ႈဢပႅတ်ႈဢၼ်ဢမ်ႇတြႃးၼၼ်ႉ တီႈမိူင်းၼၼ်ႉလႄႈ၊ မိူင်းၼၼ်ႉတၵ်းတူၼ်ႉႁၢၵ်ႈၵူၼ်းမၼ်းတင်းလၢႆဢွၵ်ႇပႅတ်ႈဢေႃႈ။-

26သူၸမ်ႉ၊ တၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ် ဢိၵ်ႇတင်းလွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉဢေႃႈ။-

27လွင်ႈၼင်ႇႁိုဝ်မိူင်းၼၼ်ႉတၵ်းဢမ်ႇလႆႈသမ်ႉတူၼ်ႉႁၢၵ်ႈသူဢွၵ်ႇပႅတ်ႈ

28ၼႂ်းမိူဝ်ႈဢၼ်သူႁႂ်ႈမၼ်းၵူဝ်ႈၵိူၵ်ႇၼၼ်ႉ မိူၼ်ၸိူဝ်ႉၼင်ႇဢၼ်တူၼ်ႉႁၢၵ်ႈၵူၼ်းမဵဝ်းဢၼ်မီးဢွၼ်တၢင်းသူၼၼ်ႉဢွၵ်ႇပႅတ်ႈၼၼ်ႉၸိုင်၊ ၵူၼ်းမဵဝ်းတူဝ်ၸဝ်ႈၵဝ်ႇသေဢမ်ႇဝႃႈ၊ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈၼႂ်းသူသေဢမ်ႇဝႃႈ၊ ဢမ်ႇလႆႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်ႉၼင်ႇၼၼ်ၼၼ်ႉ။ ၵူၼ်းဝၢၼ်ႈၵူၼ်းမိူင်းဢၼ်မီးဢွၼ်တၢင်းသူၸိူဝ်းၼၼ်ႉ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇ တင်းသဵင်ႈတင်းလူင်ၸိူဝ်းၼၼ်ႉလႄႈ၊ မိူင်းၶဝ်မီးတၢင်းဢၼ်ၵူဝ်ႈၵိူၵ်ႇဢေႃႈ။-

29ၵေႃႉဢၼ်ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်ႉၼင်ႇၼၼ်ၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်း မဵဝ်းၸိူဝ်ႉၶိူဝ်းမၼ်းဢေႃႈ။-

30ပိူဝ်ႈၼႆလႄႈ လွင်ႈၼင်ႇႁိုဝ် သူတၵ်းဢမ်ႇၸွမ်းထုင်းၽိင်ႈဢၼ်လီႁင်ႈဢဵတ်ႇသဵတ်ႇ၊ ဢၼ်ယၢမ်ႈလႆႈႁဵတ်းမႃးယဝ်ႉ မိူဝ်ႈဢွၼ်တင်းသူၼၼ်ႉၸိူဝ်းၼၼ်ႉသေလႄႈ တူဝ်ၸဝ်ႈၵဝ်ႇႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၸိုင်၊ တၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်ဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

← Chapter 17 Jump to: Chapter 19 →