Leviticus 14 — Shan

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈ၊-

2တြႃးဢၼ်ၸၢပ်ႈသႅင်ႇၵၼ်တင်းၵူၼ်းတုတ်ႈ ၼႂ်းၶိင်ႇမိုဝ်ႉဝၼ်းဢၼ်ႁႂ်ႈမူတ်းသႂ်ၼၼ်ႉၸမ်ႉ၊ တၵ်းလႆႈႁွင်ႉဢဝ်မၼ်းၼၼ်ႉမႃး ၵႃႈတီႈယိတ်ႈပရေႃးႁဵၵ်ႈလႄႈ၊-

3ယိတ်ႈပရေႃးႁဵၵ်ႈၼၼ်ႉ တၵ်းလႆႈဢွၵ်ႇၸူးၵႃႈတီႈၼွၵ်ႈတပ်ႉသေလႄႈ ယိတ်ႈပရေႃးႁဵၵ်ႈၼၼ်ႉတၵ်းလႆႈတူၺ်းလႄႈ ပေႃးတၢင်းဢၼ်တုတ်ႈ ပေႃႇဢွၵ်ႇမႃးၵႃႈတီႈၵူၼ်းဢၼ်ပဵၼ်တုတ်ႈၼၼ်ႉႁၢႆယဝ်ႉၸိုင်၊-

4ယိတ်ႈပရေႃးႁဵၵ်ႈၼၼ်ႉတၵ်းလႆႈသင်ႇလၢတ်ႈ ႁႂ်ႈဢဝ်ၼူၵ်ႉဢၼ်ဢသၢၵ်ႈလိပ်းယူႇလႄႈမူတ်းသႂ်ၼၼ်ႉသွင်တူဝ်၊ ၼိူဝ်ႉမႆႉ ဢႃႇရိတ်ႉ ၊ ၸိူၵ်ႈဢၼ်လႅင်ၵမ်ႇ၊ တင်းယွတ်ႈတူၼ်ႈ ႁုတ်ႉသူပ်ႇ မႃးပုၼ်ႈၵေႃႉဢၼ်ၶၢမ်ႇတၢင်းဢၼ် ႁႂ်ႈမူတ်းသႂ်ၼၼ်ႉဢေႃႈ။-

5ၵမ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈသင်ႇလၢတ်ႈႁႂ်ႈဢဝ်ၼူၵ်ႉတူဝ်ၼိုင်ႈတၢႆၵႃႈၼႂ်းမေႃႈလိၼ် ၵႃႈၼိူဝ်ၼမ်ႉဢၼ် ဢဝ်ၼမ်ႉဢၼ်လႆၵႂႃႇယူႇၼၼ်ႉ သႂ်ႇဝႆႉၼၼ်ႉသေလႄႈ၊-

6ၼူၵ်ႉဢၼ်ဢသၢၵ်ႈလိပ်းၼၼ်ႉၸိုင်၊ မၼ်းတၵ်းလႆႈဢဝ်ဢိၵ်ႇလူၺ်ႈၵၼ်တင်းၼိူဝ်ႉမႆႉ ဢႃႇရိတ်ႉ ၊ ၸိူၵ်ႈဢၼ်လႅင်ၵမ်ႇ၊ တင်းယွတ်ႈတူၼ်ႈ ႁုတ်ႉသူပ်ႇ ၸိူဝ်းၼၼ်ႉလႄႈ ဢဝ်ၸိူဝ်းၼၼ်ႉဢိၵ်ႇတင်းၼူၵ်ႉဢၼ်ဢသၢၵ်ႈလိပ်းၼၼ်ႉ ၸွမ်ႇၸုမ်ႇၵႃႈၼႂ်းလိူတ်ႈၼူၵ်ႉဢၼ်ဢဝ်တၢႆ ၵႃႈၼိူဝ်ၼမ်ႉဢၼ်လႆၵႂႃႇၼၼ်ႉသေယဝ်ႉ၊-

7ဢဝ်ၽႅတ်းသႂ်ႇၵႃႈၼိူဝ် ၵေႃႉဢၼ်ၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉၸဵတ်းၵမ်းလႄႈ ၸီႇယၢင်ႇလႄႈဝႃႈ၊ ၵေႃႉၼၼ်ႉမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။ လိုၼ်းၼၼ်ႉ တၵ်းလႆႈဢဝ်ၼူၵ်ႉဢၼ်ဢသၢၵ်ႈလိပ်းၼၼ်ႉ ပွႆႇလွတ်ႈပႅတ်ႈသေၵႃႈတီႈၵၢင်ပၢင်ႇဢေႃႈ။-

8ၵေႃႉဢၼ်ၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းလႄႈ၊ ႁူၼ်ထႃၶူၼ်ၼူတ်ႇမၼ်း တင်းသဵင်ႈတင်းမူတ်းသေယဝ်ႉ၊ ဢၢပ်ႇၼမ်ႉသေလႄႈတၵ်းလႆႈမူတ်းသႂ်ဢေႃႈ။ လိုၼ်းၼၼ်ႉ မၼ်းတၵ်းလႆႈၶဝ်ႈၵႃႈၼႂ်းတပ်ႉဢေႃႈ။ ၵူၺ်းၵႃႈ မၼ်းတၵ်းလႆႈယူႇၵႃႈၼွၵ်ႈမူဝ်းၵႃႇမၼ်းၸဵတ်းဝၼ်းဢေႃႈ။-

9ဝၼ်းသတ်ႉတမႃႉၼၼ်ႉ မၼ်းတၵ်းလႆႈႁူၼ်ထႃၶူၼ်ႁူဝ်မၼ်း၊ ၼူတ်ႇမၼ်း၊ ၶူၼ်ႁိမ်းတႃမၼ်း၊ ၶူၼ်မၼ်းၵႃႈမီးၼၼ်ႉလႄႈ သၵ်ႉလွႆးၶူဝ်းၼုင်ႈမၼ်းသေယဝ်ႉ၊ ဢၢပ်ႇၼမ်ႉသေလႄႈ တၵ်းလႆႈမူတ်းသႂ်ဢေႃႈ။-

10ဝၼ်းဢႃႉထမႃႉၼၼ်ႉၵေႃႈ မၼ်းတၵ်းလႆႈဢဝ်သူဝ်းပေႃႈဢွၼ်ႇ ဢၼ်ဢမ်ႇမီးဢပႅတ်ႈသွင်တူဝ်၊ သူဝ်းမႄႈဢၼ်ဢမ်ႇမီးဢပႅတ်ႈလႄႈဢမ်ႇပႆႇၶွပ်ႈၶူပ်ႇတူဝ်ၼိုင်ႈ၊ ၽွင်ၶဝ်ႈမုၼ်း ဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉ ဢေးၽႃႇ သိပ်းပုၼ်ႈဢဝ်သၢမ်ပုၼ်ႈတင်းၼမ်ႉမၼ်း လေႃးၶႃႉ ၼိုင်ႈလႄႈ၊-

11ယိတ်ႈပရေႃးႁဵၵ်ႈဢၼ်ႁႂ်ႈမူတ်းသႂ်ၼၼ်ႉ တၵ်းလႆႈဢဝ်ၵေႃႉဢၼ်ၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉ ဢိၵ်ႇတင်းတၢင်းပုၵ်ႈၸေႃႇၸိူဝ်းၼၼ်ႉ သၢၵ်ႈၵၢပ်ႈတီႈထႃႇဝရႃႉၽြႃး ၵႃႈတီႈၽၢႆႇၼႃႈၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။-

12ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်သူဝ်းပေႃႈဢွၼ်ႇတူဝ်ၼိုင်ႈၼၼ်ႉလႄႈ ပုၵ်ႈၸေႃႇပုၼ်ႈယိတ်ႈဢၼ်ၽေႇတူႉၸရိူၵ်ႈလႄႈ ဢဝ်တင်းၼမ်ႉမၼ်း လေႃးၶႃႉ ၼိုင်ႈၼၼ်ႉ ယွင်ႈၵႂႆပုၼ်ႈတၢင်းပုၵ်ႈၸေႃႇဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

13မၼ်းတၵ်းလႆႈဢဝ်သူဝ်းဢွၼ်ႇၼၼ်ႉတၢႆ ၵႃႈၼႂ်းတီႈဢၼ်ဢဝ်တၢႆတူဝ်ယိတ်ႈဢၼ်ၽေႇဢပႅတ်ႈဢိၵ်ႇတင်းတူဝ်ယိတ်ႈ ဢၼ်တုတ်ႇၽႆးတၢႆၼၼ်ႉၼႂ်းထႃႇၼႃႉတီႈမူတ်းၸၢင်ႇၼၼ်ႉဢေႃႈ။ လွင်ႈမၼ်းၸမ်ႉ ယိတ်ႈပရေႃးႁဵၵ်ႈပိူင်ႇဢဝ်ယိတ်ႈဢၼ်ၽေႇတူႉၸရိူၵ်ႈၼၼ်ႉ မိူၼ်ၸိူဝ်ႉၼင်ႇဢၼ်ပိူင်ႇဢဝ်တူဝ်ယိတ်ႈဢၼ်ၽေႇဢပႅတ်ႈၼၼ်ႉဢေႃႈ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။-

14ယိတ်ႈပရေႃးႁဵၵ်ႈတၵ်းလႆႈဢဝ်လိူတ်ႈတူဝ်ဢၼ်ၽေႇတူႉၸရိူၵ်ႈဢပႅတ်ႈၼၼ်ႉၵမ်ႈၽွင်ႈ သႂ်ႇၵႃႈတီႈမႂ်ႁူၶွၼ်ၶႂႃ၊ တင်းမႄႈမိုဝ်းၶွၼ်ၶႂႃ၊ တင်းမႄႈတိၼ်ၶွၼ်ၶႂႃ ၵေႃႉဢၼ်တၵ်းၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉဢေႃႈ။-

15ယိတ်ႈပရေႃးႁဵၵ်ႈတၵ်းလႆႈဢဝ်ၼမ်ႉမၼ်း လေႃးၶႃႉ ၼိုင်ႈၼၼ်ႉၵမ်ႈၽွင်ႈလႄႈ ထွၵ်ႇသႂ်ႇၵႃႈတီႈၽႃႇမိုဝ်းၶွၼ်သၢႆႉမၼ်းသေယဝ်ႉ၊-

16ယိတ်ႈပရေႃးႁဵၵ်ႈတၵ်းလႆႈဢဝ်ၼိဝ်ႉၸီႉၶွၼ်ၶႂႃမၼ်းၸုပ်ႉသႂ်ႇၵႃႈၼႂ်းၼမ်ႉမၼ်းၼၼ်ႉလႄႈ ၽႅတ်းသႂ်ႇၵႃႈတီႈၽၢႆႇၼႃႈထႃႇဝရႃႉၽြႃး ၸဵတ်းၵမ်းဢေႃႈ။-

17ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၵႃႈတီႈမိုဝ်းမၼ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈဢဝ်ၵမ်ႈၽွင်ႈလႄႈ သႂ်ႇၵႃႈတီႈမႂ်ႁူၶွၼ်ၶႂႃ၊ မႄႈမိုဝ်းၶွၼ်ၶႂႃ၊ မႄႈတိၼ်ၶွၼ်ႇၶႂႃၵေႃႉဢၼ်တၵ်းၶၢမ်ႇတၢင်းဢၼ် ႁႂ်ႈမူတ်းသႂ်ၼၼ်ႉ ဢိၵ်ႇတင်း ၵႃႈတီႈလိူတ်ႈတူဝ်ယိတ်ႈ ဢၼ်ၽေႇတူႉၸရိူၵ်ႈၼၼ်ႉဢေႃႈ။-

18ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၵႃႈတီႈမိုဝ်းယိတ်ႈပရေႃးႁဵၵ်ႈၼၼ်ႉ၊ မၼ်းတၵ်းလႆႈဢဝ်ထွၵ်ႇသႂ်ႇၵႃႈၼိူဝ်ႁူဝ်ၵေႃႉဢၼ်တၵ်းၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉလႄႈ ႁဵတ်းတၢင်းဢၼ်ၽေႇဢပႅတ်ႈ ပုၼ်ႈၵေႃႉၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

19လိူဝ်သေၼၼ်ႉ ယိတ်ႈပရေႃးႁဵၵ်ႈတၵ်းလႆႈပုၵ်ႈၸေႃႇယိတ်ႈဢၼ်ၽေႇဢပႅတ်ႈလႄႈ ႁဵတ်းတၢင်းဢၼ်ၽေႇဢပႅတ်ႈ ပုၼ်ႈၵေႃႉဢၼ်တၵ်းၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉ ၵွပ်ႈပိူဝ်ႈတၢင်းဢၼ်မၼ်းဢမ်ႇမူတ်းသႂ်ၼၼ်ႉလႄႈ၊ လိုၼ်းၼၼ်ႉ ဢဝ်တူဝ်ယိတ်ႈဢၼ်တုတ်ႇၽႆးတၢႆဢေႃႈ။-

20ယိတ်ႈပရေႃးႁဵၵ်ႈၼၼ်ႉတၵ်းလႆႈဢဝ်တူဝ်ယိတ်ႈဢၼ်တုတ်ႇၽႆး ဢိၵ်ႇတင်းတၢင်းပုၵ်ႈၸေႃႇၽေႃးၸဵၼ်ႇ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၵေႃႉၼၼ်ႉသေယဝ်ႉ၊ ၵေႃႉၼၼ်ႉတၵ်းလႆႈမူတ်းသႂ်ဢေႃႈ။

21ပေႃးၵေႃႉၼၼ်ႉယၢၵ်ႈၽၢၼ်လႄႈဢမ်ႇတၢတ်ႈၼိူင်ႇလႆႈထၢၼ်ႇၼႆႉၸိုင်၊ မၼ်းတၵ်းလႆႈဢဝ်သူဝ်းပေႃႈဢွၼ်ႇ ပုၼ်ႈယိတ်ႈဢၼ်ၽေႇတူႉၸရိူၵ်ႈပုၼ်ႈဢၼ်တၵ်းယွင်ႈၵႂႆလႄႈ ႁဵတ်းတၢင်းဢၼ်ၽေႇဢပႅတ်ႈမၼ်းတူဝ်ၼိုင်ႈ၊ ဢိၵ်ႇတင်းၽွင်ၶဝ်ႈမုၼ်း ဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉ ဢေးၽႃႇ သိပ်းပုၼ်ႈဢဝ်ပုၼ်ႈၼိုင်ႈ ပုၼ်ႈတၢင်းပုၵ်ႈၸေႃႇၽေႃးၸဵၼ်ႇ တင်းၼမ်ႉမၼ်း လေႃးၶႃႉ ၼိုင်ႈ၊-

22တင်းၼူၵ်ႉတူႈသွင်တူဝ်၊ ဢမ်ႇၼၼ်ၵေႃႈ ၵႃၵႄဢွၼ်ႇသွင်တူဝ် ၸွမ်းၵႃႈၼင်ႇဢၼ်မၼ်းတၢတ်ႈၼိူင်ႇလႆႈၼၼ်ႉ ပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ၊ ပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈ၊-

23မႃးၸူးၵႃႈတီႈယိတ်ႈပရေႃးႁဵၵ်ႈၵႃႈႁိမ်းၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ၵႃႈတီႈၽၢႆႇၼႃႈထႃႇဝရႃႉၽြႃး ပုၼ်ႈလွင်ႈၼင်ႇႁိုဝ် တူဝ်ၸဝ်ႈၵဝ်ႇတၵ်းမူတ်းသႂ်ၼၼ်ႉ ၼႂ်းဝၼ်းဢႃႉထမႃႉၼၼ်ႉလႄႈ၊-

24ယိတ်ႈပရေႃးႁဵၵ်ႈတၵ်းလႆႈဢဝ်သူဝ်းဢွၼ်ႇ ယိတ်ႈဢၼ်ၽေႇတူႉၸရိူၵ်ႈတင်းၼမ်ႉမၼ်း လေႃးၶႃႉ ၼိုင်ႈသေလႄႈ ယွင်ႈၵႂႆ ပုၼ်ႈတင်းပုၵ်ႈၸေႃႇဢၼ်ယွင်ႈၵႂႆ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။-

25မၼ်းဢဝ်သူဝ်းဢွၼ်ႇၼၼ်ႉတၢႆသေယဝ်ႉ၊ ယိတ်ႈပရေႃးႁဵၵ်ႈတၵ်းလႆႈဢဝ်လိူတ်ႈတူဝ်ယိတ်ႈဢၼ်ၽေႇတူႉၸရိူၵ်ႈ ဢပႅတ်ႈၼၼ်ႉၵမ်ႈၽွင်ႈ သႂ်ႇၵႃႈတီႈမႂ်ႁူၶွၼ်ႇၶႂႃ တင်းမႄႈမိုဝ်းၶွၼ်ၶႂႃ တင်းမႄႈတိၼ်ၶွၼ်ၶႂႃ ၵေႃႉဢၼ်တၵ်းၶၢမ်ႇတၢင်းဢၼ် ႁႂ်ႈမူတ်းသႂ်ၼၼ်ႉဢေႃႈ။-

26ယိတ်ႈပရေႃးႁဵၵ်ႈတၵ်းလႆႈဢဝ်ၼမ်ႉမၼ်းၼၼ်ႉၵမ်ႈၽွင်ႈ ထွၵ်ႇသႂ်ႇၵႃႈတီႈၽႃႇမိုဝ်းၶွၼ်သၢႆႉတူဝ်ၸဝ်ႈၵဝ်ႇသေယဝ်ႉ၊-

27ဢဝ်ၼိဝ်ႉၸီႉၶွၼ်ၶႂႃမၼ်း ၸုပ်ႉသႂ်ႇၵႃႈၼႂ်းၼမ်ႉမၼ်းဢၼ်မီးၵႃႈၼႂ်းၽႃႇမိုဝ်းၶွၼ်သၢႆႉမၼ်းၼၼ်ႉသေလႄႈ ၽႅတ်းသႂ်ႇၵႃႈတီႈၽၢႆႇၼႃႈထႃႇဝရႃႉၽြႃး ၸဵတ်းၵမ်းဢေႃႈ။-

28ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၵႃႈတီႈမိုဝ်းမၼ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈဢဝ်ၵမ်ႈၽွင်ႈသႂ်ႇၵႃႈတီႈမႂ်ႁူၶွၼ်ၶႂႃ၊ မႄႈမိုဝ်းၶွၼ်ၶႂႃ၊ မႄႈတိၼ်ၶွၼ်ၶႂႃၵေႃႉဢၼ်တၵ်းၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉ ဢိၵ်ႇတင်းၵႃႈတီႈလိူတ်ႈတူဝ်ယိတ်ႈ ဢၼ်ၽေႇတူႉၸရိူၵ်ႈၼၼ်ႉဢေႃႈ။-

29ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၵႃႈတီႈမိုဝ်းယိတ်ႈပရေႃးႁဵၵ်ႈၼၼ်ႉ၊ မၼ်းတၵ်းလႆႈဢဝ်ထွၵ်ႇသႂ်ႇၵႃႈၼိူဝ်ႁူဝ် ၵေႃႉဢၼ်တၵ်းၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၵေႃႉၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

30ၵေႃႉၼၼ်ႉတၵ်းလႆႈဢဝ်ၼူၵ်ႉတူႈၸိူဝ်းၼၼ်ႉ၊ ဢမ်ႇၼၼ်ၵေႃႈ ၵႃၵႄဢွၼ်ႇၸိူဝ်းၼၼ်ႉ ဢၼ်ၵႃႈၼင်ႇဢၼ်မၼ်းတၢတ်ႈၼိူင်ႇလႆႈၼၼ်ႉ၊-

31ပုၼ်ႈယိတ်ႈဢၼ်ၽေႇဢပႅတ်ႈတူဝ်ၼိုင်ႈ ပုၼ်ႈယိတ်ႈဢၼ်တုတ်ႇၽႆးတူဝ်ၼိုင်ႈ ပုၵ်ႈၸေႃႇဢိၵ်ႇလူၺ်ႈၵၼ်တင်းတၢင်းပုၵ်ႈၸေႃႇၽေႃးၸဵၼ်ႇၼၼ်ႉလႄႈ ယိတ်ႈပရေႃးႁဵၵ်ႈတၵ်းလႆႈႁဵတ်းတၢင်းဢၼ် ၽေႇဢပႅတ်ႈပုၼ်ႈၵေႃႉဢၼ်တၵ်းၶၢမ်ႇတၢင်းဢၼ်မူတ်းသႂ်ၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

32ဢၼ်ၼႆႉၸမ်ႉ၊ ပဵၼ်တြႃး ဢၼ်ၸၢပ်ႈသႅင်ႇၵၼ်တင်းၵေႃႉဢၼ်မီးတၢင်းဢၼ်တုတ်ႈပေႃႇဢွၵ်ႇမႃးလႄႈဢမ်ႇတၢတ်ႈၼိူင်ႇလႆႈ ပုၼ်ႈလွင်ႈၼင်ႇႁိုဝ် တၵ်းႁႂ်ႈတူဝ်ၸဝ်ႈၵဝ်ႇမူတ်းသႂ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

33ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ တင်း ဢႃႇရုၼ်ႇ လႄႈဝႃႈ၊-

34မိူဝ်ႈဢၼ်သူႁွတ်ႈထိုင်ၵႃႈတီႈမိူင်း ၶႃႇၼၢၼ်ႇ ဢၼ်ၵဝ်ပၼ်ပုၼ်ႈဢၼ်သူတၵ်းပိူင်ႇဢဝ်ၼၼ်ႉ၊ ပေႃးၵဝ်ႁႂ်ႈတၢင်းဢၼ်တုတ်ႈပေႃႇဢွၵ်ႇမႃးၼၼ်ႉၸပ်းၵႃႈတီႈႁိူၼ်းသေလင်လင် ၵႃႈၼႂ်းမိူင်းတီႈဢၼ်သူပိူင်ႇၼၼ်ႉၸိုင်၊-

35ၸဝ်ႈႁိူၼ်းၼၼ်ႉ တၵ်းလႆႈၵႂႃႇၸူးၵႃႈတီ ယိတ်ႈပရေႃးႁဵၵ်ႈလႄႈလၢတ်ႈဝႃႈ၊ ၵႃႈတီႈႁိူၼ်းၵဝ်ၶႃႈၼၼ်ႉ မိူၼ်ၼင်ႇႁၢင်ႈပဵၼ်တၢင်းဢၼ်ပေႃႇဢွၵ်ႇမႃးဢေႃႈ၊ ဝႃႈၼင်ႇၼႆသေယဝ်ႉ၊-

36ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇႁႂ်ႈၶဝ်ဢဝ်ၵႃႈမီးတင်းသဵင်ႈတင်းလူင်ဢွၵ်ႇသေၵႃႈၼႂ်းႁိူၼ်းၼၼ်ႉ ၸူဝ်ႈဢၼ်ယိတ်ႈပရေႃးႁဵၵ်ႈဢမ်ႇပႆႇၶဝ်ႈလူၶဝ်ႈတူၺ်းတၢင်းဢၼ်ပေႃႇဢွၵ်ႇမႃးၼၼ်ႉပုၼ်ႈလွင်ႈၼင်ႇႁိုဝ်ၵႃႈဢၼ်မီး ၵႃႈၼႂ်းႁိူၼ်းၼၼ်ႉ တၵ်းဢမ်ႇလႆႈႁွတ်ႈထိုင်တၢင်းဢၼ်ဢမ်ႇမူတ်းသႂ်ၼၼ်ႉဢေႃႈ။ လိုၼ်းၼၼ်ႉ ယိတ်ႈပရေႃးႁဵၵ်ႈတၵ်းလႆႈၶဝ်ႈလူၶဝ်ႈတူၺ်းႁိူၼ်းၼၼ်ႉလႄႈ၊-

37မိူဝ်ႈဢၼ်တူၺ်းတၢင်းဢၼ်ပေႃႇဢွၵ်ႇမႃးၼၼ်ႉ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉမီးၵႃႈၼႂ်းၽႃႁိူၼ်းလႄႈ ပဵၼ်ၶူင်ႈပဵၼ်လုၵ်း၊ ႁၢမ်ႉၶဵဝ်ၶဵဝ်၊ ႁၢမ်ႉလႅင်လႅင်ဝႆႉလႄႈမိူၼ်ၼင်ႇႁၢင်ႈပဵၼ်တႂ်ႈၼႃႈၽႃၼၼ်ႉၸိုင်၊-

38ယိတ်ႈပရေႃးႁဵၵ်ႈတၵ်းလႆႈဢွၵ်ႇၵႃႈၼွၵ်ႈၽၵ်းတူႁိူၼ်းလႄႈ ဢိုတ်းႁိူၼ်းၼၼ်ႉဝႆႉၸဵတ်းဝၼ်းဢေႃႈ။-

39ဝၼ်းသတ်ႉတမႃႉၼၼ်ႉ၊ ယိတ်ႈပရေႃးႁဵၵ်ႈတၵ်းလႆႈသမ်ႉၶိုၼ်းမႃးလူမႃးတူၺ်းလႄႈ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉ ယႂ်ႇၽႄႈမႃးၵႃႈတီႈၽႃႁိူၼ်းၼၼ်ႉၸိုင်၊-

40ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇႁႂ်ႈၶဝ်ၼုၵ်ႈဢဝ်မၢၵ်ႇႁိၼ်ဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉဢွၵ်ႇလႄႈ ပႅတ်ႈၵႃႈတီႈဢၼ်ဢမ်ႇမူတ်းသႂ်ၵႃႈၼွၵ်ႈဝဵင်းလႄႈ၊-

41ႁႂ်ႈၶုတ်းႁွပ်ႈႁိမ်းမၼ်းၵႃႈၼႂ်းႁိူၼ်းၼၼ်ႉဢေႃႈ။ မုၼ်ႈဢၼ်ၶုတ်းလႄႈဢွၵ်ႇၼၼ်ႉၵေႃႈ ၶဝ်တၵ်းလႆႈထွၵ်ႈပႅတ်ႈၵႃႈတီႈဢၼ်ဢမ်ႇမူတ်းသႂ်ၵႃႈၼွၵ်ႈဝဵင်းဢေႃႈ။-

42ၶဝ်တၵ်းလႆႈဢဝ်မၢၵ်ႇႁိၼ်တၢင်ႇဢၼ် ပုတ်ႈသႂ်ႇၼႂ်းတီႈႁွႆႈမၢၵ်ႇႁိၼ်ၸိူဝ်းၼၼ်ႉလႄႈ ဢဝ်တင်း ဢၢင်းၵတေႇဢၼ်မႂ်ႇတႃးသေဢေႃႈ။-

43ႁဵတ်းတၢင်းဢၼ်ၼုၵ်ႈဢဝ်မၢၵ်ႇႁိၼ်လႄႈၶုတ်းႁိူၼ်း ဢိၵ်ႇတင်းတၢင်းဢၼ်ဢဝ်ဢၢင်းၵတေႇဢၼ်မႂ်ႇတႃးၸိူဝ်ႉၼင်ႇၼၼ်သေယဝ်ႉ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉသမ်ႉမႃးလႄႈ ပေႃႇဢွၵ်ႇမႃးၵႃႈၼႂ်းႁိူၼ်းထႅင်ႈၸိုင်၊-

44ယိတ်ႈပရေႃးႁဵၵ်ႈၼၼ်ႉ တၵ်းလႆႈမႃးလူမႃးတူၺ်းလႄႈ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉယႂ်ႇၽေႈမႃးၵႃႈတီႈႁိူၼ်းၼၼ်ႉ ဢမၢၼ်ႇၶၼ်ပဵၼ်ၸိုင်၊ ပဵၼ်တုတ်ႈဢၼ်ၸၢင်ႈၵိၼ်ဢေႃႈ။ ႁိူၼ်းၼၼ်ႉဢမ်ႇမူတ်းသႂ်ဢေႃႈ။-

45မႂ်းတၵ်းလႆႈၵိူၼ်ႇယႃႉ မၢၵ်ႇႁိၼ်၊ မႆႉ၊ ဢၢင်းၵတေႇၵႃႈဢၼ်ပဵၼ်ႁိူၼ်းၼၼ်ႉပႅတ်ႈသေလႄႈ ဢဝ်ၵႂႃႇၵႃႈတီႈဢၼ်ဢမ်ႇမူတ်းသႂ်ၵႃႈၼွၵ်ႈဝဵင်းဢေႃႈ။-

46လိူဝ်သေၼၼ်ႉဢမ်ႇၵႃး၊ ၼႂ်းၶိင်ႇၵႃႇလႃႉၸူဝ်ႈဢၼ်ဢိုတ်းႁိူၼ်းၼၼ်ႉဝႆႉၼၼ်ႉတဵမ်တဵမ်၊ ၵေႃႉဢၼ်ၶဝ်ႈၵႃႈၼႂ်းႁိူၼ်းၼၼ်ႉမႅၼ်ႈၼၼ်ႉ ဢမ်ႇမူတ်းသႂ်ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈၼၼ်ႉဢေႃႈ။-

47ၵေႃႉဢၼ်ၼွၼ်းၵႃႈၼႂ်းႁိူၼ်းၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေဢေႃႈ။ ၵေႃႉဢၼ်ၵိၼ်ၵႃႈၼႂ်းႁိူၼ်းၼၼ်ႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေဢေႃႈ။

48မိူဝ်ႈဢၼ် ယိတ်ႈပရေႃးႁဵၵ်ႈမႃးလူမႃးတူၺ်းၼၼ်ႉ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉ ဢမ်ႇယႂ်ႇၽႄႈမႃးၵႃႈတီႈႁိူၼ်း လိုၼ်းသေဢၼ်ဢဝ်ဢၢင်းၵတေႇဢၼ်မႂ်ႇတႃးႁိူၼ်းၼၼ်ႉယဝ်ႉၼၼ်ႉၸိုင်၊ ၵွပ်ႈပိူဝ်ႈဢၼ်တၢင်းဢၼ်ပေႃႇဢွၵ်ႇမႃးၼၼ်ႉႁၢႆလႄႈ၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ႁိူၼ်းၼၼ်ႉမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။-

49လွင်ႈၼင်ႇႁိုဝ်တၵ်းႁႂ်ႈႁိူၼ်းၼၼ်ႉမူတ်းသႂ်ၸိုင်၊ မၼ်းတၵ်းလႆႈဢဝ်ၼူၵ်ႉသွင်တူဝ်၊ ၼိူဝ်ႉမႆႉ ဢႃႇရိတ်ႉ ၊ ၸိူၵ်ႈဢၼ်လႅင်ၵမ်ႇ တင်းယွတ်ႈတူၼ်ႈ ႁုတ်ႉသူပ်ႇ ၸိူဝ်းၼၼ်ႉလႄႈ၊-

50ဢဝ်ၼူၵ်ႉတူဝ်ၼိုင်ႈ တၢႆၵႃႈၼႂ်းမေႃႈလိၼ်ၵႃႈၼိူဝ်ၼမ်ႉဢၼ်ဢဝ်ၼမ်ႉဢၼ်လႆၵႂႃႇယူႇၼၼ်ႉ သႂ်ႇဝႆႉၼၼ်ႉသေယဝ်ႉ၊-

51ဢဝ်ၼိူဝ်ႉမႆႉ ဢႃႇရိတ်ႉ ၊ ယွတ်ႈတူၼ်ႈ ႁုတ်ႉသူပ်ႇ ၊ ၸိူၵ်ႈဢၼ်လႅင်ၵမ်ႇ၊ ၼူၵ်ႉတူဝ်ဢၼ်ဢသၢၵ်ႈလိပ်းယူႇၼၼ်ႉၸိူဝ်းၼၼ်ႉ ၸွမ်ႇၸုမ်ႇၵႃႈၼႂ်းလိူတ်ႈၼူၵ်ႉဢၼ်ဢဝ်တၢႆၼၼ်ႉ တင်းၼမ်ႉဢၼ်ဢဝ်ၼမ်ႉဢၼ်လႆၵႂႃႇယူႇၼၼ်ႉ သႂ်ႇဝႆႉၼၼ်ႉလႄႈ၊ ၽႅတ်းသႂ်ႇႁိူၼ်းၼၼ်ႉၸဵတ်းၵမ်းဢေႃႈ။-

52မၼ်းတၵ်းလႆႈဢဝ်လိူတ်ႈၼူၵ်ႉ၊ ၼမ်ႉဢၼ်လႆၵႂႃႇယူႇ၊ ၼူၵ်ႉဢၼ်ဢသၢၵ်ႈလိပ်းယူႇ၊ ၼိူဝ်ႉမႆႉ ဢႃႇရိတ်ႉ ၊ ယွတ်ႈတူၼ်ႈ ႁုတ်ႉသူပ်ႇ တင်းၸိူၵ်ႈဢၼ်လႅင်ၵမ်ႇၸိူဝ်းၼၼ်ႉ ႁႂ်ႈမူတ်းသႂ်ဢေႃႈ။-

53ၵူၺ်းၵႃႈ မၼ်းတၵ်းလႆႈဢဝ်ၼူၵ်ႉဢၼ်ဢသၢၵ်ႈလိပ်းၼၼ်ႉပွႆႇလွတ်ႈပႅတ်ႈသေၵႃႈတီႈၵၢင်ပၢင်ႇလႄႈ ႁဵတ်းတၢင်းဢၼ်ၽေႇဢပႅတ်ႈ ပုၼ်ႈႁိူၼ်းၼၼ်ႉသေယဝ်ႉ၊ ႁိူၼ်းၼၼ်ႉတၵ်းမီးတၢင်းဢၼ်မူတ်းသႂ်ဢေႃႈ။

54ဢၼ်ၼႆႉၸမ်ႉ၊ ပဵၼ်တြႃးတၢင်းဢၼ်တုတ်ႈပေႃႇဢွၵ်ႇမႃးၵူႈၸိူဝ်ႉၵူႈပိူင် ဢၼ်ၸႃႉၸဵမ် တုတ်ႈၶႆးၽွၵ်ႈလႄႈ၊-

55တုတ်ႈဢၼ်ၸပ်းၵႃႈတီႈၶူဝ်းၼုင်ႈ၊ တုတ်ႈဢၼ်ၸပ်းၵႃႈတီႈႁိူၼ်း၊-

56တုမ်ႇ၊ ႁဝ်ႈ၊ ၵႂၢၵ်ႈၸိူဝ်းၼၼ်ႉ၊-

57ႁႂ်ႈလႆႈသွၼ်ပၼ်လႄႈႁူႉ ဢၼ်မူတ်းသႂ်၊ ဢၼ်ဢမ်ႇမူတ်းသႂ်ဢေႃႈ။ ဢၼ်ၼႆႉၸမ်ႉ၊ ပဵၼ်တြႃးတုတ်ႈဢေႃႈ၊ ဝႃႈၼင်ႇၼႆဢေႃႈ။