Leviticus 13 — Shan

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ တင်း ဢႃႇရုၼ်ႇ လႄႈဝႃႈ၊-

2ပေႃးၵူၼ်းသေၵေႃႉမီးတုမ်ႇ၊ ဢမ်ႇၼၼ် ႁဝ်ႈ၊ ဢမ်ႇၼၼ် ၵႂၢၵ်ႈၵႃႈတီႈၼင်ၼိူဝ်ႉမၼ်းလႄႈ ပေႃႇဢွၵ်ႇမႃးမိူၼ်ၸိူဝ်ႉၼင်ႇ လၢၵ်ႈၶၼႃႇတုတ်ႈၼၼ်ႉ ၵႃႈတီႈၼင်ၼိူဝ်ႉမၼ်းၸိုင်၊ တၵ်းလႆႈႁွင်ႉဢဝ်ၵေႃႉၼၼ်ႉ ၵႂႃႇၵႃႈတီႈယိတ်ႈပရေႃးႁဵၵ်ႈ ဢႃႇရုၼ်ႇ ၊ ဢမ်ႇၼၼ် ၵႃႈတီႈယိတ်ႈပရေႃးႁဵၵ်ႈသေၵေႃႉသေၵူၼ်းဢေႃႈ။-

3ယိတ်ႈပရေႃးႁဵၵ်ႈၼၼ်ႉ တၵ်းလႆႈတူၺ်းတၢင်းဢၼ်ပေႃႇဢွၵ်ႇမႃးၵႃႈတီႈၼင်ၼိူဝ်ႉၵေႃႉၼၼ်ႉလႄႈ၊ ပေႃးၶူၼ်ဢၼ်မီးၵႃႈတီႈတၢင်းဢၼ်ပေႃႇဢွၵ်ႇမႃးၼၼ်ႉၽိူၵ်ႇဝႆႉလႄႈ တၢင်းဢၼ်ပေႃႇဢွၵ်ႇမႃးၼၼ်ႉ မိူၼ်ႁၢင်ႈၸပ်းၸွႆးၵႃႈတႂ်ႈၼင်ၼိူဝ်ႉမၼ်းၸိုင်၊ ပဵၼ်တုတ်ႈဢမၢၼ်ႇၶၼ်ပဵၼ်ဢေႃႈ။ ယိတ်ႈပရေႃးႁဵၵ်ႈတူၺ်းၵေႃႉၼၼ်ႉသေယဝ်ႉ၊ တၵ်းလႆႈၸီႇယၢင်ႇလႄႈဝႃႈ၊ မၼ်းၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။-

4ပေႃးၵႂၢၵ်ႈၼၼ်ႉၽိူၵ်ႇဝႆႉၵႃႈတီႈၼင်ၼိူဝ်ႉမၼ်းလႄႈ ဢမ်ႇမိူၼ်ၼင်ႇႁၢင်ႈၸပ်းၸွႆးၵႃႈတႂ်ႈၼင်ၼိူဝ်ႉမၼ်းလႄႈ ၶူၼ်မၼ်းဢမ်ႇၽိူၵ်ႇၸိုင်၊ ယိတ်ႈပရေႃးႁဵၵ်ႈတၵ်းလႆႈဢဝ်ၵေႃႉဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ ၶျုၵ်ႈဝႆႉ ၸဵတ်းဝၼ်းတဵမ်တဵမ်ဢေႃႈ။-

5ဝၼ်းသတ်ႉတမႃႉၼၼ်ႉ ယိတ်ႈပရေႃးႁဵၵ်ႈတၵ်းလႆႈတူၺ်းမၼ်းလႄႈ ပေႃးတၢင်းဢၼ်ပေႃႇဢွၵ်ႇမႃးၵႃႈတီႈၼင်ၼိူဝ်ႉမၼ်းၼၼ်ႉ ဢမ်ႇယႂ်ႇၽႄႈ၊ ဢမ်ႇယွမ်းၵႂႃႇလႄႈယူႇၸိုင်၊ တၵ်းလႆႈသမ်ႉဢဝ်မၼ်းၶျုၵ်ႈဝႆႉၸဵတ်းဝၼ်းတဵမ်တဵမ်ထႅင်ႈဢေႃႈ။-

6လိုၼ်းၼၼ်ႉ ဝၼ်းသတ်ႉတမႃႉၼၼ်ႉ၊ ယိတ်ႈပရေႃးႁဵၵ်ႈတၵ်းသမ်ႉလႆႈၶိုၼ်းတူၺ်းမၼ်းလႄႈ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉ ဢမ်ႇယႂ်ႇၽႄႈမႃးၵႃႈၼႂ်းၼင်မၼ်းလႄႈ ပဵၼ်ႁၢမ်ႉလမ်လမ်ဝႆႉၸိုင်၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉ မူတ်းသႂ်ဢေႃႈ၊ ဝႃႈၼင်ႇၼႆဢေႃႈ။ ပဵၼ်ႁဝ်ႈၵူၺ်းဢေႃႈ။ မၼ်းတၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ လႆႈမူတ်းသႂ်ဢေႃႈ။-

7ပေႃးႁဝ်ႈၼၼ်ႉသမ်ႉၶိုၼ်းယႂ်ႇၽႄႈမႃးၵႃႈၼႂ်းၼင်မၼ်း လိုၼ်းသေမၼ်းၼႄပျႃးတူဝ်ၸဝ်ႈၵဝ်ႇ တီႈယိတ်ႈပရေႃးႁဵၵ်ႈယဝ်ႉၼၼ်ႉၸိုင်၊ မၼ်းသမ်ႉတၵ်းလႆႈၶိုၼ်းၼႄပျႃးတူဝ်ၸဝ်ႈၵဝ်ႇတီႈယိတ်ႈပရေႃးႁဵၵ်ႈထႅင်ႈလႄႈ၊-

8ယိတ်ႈပရေႃးႁဵၵ်ႈၼၼ်ႉတူၺ်းလွင်ႈဢၼ်ႁဝ်ႈၼၼ်ႉ ယႂ်ႇၽႄႈမႃးၼၼ်ႉသေယဝ်ႉ၊ ယိတ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ပဵၼ်တုတ်ႈဢေႃႈ။

9မိူဝ်ႈဢၼ်သေၵေႃႉသေၵူၼ်းမီးတၢင်းဢၼ်တုတ်ႈပေႃႇဢွၵ်ႇမႃးၸိုင်၊ တၵ်းလႆႈႁွင်ႉမၼ်းမႃးၵႃႈတီႈယိတ်ႈပရေႃးႁဵၵ်ႈဢေႃႈ။-

10ယိတ်ႈပရေႃးႁဵၵ်ႈၼၼ်ႉ တၵ်းလႆႈတူၺ်းမၼ်းလႄႈ၊ ပေႃးတုမ်ႇဢၼ်ၽိူၵ်ႇဝႆႉၼၼ်ႉ ပွင်းၶိုၼ်ႈၵႃႈၼႂ်းၼင်မၼ်းလႄႈ ႁႂ်ႈၶူၼ်မၼ်းၽိူၵ်ႇဝႆႉသေလႄႈ မီးၼိူဝ်ႉဢၼ်လႅင်ႁၢႆၵႃႈတီႈတုမ်ႇမၼ်းၸိုင်၊-

11ပဵၼ်တုတ်ႈဢၼ်ၵဝ်ႇၵႃႈၼႂ်းၼင်ၼိူဝ်ႉမၼ်းဢေႃႈ။ ယိတ်ႈပရေႃးႁဵၵ်ႈၼၼ်ႉ တၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆလႄႈ၊ ၶျုၵ်ႈမၼ်းဝႆႉၵွပ်ႈပိူဝ်ႈဢၼ်မၼ်းဢမ်ႇမူတ်းသႂ်ၼၼ်ႉဢေႃႈ။-

12ပေႃးတုတ်ႈၼၼ်ႉယႂ်ႇၽႄႈမႃးၵႃႈတီႈၼင်မၼ်းလႄႈ တုတ်ႈၼၼ်ႉၸွတ်ႇတူဝ်ႈၼင်ၵေႃႉဢၼ်ပဵၼ်တုတ်ႈၼၼ်ႉတင်းတူဝ်တင်းၶိင်း ဢဝ်ၵႃႈတီႈၸိၵ်းႁူဝ်တေႃႇထိုင်ႁွတ်ႈၽႃႇတိၼ် ၵႃႈဢၼ်ယိတ်ႈပရေႃးႁဵၵ်ႈတူၺ်းၵူႈတီႈၵူႈလႅၼ်ၼၼ်ႉၸိုင်၊-

13ယိတ်ႈပရေႃးႁဵၵ်ႈၼၼ်ႉတၵ်းလႆႈတူၺ်းလႄႈ ပေႃးတုတ်ႈၼၼ်ႉၸွတ်ႇတူဝ်ႈၼင်မၼ်းၼၼ်ႉၵႂႃႇတင်းတူဝ်တင်းၶိင်းၸိုင်၊ တၵ်းလႆႈၸီႇယၢင်ႇတီႈၵေႃႉဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉလႄႈဝႃႈ၊ မူတ်းသႂ်ယူႇ၊ ဝႃႈၼင်ႇၼႆဢေႃႈ။ မၼ်းမူတ်းသႂ်ၵွပ်ႈပိူဝ်ႈဢၼ်တင်းတူဝ်တင်းၶိင်းၽိူၵ်ႇၵႂႃႇၼၼ်ႉဢေႃႈ။-

14ၵူၺ်းၵႃႈ ပေႃးၼိူဝ်ႉဢၼ်လႅင်ႁၢႆပေႃႇဢွၵ်ႇမႃးတီႈမၼ်းၼၼ်ႉၸိုင်၊ မၼ်းဢမ်ႇမူတ်းသႂ်။-

15ယိတ်ႈပရေႃးႁဵၵ်ႈတၵ်းလႆႈတူၺ်းၼိူဝ်ႉ ဢၼ်လႅင်ႁၢႆၼၼ်ႉလႄႈ ၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ၼိူဝ်ႉဢၼ်လႅင်ႁၢႆၼၼ်ႉ ဢမ်ႇမူတ်းသႂ်၊ ပဵၼ်တုတ်ႈဢေႃႈ။-

16ပေႃးၼိူဝ်ႉဢၼ်လႅင်ႁၢႆၼၼ်ႉၶၢႆႉပုတ်ႈသေလႄႈ သမ်ႉၶိုၼ်းၽိူၵ်ႇၵႂႃႇၸိုင်၊ မၼ်းတၵ်းသမ်ႉလႆႈၶိုၼ်းမႃးၵႃႈတီႈယိတ်ႈပရေႃးႁဵၵ်ႈဢေႃႈ။-

17ယိတ်ႈပရေႃးႁဵၵ်ႈၼၼ်ႉတၵ်းလႆႈတူၺ်းမၼ်းလႄႈ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉ သမ်ႉၶိုၼ်းၽိူၵ်ႇၵႂႃႇယဝ်ႉၸိုင်၊ ယိတ်ႈပရေႃးႁဵၵ်ႈၼၼ်ႉ တၵ်းလႆႈၸီႇယၢင်ႇလႄႈဝႃႈ၊ ၵေႃႉဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ မူတ်းသႂ်ဢေႃႈ၊ ဝႃႈၼင်ႇၼႆလႄႈ၊ မၼ်းၼၼ်ႉမူတ်းသႂ်ယူႇဢေႃႈ။

18ပေႃးပဵၼ်ၽီ ၵႃႈတီႈၼင်ၼိူဝ်ႉလႄႈႁၢႆသေယဝ်ႉ၊-

19တုမ်ႇဢၼ်ၽိူၵ်ႇဝႆႉ၊ ဢမ်ႇၼၼ် ၵႂၢၵ်ႈဢၼ်ၽိူၵ်ႇလႅင်ဝႆႉၼၼ်ႉပေႃႇဢွၵ်ႇမႃးၵႃႈတီႈႁွႆႈၸဵပ်းၼၼ်ႉၸိုင်၊ တၵ်းလႆႈဢဝ်ၼႄပျႃးတီႈယိတ်ႈပရေႃးႁဵၵ်ႈလႄႈ၊-

20ယိတ်ႈပရေႃးႁဵၵ်ႈၼၼ်ႉ တၵ်းလႆႈတူၺ်းလႄႈ၊ ပေႃးမိူၼ်ၼင်ႇႁၢင်ႈၸပ်းၸွႆးၵႃႈတႂ်ႈၼင်လႄႈ ၶူၼ်မၼ်းၽိူၵ်ႇဝႆႉၸိုင်၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ပဵၼ်တုတ်ႈဢၼ်ဢွၵ်ႇၵႃႈၼႂ်းၽီၼၼ်ႉဢေႃႈ။-

21ၵူၺ်းၵႃႈ မိူဝ်ႈဢၼ်ယိတ်ႈပရေႃးႁဵၵ်ႈတူၺ်းၼၼ်ႉ၊ ပေႃးဢမ်ႇမီးၶူၼ်ဢၼ်ၽိူၵ်ႇဝႆႉ၊ ဢမ်ႇၸပ်းၸွႆးၵႃႈတႂ်ႈၼင်မၼ်းလႄႈ ပဵၼ်ႁၢမ်ႉလမ်လမ်ဝႆႉၸိုင်၊ ယိတ်ႈပရေႃးႁဵၵ်ႈတၵ်းလႆႈဢဝ်ၵေႃႉၼၼ်ႉၶျုၵ်ႈဝႆႉၸဵတ်းဝၼ်းတဵမ်တဵမ်ဢေႃႈ။-

22ပေႃးယႂ်ႇၽႄႈမႃးၵႃႈၼႂ်းၼင်မၼ်းၸိုင်၊ ယိတ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ပဵၼ်တုတ်ႈဢေႃႈ။-

23ဢမ်ႇၼၼ်ၵေႃႈ ပေႃးၵႂၢၵ်ႈၼၼ်ႉဢမ်ႇၶၢႆႉတီႈ၊ ဢမ်ႇယႂ်ႇၽႄႈမႃးၸိုင်၊ ပဵၼ်ႁွႆးၸဵပ်းၽီဢေႃႈ။ ယိတ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။

24ပေႃးမီးတၢင်းၸဵပ်းၽႆးမႆႈၵႃႈတီႈၼင်ၼိူဝ်ႉလႄႈ၊ ၼိူဝ်ႉလႅင်တၢင်းၸဵပ်းၽႆးမႆႈၼၼ်ႉ မီးၵႂၢၵ်ႈဢၼ်ၽိူၵ်ႇလႅင်ဝႆႉ၊ ဢမ်ႇၼၼ်ၵေႃႈ ၽိူၵ်ႇဝႆႉၼၼ်ႉၸိုင်၊-

25ယိတ်ႈပရေႃးႁဵၵ်ႈတၵ်းလႆႈတူၺ်းဢေႃႈ။ ပေႃးၶူၼ်ၵႂၢၵ်ႈၼၼ်ႉၽိူၵ်ႇၵႂႃႇယဝ်ႉလႄႈ မိူၼ်ၼင်ႇႁၢင်ႈၸပ်းၸွႆးၵႃႈတႂ်ႈၼင်မၼ်းၸိုင် ပဵၼ်တုတ်ႈဢၼ်ဢွၵ်ႇၵႃႈၼႂ်းတၢင်းၸဵပ်းၽႆးမႆႈၼၼ်ႉဢေႃႈ။ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ပဵၼ်တုတ်ႈဢေႃႈ။-

26မိူဝ်ႈဢၼ်ယိတ်ႈပရေႃးႁဵၵ်ႈတူၺ်းၼၼ်ႉ၊ ပေႃးဢမ်ႇမီးၶူၼ်ဢၼ်ၽိူၵ်ႇဝႆႉၼၼ်ႉ ၵႃႈတီႈၵႂၢၵ်ႈၼၼ်ႉ၊ ဢမ်ႇၸပ်းၸွႆးၵႃႈတႂ်ႈၼင်မၼ်းလႄႈ ပဵၼ်ႁၢမ်ႉလမ်လမ်ဝႆႉၸိုင်၊ ယိတ်ႈပရေႃးႁဵၵ်ႈတၵ်းလႆႈဢဝ်ၵေႃႉၼၼ်ႉၶျုၵ်ႈဝႆႉၸဵတ်းဝၼ်းတဵမ်တဵမ်ဢေႃႈ။-

27ဝၼ်းသတ်ႉတမႃႉၼၼ်ႉ ယိတ်ႈပရေႃးႁဵၵ်ႈတၵ်းလႆႈတူၺ်းၵေႃႉၼၼ်ႉလႄႈ၊ ပေႃးၵႂၢၵ်ႈၼၼ်ႉယႂ်ႇၽႄႈမႃးၵႃႈတီႈၼင်မၼ်းၸိုင်၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ပဵၼ်တုတ်ႈဢေႃႈ။-

28ဢမ်ႇၼၼ်ၵေႃႈ ပေႃးၵႂၢၵ်ႈၼၼ်ႉဢမ်ႇၶၢႆႉတီႈ၊ ဢမ်ႇယႂ်ႇၽႄႈမႃးၵႃႈတီႈၼင်မၼ်းလႄႈ ပဵၼ်ႁၢမ်ႉလမ်လမ်ဝႆႉၸိုင်၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇတီႈၵေႃႉၼၼ်ႉလႄႈဝႃႈ မူတ်းသႂ်ယူႇ၊ ဝႃႈၼင်ႇၼႆဢေႃႈ။ ပဵၼ်ႁွႆးၸဵပ်းၽႆးမႆႈၵူၺ်းဢေႃႈ။

29ပေႃးၵူၼ်းၸၢႆးၵူၼ်းယိင်းမီးတၢင်းဢၼ်ပေႃႇဢွၵ်ႇမႃးၵႃႈတီႈႁူဝ်မၼ်း၊ ဢမ်ႇၼၼ် ၵႃႈတီႈၵႅမ်ႈမၼ်းၵၢင်းမၼ်းၸိုင်၊-

30ယိတ်ႈပရေႃးႁဵၵ်ႈတၵ်းလႆႈတူၺ်းလႄႈ၊ ပေႃးမိူၼ်ၼင်ႇႁၢင်ႈၸပ်းၸွႆးၵႃႈတႂ်ႈၼင်လႄႈ မီးၶူၼ်ဢၼ်လိူင်လိူင်သေးသေးဝႆႉၸိုင်၊ ယိတ်ႈပရေႃးႁဵၵ်ႈၼၼ်ႉ တၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်၊ ဝႃႈၼင်ႇၼႆဢေႃႈ။ ၵႃႈတီႈႁူဝ်သေဢမ်ႇဝႃႈ၊ ၵႃႈတီႈၵႅမ်ႈတီႈၵၢင်းသေဢမ်ႇဝႃႈ၊ ပဵၼ်ၶႆးၽွၵ်ႈ ပဵၼ်တုတ်ႈဢေႃႈ။-

31မိူဝ်ႈဢၼ်ယိတ်ႈပရေႃးႁဵၵ်ႈတူၺ်းတၢင်းဢၼ်ၶႆးၽွၵ်ႈပေႃႇဢွၵ်ႇမႃးၼၼ်ႉ၊ ပေႃးဢမ်ႇမိူၼ်ၼင်ႇႁၢင်ႈ ၸပ်းၸွႆးၵႃႈတႂ်ႈၼင်လႄႈ ဢမ်ႇမီးၶူၼ်ဢၼ်လမ်ၸိုင်၊ ယိတ်ႈပရေႃးႁဵၵ်ႈၼၼ်ႉ တၵ်းလႆႈဢဝ်ၵေႃႉဢၼ်မီးတၢင်းဢၼ်ၶႆးၽွၵ်ႈပေႃႇဢွၵ်ႇမႃးၼၼ်ႉ ၶျုၵ်ႈဝႆႉၸဵတ်းဝၼ်းတဵမ်တဵမ်ဢေႃႈ။-

32ဝၼ်းသတ်ႉတမႃႉၼၼ်ႉ ယိတ်ႈပရေႃးႁဵၵ်ႈတၵ်းလႆႈတူၺ်းတၢင်းဢၼ်ပေႃႇဢွၵ်ႇၼၼ်ႉလႄႈ၊ ပေႃးၶႆးၽွၵ်ႈၼၼ်ႉဢမ်ႇယႂ်ႇၽႄႈ၊ ဢမ်ႇမီးၶူၼ်ဢၼ်လိူင်လိူင်ဝႆႉ၊ ဢမ်ႇမိူၼ်ၼင်ႈႁၢင်ႈၸပ်းၸွႆးၵႃႈတႂ်ႈၼင်မၼ်းၸိုင်၊-

33တၵ်းလႆႈႁူၼ်ထႃၶူၼ်ၵေႃႉၼၼ်ႉပႅတ်ႈဢေႃႈ။ ၶူၼ်ၵႃႈတီႈၶႆးၽွၵ်ႈၼၼ်ႉၸမ်ႉ၊ ဢမ်ႇလႆႈႁူၼ်လႆႈထႃ။ ယိတ်ႈပရေႃးႁဵၵ်ႈတၵ်းလႆႈသမ်ႉၶိုၼ်းဢဝ်မၼ်းၶျုၵ်ႈဝႆႉၸဵတ်းဝၼ်းတဵမ်တဵမ်ဢေႃႈ။-

34ဝၼ်းသတ်ႉတမႃႉၼၼ်ႉ၊ ယိတ်ႈပရေႃးႁဵၵ်ႈတၵ်းလႆႈတူၺ်းၶႆးၽွၵ်ႈၼၼ်ႉလႄႈ၊ ပေႃးၶႆးၽွၵ်ႈၼၼ်ႉဢမ်ႇယႂ်ႇၽႄႈၵႃႈတီႈၼင်၊ ဢမ်ႇမိူၼ်ၼင်ႇႁၢင်ႈၸပ်းၸွႆးၵႃႈတႂ်ႈၼင်ၸိုင်၊ ယိတ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။ ၵေႃႉၼၼ်ႉ တၵ်းလႆႈသၵ်ႉလွႆးၶူဝ်းၼုင်ႈမၼ်းသေလႄႈ လႆႈမူတ်းသႂ်ဢေႃႈ။-

35ပေႃးၶႆးၽွၵ်ႈၼၼ်ႉယႂ်ႇၽႄႈမႃးၵႃႈတီႈၼင်မၼ်းလိုၼ်းသေမၼ်းမူတ်းသႂ်ယဝ်ႉၼၼ်ႉၸိုင်၊-

36ယိတ်ႈပရေႃးႁဵၵ်ႈၼၼ်ႉတၵ်းလႆႈသမ်ႉၶိုၼ်းတူၺ်းၵေႃႉၼၼ်ႉလႄႈ၊ ပေႃးၶႆးၽွၵ်ႈၼၼ်ႉယႂ်ႇၽႄႈၵႃႈတီႈ ၼင်မၼ်းၸိုင်၊ ယိတ်ႈပရေႃးႁဵၵ်ႈဢမ်ႇလႆႈႁႃ ၶူၼ်ဢၼ်လိူင်လိူင်ဝႆႉၼၼ်ႉယဝ်ႉ။ ၵေႃႉၼၼ်ႉဢမ်ႇမူတ်းသႂ်။-

37ဢမ်ႇၼၼ်ၵေႃႈ ပေႃးၶႆးၽွၵ်ႈၼၼ်ႉမိူၼ်ၼင်ႇႁၢင်ႈၵိုတ်းသဝ်းယူႇလႄႈ ၶူၼ်ဢၼ်လမ်လမ်ဝႆႉ ဢွၵ်ႇမႃးၸိုင်၊ ၶႆးၽွၵ်ႈၼၼ်ႉႁၢႆလႄႈ ၵေႃႉၼၼ်ႉမူတ်းသႂ်ယူႇဢေႃႈ။ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။

38ပေႃးၵူၼ်းၸၢႆးၵူၼ်းယိင်းမီးၵႂၢၵ်ႈၵႃႈတီႈၼင်ၼိူဝ်ႉၶဝ်ဢၼ်ဝႃႈ ၵႂၢၵ်ႈဢၼ်ၽိူၵ်ႇဝႆႉၼၼ်ႉၸိုင်၊-

39ယိတ်ႈပရေႃးႁဵၵ်ႈတၵ်းလႆႈတူၺ်းလႄႈ၊ ပေႃးၵႂၢၵ်ႈဢၼ်မီးၵႃႈတီႈၼင်ၼိူဝ်ႉၶဝ်ၼၼ်ႉ မီးႁၢင်ႈၽၢင်ဢၼ်မူၼ်ႇၵႄႇဝႆႉၸိုင်၊ ပဵၼ်လၢင်ႇဢၼ်ဢွၵ်ႇၵႃႈတီႈၼင်ဢေႃႈ။ ၵေႃႉၼၼ်ႉမူတ်းသႂ်ယူႇဢေႃႈ။-

40ၵေႃႉဢၼ်ၶူၼ်ႁူဝ်ႁူင်ႈၼၼ်ႉ၊ ႁူဝ်ၵဵင်ႈသေၵေႃႈ မူတ်းသႂ်ယူႇဢေႃႈ။-

41ၵေႃႉဢၼ်ၶူၼ်ႁူဝ်ၼႃႈၽၢၵ်ႇႁူင်ႈၼၼ်ႉ၊ ၼႃႈၽၢၵ်ႇၵဵင်ႈသေၵေႃႈ မူတ်းသႂ်ယူႇဢေႃႈ။-

42ၵႃႈတီႈႁူဝ်ဢၼ်ၵဵင်ႈသေဢမ်ႇဝႃႈ၊ ၵႃႈတီႈၼႃႈၽၢၵ်ႇဢၼ်ၵဵင်ႈသေဢမ်ႇဝႃႈ၊ ပေႃးတၢင်းဢၼ်ပေႃႇဢွၵ်ႇမႃးလႄႈ ၽိူၵ်ႇလႅင်ဝႆႉၸိုင် ပဵၼ်တုတ်ႈဢၼ်ဢွၵ်ႇၵႃႈတီႈႁူဝ်ဢၼ်ၵဵင်ႈ၊ ဢမ်ႇၼၼ် ၵႃႈတီႈၼႃႈၽၢၵ်ႇဢၼ်ၵဵင်ႈၼၼ်ႉဢေႃႈ။-

43မိူဝ်ႈၼၼ်ႉ ယိတ်ႈပရေႃးႁဵၵ်ႈတၵ်းလႆႈတူၺ်းၵေႃႉၼၼ်ႉလႄႈ၊ ပေႃးတုမ်ႇတၢင်းဢၼ်ပေႃႇဢွၵ်ႇမႃးၵႃႈတီႈႁူဝ်ဢၼ်ၵဵင်ႈ ၼႃႈၽၢၵ်ႇဢၼ်ၵဵင်ႈၼၼ်ႉ ၽိူၵ်ႇလႅင်ဝႆႉမိူၼ်ၸိူဝ်ႉၼင်ႇတုတ်ႈၵႃႈတီႈၼင်ၼိူဝ်ႉၼၼ်ႉၸိုင်၊-

44ၵေႃႉၼၼ်ႉဢမ်ႇမူတ်းသႂ်။ ပဵၼ်ၵူၼ်းတုတ်ႈဢေႃႈ။ ၵွပ်ႈပိူဝ်ႈဢၼ် တၢင်းဢၼ်ပေႃႇဢွၵ်ႇမႃးၼၼ်ႉမီးၵႃႈတီႈႁူဝ်မၼ်းလႄႈ၊ ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇလႄႈဝႃႈ၊ ၵေႃႉၼၼ်ႉဢမ်ႇမူတ်းသႂ်လႃးလႃး၊ ဝႃႈၼင်ႇၼႆဢေႃႈ။

45ၵေႃႉဢၼ်ပဵၼ်တုတ်ႈၼၼ်ႉတၵ်းလႆႈၼုင်ႈၶူဝ်းၼုင်ႈဢၼ်သိၵ်ႇၼၼ်ႉဢေႃႈ။ ၶူၼ်ႁူဝ်မၼ်းၵေႃႈတၵ်းလႆႈၽႄႇဝႆႉဢေႃႈ။ မၼ်းတၵ်းလႆႈႁူမ်ႇသီႇသူပ်းၽၢႆႇၼိူဝ်သေလႄႈႁွင်ႉသႅၼ်ႇလႄႈဝႃႈ၊ ဢမ်ႇမူတ်းသႂ်၊ ဢမ်ႇမူတ်းသႂ်၊ ဝႃႈၼင်ႇၼႆဢေႃႈ။-

46ၶိင်ႇၵႃႇလႃႉမိုဝ်ႉဝၼ်းၵႃႈဢၼ်တၢင်းဢၼ်ပေႃႇဢွၵ်ႇမႃးၼၼ်ႉ ယင်းမီးယူႇတီႈမၼ်းၼၼ်ႉတဵမ်တဵမ်၊ မၼ်းၵူဝ်ႈၵိူၵ်ႇယူႇဢေႃႈ။ မၼ်းဢမ်ႇမူတ်းသႂ်လႄႈ တၵ်းလႆႈယူႇၵေႃႉလဵဝ်ၵူၺ်းမၼ်းဢေႃႈ။ တီႈဢၼ်မၼ်းယူႇၼၼ်ႉ တၵ်းလႆႈမီးၵႃႈၼွၵ်ႈတပ်ႉဢေႃႈ။

47ပိူင်လဵဝ်ၵၼ် ၶူဝ်းၼုင်ႈဢၼ်မီးတၢင်းဢၼ်တုတ်ႈပေႃႇဢွၵ်ႇမႃးၵႃႈၼႂ်းမၼ်းၼၼ်ႉ ပဵၼ်ၶူဝ်းၼုင်ႈပိၵ်ႈသေဢမ်ႇဝႃႈ၊ ပဵၼ်ၶူဝ်းၼုင်ႈၶူၼ်သူဝ်းသေဢမ်ႇဝႃႈ၊-

48ပဵၼ်သၢႆႁုၵ်ႇသေဢမ်ႇဝႃႈ၊ ပဵၼ်မႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ ပဵၼ်ပိၵ်ႈသေဢမ်ႇဝႃႈ၊ ပဵၼ်ၶူၼ်သူဝ်းသေဢမ်ႇဝႃႈ၊ ပဵၼ်ၼင်သေဢမ်ႇဝႃႈ၊ ပဵၼ်ၶိူင်ႈဢၼ်ဢဝ်ၼင်ႁဵတ်းၼၼ်ႉသေဢမ်ႇဝႃႈ၊-

49ပေႃးတၢင်းဢၼ်ပေႃႇဢွၵ်ႇမႃးၼၼ်ႉ ပဵၼ်ႁၢမ်ႉၶဵဝ်ၶဵဝ်၊ ဢမ်ႇၼၼ် ႁၢမ်ႉလႅင်လႅင်ဝႆႉၵႃႈတီႈၶူဝ်းၼုင်ႈၼၼ်ႉ၊ ဢမ်ႇၼၼ် ၵႃႈတီႈၼင်ၼၼ်ႉ၊ ဢမ်ႇၼၼ် ၵႃႈတီႈသၢႆႁုၵ်ႇၼၼ်ႉ၊ ဢမ်ႇၼၼ် ၵႃႈတီႈမႆဢၼ်တၵ်းတမ်ႇတၵ်းတေႃးၼၼ်ႉ၊ ဢမ်ႇၼၼ် ၵႃႈတီႈၶိူင်ႈဢၼ်ဢဝ်ၼင်ႁဵတ်းၼၼ်ႉ ၸိူဝ်းၼၼ်ႉၸိုင်၊ ပဵၼ်တၢင်းဢၼ်တုတ်ႈပေႃႇဢွၵ်ႇမႃးၼၼ်ႉဢေႃႈ။ တၵ်းလႆႈဢဝ်ၼႄပျႃးတီႈယိတ်ႈပရေႃးႁဵၵ်ႈဢေႃႈ။-

50ယိတ်ႈပရေႃးႁဵၵ်ႈၼၼ်ႉ တၵ်းလႆႈတူၺ်းတၢင်းဢၼ်ပေႃႇဢွၵ်ႇမႃးၼၼ်ႉလႄႈ ဢဝ်ၶူဝ်းၼုင်ႈဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ သိမ်းဝႆႉၸဵတ်းဝၼ်းဢေႃႈ။-

51ဝၼ်းသတ်ႉတမႃႉၼၼ်ႉ မၼ်းတၵ်းလႆႈသမ်ႉၶိုၼ်းတူၺ်းတၢင်းဢၼ်ပေႃႇဢွၵ်ႇမႃးၼၼ်ႉလႄႈ ပေႃးတၢင်းဢၼ်ပေႃႇဢွၵ်ႇမႃးၼၼ်ႉ ယႂ်ႇၽႄႈမႃးၵႃႈတီႈၶူဝ်းၼုင်ႈၼၼ်ႉ၊ ပဵၼ်သၢႆႁုၵ်ႇသေဢမ်ႇဝႃႈ၊ ပဵၼ်မႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ ပဵၼ်ၼင်သေဢမ်ႇဝႃႈ၊ ပဵၼ်ၶိူင်ႈဢၼ်ဢဝ်ၼင်ႁဵတ်းၼၼ်ႉသေဢမ်ႇဝႃႈၼၼ်ႉၸိုင်၊ တၢင်းဢၼ်ပေႃႇဢွၵ်ႇမႃးၼၼ်ႉပဵၼ်တုတ်ႈ ဢၼ်ၸၢင်ႈၵိၼ်ဢေႃႈ။ ပဵၼ်ဢၼ်ဢမ်ႇမူတ်းသႂ်။-

52ၶူဝ်းၼုင်ႈဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ ပဵၼ်သၢႆႁုၵ်ႇသေဢမ်ႇဝႃႈ၊ ပဵၼ်မႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ ပဵၼ်ၶူၼ်သူဝ်းသေဢမ်ႇဝႃႈ၊ ပဵၼ်ပိၵ်ႈသေဢမ်ႇဝႃႈ၊ ပဵၼ်ၶိူင်ႈၼင်သေဢမ်ႇဝႃႈၼၼ်ႉၸိုင်၊ တၵ်းလႆႈဢဝ်တုတ်ႇၽႆးပႅတ်ႈဢေႃႈ။ ပဵၼ်တုတ်ႈဢၼ်ၸၢင်ႈၵိၼ်ဢေႃႈ။ တၵ်းလႆႈဢဝ်တုတ်ႇၽႆးပႅတ်ႈသေဢေႃႈ။-

53ပေႃးယိတ်ႈပရေႃးႁဵၵ်ႈတူၺ်းလႄႈ တၢင်းဢၼ်ပေႃႇဢွၵ်ႇမႃးၼၼ်ႉ ဢမ်ႇယႂ်ႇၽႄႈမႃးၵႃႈတီႈၶူဝ်းၼုင်ႈၼၼ်ႉ၊ ပဵၼ်သၢႆႁုၵ်ႇသေဢမ်ႇဝႃႈ၊ ပဵၼ်မႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ ပဵၼ်ၶိူင်ႈၼင်သေဢမ်ႇဝႃႈၼၼ်ႉၸိုင်၊-

54ယိတ်ႈပရေႃးႁဵၵ်ႈတၵ်းလႆႈၸီႇယၢင်ႇႁႂ်ႈၶဝ်လႆႈဢဝ်ၶိူင်ႈဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ သၵ်ႉလွႆးလႄႈ သမ်ႉၶိုၼ်းသိမ်းဝႆႉၸဵတ်းဝၼ်းဢေႃႈ။-

55သၵ်ႉလွႆးတၢင်းဢၼ်ပေႃႇဢွၵ်ႇမႃးၼၼ်ႉသေယဝ်ႉ၊ ယိတ်ႈပရေႃးႁဵၵ်ႈတၵ်းလႆႈသမ်ႉၶိုၼ်းတူၺ်းလႄႈ၊ ပိၵ်ႉသမ်ႉတၢင်းဢၼ် ပေႃႇဢွၵ်ႇမႃးၼၼ်ႉ ႁၢင်ႈၽၢင်ဢမ်ႇၶၢႆႉပုတ်ႈလႄႈ ဢမ်ႇယႂ်ႇၽႄႈမႃးသေၵေႃႈ၊ ဢမ်ႇမူတ်းသႂ်။ မႂ်းတၵ်းလႆႈဢဝ်တုတ်ႇၽႆးပႅတ်ႈသေဢေႃႈ။ ပဵၼ်တီႈၶူင်ႈဢၼ်ၽင်ႉလၢၼ်ႈၵႂႃႇဢေႃႈ။ ပဵၼ်ၵႃႈၼႂ်းသေဢမ်ႇဝႃႈ၊ ပဵၼ်ၵႃႈၼွၵ်ႈသေဢမ်ႇဝႃႈ၊ ပဵၼ်ဢၼ်ပဝ်ႇဢၼ်လၢပ်ႈဢေႃႈ။-

56ပေႃးယိတ်ႈပရေႃးႁဵၵ်ႈတူၺ်းလႄႈတၢင်းဢၼ်ပေႃႇဢွၵ်ႇမႃးၼၼ်ႉ ပဵၼ်ႁၢမ်ႉလမ်လမ်ဝႆႉ လိုၼ်းသေသၵ်ႉလွႆးယဝ်ႉၼၼ်ႉၸိုင်၊ ၵႃႈၼႂ်းၶူဝ်းၼုင်ႈၼၼ်ႉသေဢမ်ႇဝႃႈ၊ ၵႃႈၼႂ်းၼင်ၼၼ်ႉသေဢမ်ႇဝႃႈ၊ ၵႃႈၼႂ်းသၢႆႁုၵ်ႇၼၼ်ႉသေဢမ်ႇဝႃႈ၊ ၵႃႈၼႂ်းမႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ မၼ်းတၵ်းလႆႈဢဝ်သိၵ်ႇဢွၵ်ႇပႅတ်ႈသေဢေႃႈ။-

57လိုၼ်းၼၼ်ႉ ပေႃးသမ်ႉၶိုၼ်းပေႃႇဢွၵ်ႇမႃးၵႃႈတီႈၶူဝ်းၼုင်ႈၼၼ်ႉသေဢမ်ႇဝႃႈ၊ ၵႃႈတီႈသၢႆႁုၵ်ႇၼၼ်ႉသေဢမ်ႇဝႃႈ၊ ၵႃႈတီႈမႆဢၼ်တၵ်းတမ်ႇတၵ်းတေႃးၼၼ်ႉသေဢမ်ႇဝႃႈ၊ ၵႃႈတီႈၶိူင်ႈၼင်ၼၼ်ႉသေဢမ်ႇဝႃႈၼၼ်ႉၸိုင်၊ ပဵၼ်တၢင်းဢၼ်ပေႃႇဢွၵ်ႇမႃးဢၼ်ၸၢင်ႈယႂ်ႇၽႄႈမႃးဢေႃႈ။ မႂ်းတၵ်းလႆႈဢဝ်ၶိူင်ႈဢၼ်မီးတၢင်းဢၼ်ပေႃႇဢွၵ်ႇမႃးၼၼ်ႉ တုတ်ႇၽႆးပႅတ်ႈသေဢေႃႈ။-

58ၶူဝ်းၼုင်ႈဢၼ်မႂ်းတၵ်းလႆႈသၵ်ႉလွႆးၼၼ်ႉ ပဵၼ်သၢႆႁုၵ်ႇသေဢမ်ႇဝႃႈ၊ ပဵၼ်မႆဢၼ်တၵ်းတမ်ႇတၵ်းတေႃးသေဢမ်ႇဝႃႈ၊ ပဵၼ်ၶိူင်ႈၼင်သေဢမ်ႇဝႃႈၼၼ်ႉ၊ ပေႃးတၢင်းဢၼ်ပေႃႇဢွၵ်ႇမႃးၼၼ်ႉႁၢႆၸိုင်၊ တၵ်းလႆႈသၵ်ႉလွႆးပွၵ်ႈတူႉတီႉယႃႉ ထႅင်ႈပွၵ်ႈၼိုင်ႈလႄႈ တၵ်းလႆႈမူတ်းသႂ်ဢေႃႈ။-

59ဢၼ်ၼႆႉၸမ်ႉ၊ ပဵၼ်တြႃးဢၼ်ၸၢပ်ႈသႅင်ႇၵၼ်တင်း တၢင်းဢၼ်တုတ်ႈပေႃႇဢွၵ်ႇမႃးၵႃႈတီႈၶူဝ်းၼုင်ႈ ၶူၼ်သူဝ်းသေဢမ်ႇဝႃႈ၊ ၵႃႈတီႈၶူဝ်းၼုင်ႈပိၵ်ႈသေဢမ်ႇဝႃႈ၊ ၵႃႈတီႈသၢႆႁုၵ်ႇသေဢမ်ႇဝႃႈ၊ ၵႃႈတီႈမႆဢၼ်တၵ်းတမ်ႇတၵ်းတေႃးသေဢမ်ႇဝႃႈ၊ ၵႃႈတီႈၶိူင်ႈၼင်သေဢမ်ႇဝႃႈၼၼ်ႉ ႁႂ်ႈလႆႈၸီႇယၢင်ႇလႄႈဝႃႈ၊ မူတ်းသႂ် ဢိၵ်ႇတင်းႁႂ်ႈလႆႈၸီႇယၢင်ႇလႄႈဝႃႈ၊ ဢမ်ႇမူတ်းသႂ် ဝႃႈၼင်ႇၼႆၼၼ်ႉဢေႃႈ၊ ဝႃႈၼၼ်ၼႆဢေႃႈ။