Leviticus 19

Shan

← Chapter 18 Jump to: Chapter 20 →

1ထႃႇဝရႃႉၽြႃးသမ်ႉမီးဢမိင်ႉတီႈ မူဝ်းသေႇ လႄႈဝႃႈၸမ်ႉ၊-

2သင်ႇလၢတ်ႈဝႆႉတီႈပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ ၼၼ်ႉလႄႈဝႃႈ၊ ၵွပ်ႈပိူဝ်ႈဢၼ် ၵဝ်ထႃႇဝရႃႉၽြႃး ၽြႃးပဵၼ်ၸဝ်ႈသူမူတ်းၸၢင်ႇလႄႈ သူၵေႃႈမီးတၢင်းဢၼ်မူတ်းၸၢင်ႇတႃႉ။

3သူၵူႈၵေႃႉၵူႈၵူၼ်း တၵ်းလႆႈဢွၼ်ၵၼ်ရူဝ်ႇသေႇၵူဝ်ယမ်ပေႃႈမႄႈသူဢေႃႈ။ ဝၼ်းၵမ်သိၼ်ၵဝ်တင်းလၢႆၵေႃႈ၊ သူတၵ်းလႆႈဢွၼ်ၵၼ်ပႂ်ႉဢေႃႈ။

4သူဢမ်ႇလႆႈဝႄႉၵႂႃႇလႄႈ သုတ်ႉၸပ်းသုတ်ႉၸူးတီႈရုၵ်ႈထူႉသၢင်းထူႉ။ သူဢမ်ႇလႆႈဢွၼ်ၵၼ် ႁဵတ်းၽြႃးဢၼ်သွၼ်းလေႃႇႁဵတ်းပုၼ်ႈသူ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။

5ပေႃးသူပုၵ်ႈၸေႃႇယိတ်ႈမိၵ်ႉသႃႇႁႃယႃႉတီႈထႃႇဝရႃႉၽြႃးၸိုင်၊ သူတၵ်းလႆႈပုၵ်ႈၸေႃႇႁႂ်ႈထုၵ်ႇၸႂ်မႅၼ်ႈၸႂ်မၼ်းၸဝ်ႈဢေႃႈ။-

6တၵ်းလႆႈၵိၼ်ၼႂ်းဝၼ်းဢၼ်ပုၵ်ႈၸေႃႇ ဢိၵ်ႇတင်းၼႂ်းဝၼ်းမိူဝ်ႈၽုၵ်ႈၼၼ်ႉဢေႃႈ။ ပေႃးၵိုတ်းၵျၢၼ်ႇတေႃႇထိုင်ႁွတ်ႈ ဝၼ်းတႃႉတီႉယႃႉသေဢိတ်းသေဢီႈၸိုင်၊ တၵ်းလႆႈဢဝ်တုတ်ႇၽႆးပႅတ်ႈသေဢေႃႈ။-

7ၼႂ်းဝၼ်းတႃႉတီႉယႃႉၼၼ်ႉ၊ ပေႃးၵိၼ်သေဢိတ်းသေဢီႈၸိုင်၊ ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။ ဢမ်ႇထုၵ်ႇၸႂ်မႅၼ်ႈၸႂ်မၼ်းၸဝ်ႈ။-

8ၵေႃႉဢၼ်ၵိၼ်ၼၼ်ႉ ၵွပ်ႈပိူဝ်ႈဢၼ်မၼ်းၶျႃးၶိူင်ႈပိူင် ဢၼ်မူတ်းၸၢင်ႇထႃႇဝရႃႉၽြႃးတူၵ်းတီႈတႅမ်ႇလႄႈ၊ မၼ်းတၵ်းလႆႈၶၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။

9မိူဝ်ႈဢၼ်သူပၢတ်ႇၶဝ်ႈဢၼ်ပဵၼ်ၵႃႈတီႈလိၼ်သူၼၼ်ႉၸိုင်၊ မႂ်းဢမ်ႇလႆႈပၢတ်ႇၵႃႈတီႈၸွၵ်ႉၼႃးၸဵင်ႇၼႃးတင်းလၢႆ မူတ်းမူတ်းသဵင်ႈသဵင်ႈ။ မႂ်းဢမ်ႇလႆႈၶိုၼ်းလႄႈၵဵပ်းဢဝ်သိမ်းဢဝ် ဢၼ်တူၵ်းဢၼ်ႁူင်ႈ ၵႃႈတီႈဢၼ်သိမ်းဢဝ်ယဝ်ႉၼၼ်ႉ။-

10သူၼ်ဢူးယဵၼ်ႇၸပိတ်ႈမႂ်းၵေႃႈ မႂ်းဢမ်ႇလႆႈၶိုၼ်းလႄႈသိမ်းဢဝ် မၢၵ်ႇမၼ်းမူတ်းမူတ်းသဵင်ႈသဵင်ႈ။ မႂ်းဢမ်ႇလႆႈၵဵပ်းလႆႈဢဝ် မၢၵ်ႇဢၼ်တူၵ်းဢၼ်ႁူင်ႈၼၼ်ႉ။ မၢၵ်ႇၸိူဝ်းၼၼ်ႉၸိုင် မႂ်းတၵ်းလႆႈႁႂ်ႈၵိုတ်းၵျၢၼ်ႇဝႆႉ ပုၼ်ႈၵူၼ်းယၢၵ်ႈၵူၼ်းၽၢၼ်တင်းၶႅၵ်ႇဢႃႇၵၼ်ႇတူႉဢေႃႈ။ ၵဝ်ၼႆႉပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။

11သူဢမ်ႇလႆႈလၵ်ႉဢဝ်ဢုၵ်ႉၸႃႇပိူၼ်ႈ။ ဢမ်ႇလႆႈပႅတ်ႉလႆႈလႅၼ်ပိူၼ်ႈ၊ ၵေႃႉၼိုင်ႈလႄႈၵေႃႉၼိုင်ႈ ဢမ်ႇလႆႈလၢတ်ႈၵႂၢမ်းမူႉသႃႇတေႃႇၵၼ်။-

12ယင်းဢမ်ႇၸိုဝ်ႈဢမ်ႇၸႂ်ႈလႄႈ သူဢမ်ႇလႆႈဢဝ်ၼႃႇမႃႉၸိုဝ်ႈသဵင်ၵဝ် ႁဵတ်းတၢင်းဢၼ်ၵိၼ်ႇဢၼ်ဝႃႈ။ ဢမ်ႇလႆႈဢဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈမႂ်း ၶျႃးတူၵ်းတီႈတႅမ်ႇၸိူဝ်ႉၼင်ႇၼၼ်။ ၵဝ်ပဵၼ်ထႃႇဝရႃႉၽြႃးဢေႃႈ။-

13ဢုၵ်ႉၸႃႇၶူဝ်းလဵင်းၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်၊ မႂ်းဢမ်ႇလႆႈႁဵတ်းဢၼ်ဢမ်ႇတြႃးသေလႄႈသိမ်းဢဝ်။ ဢမ်ႇလႆႈႁဵတ်းပႄႉႁဵတ်းၼႅင်ႇသေလႄႈႁိမ်ဢဝ်။ ၵႃႈၸၢင်ႈၶၼ်ငႃဢၼ်ၵူၼ်းၵိၼ်ၸၢင်ႈၵိၼ်ငႃထုၵ်ႇလႆႈၶၢမ်ႇဢဝ်ၼၼ်ႉ ဢမ်ႇလႆႈမီးဝႆႉယူႇတီႈမႂ်းတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်။

14မႂ်းဢမ်ႇလႆႈၵိၼ်ႇလႆႈလႃႇၵူၼ်းႁူၼူၵ်ႇ။ မႂ်းဢမ်ႇလႆႈဢဝ်ဢၼ်တၵ်းတိူဝ်ႉမႅၼ်ႈလႄႈလူမ်ႉၼၼ်ႉ ဝႆႉၵႃႈတီႈၽၢႆႇၼႃႈၵူၼ်းတႃမွတ်ႇ။ မႂ်းတၵ်းလႆႈၵူဝ်ႁႄ ၽြႃးပဵၼ်ၸဝ်ႈမႂ်းဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။

15သူဢမ်ႇလႆႈၸွမ်းဢၼ်ဢမ်ႇတြႃးသေလႄႈ ၸီႇယၢင်ႇၼႂ်းဢမူႉဢၼ်ထူပ်းတြႃးၼၼ်ႉ။ မႂ်းယင်းဢမ်ႇၸွင်ႇပင်းလူၼႃႈ ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ။ ယင်းဢမ်ႇထွၵ်ႈလူၺ်ႈၼႃႈၵေႃႉဢၼ်ယႂ်ႇဢၼ်လူင်ၼၼ်ႉလႄႈ တၵ်းလႆႈၸီႇယၢင်ႇၸွမ်းၼင်ႇတြႃး တီႈၵူၼ်းဢၼ်ၸၢပ်ႈသႅင်ႇၵၼ်တင်းမႂ်းဢေႃႈ။

16မႂ်းဢမ်ႇလႆႈပဵၼ်ၵေႃႉဢၼ်ၸၢင်ႈၶႃႉၸိုဝ်ႈၶၢႆသဵင်ၼၼ်ႉသေလႄႈ ၵႂႃႇၵႂႃႇမႃးမႃးၵႃႈၼႂ်းၵူၼ်းမဵဝ်းမႂ်းတင်းလၢႆ။ ဢမ်ႇလႆႈၵျၢမ်ႇလႆႈပွင် ႁႂ်ႈၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉလႆႈတၢႆ။ ၵဝ်ပဵၼ်ထႃႇဝရႃႉၽြႃးဢေႃႈ။

17မႂ်းဢမ်ႇလႆႈမီးၸႂ်ဢၼ်မူမ်ႇတၢင်းၽိတ်းဝႆႉၵႃႈတီႈပီႈၼွင်ႉမႂ်း။ မႂ်းယင်းဢမ်ႇလႆႈႁၢပ်ႇဢဝ်ပႃးဢဝ်ဢပႅတ်ႈၵွပ်ႈပိူဝ်ႈၵေႃႉဢၼ် ၸၢပ်ႈသႅင်ႇၵၼ်တင်းမႂ်းၼၼ်ႉယူႇသေလႄႈ တၵ်းလႆႈသင်ႇသွၼ်သုင်းမႃႉပၼ်မၼ်း ဢမၢၼ်ႇၶၼ်ပဵၼ်ဢေႃႈ။

18ပေႃးၵူၼ်းမဵဝ်းလဵဝ်ၵၼ်တင်းမႂ်းၼၼ်ႉ ၽိတ်းပိူင်ႈမႂ်းၸိုင်၊ မႂ်းဢမ်ႇလႆႈၶိုၼ်းတွပ်ႇတႅၼ်းပၼ်ဢပႅတ်ႈတီႈမၼ်း။ ဢမ်ႇလႆႈဝႆႉတၢင်းၽိတ်းတီႈမၼ်း။ ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်၊ မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။

19သူတၵ်းလႆႈပႂ်ႉပိင်းၺၢပ်ႈတြႃးၵဝ်ဢေႃႈ။ မႂ်းဢမ်ႇလႆႈႁႂ်ႈတရိၵ်ႈသၢၼ်ႇမႂ်းဢၼ်မဵဝ်းပႅၵ်ႇၵၼ်ပိူင်ႈၵၼ်ၼၼ်ႉလႆႈႁႂ်ႈ ၶိုၼ်ႈၵၼ်ဝၢင်ၵၼ်။ မႂ်းဢမ်ႇလႆႈဢဝ်ၸိူဝ်ႉၽၼ်းဢၼ်ပႅၵ်ႇပိူင်ႈၵၼ်ၼၼ်ႉ ဝၢၼ်ႇပိုၼ်လူၺ်ႈၵၼ်ၵႃႈၼႂ်းႁႆႊမႂ်းၼႃးမႂ်း။ ဢမ်ႇလႆႈၼုင်ႈၶူဝ်းၼုင်ႈ ဢၼ်ဢဝ်သွင်ၸိူဝ်ႉသွင်မဵဝ်းလေႃးၵၼ်သေလႄႈတေႃးႁဵတ်းၼၼ်ႉ။

20ပေႃးသေၵေႃႉသေၵူၼ်း ၼွၼ်းလူၺ်ႈၵၼ်တင်းၶႃႈမႄႈယိင်း ဢၼ်ပိူၼ်ႈမၢႆဝႆႉလႄႈ ဢမ်ႇပႆႇထုတ်ႇပႆႇလွတ်ႈၼၼ်ႉၸိုင်၊ သွင်ၶႃတၵ်းလႆႈၶၢမ်ႇတၢမ်ႇဢပႅတ်ႈဢေႃႈ။ ပိူဝ်ႈဢၼ်မၼ်းပဵၼ်ၶႃႈပိူၼ်ႈလႄႈ သွင်ၶႃတၵ်းလႆႈလွတ်ႈသေတၢင်းဢၼ်ၶၢမ်ႇတၢင်းဢၼ်ဢဝ်တၢႆဢေႃႈ။-

21ၵူၼ်းၸၢႆးၼၼ်ႉ တၵ်းလႆႈဢဝ်ယိတ်ႈဢၼ်ၽေႇတူႉၸရိူၵ်ႈဢၼ်ဝႃႈ သူဝ်းပေႃႈပုၼ်ႈယိတ်ႈဢၼ် ၽေႇတူႉၸရိူၵ်ႈတူဝ်ၼိုင်ႈ မႃးၵႃႈတီႈထႃႇဝရႃႉၽြႃးၵႃႈႁိမ်းၽၵ်းတူမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈဢေႃႈ။-

22ယိတ်ႈပရေႃးႁဵၵ်ႈတၵ်းလႆႈဢဝ်သူဝ်းပေႃႈ ယိတ်ႈဢၼ်ၽေႇတူႉၸရိူၵ်ႈၼၼ်ႉ ႁဵတ်းတၢင်းဢၼ်ၽေႇဢပႅတ်ႈဢၼ်မၼ်းၼၼ်ႉႁဵတ်းၼၼ်ႉ ပုၼ်ႈမၼ်းၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ မၼ်းၼၼ်ႉတၵ်းႁွတ်ႈထိုင် တၢင်းဢၼ်လွတ်ႈဢပႅတ်ႈဢၼ်မၼ်းႁဵတ်းၼၼ်ႉဢေႃႈ။-

23မိူဝ်ႈဢၼ်သူႁွတ်ႈထိုင်ၵႃႈတီႈမိူင်းၼၼ်ႉလႄႈ ၽုၵ်ႇသွမ်ႈတူၼ်ႈဢၼ်လီၵိၼ်လီၶူပ်း ၵူႈၸိူဝ်ႉၵူႈပိူင်ယဝ်ႉၼၼ်ႉၸိုင်၊ တၵ်းလႆႈမၢတ်ႈမၢၵ်ႇဢၼ်မၢၵ်ႇၸိူဝ်းၼၼ်ႉ ပဵၼ်ၸိူဝ်ႉၼင်ႇတၢင်းဢၼ်ဢမ်ႇထိူဝ်ႁိမ်းဢေႃႈ။ သၢမ်ပီႊတဵမ်တဵမ် တၵ်းလႆႈပဵၼ်ၸိူဝ်ႉၼင်ႇတၢင်းဢၼ်ဢမ်ႇထိူဝ်ႁိမ်းၼၼ်ႉတီႈသူဢေႃႈ။ ဢမ်ႇလႆႈၵိၼ်မၢၵ်ႇၸိူဝ်းၼၼ်ႉ။-

24ၼႂ်းပီႊၸတုၵ်ႉထႃႉၼၼ်ႉ မၢၵ်ႇဢၼ်မၢၵ်ႇၵႃႈမီးၼၼ်ႉၸိုင်၊ တၵ်းလႆႈမူတ်းၸၢင်ႇလႄႈ ပဵၼ်ပုၼ်ႈဢၼ်တၵ်းယွင်ႈယေႃးၵျေးၸူးထႃႇဝရႃႉၽြႃးဢေႃႈ။-

25ၼႂ်းပီႊပိၼ်ႇၸမႃႉၼၼ်ႉ၊ သူတၵ်းလႆႈၵိၼ်မၢၵ်ႇဢၼ်မၢၵ်ႇၸိူဝ်းၼၼ်ႉဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တူၼ်ႈၸိူဝ်းၼၼ်ႉ ယဵင်ႈၶႅၼ်းတၵ်းမၢၵ်ႇၼႃႇဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။

26သူဢမ်ႇလႆႈၵိၼ်ၼိူဝ်ႉဢၼ်ပႃးလိူတ်ႈ။ သူဢမ်ႇလႆႈပွင်လႆႈႁဵတ်းတၢင်းၸၢင်ႈတၢင်းမေႃ ဢၼ်ဢမ်ႇလီဢမ်ႇငၢမ်းၼၼ်ႉ။ သူဢမ်ႇလႆႈလူလႆႈတူၺ်းပေႇတၢင်ႇၵႃႇလႃး။-

27သူဢမ်ႇလႆႈထႃၶူၼ်ႁူဝ်သူလဵပ်ႈႁွပ်ႈၵႃႈတီႈႁိမ်းၵွၵ်းႁူဝ်သူ ႁဵတ်းႁႂ်ႈမၼ်းမူၼ်းဝႆႉ။ ၼူတ်ႇၵၢင်းၵေႃႈ သူဢမ်ႇလႆႈထႃႁဵတ်းႁႂ်ႈမၼ်းမူၼ်းဝႆႉ။-

28ၵွပ်ႈပိူဝ်ႈၵူၼ်းတၢႆလႄႈ၊ သူဢမ်ႇလႆႈထိူဝ်လႆႈၽၼ်းၼိူဝ်ႉသူၼင်သူ။ သူဢမ်ႇလႆႈသမ်းမိုၵ်ႉတီႈတူဝ်သူ။ ၵဝ်ပဵၼ်ထႃႇဝရႃႉၽြႃးဢေႃႈ။

29မႂ်းဢမ်ႇလႆႈဢဝ်လုၵ်ႈယိင်းမႂ်း ၶျႃးတူၵ်းတီႈတႅမ်ႇႁႂ်ႈလႆႈပဵၼ်မႄႈမွၵ်ႇယႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တင်းဝၢၼ်ႈတင်းမိူင်း တၵ်းဢွၼ်ၵၼ်ၸွမ်းမေႇထုင်ႇဢၼ်ဢမ်ႇတြႃးလႄႈ တဵမ်ဝႆႉတင်းလွင်ႈတၢင်းဢၼ်ဢမ်ႇတြႃးဢေႃႈ။

30သူတၵ်းလႆႈပႂ်ႉၵမ်ပႂ်ႉၸွမ်းဝၼ်းၵမ်သိၼ်ၵဝ်တင်းလၢႆလႄႈ ရူဝ်ႇသေႇၵူဝ်ယမ်ထႃႇၼႃႉတီႈမူတ်းၸၢင်ႇၵဝ်ဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။

31သူဢမ်ႇလႆႈဝႄႉၵႂႃႇလႄႈ သုတ်ႉၸပ်းသုတ်ႉၸူးၵႃႈတီႈၶဝ်ၸိူဝ်းဢၼ်ၽီၶဝ်ႈၼၼ်ႉ ဢိၵ်ႇတင်းၶဝ်ၸိူဝ်းဢၼ်ႁဵတ်းၽိူဝ်ႉၼၼ်ႉ။ သူဢမ်ႇလႆႈသွၵ်ႈလႆႈႁႃၶဝ်ၼၼ်ႉ ႁႂ်ႈတူဝ်သူလႆႈၵူဝ်ႈလႆႈၵိူၵ်ႇ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။

32မႂ်းတၵ်းလႆႈလုၵ်ႉၸုၵ်းၵႃႈတီႈၽၢႆႇၼႃႈၵေႃႉဢၼ် ၶူၼ်ႁူဝ်ႁွၵ်ႇၼၼ်ႉဢေႃႈ။ မႂ်းတၵ်းလႆႈရူဝ်ႇသေႇၵူဝ်ယမ်ၼႃႈၵေႃႉဢၼ် ဢသၢၵ်ႈယႂ်ႇၼၼ်ႉဢေႃႈ။ မႂ်းတၵ်းလႆႈၵူဝ်လႆႈႁႄၽြႃးပဵၼ်ၸဝ်ႈမႂ်းဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။

33ပေႃးၶႅၵ်ႇသွၼ်ႈပိုင်ႈယူႇၵႃႈၼႂ်းမိူင်းမႂ်းၸိုင်၊ ဢမ်ႇလႆႈၼိၵ်ႈၸၢၵ်ႈငႅၼ်းသႄးမၼ်း။-

34ၶႅၵ်ႇဢၼ်ယူႇလူၺ်ႈၵၼ်တင်းမႂ်းၼၼ်ႉ တၵ်းလႆႈပဵၼ်ၸိူဝ်ႉၼင်ႇၵူၼ်းမဵဝ်းဢၼ် ပဵၼ်ၸိူဝ်ႉၶိူဝ်းလဵဝ်ၵၼ်တင်းမႂ်းၼၼ်ႉတီႈမႂ်းဢေႃႈ။ မႂ်းတၵ်းလႆႈႁၵ်ႉမၼ်းမိူၼ်ၼင်ႇတူဝ်ၸဝ်ႈၵဝ်ႇဢေႃႈ။ လွင်ႈမၼ်းၸမ်ႉ သူလႆႈပဵၼ်ၶႅၵ်ႇၵႃႈၼႂ်းမိူင်း ဢေႇၵိပ်ႉတူႉ မႃးယဝ်ႉ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။

35သူဢမ်ႇလႆႈၸွမ်းဢၼ်ဢမ်ႇတြႃးသေလႄႈ ႁဵတ်းၼႂ်းဢမူႉဢၼ်ထူပ်းတြႃးၼၼ်ႉ ဢိၵ်ႇတင်းၼႂ်းလွင်ႈတၢင်းဢၼ်တႅၵ်ႈဢၼ်ၶိုပ်ႈ၊ လွင်ႈတၢင်းဢၼ်ၸင်ႈဢၼ်ႁိဝ်ႈ၊ လွင်ႈတၢင်းဢၼ်တူင်ဢၼ်ၵႂၢတ်ႇၼၼ်ႉ။-

36သူတၵ်းလႆႈယိပ်းလႆႈသုင်းယႃႇၸူႇယွႆးဢၼ်မၢၼ်ႇဢၼ်မႅၼ်ႈ၊ လုၵ်ႈၶၼ်ဢၼ်မၢၼ်ႇဢၼ်မႅၼ်ႈ၊ ဢေးၽႃႇ ဢၼ်မၢၼ်ႇဢၼ်မႅၼ်ႈ၊ ႁီႉၼႃႉ ဢၼ်မၢၼ်ႇဢၼ်မႅၼ်ႈၸိူဝ်းၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢၼ်ၼုၵ်ႈဢဝ်သူဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဢေႃႈ။-

37သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ် ဢိၵ်ႇတင်းတၢင်းဢၼ်ၵဝ်ၸီႇယၢင်ႇဝႆႉတင်းသဵင်ႈတင်းလူင်ၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

← Chapter 18 Jump to: Chapter 20 →