Mark 1 — Shan

4ယူဝ်းႁၢၼ်ႇ ပေႃႇမႃးပၼ် ပပ်ႉတီႉၸမ်ႇ ၵႃႈတီႈၼႂ်းထိူၼ်ႇလႄႈ ႁေႃးလၢတ်ႈတြႃး ပပ်ႉတီႉၸမ်ႇ ဢၼ်ၸၢပ်ႈသႅင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ် ပုၼ်ႈလွင်ႈၼင်ႇႁိုဝ်တၵ်းလွတ်ႈဢပႅတ်ႈဢေႃႈ။-

5ၸႃႉၸဵမ်ၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ဢိၵ်ႇတင်းၵူၼ်းမိူင်း ယူႉတႃႉ ၵႃႈမီးၼၼ်ႉ ဢွၵ်ႇၵႂႃႇၸူးၵႃႈတီႈ ယူဝ်းႁၢၼ်ႇ လႄႈ ၽုၺ်ႇၼႄဢပႅတ်ႈတူဝ်ၸဝ်ႈၵဝ်ႇတင်းလၢႆသေယဝ်ႉ၊ ၶၢမ်ႇ ပပ်ႉတီႉၸမ်ႇ ၼႂ်းၼမ်ႉႁွင်ႈ ယေႃးတၢၼ်ႇ ဢေႃႈ။

6ယူဝ်းႁၢၼ်ႇ ၼၼ်ႉ ၼုင်ႈၶူဝ်းဢၼ်ဢဝ်ၶူၼ်ၵလႃးဢုၵ်ႉတေႃးႁဵတ်းၼၼ်ႉ၊ ၵႃႈတီႈဢႅဝ်ႁတ်ႉတင်းသၢႆၼင်သေလႄႈ ၵိၼ်မႅင်းၵႅင်းတင်းၼမ်ႉၽိုင်ႈ ဢၼ်မီးၵႃႈၼႂ်းထိူၼ်ႇဢေႃႈ။-

7ဢၼ်မၼ်းႁေႃးလၢတ်ႈလႄႈဝႃႈၸမ်ႉ၊ ၵေႃႉဢၼ် ယႂ်ႇမျၢတ်ႈၼႃႇသေၵဝ်ၼၼ်ႉ မႃးလိုၼ်းၵဝ်ဢေႃႈ။ ၵဝ်ၼႆႉ ယင်းဢမ်ႇထိူၵ်ႈၵူမ်ႈလႄႈၵႄႈဢဝ်သၢႆၶႅပ်းတိၼ်ၵေႃႉၼၼ်ႉ၊-

8ၵဝ်ဢဝ်သူပၼ် ပပ်ႉတီႉၸမ်ႇ ၼႂ်းၼမ်ႉဢေႃႈ။ ၵေႃႉၼၼ်ႉတၵ်းဢဝ်သူပၼ် ပပ်ႉတီႉၸမ်ႇ ၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ၊ ဝႃႈၼင်ႇၼႆဢေႃႈ။

9မိူဝ်ႈၼၼ်ႉ ယေႇသူႉ လုၵ်ႉသေၵႃႈတီႈမိူင်း ၵႃႇလီႉလႄး ဝဵင်း ၼႃႇၸရႅတ်ႈ မႃးလႄႈ ၶၢမ်ႇ ပပ်ႉတီႉၸမ်ႇ ၼႂ်းမိုဝ်း ယူဝ်းႁၢၼ်ႇ ၵႃႈၼႂ်းၼမ်ႉႁွင်ႈ ယေႃးတၢၼ်ႇ ဢေႃႈ။-

10ၼႂ်းမိူဝ်ႈဢၼ်လုၵ်ႉသေၵႃႈၼႂ်းၼမ်ႉဢွၵ်ႇမႃးၵမ်းလဵဝ်ယူႇၼၼ်ႉၸိုင် လႆႁၼ်ၵၢင်ႁၢဝ်တႅၵ်ႇဢႃႈဝႆႉသေလႄႈ ဝီႉၺိၺ်ႇဢၼ်မူတ်းၸၢင်ႇၸဝ်ႈ လူင်းမႃးၵႃႈတီႈၼိူဝ်မၼ်းၸဝ်ႈ ၸိူဝ်ႉၼင်ႇၼူၵ်ႉတူႈလႄႈ၊-

11သဵင်ၸဝ်ႈပဵၼ်မႃးၵႃႈၼိူဝ်ၵၢင်ႁၢဝ်လႄႈဝႃႈ၊ မႂ်းၼႆႉၸမ်ႉ၊ ပဵၼ်လုၵ်ႈဢၼ်ၵဝ်ႁၵ်ႉၼႃႇ၊ တီႈဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊ ဝႃႈၼင်ႇၼႆဢေႃႈ။

12မိူဝ်ႈၼၼ်ႉ ၵမ်းလဵဝ် ဝီႉၺိၺ်ႇၸဝ်ႈႁႂ်ႈ ယေႇသူႉ ၵႂႃႇၵႃႈၼႂ်းထိူၼ်ႇဢေႃႈ။-

13သီႇသိပ်းဝၼ်းတဵမ်တဵမ် မၼ်းၸဝ်ႈယူႇၵႃႈတီႈၼႂ်းထိူၼ်ႇၼၼ်ႉလႄႈ လႆႈၶၢမ်ႇတၢင်းဢၼ် ၸႃႇတၢၼ်ႇ ၸၢမ်းတူၺ်းၸူဝ်းဢဝ်ဢေႃႈ။ မီးယူႇလူၺ်ႈၵၼ်တင်းတူဝ်ထိူၼ်ႇတင်းလၢႆဢေႃႈ။ တမၢၼ်ႇၵၢင်ႁၢဝ်တင်းလၢႆၵေႃႈ ႁဵတ်းလဵင်ႉႁဵတ်းလူတီႈမၼ်းၸဝ်ႈဢေႃႈ။

14ဝၢႆးသေ ယူဝ်းႁၢၼ်ႇ ၶၢမ်ႇတၢင်းဢၼ် ဢၢပ်ႈၵႃႈၼႂ်းထွင်ႇယဝ်ႉၼၼ်ႉ၊ ယေႇသူႉ ၵႂႃႇၸူးၵႃႈတီႈမိူင်း ၵႃႇလီႉလႄး ပုၼ်ႉလႄႈ ႁေႃးလၢတ်ႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တၢင်းမိူင်းၽြႃးပဵၼ်ၸဝ်ႈလႄႈဝႃႈ၊-

15ၶိင်ႇမၼ်းပျေႉၸုမ်ႇယဝ်ႉ၊ မိူင်းၽြႃးပဵၼ်ၸဝ်ႈၸမ်တၵ်းတႄႇပဵၼ်ယဝ်ႉ။ ၶုၵ်းၸႂ်လႆႈမႆႈၸႂ်တႃႉ။ ယုမ်ႇမၢတ်ႈတြႃးသတၢင်းသိူဝ်းပျေႃႇတႃႉ၊ ဝႃႈၼင်ႇၼႆဢေႃႈ။

16ၼႂ်းမိူဝ်ႈဢၼ် မၼ်းၸဝ်ႈၸွမ်းႁိမ်းၼွင် ၵႃႇလီႉလႄး ၵႂႃႇယူႇၼၼ်ႉၸိုင်၊ မၼ်းၸဝ်ႈထူပ်းႁၼ် သီႉမုၼ်ႇ တင်းၼွင်ႉၸၢႆးမၼ်း ဢၼ်ႇတရေႇ ဝၢၼ်ႇၶႄတူၵ်းၵႃႈၼႂ်းၼွင်ယူႇဢေႃႈ။ ၶဝ်ၸိူဝ်းၼၼ်ႉၸမ်ႉ ပဵၼ်တမ်ႇငႃႈဢေႃႈ။-

17ယေႇသူႉ လၢတ်ႈတီႈၶဝ်လႄႈဝႃႈ၊ ၸွမ်းပႃႈလင်ၵဝ်တႃႉ။ ၵဝ်တၵ်းႁႂ်ႈသူပဵၼ်တမ်ႇငႃႈဢၼ်မဵတ်းၵူၼ်းဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်-

18ၶဝ်ၼၼ်ႉ ပႅတ်ႈဝႆႉၶႄၶဝ်ၵမ်းလဵဝ်သေလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။

19မၼ်းၸဝ်ႈပူၼ်ႉသေတီႈၼၼ်ႈၵႂႃႇဢိတ်းၼိုင်ႈယဝ်ႉၸင်ႇ၊ ထူပ်းႁၼ် ယႃႇၵုပ်ႈ လုၵ်ႈၸၢႆး ၸေႇပေႇတႄး တင်းၼွင်ႉၸၢႆးမၼ်း ယူဝ်းႁၢၼ်ႇ မႄးၽုင်ၶႄၶဝ်ယူႇၵႃႈၼိူဝ်ႁိူဝ်းလႄႈ ႁွင်ႉဢဝ်ၶဝ်ၼၼ်ႉၵမ်းလဵဝ်ဢေႃႈ။-

20ၶဝ်ၼၼ်ႉၵေႃႈ ပႅတ်ႈဝႆႉပေႃႈၶဝ် ၸေႇပေႇတႄး ၵႃႈၼိူဝ်ႁိူဝ်း ဢိၵ်ႇတင်းၵူၼ်းၵိၼ်ၸၢင်ႈၵိၼ်ငႃတင်းလၢႆလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။

21ၶဝ်ၼၼ်ႉ ၵႂႃႇၵႃႈၼႂ်းဝဵင်း ၵပိူဝ်ႇၼေႇဢုမ်ႇ ယဝ်ႉၸင်ႇ၊ ဝၼ်းၵမ်သိၼ်ၸိုင်၊ မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးသေလႄႈ သင်ႇသွၼ်ပၼ်ဢေႃႈ။-

22ပရဵၵ်ႈသၢတ်ႈ တင်းလၢႆၵေႃႈ ဢၢမ်းလွင်ႈတၢင်းဢၼ်မၼ်းၸဝ်ႈ သင်ႇသွၼ်ပၼ်ၼၼ်ႉၼႃႇလူင်လၢင်ဢေႃႈ။ လွင်ႈမၼ်းၸမ်ႉ မၼ်းၸဝ်ႈသင်ႇသွၼ်ပၼ်ၶဝ်မိူၼ်ၸိူဝ်ႉၼင်ႇၵူၼ်းထုတ်ႇၵျၢမ်းဢမ်ႇၸႂ်ႈ။ မိူၼ်ၸိူဝ်ႉၼင်ႇၵေႃႉဢၼ်ဢုပ်ႉပိူင်ႇၼၼ်ႉဢေႃႈ။

23ၼႂ်းၸရွပ်ႈႁေႃးတြႃးၶဝ်ၼၼ်ႉ မီးၵူၼ်းဢၼ်ၽီၵူဝ်ႈၵိူၵ်ႇၶဝ်ႈၵေႃႉၼိုင်ႈလႄႈမၼ်းႁွင်ႉသႅၼ်ႇလႄႈဝႃႈ၊-

24ဢူဝ်း ယေႇသူႉ ၵူၼ်းဝဵင်း ၼႃႇၸရႅတ်ႈ ၊ ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈ ၸိူဝ်ႉၼင်ႇႁိုဝ်ၶႃႈ။ ၸဝ်ႈႁဝ်းမႃးႁႂ်ႈလႆႈယႃႉပႅတ်ႈႁဝ်းၶႃႈႁိုဝ်။ လွင်ႈဢၼ်ၸဝ်ႈႁဝ်းပဵၼ်ၽူႈလႂ်ၸိုင် ၵဝ်ၶႃႈႁူႉယူႇၶႃႈဢေႃႈ။ ပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈၶႃႈ၊ ဝႃႈၼင်ႇၼႆဢေႃႈ။-

25ယေႇသူႉ ၵေႃႈ သင်ႇလၢတ်ႈတီႈမၼ်းလႄႈဝႃႈ၊ ယူႇတဵတ်ႇတဵတ်ႇတႃႉ။ ဢွၵ်ႇသေၵႃႈၼႂ်းမၼ်းၵႂႃႇတႃႉ၊ မိူဝ်ႈဢၼ် ဝႃႈၼင်ႇၼႆၸိုင်၊-

26ၽီဢၼ်ၵူဝ်ႈၵိူၵ်ႇၼၼ်ႉၵေႃႈ ႁႂ်ႈၵေႃႉၼၼ်ႉၵႅၼ်ႇၵႂႃႇၶႅင်ၵႂႃႇယဝ်ႉၸင်ႇ၊ ႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇလႄႈ ဢွၵ်ႇၵႂႃႇသေဢေႃႈ။-

27ၵူၼ်းတင်းသဵင်ႈတင်းလူင်ၼၼ်ႉ ၵႂင်ၸႂ်ယုင်ႈၸႂ် တေႃႇထိုင်ႁွတ်ႈထၼ်ႈပေႃးၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၸႃၵၼ်လႄႈဝႃႈ၊ လွင်ႈၼႆႉပဵၼ်ၸိူဝ်ႉၼင်ႇႁိုဝ်။ ပဵၼ်တၢင်းဢၼ်သင်ႇသွၼ်ပၼ်ဢၼ်မႂ်ႇလႄႈ ပႃးတင်းဢႃႇၼႃႇတၼ်းၶူဝ်းလူင်ပႄႇ။ မၼ်းၸဝ်ႈသင်ႇလၢတ်ႈတီႈၽီဢၼ်ၵူဝ်ႈၵိူၵ်ႇတင်းလၢႆလႄႈ ၶဝ်ထွမ်ႇဢဝ်လူင်ပႄႇ၊ ဝႃႈၼင်ႇၼႆဢေႃႈ။-

28သတၢင်းသဵင်ၶၢဝ်ႇမၼ်းၸဝ်ႈၼၼ်ႉၵေႃႈ ၸွတ်ႇၸႅတ်ႇၵႂႃႇၵူႈတီႈၵူႈလႅၼ် ၵႃႈၼႂ်းမိူင်း ၵႃႇလီႉလႄး ၼၼ်ႉၵမ်းလဵဝ်ဢေႃႈ။

29မိူဝ်ႈဢၼ်ဢွၵ်ႇသေၵႃႈၼႂ်းၸရွပ်ႈႁေႃးတြႃးၼၼ်ႉၸိုင်၊ ၶဝ်ၸိူဝ်းၼၼ်ႉ ဢိၵ်ႇတင်း ယႃႇၵုပ်ႈ တင်း ယူဝ်းႁၢၼ်ႇ ၵႂႃႇၶဝ်ႈၵႃႈၼႂ်းႁိူၼ်း သီႉမုၼ်ႇ တင်း ဢၼ်ႇတရေႇ ဢေႃႈ။-

30ဢွၵ်ႇၼၢႆး ပေႇတရူႉ ၼၼ်ႉၼၢဝ်လႄႈ ၼွၼ်းလိူၼ်းယူႇဢေႃႈ။ ၶဝ်လဝ်ႊလၢတ်ႈလွင်ႈမၼ်းၼၼ်ႉ တီႈမၼ်းၸဝ်ႈၵမ်းလဵဝ်ဢေႃႈ။-

31မၼ်းၸဝ်ႈၵေႃႈ မႃးလႄႈယိပ်းမိုဝ်းမႄႈယိင်းၼၼ်ႉယဝ်ႉၸင်ႇ၊ ယုၵ်ႉယွင်ႈဢဝ်မၼ်းဢေႃႈ။ ၼၢဝ်မၼ်းၼၼ်ႉႁၢႆၵမ်းလဵဝ်လႄႈ မၼ်းႁဵတ်းဝၢတ်ႈၶႅၵ်ႇတီႈၶဝ်ဢေႃႈ။

32မိူဝ်ႈဢၼ်ၵၢင်ဝၼ်းတူၵ်းယဝ်ႉလႄႈ ႁွတ်ႈထိုင်ၶိင်ႇၵၢင်ၶမ်ႈၸိုင်၊ ၶဝ်ဢဝ်ၵူၼ်းၶႆႈၵူၼ်းပဵၼ် ဢိၵ်ႇတင်းၵူၼ်းဢၼ်ၽီႁၢႆႉၶဝ်ႈၵႃႈမီး တင်းသဵင်ႈတင်းလူင်မႃးတီႈမၼ်းၸဝ်ႈသေလႄႈ၊-

33တင်းဝဵင်းၼၼ်ႉ ၸူႉၵၼ်တုမ်ၵၼ်ယူႇၵႃႈတီႈႁိမ်းၽၵ်းတူဢေႃႈ။-

34မၼ်းၸဝ်ႈၵေႃႈ ႁႂ်ႈၵူၼ်းၼမ်ၼႃႇ ဢၼ်မီးတၢင်းၶႆႈတၢင်းပဵၼ် ၵူႈၸိူဝ်ႉၵူႈပိူင်ၸိူဝ်းၼၼ်ႉၶႅၼ်းမႃးလႄႈ ၽီႁၢႆႉၼမ်ၼႃႇၵေႃႈ မၼ်းၸဝ်ႈႁေႃႈဢွၵ်ႇပႅတ်ႈသေဢေႃႈ။ ပိူဝ်ႈဢၼ်ၽီႁၢႆႉၸိူဝ်းၼၼ်ႉ ႁူႉမၼ်းၸဝ်ႈယူႇလႄႈ မၼ်းၸဝ်ႈဢမ်ႇပၼ်ၶဝ်လၢတ်ႈၵႂၢမ်းသေၶေႃႈသေၵမ်း။

35ၶိင်ႇၵၢင်ၼႂ် ၸူဝ်ႈဢၼ်မိူင်းဢမ်ႇပႆႇလႅင်းၸိုင်၊ မၼ်းၸဝ်ႈလုၵ်ႉယဝ်ႉၸင်ႇ၊ ဢွၵ်ႇၵႂႃႇၶဝ်ႈၵႃႈတီႈၼႂ်းထိူၼ်ႇသေလႄႈ သူးတွင်းယူႇၵႃႈတီႈၼၼ်ႈဢေႃႈ။-

36သီႉမုၼ်ႇ တင်း ၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၼၼ်ႉ ၸွမ်းႁႃမၼ်းၸဝ်ႈလႄႈ၊-

37မိူဝ်ႈဢၼ်ထူပ်းႁၼ်မၼ်းၸဝ်ႈၸိုင်လဝ်ႊလၢတ်ႈလႄႈဝႃႈ၊ ၵူၼ်းတင်းသဵင်ႈတင်းလူင်ႁႃၸဝ်ႈႁဝ်းယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

38မၼ်းၸဝ်ႈၵေႃႈ လၢတ်ႈတီႈၶဝ်လႄႈဝႃႈ၊ ၼင်ႇႁိုဝ်တၵ်းလႆႈႁေႃးလၢတ်ႈတြႃးၸိုင်၊ ၵႂႃႇၼႂ်းဝၢၼ်ႈ ဢၼ်မီးၸမ်ၵႃႈတီႈႁိမ်းၼႆႈတႃႉႁဝ်း။ ပုၼ်ႈလွင်ႈၼင်ႇႁိုဝ်တၵ်းလႆႈႁဵတ်းၸိူဝ်ႉၼင်ႇၼႆၸိုင် ၵဝ်မႃးယဝ်ႉ၊ ဝႃႈၼင်ႇၼႆယဝ်ႉၸင်ႇ၊-

39ႁေႃးလၢတ်ႈတြႃးၵႃႈတီႈၼႂ်းၸရွပ်ႈႁေႃးတြႃးတင်းလၢႆ ၼႂ်းမိူင်း ၵႃႇလီႉလႄး ၵူႈတီႈၵူႈလႅၼ်လႄႈ ႁေႃႈၽီႁၢႆႉတင်းလၢႆ ဢွၵ်ႇပႅတ်ႈယူႇဢေႃႈ။

40ၵူၼ်းဢၼ်ပဵၼ်တုတ်ႈၵေႃႉၼိုင်ႈ မႃးတီႈမၼ်းၸဝ်ႈလႄႈ ၶုပ်ႉၶဝ်ႇယူႇသေလႄႈ တွင်းပၢၼ်ႇလဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းမီးဢလူဝ်ႇၸိုင်၊ ႁႂ်ႈၵဝ်ၶႃႈ မူတ်းသႂ်လႆႈယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

41ယေႇသူႉ ၵေႃႈ မီးၸႂ်ဢၼ်ဢဵတ်းလူလႄႈ ယိုၼ်ႈမိုဝ်းမၼ်းၸဝ်ႈတိူဝ်ႉၵေႃႉၼၼ်ႉသေလႄႈလၢတ်ႈလႄႈဝႃႈ၊ ၵဝ်မီးဢလူဝ်ႇယူႇဢေႃႈ။ ႁႂ်ႈမူတ်းသႂ်တႃႉ၊ ဝႃႈၼင်ႇၼႆဢေႃႈ။-

42တုတ်ႈမၼ်းၼၼ်ႉ ႁၢႆၵမ်းလဵဝ်လႄႈ ႁွတ်ႈထိုင်တၢင်းဢၼ်မူတ်းသႂ်မႃးဢေႃႈ။-

43မၼ်းၸဝ်ႈၵေႃႈ ႁၢမ်ႈတၢပ်ႈႁႄႉၶႅၼ်မၼ်းၼႃႇလူင်လၢင်လႄႈဝႃႈ၊-

44မႂ်းႁဵတ်းသတီႉတႃႉ။ လွင်ႈၼႆႉၸိုင် ယႃႇပေလၢတ်ႈတီႈၽူႈလႂ်သေဢိတ်း။ ၵူၺ်းၵႃႈ ၵႂႃႇၼႄပျႃးတူဝ်ၸဝ်ႈၵဝ်ႇ ၵႃႈတီႈယိတ်ႈပရေႃးႁဵၵ်ႈပုၼ်ႉတႃႉ။ ၼင်ႇႁိုဝ်တၵ်းပဵၼ်သၢၵ်ႈသေႇတီႈပိူၼ်ႈတၢင်ႇၵေႃႉၸိုင်၊ ၵွပ်ႈပိူဝ်ႈဢၼ်ႁွတ်ႈထိုင်တၢင်းဢၼ်မူတ်းသႂ်လႄႈ သၢၵ်ႈၵၢပ်ႈတၢင်းပုၵ်ႈၸေႃႇ ဢၼ် မူဝ်းသေႇ ၸီႇယၢင်ႇသင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆလႄႈ ပွႆႇမၼ်းၵႂႃႇၵမ်းလဵဝ်ဢေႃႈ။-

45ၵူၺ်းၵႃႈ ၵေႃႉၼၼ်ႉ ဢွၵ်ႇၵႂႃႇ လၢတ်ႈၵႂၢမ်းၼမ်ၼႃႇလႄႈ ႁႂ်ႈလွင်ႈတီႈႁဵင်း ၼၼ်ႉ ၸွတ်ႇတူဝ်ၵႂႃႇ ၵူႈတီႈၵူႈလႅၼ်ဢေႃႈ။ ပိူဝ်ႈၼႆလႄႈ လိုၼ်းၼၼ်ႉ မၼ်းၸဝ်ႈဢမ်ႇလႆႈၶဝ်ႈ ထၢင်ႇထၢင်ႇသႃးသႃးၵႃႈၼႂ်းဝဵင်းလႄႈ လႆႈယူႇၵႃႈၼွၵ်ႈ ၼႂ်းထိူၼ်ႇၵူၺ်းဢေႃႈ။ ၶဝ်လုၵ်ႉသေၵူႈတီႈၵူႈလႅၼ် မႃးၵႃႈတီႈမၼ်းၸဝ်ႈဢေႃႈ။