Mark 8

Shan

← Chapter 7 Jump to: Chapter 9 →

1မိူဝ်ႈၼၼ်ႉ ပိူဝ်ႈဢၼ်ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ မီးၼမ်ၼႃႇလူင်လၢင်လႄႈ ဢမ်ႇမီးတၢင်းၵိၼ်တၢင်းၶူပ်းၼၼ်ႉလႄႈ မၼ်းၸဝ်ႈႁွင်ႉဢဝ်တပႄးၸဝ်ႈမႃးလႄႈလၢတ်ႈဝႃႈ၊-

2ၵဝ်ဢဵတ်းလူၵူၼ်းဢၼ်ၸူႉဢၼ်တုမ်ၸိူဝ်းၼႆႉဢေႃႈ။ ၶဝ်မီးယူႇလူၺ်ႈၵၼ်တင်းၵဝ်လႆႈသၢမ်ဝၼ်းတဵမ်တဵမ်ယဝ်ႉ။ ၶဝ်ဢမ်ႇမီးတၢင်းၵိၼ်ၵႃႈသင်သေဢိတ်း။-

3ပိူဝ်ႈဢၼ် ၵမ်ႈၽွင်ႈလုၵ်ႉသေၵႃႈတီႈဢၼ်ၵႆမႃးလႄႈ၊ ၸူဝ်ႈဢၼ်ၶဝ်ဢမ်ႇပႆႇၵိၼ်တၢင်းၵိၼ်ၼၼ်ႉ၊ ပေႃးၵဝ်ပွႆႇၶဝ်မိူဝ်းၵႂႃႇၵႃႈတီႈႁိူၼ်းၸိုင်၊ ၶဝ်တၵ်းႁိူဝ်ႉတၵ်းဢူၼ်ႈၵႃႈတၢင်းဢေႃႈ၊ ဝႃႈၼင်ႇၼႆဢေႃႈ။-

4တပႄးၸဝ်ႈတင်းလၢႆၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၵႃႈၼႂ်းထိူၼ်ႇ၊ တၵ်းလႆႈတၢင်းၵိၼ်ႁႂ်ႈၵူၼ်းၸိူဝ်းၼႆႉ ပေႃးၵိၼ်ဢိမ်ႇၵိၼ်တဵမ်ၼၼ်ႉၵႃႈတီႈလႂ်လႆႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

5မၼ်းၸဝ်ႈၵေႃႈထၢမ်လႄႈဝႃႈ၊ သူမီးၶဝ်ႈမုၼ်းလၢႆႁူၺ်ႇ၊ ဝႃႈၼင်ႇၼႆယဝ်ႉၸင်ႇ၊ ၶဝ်ၶိုၼ်းလဝ်ႊလၢတ်ႈလႄႈဝႃႈ၊ မီးၶဝ်ႈမုၼ်းၸဵတ်းႁူၺ်ႇၶႃႈဢေႃႈ၊ ဝႃႈၼင်ႇၼႆဢေႃႈ။-

6မိူဝ်ႈၼၼ်ႉ မၼ်းၸဝ်ႈမီးဢမိင်ႉ ႁႂ်ႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ဢိင်ယူႇၵႃႈၼိူဝ်လိၼ်ဢေႃႈ။ မၼ်းၸဝ်ႈဢဝ်ၶဝ်ႈမုၼ်း ၸဵတ်းႁူၺ်ႇၼၼ်ႉ ယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းလႄႈ ပၼ်တီႈတပႄးၸဝ်ႈတင်းလၢႆ ႁႂ်ႈသႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းၸိူဝ်းၼၼ်ႉဢေႃႈ။ တပႄးၸဝ်ႈၸိူဝ်းၼၼ်ႉၵေႃႈ ဢဝ်သႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉဢေႃႈ။-

7တူဝ်ပႃဢွၼ်ႇၵေႃႈ ၶဝ်မီးဢိတ်းၼိုင်ႈလႄႈ၊ မၼ်းၸဝ်ႈယွင်ႈယေႃး ၵျေးၸူးၸဝ်ႈယဝ်ႉၸင်ႇ၊ မီးဢမိင်ႉႁႂ်ႈသႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းၸိူဝ်းၼၼ်ႉဢေႃႈ။-

8ၶဝ်ၼၼ်ႉၵိၼ်လႄႈ ဢိမ်ႇယဝ်ႉၸင်ႇ၊ ၵဵပ်းသိမ်းဢဝ်ဢၼ်ၵိုတ်းဢၼ်ႁၵ်းဢၼ်ႁဵၵ်းၸိူဝ်းၼၼ်ႉလႄႈ လႆႈၸဵတ်းပဵတ်ႈဢေႃႈ။-

9ၶဝ်ၸိူဝ်းဢၼ်ၵိၼ်ၼၼ်ႉၸမ်ႉ၊ မီးသီႇႁဵင်ၸမ်ၸမ်ဢေႃႈ။

10မၼ်းၸဝ်ႈပွႆႇၶဝ်ၼၼ်ႉယဝ်ႉၸင်ႇ၊ ဢိၵ်ႇတင်းတပႄးၸဝ်ႈတင်းလၢႆ ၶဝ်ႈၵႃႈၼႂ်းႁိူဝ်းၵမ်းလဵဝ်လႄႈ ႁွတ်ႈထိုင်ၵႃႈတီႈဝၢၼ်ႈၼွၵ်ႈၼႃးပၢင်ႇ တႃႇလမႃႉၼူႉထႃႉ ပုၼ်ႉဢေႃႈ။

11မိူဝ်ႈၼၼ်ႉ ၽႃႇရီႉသႄး တင်းလၢႆ ဢွၵ်ႇမႃးလႄႈတွင်ႈထၢမ်ထဵင်ၵၼ်တင်းမၼ်းၸဝ်ႈယူႇသေလႄႈ ယွၼ်းၼီႉမိၵ်ႈလၢၵ်ႈၶၼႃႇ ဢၼ်ပဵၼ်မႃးၵႃႈၼိူဝ်ၽႃႉၵၢင်ႁၢဝ် ႁႂ်ႈလႆႈၸၢမ်းတူၺ်းယႃႉယူၵ်ႉမၼ်းၸဝ်ႈယူႇဢေႃႈ။-

12မၼ်းၸဝ်ႈထူၺ်ႈၸႂ်လူင်ၼႂ်းႁူဝ်ၸႂ်ၼႃႇလူင်လၢင်သေလႄႈလၢတ်ႈဝႃႈ၊ ႁဵတ်းႁိုဝ်လႄႈၵူၼ်းမဵဝ်းၼႆႉ ယွၼ်းၼီႉမိၵ်ႈလၢၵ်ႈၶၼႃႇၼင်ႇႁိုဝ်။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ဢမ်ႇလႆႈၼႄပျႃးၼီႉမိၵ်ႈလၢၵ်ႈၶၼႃႇတီႈၵူၼ်းမဵဝ်းၼႆႉ၊ ဝႃႈၼင်ႇၼႆသေယဝ်ႉ၊-

13ဢွၵ်ႇသေၵႃႈၼႂ်းတီႈဢၼ်ၶဝ်မီးၼၼ်ႉ ၵႂႃႇလႄႈသမ်ႉၶိုၼ်းၶဝ်ႈၵႃႈၼႂ်းႁိူဝ်းယဝ်ႉၸင်ႇ၊ ၶိုၼ်းမိူဝ်းၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉဢေႃႈ။

14တပႄးၸဝ်ႈတင်းလၢႆ လိုမ်းပႃးဢဝ်ၶဝ်ႈမုၼ်းၵႂႃႇလႄႈ၊ ၵႃႈၼိူဝ်ႁိူဝ်းၼၼ်ႉ၊ တီႈၶဝ်မီးၶဝ်ႈမုၼ်းႁူၺ်ႇလဵဝ်ၵူၺ်းဢေႃႈ။-

15မၼ်းၸဝ်ႈၵေႃႈ ပိင်းၺၢပ်ႈလႄႈဝႃႈ၊ ႁဵတ်းသတီႉလႄႈ ဝႄႈပႅတ်ႈၸိူဝ်ႉပႅင်ႈ ၽႃႇရီႉသႄး တင်းလၢႆ ဢိၵ်ႇတင်းၸိူဝ်ႉပႅင်ႈ ႁေႇရူတ်ႈ ၼၼ်ႉတႃႉ၊ ဝႃႈၼင်ႇၼႆဢေႃႈ။-

16ၶဝ်ၵေႃႈ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၸႃၵၼ်လႄႈဝႃႈ၊ ပိူဝ်ႈဢၼ်ႁဝ်းဢမ်ႇပႃးၶဝ်ႈမုၼ်းမႃးလႄႈ မၼ်းၸဝ်ႈၸင်ႇဝႃႈယဝ်ႉ၊ ဝႃႈၼင်ႇၼႆဢေႃႈ။-

17ယေႇသူႉ ႁူႉသေယဝ်ႉ၊ လၢတ်ႈလႄႈဝႃႈ၊ ႁဵတ်းသင်လႄႈ သူၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၸႃၵၼ် ၵွပ်ႈပိူဝ်ႈဢၼ်ဢမ်ႇပႃးၶဝ်ႈမုၼ်းမႃးၼၼ်ႉၼင်ႇႁိုဝ်။ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ သူယင်းဢမ်ႇပႆႇဢဝ်သႂ်ႇၸႂ်လႄႈ ႁူႉလူးၵွၼ်ႇႁိုဝ်။ ႁူဝ်ၸႂ်သူယင်းၵႅၼ်ႇၶႅင်ယူႇလူးၵွၼ်ႇႁိုဝ်။-

18မီးတႃသေၵေႃႈ ဢမ်ႇႁၼ်ႁိုဝ်၊ မီးႁူသေၵေႃႈဢမ်ႇငိၼ်းႁိုဝ်၊ ဢမ်ႇၶုၵ်းၸႂ်လႆႈၶႆႈၸႂ်ထူပ်းလႄႈယူႇလူးၵွၼ်ႇႁိုဝ်။-

19မိူဝ်ႈဢၼ်ၵဝ်ဢဝ်ၶဝ်ႈမုၼ်းႁႃႈႁူၺ်ႇ ဝိတ်းပၼ်တီႈၵူၼ်းႁႃႈႁဵင်ၼၼ်ႉၸိုင် သူၵဵပ်းသိမ်းဢဝ်ဢၼ်ႁၵ်းဢၼ်ႁဵၵ်းမၼ်းလႄႈ လႆႈလၢႆပဵတ်ႈ၊ ဝႃႈၼင်ႇၼႆယဝ်ႉၸင်ႇ၊ ၶဝ်ၼၼ်ႉလဝ်ႊလၢတ်ႈလႄႈဝႃႈ၊ လႆႈသိပ်းသွင်ပဵတ်ႈၶႃႈဢေႃႈ၊ ဝႃႈၼင်ႇၼႆဢေႃႈ။-

20မၼ်းၸဝ်ႈၵေႃႈသမ်ႉထၢမ်ထႅင်ႈလႄႈဝႃႈ၊ မိူဝ်ႈဢၼ် ၵဝ်ဢဝ်ၶဝ်ႈမုၼ်းၸဵတ်းႁူၺ်ႇ ဝိတ်းပၼ်တီႈၵူၼ်းသီႇႁဵင်ၼၼ်ႉၸိုင်၊ ၵဵပ်းသိမ်းဢဝ် ဢၼ်ႁၵ်းဢၼ်ႁဵၵ်းမၼ်းလႄႈ လႆႈလၢႆပဵတ်ႈ၊ ဝႃႈၼင်ႇၼႆယဝ်ႉၸင်ႇ၊ ၶဝ်ၼၼ်ႉ လဝ်ႊလၢတ်ႈလႄႈဝႃႈ၊ လႆႈၸဵတ်းပဵတ်ႈၶႃႈ၊ ဝႃႈၼင်ႇၼႆဢေႃႈ။-

21မၼ်းၸဝ်ႈၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ႁဵတ်းသင်လႄႈ သူယင်းဢမ်ႇႁူႉလႄႈယူႇၼင်ႇႁိုဝ်။ ဝႃႈၼင်ႇၼႆဢေႃႈ။

22ၶဝ်ၼၼ်ႉ ႁွတ်ႈထိုင်ၵႃႈတီႈဝဵင်း ပႅတ်ႉၸေးတႃႉ ပုၼ်ႉသေယဝ်ႉ၊ ပိူၼ်ႈဢဝ်ၵူၼ်းတႃမွတ်ႇၵေႃႉၼိုင်ႈ မႃးတီႈမၼ်းၸဝ်ႈလႄႈ တွင်းပၢၼ်ႇႁႂ်ႈမၼ်းၸဝ်ႈ တိူဝ်ႉၵေႃႉၼၼ်ႉဢေႃႈ။-

23မၼ်းၸဝ်ႈၸုင်ဢဝ်မိုဝ်းၵူၼ်းတႃမွတ်ႇၼၼ်ႉလႄႈ ဢွၵ်ႇၵႂႃႇၵႃႈၼွၵ်ႈဝဵင်းယဝ်ႉၸင်ႇ၊ ထူမ်ႇၼမ်ႉလၢႆးသႂ်ႇၼႂ်းမၢၵ်ႇတႃမၼ်းလႄႈ ဢဝ်မိုဝ်းမၼ်းၸဝ်ႈ တၢင်ႇၵႃႈၼိူဝ်မၼ်းယူႇသေလႄႈ ထၢမ်လႄႈဝႃႈ၊ မႂ်းႁၼ်သေၸိူဝ်ႉသေပိူင်ႁိုဝ်။ ဝႃႈၼင်ႇၼႆဢေႃႈ။-

24ၵေႃႉၼၼ်ႉမုင်ႈတူၺ်းသေလႄႈ လဝ်ႊလၢတ်ႈလႄႈဝႃႈ၊ ၵဝ်ၶႃႈႁၼ်ၵူၼ်းတင်းလၢႆၶႃႈဢေႃႈ။ ၵဝ်ၶႃႈႁၼ်ၵူၼ်းၸိူဝ်းၼၼ်ႉ ပဵၼ်ၸိူဝ်ႉၼင်ႇ တူၼ်ႈမႆႉလႄႈ ပႆတၢင်းၵႂႃႇယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

25လိုၼ်းၼၼ်ႉ မၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်မၢၵ်ႇတႃမၼ်းယဝ်ႉၸင်ႇ၊ မၼ်းၼၼ်ႉႁၼ်ၸႅင်ႈၸႅင်ႈလႅင်းလႅင်းလႄႈ ပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇယူႇသေလႄႈ လႆႈႁၼ်တင်းသဵင်ႈတင်းလူင်လီလီငၢမ်းငၢမ်းဢေႃႈ။-

26မၼ်းၸဝ်ႈၵေႃႈ ပွႆႇမၼ်းၵႂႃႇၵႃႈတီႈႁိူၼ်းမၼ်းသေလႄႈ လၢတ်ႈလႄႈဝႃႈ၊ ယႃႇပေၶဝ်ႈၵႃႈၼႂ်းဝၢၼ်ႈပုၼ်ႉ၊ ယႃႇပေလၢတ်ႈတီႈ ၽူႈလႂ်သေၵေႃႉသေၵူၼ်း ၵႃႈၼႂ်းဝၢၼ်ႈၼၼ်ႉ၊ ဝႃႈၼင်ႇၼႆဢေႃႈ။

27ၼႂ်းမိူဝ်ႈဢၼ် ယေႇသူႉ ဢိၵ်ႇတင်းတပႄးၸဝ်ႈတင်းလၢႆ ၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇ ဝဵင်း ၵေႇသရီႉၽီႉလိပ်ႉပူႉ ယူႇၼၼ်ႉၸိုင်၊ မၼ်းၸဝ်ႈထၢမ်တီႈတပႄးမၼ်းၸဝ်ႈၸိူဝ်းၼၼ်ႉလႄႈဝႃႈ၊ ၵူၼ်းတင်းလၢႆဝႃႈ၊ ၵဝ်ၼႆႉပဵၼ်ၽူႈလႂ်၊ ဝႃႈၼင်ႇၼႆသေယဝ်ႉ၊-

28ၶဝ်ၵေႃႈလဝ်ႊလၢတ်ႈလႄႈဝႃႈ၊ ၵမ်ႈၽွင်ႈဝႃႈ ၸဝ်ႈႁဝ်းပဵၼ် ယူဝ်းႁၢၼ်ႇ ဢၼ်ပၼ် ပပ်ႉတီႉၸမ်ႇ ၼၼ်ႉ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ ပဵၼ် ဢေးလီႉယႃႉ ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ ပဵၼ်ပရေႃးၽႅတ်ႈသေပႃးပႃး၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆဢေႃႈ။-

29မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊ သူၸိုင်ဝႃႈၵဝ်ၼႆႉပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၼၼ်ႉ၊ ပေႇတရူႉ လဝ်ႊလၢတ်ႈလႄႈဝႃႈ၊ ၸဝ်ႈႁဝ်းပဵၼ် ၸဝ်ႈၶရိၸ်ႈၶႃႈဢေႃႈ၊ ဝႃႈၼင်ႇၼႆဢေႃႈ။-

30ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈမၼ်းၸဝ်ႈၼၼ်ႉ တီႈၽူႈလႂ်သေၵေႃႉသေၵူၼ်းၸိုင်၊ မၼ်းၸဝ်ႈပိင်းၺၢပ်ႈဝႆႉ တီႈတပႄးၸဝ်ႈၸိူဝ်းၼၼ်ႉဢေႃႈ။

31လိူဝ်သေၼၼ်ႉ မၼ်းၸဝ်ႈၸႃႉၼႄပျႃးလွင်ႈဢၼ် လုၵ်ႈၵူၼ်းတၵ်းလႆႈၶၢမ်ႇၼမ်ၼႃႇလူင်လၢင်၊ လွင်ႈဢၼ်တၵ်းလႆႈၶၢမ်ႇတၢင်းဢၼ် ပႄႇပႅတ်ႈၵႃႈၼႂ်းၵူၼ်း ဢၼ်ပဵၼ်ၵႄႇပဵၼ်ႁူဝ်၊ ယိတ်ႈပရေႃးႁဵၵ်ႈလူင် တင်းၵူၼ်းထုတ်ႇၵျၢမ်းတင်းလၢႆ၊ လွင်ႈဢၼ်တၵ်းလႆႈၶၢမ်ႇတၢင်းဢၼ်ဢဝ်တၢႆ၊ လွင်ႈဢၼ်တၵ်းလုၵ်ႉၶိုၼ်းလိပ်း ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ တီႈတပႄးၸဝ်ႈၸိူဝ်းၼၼ်ႉဢေႃႈ။-

32မၼ်းၸဝ်ႈလၢတ်ႈၵႂၢမ်းၼၼ်ႉလႅင်းလႅင်းဢေႃႈ။ ပေႇတရူႉ ႁွင်ႉဢဝ်မၼ်းၸဝ်ႈၵႂႃႇႁူမ်ႈၵၼ်တင်းမၼ်းလႄႈ လၢတ်ႈၵႂၢမ်းဢၼ်တၢင်ႇဢပႅတ်ႈယဝ်ႉၸင်ႇ၊-

33မၼ်းၸဝ်ႈဝၢႆႇၼႃႈတူၺ်းတပႄးၸဝ်ႈတင်းလၢႆသေလႄႈ သင်ႇသွၼ်သုင်းမႃႉပၼ်တီႈ ပေႇတရူႉ လႄႈဝႃႈ၊ ၸႃႇတၢၼ်ႇ ဢိူၺ်း၊ သုတ်ႉပႃႈလင်ၵဝ်တႃႉ။ မႂ်းၸႂ်ဢမ်ႇၸပ်းဢမ်ႇၸွႆးလွင်ႈတၢင်းဢၼ် ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ၊ ၸႂ်ၸပ်းၸႂ်ၸွႆးလွင်ႈတၢင်းဢၼ် ၸၢပ်ႈသႅင်ႇၵၼ်တင်းၵူၼ်းတင်းလၢႆၵူၺ်းဢေႃႈ၊ ဝႃႈၼင်ႇၼႆဢေႃႈ။

34ၵမ်းၼၼ်ႉ မၼ်းၸဝ်ႈႁွင်ႉဢဝ်ပရဵၵ်ႈသၢတ်ႈ ဢိၵ်ႇတင်းတပႄးၸဝ်ႈတင်းလၢႆယဝ်ႉၸင်ႇ၊ လၢတ်ႈလႄႈဝႃႈ၊ ၽူႈလႂ်သေဢမ်ႇဝႃႈ၊ ၵေႃႉဢၼ်မီးဢလူဝ်ႇ ၶႂ်ႈၸပ်းမႃးပႃႈလင်ၵဝ်ၼၼ်ႉ၊ ႁႂ်ႈၵေႃႉၼၼ်ႉပႄႇပႅတ်ႈတူဝ်ၸဝ်ႈၵဝ်ႇသေလႄႈ ႁၢပ်ႇဢဝ် သဝ်လၵ်းဝႃးၵၢပ်ႈတူဝ်ၸဝ်ႈၵဝ်ႇလႄႈ ၸွမ်းပႃႈလင်ၵဝ်တႃႉ။-

35လွင်ႈမၼ်းၸမ်ႉ ၽူႈလႂ်သေဢမ်ႇဝႃႈ၊ ၵေႃႉဢၼ်မီးဢလူဝ်ႇ ၶႂ်ႈၵႄႇသႄႇဢဝ်တူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉ တၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်သုမ်းဢသၢၵ်ႈၵွပ်ႈပိူဝ်ႈၵဝ် ဢိၵ်ႇတင်းၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉ၊ ၵေႃႉၼၼ်ႉ တၵ်းၵႄႇသႄႇဢဝ် ဢသၢၵ်ႈတူဝ်ၸဝ်ႈၵဝ်ႇဢေႃႈ။-

36ၵူၼ်းသေၵေႃႉသေၵူၼ်း၊ ပေႃးလႆႈဢုပ်ႉပိူင်ႇလေႃးၵႃႉၼႆႉ တင်းသဵင်ႈတင်းလူင်လႄႈ ဝီႉၺိၺ်ႇတူဝ်ၸဝ်ႈၵဝ်ႇသုမ်းၸိုင်၊ တၵ်းမီးၵျေးၸူးၵႃႈသင်။-

37ၵေႃႉၼၼ်ႉ တၵ်းဢဝ်ဢုၵ်ႉၸႃႇဢၼ်လႂ်ထုတ်ႇဢဝ် ဝီႉၺိၺ်ႇတူဝ်ၸဝ်ႈၵဝ်ႇ။-

38ၽူႈလႂ်သေဢမ်ႇဝႃႈ၊ ၵေႃႉဢၼ်ဢူၵ်းဢၢႆ ၵွပ်ႈပိူဝ်ႈၵဝ် ဢိၵ်ႇတင်းၵွပ်ႈပိူဝ်ႈၵႂၢမ်းၵဝ် ၵႃႈၼႂ်းၵူၼ်းမဵဝ်းဢၼ်ႁၢႆႉမိူၵ်ႈလႄႈ လဵၼ်ႈၽူဝ်ဢွၼ်ႇၼႆႉၼၼ်ႉ၊ ၵေႃႉၼၼ်ႉၸိုင် လုၵ်ႈၵူၼ်းတၵ်းဢူၵ်းဢၢႆ မိူဝ်ႈဢၼ်ပႃးတင်းမုၼ်ၽုင်းဢႃႇၼူႉၽေႃႇပေႃႈၸဝ်ႈ ဢိၵ်ႇတင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆမႃးၼၼ်ႉဢေႃႈ။

← Chapter 7 Jump to: Chapter 9 →