Mark 16

Shan

← Chapter 15 Jump to:

1မိူဝ်ႈဢၼ် ပူၼ်ႉဝၼ်းၵမ်သိၼ်ယဝ်ႉၸိုင်၊ မႃႇရီႉမႃႇၵတလႃႉ၊ မႃႇရီႉ ဢၼ်ပဵၼ်မႄႈ ယႃႇၵုပ်ႈ ဢိၵ်ႇတင်း သႃႇလုမ်ႇ ၸိူဝ်းၼၼ်ႉ သိုဝ်ႉဢဝ်မဵဝ်းၼၢမ်ႇသႃႇ ႁႂ်ႈလႆႈတႃးတူဝ်တၢႆမၼ်းၸဝ်ႈၼၼ်ႉယဝ်ႉၸင်ႇ၊-

2ဝၼ်းဢၼ်ပဵၼ်ဝၼ်းပထမႃႉၼႂ်းၸဵတ်းဝၼ်း၊ ၶိင်ႇၵၢင်ၼႂ်ၸဝ်ႉၸဝ်ႉ၊ ၶိင်ႇဢၼ်ၵၢင်ဝၼ်းဢွၵ်ႇၼၼ်ႉ ၵႂႃႇၸူးၵႃႈတီႈသၢင်းၶႅင်းမၼ်းၸဝ်ႈဢေႃႈ။-

3ၶဝ်ၼၼ်ႉ ၼင်ႇၵၼ်ၵၼ် လၢတ်ႈၵၼ်လႄႈဝႃႈ၊ ၽူႈလႂ်တၵ်းၵိင်ႈမၢၵ်ႇႁိၼ်ၼၼ်ႉဢွၵ်ႇသေၵႃႈတီႈႁူးၶုမ်သၢင်းၶႅင်းၼၼ်ႉ၊ ဝႃႈၼင်ႇၼႆယဝ်ႉၸင်ႇ၊-

4မိူဝ်ႈဢၼ်လူတူၺ်းၸိုင်၊ လႆႈႁၼ်မၢၵ်ႇႁိၼ်ၼၼ်ႉ ၵိင်ႈဢွၵ်ႇသေလႄႈ မီးဝႆႉယူႇဢေႃႈ။ မၢၵ်ႇႁိၼ်ၼၼ်ႉၸမ်ႉ၊ ပဵၼ်မၢၵ်ႇႁိၼ် ဢၼ်ယႂ်ႇၼႃႇဢေႃႈ။-

5ၶဝ်ၼၼ်ႉ ၶဝ်ႈၵႂႃႇၵႃႈၼႂ်းၶုမ်သၢင်းၶႅင်းၼၼ်ႉသေယဝ်ႉ၊ ထူပ်းႁၼ်ၵူၼ်းၼုမ်ႇ ဢၼ်ၼုင်ႈသိူဝ်ႈယၢဝ်း ဢၼ်ၽိူၵ်ႇဢၼ်ၶၢဝ်ၵေႃႉၼိုင်ႈ ၼင်ႈယူႇၵႃႈတီႈၽၢႆႇၶႂႃၼၼ်ႉလႄႈ ၶဝ်တူၵ်းၸႂ်ဢေႃႈ။-

6ၵေႃႉၼၼ်ႉၵေႃႈ လၢတ်ႈလႄႈဝႃႈ၊ ယႃႇပေတူၵ်းၸႂ်၊ သူႁႃ ယေႇသူႉ ၵူၼ်းဝဵင်း ၼႃႇၸရႅတ်ႈ ဢၼ်လႆႈၶၢမ်ႇတၢင်းဢၼ်တွၵ်ႇဝႆႉ ၵႃႈၼိူဝ်သဝ်လၵ်းဝႃးၵၢပ်ႈၼၼ်ႉဢေႃႈ။ မၼ်းၸဝ်ႈၶိုၼ်းလုၵ်ႉယဝ်ႉ။ ဢမ်ႇမီးၵႃႈတီႈၼႆႈ။ တူၺ်းတီႈဢၼ်ဝႆႉတူဝ်တၢႆမၼ်းၸဝ်ႈၼႆႉတႃႉ။-

7ၵႂႃႇလႄႈမွၵ်ႇလၢတ်ႈတီႈ ပေႇတရူႉ ဢိၵ်ႇတင်း တပႄးၸဝ်ႈတင်းလၢႆလႄႈဝႃႈ၊ မၼ်းၸဝ်ႈၵႂႃႇၵႃႈတီႈ မိူင်း ၵႃႇလီႉလႄး ပုၼ်ႉ ဢွၼ်တၢင်းသူယူႇဢေႃႈ၊ ဝႃႈၼင်ႇၼႆတႃႉ။ သူတၵ်းထူပ်းႁၼ်မၼ်းၸဝ်ႈ ၵႃႈတီႈမိူင်းပုၼ်ႉ ၵႃႈၼင်ႇဢၼ်မၼ်းၸဝ်ႈလၢတ်ႈဝႆႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

8ၶဝ်ၼၼ်ႉၵေႃႈ ဢွၵ်ႇသေၵႃႈၼႂ်းၶုမ်သၢင်းၶႅင်းၸဝ်ႈၼၼ်ႉလႄႈ သၼ်ႇဝႆယူႇ၊ ၵႂင်ၸႂ်ယုင်ႈၸႂ်ယူႇသေလႄႈ လႅၼ်ႈပၢႆႈၵႂႃႇဢေႃႈ။ ပိူဝ်ႈဢၼ် ၶဝ်ၵူဝ်ႁႄၼႃႇလူင်လၢင်လႄႈ ၶဝ်ဢမ်ႇလၢတ်ႈၵႃႈသင်တီႈၽူႈလႂ်သေၵေႃႉသေၵူၼ်း။

9မၼ်းၸဝ်ႈၼၼ်ႉ၊ ဝၼ်းဢၼ်ပဵၼ်ဝၼ်းပထမႃႉ ၼႂ်းၸဵတ်းဝၼ်း ၶိင်ႇမိူဝ်ႈ ၸဝ်ႉၸဝ်ႉၼၼ်ႉ လုၵ်ႉၶိုၼ်းယဝ်ႉၸင်ႇ၊ ၼႄပျႃးတူဝ်မၼ်းၸဝ်ႈ တီႈ မႃႇရီႉမႃႇၵတလႃႉ ဢၼ်မၼ်းၸဝ်ႈ ႁေႃႈၽီႁၢႆႉ ၸဵတ်းၵေႃႉဢွၵ်ႇပႅတ်ႈမိူဝ်ႈၼၼ်ၼၼ်ႉဢွၼ်တၢင်းဢေႃႈ။-

10မၼ်းၼၼ်ႉၵေႃႈ ၵႂႃႇလႄႈမွၵ်ႇလၢတ်ႈတီႈၶဝ်ၸိူဝ်းဢၼ် လႆႈႁဵတ်းၵေႃႉႁူမ်ႈလူၺ်ႈၵၼ်တင်းမၼ်းၸဝ်ႈ ၼႂ်းမိူဝ်ႈဢၼ်ၶဝ်ယင်းတိုၵ်ႉမႆႈၸႂ်ၶီၸႂ် ႁႆႈႁွင်ႉယူႇၼၼ်ႉဢေႃႈ။-

11မိူဝ်ႈဢၼ်ၶဝ်ငိၼ်းလွင်ႈဢၼ် မၼ်းၸဝ်ႈဢသၢၵ်ႈလိပ်းယူႇ ဢိၵ်ႇတင်းလွင်ႈဢၼ်မၼ်းၼၼ်ႉ လႆႈႁၼ်မၼ်းၸဝ်ႈယဝ်ႉၼၼ်ႉၸိုင်၊ ၶဝ်ဢမ်ႇယုမ်ႇ။

12လိုၼ်းသေၼၼ်ႉ ၼႂ်းမိူဝ်ႈဢၼ် တပႄးၸဝ်ႈသွင်ၵေႃႉ ၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇယူႇၼၼ်ႉၸိုင်၊ မၼ်းၸဝ်ႈႁဵတ်းႁၢင်ႈၽၢင်ဢၼ်ပႅၵ်ႇပိူင်ႈသေလႄႈ ၼႄပျႃးတူဝ်မၼ်းၸဝ်ႈတီႈၶဝ်ၼၼ်ႉဢေႃႈ။-

13ၶဝ်ၼၼ်ႉ ၶိုၼ်းမႃးလႄႈ မွၵ်ႇလၢတ်ႈလွင်ႈတၢင်းၼၼ်ႉ တီႈၶဝ်ၸိူဝ်းဢၼ် ၵိုတ်းယူႇတင်းလၢႆၼၼ်ႉဢေႃႈ။ ၶဝ်ၼၼ်ႉၵေႃႈ ဢမ်ႇယုမ်ႇၶဝ်ၼၼ်ႉလႄႈ ယူႇဢေႃႈ။

14လိုၼ်းသေၼၼ်ႉ ၼႂ်းမိူဝ်ႈဢၼ် တပႄးၸဝ်ႈသိပ်းဢဵတ်းပႃး ဢိင်ယူႇၵႃႈတီႈႁိမ်းၶူင်ႇတီႈၵိၼ်ၼၼ်ႉၸိုင်၊ မၼ်းၸဝ်ႈၼႄပျႃးတူဝ်မၼ်းၸဝ်ႈတီႈၶဝ်လႄႈ တၢင်ႇဢပႅတ်ႈသင်ႇသွၼ်သုင်းမႃႉပၼ် တၢင်းဢၼ်ၸႂ်ၶဝ်ဢမ်ႇယုမ်ႇမၢတ်ႈ ဢိၵ်ႇတင်းတၢင်းဢၼ်ၸႂ်ၶဝ်ၵႅၼ်ႇၶႅင် ၵွပ်ႈပိူဝ်ႈဢၼ်ၶဝ်ဢမ်ႇယုမ်ႇၵႂၢမ်း ၶဝ်ၸိူဝ်းဢၼ် လႆႈထူပ်းလႆႈႁၼ်မၼ်းၸဝ်ႈ လိုၼ်းသေမၼ်းၸဝ်ႈလုၵ်ႉၶိုၼ်းသေယဝ်ႉ မီးဝႆႉယူႇၼၼ်ႉယဝ်ႉၸင်ႇ၊-

15လၢတ်ႈတီႈၶဝ်လႄႈဝႃႈ၊ သူၵႂႃႇၵႃႈတီႈမိူင်း လေႃးၵီႇၵူႈတီႈၵူႈလႅၼ် ၵႃႈမီးလႄႈ ႁေႃးလၢတ်ႈတြႃးသတၢင်းသိူဝ်းပျေႃႇ တီႈဝူၺ်ႇၼေႇယႃႉ သတ်ႉတဝႃႇတင်းသဵင်ႈတင်းလူင်တႃႉ။-

16ၵေႃႉဢၼ်ယုမ်ႇမၢတ်ႈလႄႈ ၶၢမ်ႇ ပပ်ႉတီႉၸမ်ႇ ၼၼ်ႉ တၵ်းႁွတ်ႈထိုင်တၢင်းဢၼ် ၵႄႇၶျွတ်ႈဢဝ်ဢေႃႈ။ ၵေႃႉဢၼ်ဢမ်ႇယုမ်ႇမၢတ်ႈၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ် ၸီႇယၢင်ႇဢပႅတ်ႈဢေႃႈ။-

17ၼီႉမိၵ်ႈလၢၵ်ႈၶၼႃႇ ဢၼ်တၵ်းပဵၼ်တီႈၶဝ်ၸိူဝ်းဢၼ် ယုမ်ႇမၢတ်ႈၼၼ်ႉၸမ်ႉ၊ ၶဝ်တၵ်းဢိင်ပိုင်ႈ ၼႃႇမႃႉၸိုဝ်ႈသဵင်ၵဝ်သေလႄႈ ႁေႃႈၽီႁၢႆႉတင်းလၢႆ ဢွၵ်ႇပႅတ်ႈဢေႃႈ။ ၶဝ်တၵ်းလၢတ်ႈၵႂၢမ်းၽႃႇသႃႇဢၼ်လၢၵ်ႇပိူင်ႈ တင်းလၢႆဢေႃႈ။-

18ၶဝ်တၵ်းယိပ်းၵမ်ငူးဢေႃႈ။ ပေႃးၵိၼ်ငူၼ်ႉဢၼ်ၸၢင်ႈႁႂ်ႈတၢႆၼၼ်ႉၸိုင် ၶဝ်တၵ်းၵၢင်းလွတ်ႈၽေးဢူႉပၢတ်ႈဢေႃႈ။ ၶဝ်တၵ်းဢဝ်မိုဝ်းတၢင်ႇၵႃႈၼိူဝ်ၶဝ်ၸိူဝ်းဢၼ် ဢမ်ႇယူႇလီၵိၼ်ဝၢၼ်တင်းလၢႆၼၼ်ႉသေလႄႈ ပၼ်ၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆဢေႃႈ။

19ၸဝ်ႈၽြႃးလၢတ်ႈတီႈၶဝ်ၸိူဝ်ႉၼင်ႇၼႆၼၼ်ႉယဝ်ႉၸင်ႇ၊ လႆႈၶၢမ်ႇတၢင်းဢၼ် ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉလႄႈ ၼင်ႈယူႇၵႃႈတီႈၽၢႆႇၶႂႃ ၽြႃးပဵၼ်ၸဝ်ႈဢေႃႈ။-

20ၶဝ်ၵေႃႈ ဢွၵ်ႇၵႂႃႇလႄႈ ပႃးတင်းတၢင်းဢၼ်ၸဝ်ႈၽြႃးၸွႆႈထႅမ်မႃႉၸႃႉ၊ ဢိၵ်ႇတင်းတၢင်းဢၼ်မၼ်းၸဝ်ႈဢဝ်ၼီႉမိၵ်ႈလၢၵ်ႈၶၼႃႇ ဢၼ်ပၼ်တီႈၶဝ် ႁႂ်ႈၼုၵ်ႈၵပၢတ်ႈတြႃးၸဝ်ႈ တႄႇပဵၼ်ဝႆႉၼၼ်ႉယူႇသေလႄႈ ႁေႃးလၢတ်ႈတြႃးၸဝ်ႈ ၵူႈတီႈၵူႈလႅၼ်ဢေႃႈ။ ၶရိၸ်ႈဝၢင်ႇၸဝ်ႈမႃႇၵူႉယဝ်ႉယဝ်ႉဢေႃႈ။

← Chapter 15 Jump to: