Mark 5 — Shan

1ၶဝ်ၼၼ်ႉႁွတ်ႈထိုင်ၽင်ႇၼမ်ႉၽၢႆႇပုၼ်ႉ ၵႃႈတီႈမိူင်း ၵႃႇတရႃႉ ယဝ်ႉၸင်ႇ၊

2မိူဝ်ႈဢၼ်မၼ်းၸဝ်ႈဢွၵ်ႇသေၵႃႈၼႂ်းႁိူဝ်းၼၼ်ႉၵႂႃႇၸိုင်၊ ၵေႃႉဢၼ်ၽီၵူဝ်ႈၵိူၵ်ႇၶဝ်ႈၵေႃႉၼိုင်ႈ ဢွၵ်ႇသေၵႃႈၼႂ်းသၢင်းၶႅင်းမႃးလႄႈ ႁပ်ႉႁူဝ်တၢင်းမၼ်းၸဝ်ႈၵမ်းလဵဝ်ဢေႃႈ။-

3ၵေႃႉၼၼ်ႉ ၸၢင်ႈယူႇၵႃႈၼႂ်းသၢင်းၶႅင်းၵူၺ်းဢေႃႈ။ ၽူႈလႂ်ဢမ်ႇဢဝ်တင်းၸိူၵ်ႈလဵၵ်း မတ်ႉၽုၵ်ႇမၼ်းဝႆႉလႆႈ။-

4ပိၵ်ႉသမ်ႉဢဝ်ၶူၺ်ႇတိၼ် တင်းၸိူၵ်ႈလဵၵ်း မတ်ႉၽုၵ်ႇဝႆႉၶိူဝ်းၶိူဝ်းယႂ်းယႂ်းသေၵေႃႈ၊ မၼ်းၸၢင်ႈတိုတ်ႉၸိူၵ်ႈလဵၵ်းၶၢတ်ႇလႄႈ ႁၵ်းၶူၺ်ႇတိၼ်ပႅတ်ႈဢေႃႈ။ ၽူႈလႂ်ဢမ်ႇပႄႉဢမ်ႇၼႅင်ႇ ႁႂ်ႈမၼ်းယဵၼ်ႇမႃးငႄႈမႃးလႆႈ။-

5ဢမ်ႇထၢတ်ႇသေဝၼ်းသေၶိုၼ်း၊ ၵႃႈၼႂ်းသၢင်းၶႅင်းလႄႈသင်၊ ၵႃႈၼိူဝ်လွႆလႄႈသင်၊ မၼ်းၸၢင်ႈႁွင်ႉသႅၼ်ႇယူႇသေလႄႈ ဢဝ်တင်းမၢၵ်ႇႁိၼ် ထိူဝ်ၼိူဝ်ႉထိူဝ်ၼင်တူဝ်ၸဝ်ႈၵဝ်ႇယူႇဢေႃႈ။-

6မိူဝ်ႈဢၼ်မၼ်းႁၼ် ယေႇသူႉ ယင်းမီးယူႇတီႈၵႆၼၼ်ႉၸိုင်၊ မၼ်းလႅၼ်ႈမႃးၵႃႈတီႈမၼ်းၸဝ်ႈသေလႄႈ ၶုပ်ႉမူပ်ႇ-

7ႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇလဝ်ႊလၢတ်ႈလႄႈဝႃႈ၊ ယေႇသူႉ လုၵ်ႈၽြႃးပဵၼ်ၸဝ်ႈ ဢၼ်သုင်မျၢတ်ႈၼႃႇသေပိူၼ်ႈတီႈၶႃႈ၊ ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈၸိူဝ်ႉၼင်ႇႁိုဝ်တီႈၶႃႈ၊ ၼင်ႇႁိုဝ်ၸဝ်ႈႁဝ်းတၵ်းဢမ်ႇၼိၵ်ႈၸၢၵ်ႈငႅၼ်းသႄးၵဝ်ၶႃႈၸိုင်၊ ၵဝ်ၶႃႈတိူင်ႇၽြႃးပဵၼ်ၸဝ်ႈယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

8လွင်ႈဢၼ်လဝ်ႊလၢတ်ႈၼၼ်ႉၸမ်ႉ၊ မၼ်းၸဝ်ႈလႆႈမီးဢမိင်ႉလႄႈဝႃႈ၊ ၽီဢၼ်ၵူဝ်ႈၵိူၵ်ႇဢိူၺ်း၊ ဢွၵ်ႇသေၵႃႈၼႂ်းၵေႃႉၼႆႉၵႂႃႇတႃႉ၊ ဝႃႈၼင်ႇၼႆယဝ်ႉဢေႃႈ။-

9မၼ်းၸဝ်ႈၵေႃႈ ထၢမ်တီႈမၼ်းလႄႈဝႃႈ၊ မႂ်းမီးၸိုဝ်ႈသဵင်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလဝ်ႊလၢတ်ႈလႄႈဝႃႈ၊ ၸိုဝ်ႈသဵင်ၵဝ်ၶႃႈၸမ်ႉ ၵွပ်ႈပိူဝ်ႈဢၼ်ႁဝ်းၶႃႈပဵၼ်ဢၼ်ၼမ်ၼႃႇလႄႈ လႆႈႁွင်ႉႁဵၵ်းၸိုဝ်ႈ လေႇၵျုင်ႇ တီႈၶႃႈဢေႃႈ၊ ဝႃႈၼင်ႇၼႆယဝ်ႉၸင်ႇ၊-

10ၼင်ႇႁိုဝ်တၵ်းဢမ်ႇႁေႃႈဢွၵ်ႇသေၵႃႈၼႂ်းမိူင်းၼၼ်ႉၸိုင်၊ တွင်းပၢၼ်ႇၼမ်ၼႃႇလူင်လၢင်ဢေႃႈ။

11ၼႂ်းတီႈၼၼ်ႈ မီးၽုင်မူၼမ်ၼႃႇ ၵိၼ်ယူႇၵႃႈတီႈပဵမ်ႉလွႆဢေႃႈ။-

12ၽီႁၢႆႉၸိူဝ်းၼၼ်ႉၵေႃႈ တွင်းပၢၼ်ႇလႄႈဝႃႈ၊ ပွႆႇႁဝ်းၶႃႈၵႂႃႇႁႂ်ႈလႆႈၶဝ်ႈၵႃႈၼႂ်းမူၸိူဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆယဝ်ႉၸင်ႇ၊-

13မၼ်းၸဝ်ႈပၼ်ဢၶႂၢင်ႉၵမ်းလဵဝ်ဢေႃႈ။ ၽီၵူဝ်ႈၵိူၵ်ႇၸိူဝ်းၼၼ်ႉ ဢွၵ်ႇၵႂႃႇၶဝ်ႈၵႃႈၼႂ်းမူတင်းလၢႆၸိူဝ်းၼၼ်ႉလႄႈ ၽုင်မူၼၼ်ႉ ၶုၼ်ႇလႅၼ်ႈလူင်းၽင်ႇၸၼ်းလႄႈ ၵႅၼ်ႉၼမ်ႉၵႃႈၼႂ်းၼွင်ၼၼ်ႉ တၢႆဢေႃႈ။ ပေႃးၼပ်ႉဢၢၼ်ႇၸိုင်၊ မီးသေသွင်ႁဵင်ၸမ်ၸမ်ဢေႃႈ။-

14ၵူၼ်းလဵင်ႉမူၸိူဝ်းၼၼ်ႉ လႅၼ်ႈၵႂႃႇသေလႄႈ မွၵ်ႇလၢတ်ႈသတၢင်းသဵင်ၶၢဝ်ႇ ၵႃႈၼႂ်းဝၢၼ်ႈၼႂ်းဝဵင်းတင်းလၢႆယဝ်ႉၸင်ႇ၊ ၵူၼ်းၼမ်ၼႃႇ ဢွၵ်ႇမႃးႁႂ်ႈလႆႈတူၺ်းလႆႈႁၼ် လွင်ႈတၢင်းဢၼ်ပဵၼ်မႃးၼၼ်ႉဢေႃႈ။-

15မိူဝ်ႈဢၼ်ၶဝ်ၽႅဝ်ၵႃႈတီႈ ယေႇသူႉ လႄႈ လႆႈႁၼ်ၵေႃႉဢၼ်ၽီႁၢႆႉၶဝ်ႈ ဢၼ်ဝႃႈၵေႃႉဢၼ်မီးၽီ လေႇၵျုင်ႇ ၼၼ်ႉ ၼုင်ႈၶူဝ်းၼုင်ႈလဵင်းယူႇ၊ မီးတင်းၸႂ်ဢၼ်လီဢၼ်ငၢမ်းၼင်ႈယူႇၼၼ်ႉၸိုင်၊ ၶဝ်ၵူဝ်ႁႄဢေႃႈ။-

16ၶဝ်ၸိူဝ်းဢၼ်လႆႈႁူႉလႆႈႁၼ်ယဝ်ႉၼၼ်ႉသမ်ႉ မွၵ်ႇလၢတ်ႈလွင်ႈဢၼ်လႆႈပဵၼ်မႃး ၵႃႈတီႈၵေႃႉဢၼ်ၽီႁၢႆႉၶဝ်ႈ ဢိၵ်ႇတင်းၵႃႈတီႈမူတင်းလၢႆၸိူဝ်ႉၼင်ႇႁိုဝ်ၼၼ်ႉ တီႈၶဝ်ၸိူဝ်းဢၼ်မႃးတူၵ်းလိုၼ်းတင်းလၢႆယဝ်ႉၸင်ႇ၊-

17တွင်းပၢၼ်ႇလဝ်ႊလၢတ်ႈ ႁႂ်ႈမၼ်းၸဝ်ႈဢွၵ်ႇၵႃႈၼႂ်းမိူင်းၶဝ်ၼၼ်ႉၵႂႃႇသေဢေႃႈ။

18မိူဝ်ႈဢၼ် မၼ်းၸဝ်ႈၶဝ်ႈၵႃႈၼႂ်းႁိူဝ်းၸိုင်၊ ၵေႃႉဢၼ်ၽီႁၢႆႉၶဝ်ႈၼၼ်ႉ တွင်းပၢၼ်ႇ ယွၼ်းဢၶႂၢင်ႉ ႁႂ်ႈလႆႈမီးယူႇလူၺ်ႈၵၼ်တင်းမၼ်းၸဝ်ႈဢေႃႈ။-

19မၼ်းၸဝ်ႈၵေႃႈ ဢမ်ႇပၼ်ဢၶႂၢင်ႉလႄႈ မီးဢမိင်ႉလႄႈဝႃႈ၊ မႂ်းၵႂႃႇၵႃႈတီႈႁိူၼ်းမႂ်း ဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းၼၼ်ႉတႃႉ။ ၶႆႈပၼ်လၢတ်ႈပၼ်လွင်ႈဢၼ် ထႃႇဝရႃႉၽြႃးဢဵတ်းလူလႄႈ ႁဵတ်းၵျေးၸူးတီႈမႂ်းယႂ်ႇၼႃႇထၢၼ်ႇႁိုဝ်ၼၼ်ႉတီႈၶဝ်တႃႉ။ ဝႃႈၼင်ႇၼႆယဝ်ႉၸင်ႇ၊-

20ၵေႃႉၼၼ်ႉ ဢွၵ်ႇသေၵႃႈတီႈၼၼ်ႈၵႂႃႇလႄႈ မွၵ်ႇလၢတ်ႈသတၢင်းသဵင်ၶၢဝ်ႇလွင်ႈဢၼ် ယေႇသူႉ ႁဵတ်းၵျေးၸူးတီႈမၼ်းယႂ်ႇၼႃႇ ထၢၼ်ႇႁိုဝ်ၼၼ်ႉ ၼႂ်းမိူင်း တေႇၵႃႇပေႃးလီႉ လႄႈ ၵူၼ်းတင်းသဵင်ႈတင်းလူင် ဢၢမ်းၼႃႇဢေႃႈ။

21ယေႇသူႉ ၶိုၼ်းၶၢမ်ႈၵႂႃႇ ၵႃႈတီႈၽင်ႇၼမ်ႉၽၢႆႇပုၼ်ႉလႄႈ ၼႂ်းမိူဝ်ႈဢၼ် မီးယူႇၵႃႈတီႈႁိမ်းၼွင်ၼၼ်ႉၸိုင်၊ ၵူၼ်းဢၼ်ၸူႉဢၼ်တုမ်ၼမ်ၼႃႇ ၸူႉၵၼ်တုမ်ၵၼ်တီႈမၼ်းၸဝ်ႈဢေႃႈ။-

22ၵမ်းၼၼ်ႉ ၵႄႇၸရွပ်ႈႁေႃးတြႃး ဢၼ်လႆႈၸိုဝ်ႈ ယႃႇဢီႉရူႉ ၼၼ်ႉ မႃးလႄႈ မိူဝ်ႈဢၼ်ႁၼ်မၼ်းၸဝ်ႈၸိုင် ၶုပ်ႉမူပ်ႇၵႃႈတီႈႁိမ်းတိၼ်မၼ်းၸဝ်ႈယူႇသေလႄႈ၊-

23တွင်းပၢၼ်ႇၼမ်ၼႃႇလူင်လၢင်လႄႈဝႃႈ၊ လုၵ်ႈယိင်းဢွၼ်ႇၵဝ်ၶႃႈၸမ်ႉ တၵ်းတၢႆၶႃႈယဝ်ႉ။ ၼႂ်းဝႃႈၼၼ်သေၵေႃႈ ၶႅၼ်းတေႃႈမႃးလႄႈ ဢဝ်မိုဝ်းၸဝ်ႈႁဝ်းတၢင်ႇၵႃႈၼိူဝ်မၼ်း ႁႂ်ႈမၼ်းၶႅၼ်းမႃးလႄႈ ဢသၢၵ်ႈလိပ်းယူႇသေၵမ်းၶႃႈ၊ ဝႃႈၼင်ႇၼႆဢေႃႈ။-

24မၼ်းၸဝ်ႈၵႂႃႇလူၺ်ႈၵၼ်တင်းမၼ်းၼၼ်ႉလႄႈ ၵူၼ်းဢၼ်ၸူႉဢၼ်တုမ်ၼမ်ၼႃႇ ဢုမ်ႇၸွမ်းၽိုတ်ႉဢီးၸူး မၼ်းၸဝ်ႈဢေႃႈ။

25ၵမ်းၼၼ်ႉ မႄႈယိင်းဢၼ်ၸပ်းတၢင်းပဵၼ် ဢၼ်ထွၵ်ႇလိူတ်ႈလႆႈ သိပ်းသွင်ပီႊတဵမ်တဵမ်ယဝ်ႉလႄႈ၊-

26လႆႈၶၢမ်ႇၼႃႇလူင်လၢင် ၼႂ်းမိုဝ်းမေႃယႃၼမ်ၼႃႇ ထၼ်ႈပေႃးဢုၵ်ႉၸႃႇၵႃႈမီးတင်းသဵင်ႈတင်းလူင် သဵင်ႈမူတ်းၵႂႃႇသေၵေႃႈ တၢင်းပဵၼ်မၼ်းဢမ်ႇႁၢႆယဝ်ႉဢမ်ႇၵႃး၊ ယဵင်ႈၶႅၼ်းၼႃႇမႃးထႅင်ႈၼၼ်ႉၵေႃႉၼိုင်ႈ၊-

27မိူဝ်ႈဢၼ်မၼ်းငိၼ်းလွင်ႈ ယေႇသူႉ ၸိုင်၊ မႃးၵႃႈတီႈၽၢႆႇတၢင်းလင်မၼ်းၸဝ်ႈ ၵႃႈၼႂ်းၵူၼ်းဢၼ်ၸူႉဢၼ်တုမ်ၼၼ်ႉသေလႄႈ တိူဝ်ႉယိပ်းၶူဝ်းမၼ်းၸဝ်ႈဢေႃႈ။-

28လွင်ႈမၼ်းၸမ်ႉ မၼ်းထၢင်ႇလႄႈဝႃႈ၊ ပေႃးၵဝ်လႆႈတိူဝ်ႉလႆႈယိပ်းၶူဝ်းလဵင်း မၼ်းၸဝ်ႈၼၼ်ႉၵူၺ်းၸိုင် တၢင်းပဵၼ်တၵ်းႁၢႆဢေႃႈ၊ ဝႃႈၼင်ႇၼႆဢေႃႈ။-

29မိူဝ်ႈၼၼ်ႉၵမ်းလဵဝ်၊ တီႈဢၼ်လိူတ်ႈဢွၵ်ႇၼၼ်ႉ ပဵၼ်ဢၼ်ယူတ်းႁႅင်ႈၵႂႃႇလႄႈ မၼ်းႁူႉလွင်ႈဢၼ် မၼ်းၵၢင်းလွတ်ႈတင်း တၢင်းၶႆႈတၢင်းပဵၼ်ယဝ်ႉၼၼ်ႉ ၵႃႈၼႂ်းတူဝ်မၼ်းဢေႃႈ။-

30ယေႇသူႉ ႁူႉလွင်ႈဢၼ်တၼ်းၶူဝ်းဢွၵ်ႇၵႃႈၼႂ်းမၼ်းၸဝ်ႈၼၼ်ႉၵမ်းလဵဝ်သေယဝ်ႉ၊ ဝၢႆႇတူၺ်းတၢင်းလင်ၵႃႈၼႂ်းၵူၼ်းဢၼ်ၸူႉဢၼ်တုမ် တင်းလၢႆၼၼ်ႉသေလႄႈထၢမ်ဝႃႈ၊ ၽူႈလႂ်တိူဝ်ႉယိပ်းၶူဝ်းၵဝ်၊ ဝႃႈၼင်ႇၼႆဢေႃႈ။-

31တပႄးၸဝ်ႈတင်းလၢႆၵေႃႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်းႁၼ်လွင်ႈဢၼ် ၵူၼ်းဢၼ်ၸူႉဢၼ်တုမ်ၼႆႉ ၽိုတ်ႉဢီးၸူးၸဝ်ႈႁဝ်းယူႇၼၼ်ႉလႄႈ ၸဝ်ႈႁဝ်းထၢမ်လႄႈဝႃႈ ၽူႈလႂ်တိူဝ်ႉၵဝ်ယိပ်းၵဝ်၊ ဝႃႈၼင်ႇၼႆလူင်ပႄႇ၊ ဝႃႈၼင်ႇၼႆဢေႃႈ။-

32ၵူၺ်းၵႃႈ မၼ်းၸဝ်ႈလွမ်တူၺ်းလဵပ်ႈႁွပ်ႈႁႂ်ႈလႆႈႁၼ်ၵေႃႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉယူႇဢေႃႈ။-

33မႄႈယိင်းၼၼ်ႉ၊ ၵွပ်ႈပိူဝ်ႈဢၼ်ႁူႉလွင်ႈတၢင်းဢၼ်ပဵၼ်မႃး ၵႃႈတီႈမၼ်းၼၼ်ႉယူႇလႄႈ ၵူဝ်ႁႄသၼ်ႇဝႆယူႇသေလႄႈ မႃးတီႈမၼ်းၸဝ်ႈ ယဝ်ႉၸင်ႇ၊ ၶုပ်ႉမူပ်ႇလႄႈ လဝ်ႊလၢတ်ႈဢၼ်ၸိုဝ်ႈဢၼ်ၸႂ်ႈ လွင်ႈတီႈႁဵင်းၼၼ်ႉ ၵႃႈမီးတင်းသဵင်ႈတင်းလူင်ဢေႃႈ။-

34မၼ်းၸဝ်ႈၵေႃႈ လၢတ်ႈတီႈမၼ်းလႄႈဝႃႈ၊ လုၵ်ႈယိင်းၵဝ်ဢိူၺ်း၊ တၢင်းယုမ်ႇမၢတ်ႈမႂ်း ႁႂ်ႈတၢင်းပဵၼ်မႂ်းႁၢႆယဝ်ႉ။ ၵႂႃႇၼိမ်ၼိမ်တႃႉ။ ႁႂ်ႈၵၢင်းလွတ်ႈတင်း တၢင်းၶႆႈတၢင်းပဵၼ်တႃႉ၊ ဝႃႈၼင်ႇၼႆဢေႃႈ။

35ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆယူႇၼၼ်ႉၸိုင်၊ ၵူၼ်းလုၵ်ႉသေၵႃႈတီႈႁိူၼ်းၵႄႇၸရွပ်ႈႁေႃးတြႃးၼၼ်ႉ မႃးလၢတ်ႈလႄႈဝႃႈ၊ လုၵ်ႈယိင်းၸဝ်ႈႁဝ်းတၢႆယဝ်ႉၶႃႈဢေႃႈ။ ႁဵတ်းႁိုဝ်လႄႈယင်းယႃႉယူၵ်ႉသြႃႇယူႇၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

36မိူဝ်ႈဢၼ် ယေႇသူႉ ငိၼ်းၵႂၢမ်းၼၼ်ႉၸိုင်၊ မၼ်းၸဝ်ႈလၢတ်ႈတီႈၵႄႇၸရွပ်ႈႁေႃးတြႃးၼၼ်ႉလႄႈဝႃႈ၊ ယႃႇပေမႆႈၸႂ်။ ႁႂ်ႈမီးၸႂ်ဢၼ် ယုမ်ႇမၢတ်ႈၵူၺ်းတႃႉ၊ ဝႃႈၼင်ႇၼႆဢေႃႈ။-

37လိူဝ်သေ ပေႇတရူႉ ဢိၵ်ႇတင်း ယႃႇၵုပ်ႈ တင်း ယူဝ်းႁၢၼ်ႇ ၼွင်ႉၸၢႆး ယႃႇၵုပ်ႈ ၼၼ်ႉ၊ မၼ်းၸဝ်ႈဢမ်ႇပၼ်ၽူႈလႂ်ၵႂႃႇၸွမ်းသေၵေႃႉသေၵူၼ်း။-

38ၶဝ်ၼၼ်ႉ ႁွတ်ႈထိုင်ၵႃႈတီႈႁိူၼ်းၵႄႇၸရွပ်ႈႁေႃးတြႃးၼၼ်ႉလႄႈ မၼ်းၸဝ်ႈႁၼ်တၢင်းဢၼ်ႁဵတ်းႁုၼ်ႉႁၼ်ႉ ဢူၼ်ဢဵၼ်မေႃးမႄးၵၼ်ယူႇ ဢိၵ်ႇတင်းၶဝ်ၸိူဝ်းဢၼ်ႁဵတ်းသဵင်ႁႆႈသဵင်ႁွင်ႉၼမ်ၼႃႇၼၼ်ႉသေယဝ်ႉ၊-

39ၶဝ်ႈၵႂႃႇၵႃႈၼႂ်းလႄႈ လၢတ်ႈတီႈၶဝ်ၼၼ်ႉလႄႈဝႃႈ၊ ႁဵတ်းသင်လႄႈ သူႁဵတ်းဢူၼ်ဢဵၼ်မေႃးမႄးႁွင်ႉႁႆႈ ယူႇၼင်ႇႁိုဝ်။ လုၵ်ႈဢွၼ်ႇၼႆႉ တၢႆယဝ်ႉဢမ်ႇၸႂ်ႈ၊ မၼ်းၼွၼ်းလပ်းယူႇလႆ၊ ဝႃႈၼင်ႇၼႆယဝ်ႉၸင်ႇ၊ ၶဝ်ၼၼ်ႉ ႁဵတ်းပျၢၵ်ႈၶူဝ်မၼ်းၸဝ်ႈသေဢေႃႈ။-

40မၼ်းၸဝ်ႈႁႂ်ႈၶဝ်တင်းသဵင်ႈတင်းလူင် ၵႃႈမီးၸိူဝ်းၼၼ်ႉဢွၵ်ႇၵႂႃႇသေလႄႈ ႁွင်ႉဢဝ်ပေႃႈမႄႈလုၵ်ႈဢွၼ်ႇ ဢိၵ်ႇတင်းၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸဝ်ႈၼၼ်ႉယဝ်ႉၸင်ႇ၊ ၶဝ်ႈၸူးၵႃႈတီႈဢၼ်လုၵ်ႈဢွၼ်ႇမီးၼၼ်ႉလႄႈ၊-

41ယိပ်းမိုဝ်းလုၵ်ႈဢွၼ်ႇသေယဝ်ႉ၊ လၢတ်ႈလႄႈဝႃႈ၊ တလီႉတႃႉၵူႉမီႉ ၊ ဝႃႈၼင်ႇၼႆဢေႃႈ။ ဢထိၵ်ႈပႄႇၸမ်ႉ၊ မႄႈယိင်းဢွၼ်ႇဢိူၺ်း၊ လုၵ်ႉတႃႉ၊ ဝႃႈၼင်ႇၼႆဢေႃႈ။-

42ၵမ်းၼၼ်ႉၵမ်းလဵဝ် မႄႈယိင်းဢွၼ်ႇၼၼ်ႉ လုၵ်ႉလႄႈ ပႆတၢင်းၵႂႃႇဢေႃႈ။ မၼ်းၼၼ်ႉ ဢသၢၵ်ႈလႆႈသိပ်းသွင်ပီႊဢေႃႈ။ ၶဝ်ၼၼ်ႉၵေႃႈ ၵႂင်ၸႂ်ယုင်ႈၸႂ်ၼႃႇလူင်လၢင်ဢေႃႈ။-

43ၼင်ႇႁိုဝ်ၽူႈလႂ် တၵ်းဢမ်ႇႁူႉလွင်ႈတီႈႁဵင်းၼၼ်ႉၸိုင်၊ မၼ်းၸဝ်ႈပိင်းၺၢပ်ႈဝႆႉတီႈၶဝ်ၼႃႇ လူင်လၢင်လႄႈ သမ်ႉမီးဢမိင်ႉလႄႈဝႃႈ၊ ပၼ်တၢင်းၵိၼ်တီႈမၼ်းတႃႉ၊ ဝႃႈၼင်ႇၼႆဢေႃႈ။