Mark 7

Shan

← Chapter 6 Jump to: Chapter 8 →

1မိူဝ်ႈၼၼ်ႉ ၽႃႇရီႉသႄး ဢိၵ်ႇတင်းၵူၼ်းထုတ်ႇၵျၢမ်းတင်းလၢႆ ဢၼ်လုၵ်ႉသေၵႃႈတီႈ ဝဵင်း ယေႇရူႉသလႅမ်ႇ မႃးၵမ်ႈၽွင်ႈၸူႉၵၼ်တုမ်ၵၼ် တီႈမၼ်းၸဝ်ႈသေလႄႈ၊-

2မိူဝ်ႈဢၼ်ႁၼ်တပႄးၸဝ်ႈၵမ်ႈၽွင်ႈ ဢဝ်တင်းမိုဝ်း ဢၼ်ၵူဝ်ႈၵိူၵ်ႇဢၼ်ဝႃႈ ဢမ်ႇသုၵ်ႈၼမ်ႉၼၼ်ႉ ၵိၼ်တၢင်းၵိၼ်ယူႇၼၼ်ႉၸိုင်၊ တၢင်ႇဢပႅတ်ႈဢေႃႈ။-

3လွင်ႈမၼ်းၸမ်ႉ ၸႃႉၸဵမ် ၽႃႇရီႉသႄး တင်းလၢႆလႄႈ ၵူၼ်း ယူႉတႃႉ တင်းသဵင်ႈတင်းလူင် ဢၼ်ၶၢမ်ႇဢဝ်ၼႄးဢူႉပတေႇ ဢၼ်သိုပ်ႇလူင်းမႃး ၵႃႈတီႈၵူၼ်းမိူဝ်ႈၵွၼ်ႇၸိူဝ်းၼၼ်ႉ၊ ပေႃးဢမ်ႇသုၵ်ႈမိုဝ်းၸိုင်၊ ထုင်းၸၢမ်ႇဢၼ်ၵိၼ်တၢင်းၵိၼ်ဢမ်ႇမီး။-

4မိူဝ်ႈဢၼ်ၶဝ်လုၵ်ႉသေၵႃႈတီႈၵၢတ်ႇမႃးၼၼ်ႉ၊ ပေႃးဢမ်ႇလႆႈၶၢမ်ႇတၢင်းဢၼ်ၸုမ်ႇၸိုင်၊ ထုင်းၸၢမ်ႇဢၼ်ၵိၼ်တၢင်းၵိၼ်ဢမ်ႇမီး။ လိူဝ်သေၼၼ်ႉ၊ ၶဝ်ၶၢမ်ႇဢဝ်ထုင်းၸၢမ်ႇ တၢင်ႇၸိူဝ်ႉတၢင်ႇဢၼ်ၼမ်ၼႃႇ ဢၼ်ဝႃႈတၢင်းဢၼ် ဢဝ်ၵွၵ်းလႂ်၊ ဢႅင်ႇလႂ်၊ ဝၢၼ်ႇတွင်းလိူင်လႂ်၊ ၵူႇလႂ် ၸုမ်ႇၼၼ်ႉသေလႄႈၵမ်ၵျၢင်ႉဢေႃႈ။-

5ၵမ်းၼၼ်ႉ ၽႃႇရီႉသႄး ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၸိူဝ်းၼၼ်ႉၵေႃႈ လဝ်ႊထၢမ်လႄႈဝႃႈ ႁဵတ်းသင်လႄႈ တပႄးၸဝ်ႈႁဝ်းတင်းလၢႆ ဢမ်ႇၵမ်ဢမ်ႇၵျၢင်ႉၸွမ်းၼင်ႇၼႄးဢူႉပတေႇ ဢၼ်သိုပ်ႇလူင်းမႃးၵႃႈတီႈၵူၼ်းမိူဝ်ႈၵွၼ်ႇတင်းလၢႆၼၼ်ႉလႄႈ ဢဝ်တင်းမိုဝ်းဢၼ်ၵူဝ်ႈၵိူၵ်ႇၵိၼ်တၢင်းၵိၼ်ၼင်ႇႁိုဝ်ၶႃႈ၊ ဝႃႈၼင်ႇၼႆယဝ်ႉၸင်ႇ၊-

6မၼ်းၸဝ်ႈၵေႃႈလၢတ်ႈလႄႈဝႃႈ၊ ဢၼ် ဢီႉသႃႇယႃႉ ႁေႃးလၢတ်ႈဝႆႉ လွင်ႈသူၸိူဝ်းဢၼ်ၸၢင်ႈထိမ်ႇၸၢင်ႈမႅပ်းၸိူဝ်းၼႆႉ လီလီငၢမ်းငၢမ်းလႄႈဝႃႈၸမ်ႉ၊ ၵူၼ်းမဵဝ်းၼႆႉ ဢဝ်တင်းသူပ်းရူဝ်ႇသေႇၵူဝ်ယမ်ၵဝ်ဢေႃႈ၊ ၵူၺ်းၵႃႈႁူဝ်ၸႂ်ၶဝ်ၵႆၵၼ်တင်းၵဝ်ဢေႃႈ။-

7ၶဝ်ဢဝ်ၼႄးဢူႉပတေႇ ဢၼ်ၵူၼ်းၸီႇယၢင်ႇဝႆႉၸိူဝ်းၼၼ်ႉ သင်ႇသွၼ်သုင်းမႃႉပၼ်ၸိူဝ်ႉၼင်ႇပိင်းၺၢပ်ႈတေႇသၼႃႇၸဝ်ႈသေလႄႈ ၵူဝ်းၵႂၢႆႇၵဝ်လၢႆလၢႆလွၵ်ႇလွၵ်ႇၵူၺ်းဝႃႈၼႆ၊ မီးမႃးၼင်ႇၼႆဢေႃႈ။-

8လွင်ႈမၼ်းၸမ်ႉ သူပႄႇပႅတ်ႈပိင်းၺၢပ်ႈၽြႃးပဵၼ်ၸဝ်ႈသေလႄႈ ၶၢမ်ႇဢဝ်ၼႄးဢူႉပတေႇ ဢၼ်သိုပ်ႇလူင်းမႃးၵႃႈတီႈၵူၼ်း ဢၼ်ဝႃႈတၢင်းဢၼ်ဢဝ်ၵွၵ်းလႂ်၊ ဢႅင်ႇလႂ် ၸုမ်ႇၼၼ်ႉလႄႈ ၵမ်ၵျၢင်ႉၸွမ်းထုင်းၸၢမ်ႇတၢင်ႇၸိူဝ်ႉတၢင်ႇဢၼ် ၸိူဝ်ႉၼင်ႇၼၼ်ၼၼ်ႉၼမ်ၼႃႇဢေႃႈ။-

9ၼင်ႇႁိုဝ်သူတၵ်းလႆႈၵမ်ၵျၢင်ႉၼႄးဢူႉပတေႇမိူဝ်ႈၵွၼ်ႇ ဢၼ်သိုပ်ႇသိုပ်ႇတၢမ်းတၢမ်းၼၼ်ႉၸိုင်၊ သူပႄႇပႅတ်ႈပိင်းၺၢပ်ႈၽြႃးပဵၼ်ၸဝ်ႈလီလီငၢမ်းငၢမ်းလူင်ပႄႇ။-

10မူဝ်းသေႇ ဝႃႈဝႆႉၸမ်ႉ၊ ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ။ ႁႂ်ႈၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ ၶၢမ်ႇတၢင်းဢၼ်ဢဝ်တၢႆတႃႉ ဝႃႈၼႆ၊ မီးမႃးၼင်ႇၼႆဢေႃႈ။-

11ဢၼ်သူဝႃႈၸမ်ႉ၊ ပေႃးၵေႃႉၼိုင်ႈလၢတ်ႈတီႈပေႃႈမႄႈမၼ်းလႄႈဝႃႈ၊ ႁႂ်ႈဢုၵ်ႉၸႃႇၵဝ် ၵႃႈဢၼ်သူဢဝ်သုင်းဢဝ်သွင်ႇလႆႈၼၼ်ႉ ပဵၼ် ၵေႃႇပၢၼ်ႇ ဢၼ်ဝႃႈတႃႇၼႃႉတၢင်းလူႇတႃႉ၊ ဝႃႈၼင်ႇၼႆၼၼ်ႉၸိုင်၊ ၵေႃႉၼၼ်ႉ ၵၢင်းလွတ်ႈတင်းပေႃႈမႄႈမၼ်းယဝ်ႉ။-

12မၼ်းၼၼ်ႉၸိုင် သူႁႄႉၶႅၼ်လႄႈဝႃႈ၊ မၼ်းဢမ်ႇလႆႈႁဵတ်းဝၢတ်ႈတီႈပေႃႈမႄႈမၼ်းသေဢိတ်း၊ ဝႃႈၼင်ႇၼႆလႄႈ၊-

13ပႄႇပႅတ်ႈၼုၵ်ႈၵပၢတ်ႈၽြႃးပဵၼ်ၸဝ်ႈ ၵွပ်ႈပိူဝ်ႈၼႄးဢူႉပတေႇ ဢၼ်ၶၢမ်ႇဢဝ် သိုပ်ႇသိုပ်ႇတၢမ်းတၢမ်းၼၼ်ႉဢေႃႈ။ သူၵမ်ၵျၢင်ႉထုင်းၸၢမ်ႇၸိူဝ်ႉၼင်ႇၼၼ် ၼမ်ၼႃႇဢေႃႈ၊ ဝႃႈၼင်ႇၼႆဢေႃႈ။

14မိူဝ်ႈၼၼ်ႉ မၼ်းၸဝ်ႈႁွင်ႉဢဝ်ၵူၼ်းဢၼ်ၸူႉဢၼ်တုမ် မႃးတီႈမၼ်းၸဝ်ႈသေလႄႈလၢတ်ႈလႄႈဝႃႈ၊ သူၵႃႈမီးတင်းသဵင်ႈတင်းလူင် ထွမ်ႇငိၼ်းလႄႈႁူႉတႃႉ။-

15ဢၼ်လုၵ်ႉသေၵႃႈၼွၵ်ႈၵူၼ်းလႄႈၶဝ်ၵႃႈၼႂ်းၵူၼ်း ႁႂ်ႈၵူၼ်းၵူဝ်ႈၵိူၵ်ႇလႆႈၼၼ်ႉ ဢမ်ႇမီးၵႃႈသင်သေၸိူဝ်ႉသေပိူင်။ ဢၼ်ဢွၵ်ႇၵႃႈၼႂ်းၵူၼ်းမႃးၸိုင်၊ ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ။-

16ပေႃးမီးႁူဢၼ်လီငိၼ်းၸိုင် ႁႂ်ႈငိၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

17မိူဝ်ႈဢၼ်မၼ်းၸဝ်ႈ ဢွၵ်ႇသေၵႃႈတီႈၵူၼ်းဢၼ်ၸူႉဢၼ်တုမ်ၼၼ်ႉလႄႈ ၶဝ်ႈၼႂ်းႁိူၼ်းယဝ်ႉၸိုင်၊ တပႄးၸဝ်ႈတင်းလၢႆ လဝ်ႊထၢမ်လွင်ႈဢူႉပမႃႇၼၼ်ႉဢေႃႈ။-

18မၼ်းၸဝ်ႈၵေႃႈ လၢတ်ႈတီႈၶဝ်လႄႈဝႃႈ၊ သူဢမ်ႇမီးပိင်ႇၺႃႇထၢၼ်ႇၼႆႉလူးၵွၼ်ႇႁိုဝ်။ ဢၼ်လုၵ်ႉသေၵႃႈၼွၵ်ႈၵူၼ်းမႃးလႄႈ ၶဝ်ႈၵႃႈၼႂ်းၵူၼ်းၵူႈၸိူဝ်ႉၵူႈပိူင်ၼၼ်ႉ၊-

19ၵွပ်ႈပိူဝ်ႈဢၼ်ဢမ်ႇၶဝ်ႈၵႃႈၼႂ်းႁူဝ်ၸႂ်၊ ၶဝ်ႈၵႃႈၼႂ်းတွင်ႉၵူၺ်းႁႂ်ႈတၢင်းၵိၼ်ၵႃႈမီးမူတ်းသႂ်ယူႇသေလႄႈ သမ်ႉလူင်းၵႂႃႇၵႃႈၼႂ်းထၢင်ယေႇဢဵင်ႇၼၼ်ႉလႄႈ ဢမ်ႇႁႂ်ႈၵူၼ်းၵူဝ်ႈၵိူၵ်ႇၸိုင်၊ သူဢမ်ႇႁူႉႁိုဝ်။-

20ဢၼ်ဢွၵ်ႇၵႃႈၼႂ်းၵူၼ်းၸမ်ႉ၊ ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ။-

21လွင်ႈမၼ်းၸမ်ႉ တၢင်းၵျၢမ်ႇတၢင်းပွင်ဢၼ်ဢမ်ႇလီလႂ်၊ တၢင်းဢၼ်ၵူတ်ႉမေးပိူၼ်ႈလႂ်၊ တၢင်းဢၼ်ၽိတ်းပိူင်ႈမႄႈယိင်းဢၼ်လွတ်ႈဢၼ်လႅဝ်းလႂ်၊ တၢင်းဢၼ်ဢဝ်တၢႆဢသၢၵ်ႈၵူၼ်းလႂ်၊-

22တၢင်းဢၼ်လၵ်ႉၶူဝ်းပိူၼ်ႈလႂ်၊ တၢင်းဢၼ်ၸႂ်လေႃးၽႃႉပူၼ်ႉလိူဝ်လႂ်၊ တၢင်းဢၼ်ၸႂ်ႁၢႆႉၸႂ်မိူၵ်ႈလႂ်၊ တၢင်းဢၼ်ပႅတ်ႉလႅၼ်ပိူၼ်ႈလႂ်၊ တၢင်းဢၼ်ၵူဝ်ႈၵိူၵ်ႇလႂ်၊ တၢင်းဢၼ်သီႈၵေႉႁေႈတႃပိူၼ်ႈလႂ်၊ တၢင်းဢၼ်သႄႉသွမ်းၽြႃးပဵၼ်ၸဝ်ႈလႂ်၊ တၢင်းဢၼ်ႁူဝ်ၸႂ်သုင်လႂ်၊ တၢင်းဢၼ်ၸႂ်မဝ်မၢင်လႂ်ၸိူဝ်းၼၼ်ႉ ဢွၵ်ႇၵႃႈၼႂ်းၵူၼ်း ၵႃႈတီႈၼႂ်းႁူဝ်ၸႂ်မႃးဢေႃႈ။-

23ဢၼ်ႁၢႆႉဢၼ်မိူၵ်ႈ ၵႃႈမီးတင်းသဵင်ႈတင်းလူင်ၸိူဝ်းၼႆႉ ဢွၵ်ႇၵႃႈၼႂ်းမႃးလႄႈ ႁႂ်ႈၵူၼ်းၵူဝ်ႈၵိူၵ်ႇဢေႃႈ၊ ဝႃႈၼင်ႇၼႆဢေႃႈ။

24မၼ်းၸဝ်ႈလုၵ်ႉသေၵႃႈတီႈၼၼ်ႈလႄႈ ၵႂႃႇၸူးၵႃႈတီႈဝၢၼ်ႈၼွၵ်ႈၼႃးပၢင်ႇ ဝဵင်း တူႉရူႉ တင်းဝဵင်း ၸီႉတုမ်ႇ ပုၼ်ႉသေယဝ်ႉ၊ ၶဝ်ႈၵႃႈၼႂ်းႁိူၼ်း ႁိူၼ်းၼိုင်ႈလႄႈ၊ ပိၵ်ႉသမ်ႉမီးဢလူဝ်ႇဢမ်ႇၶႂ်ႈႁႂ်ႈၽူႈလႂ်ႁူႉသေၵေႃႈ၊ ဢမ်ႇတဵတ်ႇဢမ်ႇမႅပ်ႉယူႇလႆႈ။-

25လွင်ႈမၼ်းၸမ်ႉ၊ မႄႈယိင်းဢၼ်မီးလုၵ်ႈယိင်းဢွၼ်ႇ ဢၼ်ၽီၵူဝ်ႈၵိူၵ်ႇ ၶဝ်ႈၼၼ်ႉၵေႃႉၼိုင်ႈ ငိၼ်းသတၢင်းသဵင်ၶၢဝ်ႇမၼ်းၸဝ်ႈသေယဝ်ႉ၊ မႃးၶုပ်ႉမူပ်ႇၵႃႈတီႈတိၼ်မၼ်းၸဝ်ႈသေလႄႈ-

26တွင်းပၢၼ်ႇႁႂ်ႈမၼ်းၸဝ်ႈႁေႃႈၽီႁၢႆႉ ၵႃႈၼႂ်းလုၵ်ႈယိင်းမၼ်းၼၼ်ႉ ဢွၵ်ႇပႅတ်ႈယူႇဢေႃႈ။ မႄႈယိင်းၼၼ်ႉၸမ်ႉ၊ ပဵၼ်မဵဝ်းၵူၼ်း ႁေႇလသႃႉ ၊ ၵူၼ်းမိူင်း သူႉရီႉၽီႉၼိတ်ႉ ဢေႃႈ။-

27မၼ်းၸဝ်ႈၵေႃႈ လၢတ်ႈလႄႈဝႃႈ၊ ႁႂ်ႈလုၵ်ႈလၢင်းလႆႈၵိၼ်ဢိမ်ႇၵိၼ်တဵမ် ဢွၼ်တၢင်းတႃႉ။ ဢမ်ႇလီဢဝ်တၢင်းၵိၼ်လုၵ်ႈလၢင်း ၶျႃးပၼ်တီႈမႃ၊ ဝႃႈၼင်ႇၼႆဢေႃႈ။-

28မႄႈယိင်းၼၼ်ႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ။ မႃဢၼ်ဝႃႈၸမ်ႉ ၸၢင်ႈၵိၼ်ဢၼ်ယွႆႈဢၼ်ယႅမ်း တၢင်းၵိၼ်လုၵ်ႈလၢင်းၼၼ်ႉ ၵႃႈတႂ်ႈၶူင်ႇတီႈၵိၼ်ၶႃႈဢေႃႈ၊ ဝႃႈၼင်ႇၼႆယဝ်ႉၸင်ႇ၊-

29မၼ်းၸဝ်ႈၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈၵႂၢမ်းၼႆႉလႄႈ မႂ်းၵႂႃႇတႃႉ။ ၽီႁၢႆႉဢွၵ်ႇၵႃႈၼႂ်းလုၵ်ႈယိင်းမႂ်းၼၼ်ႉၵႂႃႇယဝ်ႉ၊ ဝႃႈၼင်ႇၼႆဢေႃႈ။-

30မႄႈယိင်းၼၼ်ႉၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းလႄႈ ထူပ်းႁၼ်လုၵ်ႈယိင်းမၼ်း ၼွၼ်းယူႇၵႃႈၼိူဝ်တီႈၼွၼ်းလႄႈ ၽီႁၢႆႉဢွၵ်ႇၵႂႃႇယဝ်ႉၼၼ်ႉဢေႃႈ။

31လိုၼ်းၼၼ်ႉ မၼ်းၸဝ်ႈဢွၵ်ႇသေၵႃႈၼႂ်းဝၢၼ်ႈၼွၵ်ႈၼႃးပၢင်ႇဝဵင်း တူႉရူႉ လႄႈ လတ်းၵႃႈၼႂ်းမိူင်း ၸီႉတုမ်ႇ ၵႂႃႇပွင်ႇၵႃႈၼႂ်းမိူင်း တေႇၵႃႇပေႃးလီႉ လႄႈႁွတ်ႈထိုင်ၵႃႈတီႈၼွင် ၵႃႇလီႉလႄး ဢေႃႈ။-

32ၵမ်းၼၼ်ႉ ၶဝ်ဢဝ်ၵူၼ်းဢၼ်ႁူၼူၵ်ႇလႄႈ လၢတ်ႈၵႂၢမ်းၵၵ်းၵေႃႉၼိုင်ႈ မႃးတီႈမၼ်းၸဝ်ႈလႄႈ တွင်းပၢၼ်ႇႁႂ်ႈမၼ်းၸဝ်ႈ ဢဝ်မိုဝ်းတၢင်ႇၵႃႈၼိူဝ်မၼ်းၼၼ်ႉဢေႃႈ။-

33မၼ်းၸဝ်ႈႁွင်ႉဢဝ်ၵေႃႉၼၼ်ႉ ဢွၵ်ႇသေၵႃႈၼႂ်းၵူၼ်းဢၼ်ၸူႉဢၼ်တုမ်လႄႈ ၵႂႃႇတီႈဢၼ်ပိူၼ်ႈဢမ်ႇမီးၼၼ်ႉယဝ်ႉၸင်ႇ၊ ဢဝ်ၼိဝ်ႉမိုဝ်းမၼ်းၸဝ်ႈ သႂ်ႇၵႃႈၼႂ်းႁူၵေႃႉၼၼ်ႉဢေႃႈ။ ထူမ်ႇၼမ်ႉလၢႆးလႄႈ တိူဝ်ႉၵႃႈတီႈလိၼ်ႉမၼ်းဢေႃႈ။-

34ၵမ်းၼၼ်ႉ ႁႅၼ်တူၺ်းၵႃႈၼိူဝ်ၵၢင်ႁၢဝ်လႄႈ ထူၺ်ႈၸႂ်လူင်သေယဝ်ႉ၊ လၢတ်ႈတီႈမၼ်းလႄႈဝႃႈ၊ ဢေးၽထႃႉ ၊ ဝႃႈၼင်ႇၼႆဢေႃႈ။ လွင်ႈဢၼ်ဝႃႈၼၼ်ႉၸမ်ႉ၊ ႁႂ်ႈၽုၺ်ႇတႃႉ၊ ဝႃႈၼင်ႇၼႆဢေႃႈ။-

35မိူဝ်ႈၼၼ်ႉၵမ်းလဵဝ်၊ ႁူမၼ်းၽုၺ်ႇလႄႈ ဢဵၼ်လိၼ်ႉမၼ်းၵေႃႈ လိတ်ႈယဝ်ႉၸင်ႇ၊ လၢတ်ႈၵႂၢမ်းလႆႈမႃး ပီႇပီႇလီလီဢေႃႈ။-

36ၼင်ႇႁိုဝ်ၶဝ်တၵ်းဢမ်ႇမွၵ်ႇလၢတ်ႈလွင်ႈတၢင်းၼၼ်ႉ တီႈၽူႈလႂ်သေၵေႃႉသေၵူၼ်းၸိုင်၊ မၼ်းၸဝ်ႈပိင်းၺၢပ်ႈဝႆႉတီႈၶဝ်ဢေႃႈ။- ပိၵ်ႉသမ်ႉမၼ်းၸဝ်ႈပိင်းၺၢပ်ႈဝႆႉ ၼမ်ၼႃႇသေၵေႃႈ၊ ၶဝ်ၼၼ်ႉ ယဵင်ႈၶႅၼ်းပွႆႇသတၢင်းသဵင်ၶၢဝ်ႇၼမ်ၼႃႇဢေႃႈ။-

37ၶဝ်ၼၼ်ႉ ၵႂင်ၸႂ်ယုင်ႈၸႂ်ထၼ်ႈပေႃး ဢမ်ႇမီးတီႈဢၼ် တၵ်းတႅၵ်ႈတၵ်းတိူင်းလႆႈလႄႈလၢတ်ႈလႄႈဝႃႈ၊ မၼ်းႁဵတ်းလွင်ႈတၢင်းၵႃႈမီးတင်းသဵင်ႈတင်းလူင် လီလီငၢမ်းငၢမ်းယဝ်ႉ။ ႁႂ်ႈၶဝ်ၸိူဝ်းဢၼ်ႁူၼူၵ်ႇၼၼ်ႉ ငိၼ်းယဝ်ႉ။ ႁႂ်ႈၶဝ်ၸိူဝ်းဢၼ် ဢႃႉၼၼ်ႉလၢတ်ႈၵႂၢမ်းယဝ်ႉ၊ ဝႃႈၼင်ႇၼႆဢေႃႈ။

← Chapter 6 Jump to: Chapter 8 →