Mark 13

Shan

← Chapter 12 Jump to: Chapter 14 →

1ၼႂ်းမိူဝ်ႈဢၼ် မၼ်းၸဝ်ႈယင်းတိုၵ်ႉဢွၵ်ႇၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉယူႇၼၼ်ႉၸိုင်၊ တပႄးၸဝ်ႈၵေႃႉၼိုင်ႈ လဝ်ႊလၢတ်ႈလႄႈဝႃႈ၊ သြႃႇၸဝ်ႈ၊ တူၺ်းလူသေၵမ်းၶႃႈ။ မၢၵ်ႇႁိၼ်ၸိူဝ်းၼႆႉ ယႂ်ႇလူင်ယႂ်ႇလၢင်ၶႃႈဢေႃႈ။ ႁိူၼ်းတိူၵ်ႈၸိူဝ်းၼႆႉ ယႂ်ႇလူင်ယႂ်ႇလၢင်ၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

2ယေႇသူႉ ၵေႃႈ ၶိုၼ်းလၢတ်ႈလႄႈဝႃႈ၊ တေႃႈလဵဝ်ၼႆႉ မႂ်းႁၼ်တိူၵ်ႈဢၼ်ယႂ်ႇၼႃႇၸိူဝ်းၼႆႉယူႇဢမ်ႇၸႂ်ႈႁိုဝ်။ ၵႃႈၼိူဝ်မၢၵ်ႇႁိၼ်လုၵ်းၼိုင်ႈ၊ ဢမ်ႇလႆႈၵိုတ်းလႆႈၵျၢၼ်ႇဝႆႉ မၢၵ်ႇႁိၼ်ဢၼ်ယင်းဢမ်ႇလႆႈၶၢမ်ႇတၢင်းဢၼ်ၶျႃးတူၵ်းလႄႈ မီးယူႇၼၼ်ႉသေလုၵ်ႈ၊ ဝႃႈၼင်ႇၼႆဢေႃႈ။

3လိုၼ်းၼၼ်ႉ ၼႂ်းမိူဝ်ႈဢၼ် မၼ်းၸဝ်ႈၼင်ႈယူႇၵႃႈၼိူဝ်လွႆ သၢၼ်ႇလုၼ်ႇ လႄႈ ဝၢႆႇၼႃႈတေႃႇပိၵ်ႈမၢၼ်ႇၸဝ်ႈယူႇၼၼ်ႉၸိုင်၊ ပေႇတရူႉ၊ ယႃႇၵုပ်ႈ၊ ယူဝ်းႁၢၼ်ႇ တင်း ဢၼ်ႇတရေႇ လဝ်ႊထၢမ် တီႈဢၼ်ပိူၼ်ႈဢမ်ႇမီးၼၼ်ႉလႄႈဝႃႈ၊-

4လွင်ႈတၢင်းၸိူဝ်းၼႆႉ တၵ်းပဵၼ်မႃးၶိင်ႇမိူဝ်ႈလႂ်ၶႃႈ။ မိူဝ်ႈဢၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉ ၸမ်ၶိင်ႇဢၼ် တၵ်းပျေႉၸုမ်ႇၼၼ်ႉၸိုင်၊ တၵ်းမီးၼီႉမိၵ်ႈလၢၵ်ႈၶၼႃႇဢၼ်လႂ်ၶႃႈ၊ ၸဝ်ႈႁဝ်းၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။-

5ယေႇသူႉ ၵေႃႈလၢတ်ႈလႄႈဝႃႈ၊ ၼင်ႇႁိုဝ်ၽူႈလႂ်တၵ်းဢမ်ႇလႆႈပႅတ်ႉလႆႈလႅၼ်သူၸိုင် ႁဵတ်းသတီႉတႃႉ၊-

6ၵူၼ်းၼမ်ၼႃႇ တၵ်းႁိမ်ဢဝ်ၸိုဝ်ႈသဵင်ၵဝ်သေလႄႈ ပေႃႇမႃးလႄႈလၢတ်ႈဝႃႈ၊ ၵဝ်ၼႆႉပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆလႄႈ ပႅတ်ႉလႅၼ်ၵူၼ်းၼမ်ၼႃႇဢေႃႈ။-

7မိူဝ်ႈဢၼ်သူငိၼ်း လွင်ႈဢၼ်တိုၵ်းသိုၵ်းလႂ်၊ သတၢင်းသဵင်ၶၢဝ်ႇ လွင်ႈဢၼ်တၵ်းတိုၵ်းသိုၵ်းလႂ်ၼၼ်ႉၸိုင်၊ ယႃႇပေမႆႈၸႂ်ၶီၸႂ်။ လွင်ႈတၢင်းၸိူဝ်းၼႆႉ တၵ်းလႆႈပဵၼ်မႃးဢေႃႈ။ ၼႂ်းဝႃႈၼၼ်သေၵေႃႈ ဢမ်ႇပႆႇပဵၼ်တီႈသုတ်းတီႈၵွႆ။

8ၵူၼ်းမဵဝ်းၼိုင်ႈလႄႈမဵဝ်းၼိုင်ႈ မိူင်းၼိုင်ႈလႄႈမိူင်းၼိုင်ႈ တၵ်းၶတ်းတႃႉၵၼ်ဢေႃႈ။ တၵ်းပဵၼ်တၢင်းဢၼ် ဢိင်ႇသၼ်ႇၵူႈတီႈၵူႈလႅၼ်ဢေႃႈ။ တၢင်းဢၼ်ဢိုပ်းတၢင်းၵိၼ်လႂ်၊ တၢင်းဢၼ်ဢမ်ႇတႄႇဢမ်ႇၼိမ်လႂ်ၵေႃႈ တၵ်းပဵၼ်ဢေႃႈ။-

9လွင်ႈတၢင်းၸိူဝ်းၼႆႉ ပဵၼ်ၵေႃႇၸႃႉငဝ်ႈႁၢၵ်ႈတုၵ်ႉၶႃႉ တၢင်းၶီတၢင်းမႆႈဢေႃႈ။ သူႁဵတ်းသတီႉတီႈတူဝ်သူတႃႉ။ လွင်ႈမၼ်းၸမ်ႉ ၶဝ်တၵ်းဢဝ်သူဢၢပ်ႈၵႃႈၼိူဝ်လုမ်းလူင်ဢေႃႈ။ တၵ်းပေႃႉယႅၼ်ႉၵႃႈၼႂ်းၸရွပ်ႈႁေႃးတြႃးလႂ်ဢေႃႈ။ ၼင်ႇႁိုဝ်သူတၵ်းပဵၼ်သၢၵ်ႈသေႇတီႈၶဝ်ၼၼ်ႉၸိုင်၊ ၵွပ်ႈပိူဝ်ႈၵဝ်လႄႈ သူတၵ်းႁွတ်ႈထိုင်ၵႃႈတီႈၽၢႆႇၼႃႈ ဢမၢတ်ႈၽွင်းမိူင်းလႂ် ဢိၵ်ႇတင်းၶုၼ်ႁေႃၶမ်းလႂ်ဢေႃႈ။-

10တၵ်းလႆႈ ႁေႃးလၢတ်ႈတြႃးသတၢင်းသိူဝ်းပျေႃႇ တီႈၵူၼ်းမဵဝ်းတင်းသဵင်ႈတင်းလူင် ဢွၼ်တၢင်းဢေႃႈ။

11မိူဝ်ႈဢၼ်ၶဝ်ဢဝ်သူၵႂႃႇ ႁႂ်ႈလႆႈဢၢပ်ႈၼၼ်ႉၸိုင်၊ တၵ်းလႆႈလၢတ်ႈဝႃႈ ၸိူဝ်ႉၼင်ႇႁိုဝ်ဝႃႈၼႆ၊ ယႃႇပေမႆႈၸႂ်။ ယႃႇပေၶႆႈၸႂ်ဝူၼ်ႉၸႂ်ဝႆႉဢွၼ်တၢင်း။ လၢတ်ႈၵႂၢမ်းဢၼ်သူလႆႈမိူဝ်ႈၶိင်ႇၼၼ်ႉၵူၺ်းၼၼ်ႉတႃႉ။ လွင်ႈမၼ်းၸမ်ႉ သူလၢတ်ႈဢမ်ႇၸႂ်ႈ။ ဝီႉၺိၺ်ႇဢၼ်မူတ်းၸၢင်ႇၸဝ်ႈ လၢတ်ႈဢေႃႈ။-

12ၶိင်ႇၵႃႇလႃႉမိူဝ်ႈၼၼ်ႉ ပီႈၼွင်ႉၵၼ် ၵေႃႉၼိုင်ႈလႄႈၵေႃႉၼိုင်ႈ တၵ်းဢဝ်ၵၼ်ဢၢပ်ႈႁႂ်ႈလႆႈတၢႆဢေႃႈ။ ပေႃႈၵေႃႈတၵ်းဢဝ်လုၵ်ႈလၢင်းဢၢပ်ႈဢေႃႈ။ လုၵ်ႈလၢင်းၵေႃႈ တၵ်းလုၵ်ႉယူႇၽၢႆႇၼိုင်ႈ တင်းပေႃႈမႄႈသေလႄႈ ႁႂ်ႈတၢႆဢေႃႈ။-

13ၵူၼ်းတင်းသဵင်ႈတင်းလူင်ၵေႃႈ တၵ်းၸင်းသူ ၵွပ်ႈပိူဝ်ႈၸိုဝ်ႈသဵင်ၵဝ်ဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်မၼ်ႈၶိူင်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉ၊ ၵေႃႉၼၼ်ႉ တၵ်းႁွတ်ႈထိုင်တၢင်းဢၼ် ၵႄႇၶျွတ်ႈဢဝ်ဢေႃႈ။

14မိူဝ်ႈဢၼ်သူလႆႈႁၼ် လွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်ၸၢင်ႈယႃႉၸၢင်ႈယူၵ်ႉၼၼ်ႉ ၸုၵ်းယူႇၵႃႈၼႂ်း တီႈဢၼ်ဢမ်ႇထုၵ်ႇလီယူႇၼၼ်ႉၸိုင်၊ ႁႂ်ႈၵေႃႉဢၼ်လူတူၺ်းၵျၢမ်းလိၵ်ႈၼၼ်ႉႁူႉတႃႉ။ မိူဝ်ႈဢၼ်လႆႈႁၼ်ၸိူဝ်ႉၼင်ႇၼၼ်ၸိုင်၊ ႁႂ်ႈၶဝ်ၸိူဝ်းဢၼ် မီးၼႂ်းမိူင်း ယူႉတႃႉ ၼႆႉ ပၢႆႈၶိုၼ်ႈၵႂႃႇၵႃႈတီႈၼိူဝ်လွႆပုၼ်ႉသေ။-

15ယႃႇႁႂ်ႈၵေႃႉဢၼ်မီးယူႇၵႃႈၼိူဝ်ၸွမ်ႁိူၼ်းၼၼ်ႉ လူင်းၵႂႃႇၵႃႈၼႂ်းႁိူၼ်း။ ယႃႇႁႂ်ႈၶဝ်ႈၵႃႈၼႂ်း ႁႂ်ႈလႆႈဢဝ်သေၸိူဝ်ႉသေပိူင်ၵႃႈၼႂ်းႁိူၼ်း။-

16ၵေႃႉဢၼ်မီးၵႃႈၼႂ်းတူင်ႈၼႃးၵေႃႈ၊ ယႃႇႁႂ်ႈၶိုၼ်းမိူဝ်းတၢင်းလင် ႁႂ်ႈလႆႈဢဝ်ၶူဝ်းၼုင်ႈတၢင်းမႆမၼ်း။

17ဝၼ်းမိူဝ်ႈၼၼ်ႉ တီႈမႄႈယိင်းဢၼ်တူဝ်ဢမ်ႇသႃႇ ဢိၵ်ႇတင်းမႄႈယိင်း ဢၼ်မီးလုၵ်ႈဢွၼ်ႇ ဢၼ်ဢမ်ႇပႆႇၽၢတ်ႇၼူမ်းတင်းလၢႆၼၼ်ႉ တၵ်းမီးဢႃႉမင်ႇၵလႃႇဢေႃႈ။-

18လွင်ႈၼင်ႇႁိုဝ် မိူဝ်ႈၶိင်ႇၼၼ်ႉ တၵ်းဢမ်ႇလႆႈတူၵ်းမိူဝ်ႈၶိင်ႇၵတ်းၸိုင်၊ သူးတွင်းတႃႉ။-

19လွင်ႈမၼ်းၸမ်ႉ တုၵ်ႉၶႃႉဢၼ်ဢမ်ႇတွၼ်ႉပဵၼ်သေပွၵ်ႈ ၸႃႉၸဵမ်မိူဝ်ႈၵေႃႇၸႃႉၵမ်ႇၽႃႇ ဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ ႁၢၼ်ႉတေႃႇမိူဝ်ႈလဵဝ်ၼႆႉလႄႈ ၵမ်းလိုၼ်းၵေႃႈ တၵ်းဢမ်ႇပဵၼ်ၼၼ်ႉ တၵ်းပဵၼ်ၼႂ်းၶိင်ႇၵႃႇလႃႉၼၼ်ႉဢေႃႈ။-

20ပေႃးၽြႃးပဵၼ်ၸဝ်ႈ ဢမ်ႇႁႂ်ႈၶိင်ႇၵႃႇလႃႉၼၼ်ႉပွတ်းသေၸိုင်၊ ၽူႈလႂ်ဢမ်ႇလွတ်ႈလႆႈသေၵေႃႉသေၵူၼ်း။ ၵွပ်ႈပိူဝ်ႈၶဝ်ၸိူဝ်းဢၼ် မၼ်းၸဝ်ႈလိူၵ်ႈၵဵပ်းဢဝ်ၼၼ်ႉလႄႈ မၼ်းၸဝ်ႈႁႂ်ႈၶိင်ႇၵႃႇလႃႉၼၼ်ႉ ပွတ်းဢေႃႈ။

21မိူဝ်ႈၼၼ်ႉ ပေႃးသေၵေႃႉသေၵူၼ်းလၢတ်ႈလႄႈဝႃႈ၊ တူၺ်းလူး၊ ၸဝ်ႈၶရိၸ်ႈမီးၵႃႈၼႆႈဢေႃႈ။ မီးၵႃႈၼၼ်ႈဢေႃႈ၊ ဝႃႈၼင်ႇၼႆၸိုင်၊ ယႃႇပေယုမ်ႇ။-

22လွင်ႈမၼ်းၸမ်ႉ ၶဝ်ၸိူဝ်းဢၼ်ႁဵတ်း မိူၼ်ၼင်ႇႁၢင်ႈၸဝ်ႈၶရိၸ်ႈ ဢိၵ်ႇတင်း မိၵ်ႉသႃႇပရေႃးၽႅတ်ႈတင်းလၢႆၼၼ်ႉ တၵ်းပေႃႇမႃးလႄႈ ပေႃးပႅတ်ႉလႅၼ်လႆႈၸိုင်၊ တၵ်းၼႄပျႃးၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆ ႁႂ်ႈလႆႈပႅတ်ႉလႅၼ်ၶဝ်ၸိူဝ်းဢၼ် လိူၵ်ႈၵဵပ်းဢဝ်တင်းလၢႆဢေႃႈ။-

23သူႁဵတ်းသတီႉတႃႉ။ တူၺ်းလူး၊ ၵဝ်လၢတ်ႈလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉ ဝႆႉ ဢွၼ်တၢင်းယဝ်ႉ။

24ၼႂ်းၶိင်ႇၵႃႇလႃႉဢၼ်ပဵၼ်ဝၢႆးလင် တုၵ်ႉၶႃႉတၢင်းၽၢၼ်ၼၼ်ႉ၊ ၵၢင်ဝၼ်းတၵ်းလပ်းသိင်ႇဢေႃႈ။ လိူၼ်တၵ်းဢမ်ႇပၼ်ဢၼ်လႅင်းမၼ်း။-

25လၢဝ်ၵၢင်ႁၢဝ်တင်းလၢႆ တၵ်းတူၵ်းသေၵႃႈၼိူဝ်ၵၢင်ႁၢဝ်ဢေႃႈ။ တၼ်းၶူဝ်းၵၢင်ႁၢဝ်တင်းလၢႆၵေႃႈ တၵ်းသၼ်ႇၶွၼ်းဝႆဢေႃႈ။-

26မိူဝ်ႈၼၼ်ႉ ၵူၼ်းတင်းလၢႆ တၵ်းလႆႈႁၼ်လုၵ်ႈၵူၼ်းပႃးတင်းမုၼ်တၼ်းၶူဝ်း ဢႃႇၼူႉၽေႃႇမၼ်းၸဝ်ႈ ဢၼ်ယႂ်ႇၼႃႇၼၼ်ႉသေလႄႈ မႃးၵႃႈၼိူဝ်မွၵ်ႇၵုမ်ႈဢေႃႈ။-

27မိူဝ်ႈၼၼ်ႉ မၼ်းၸဝ်ႈတၵ်းပွႆႇၸႂ်ႉတမၢၼ်ႇမၼ်းၸဝ်ႈတင်းလၢႆမႃးလႄႈ ႁႂ်ႈၶဝ်ၸိူဝ်းဢၼ်လိူၵ်ႈၵဵပ်းဢဝ်ၼၼ်ႉ လုၵ်ႉသေၵႃႈတီႈသီႇၸဵင်ႇပႅတ်ႇၼႃႈ ၵူႈတီႈၵူႈလႅၼ် တႂ်ႈၽႃႉၵၢင်ႁၢဝ် ၸူႉၵၼ်တုမ်ၵၼ်ဢေႃႈ။

28ဢဝ်တူၼ်ႈမၢၵ်ႇလိူဝ်ႇသၢင်းၽေႃး ႁဵတ်းဢူႉပမႃႇလႄႈ သွၼ်ဢဝ်တႃႉ။ မိူဝ်ႈဢၼ် ၵိင်ႇမၼ်းၶႃႊမၼ်းၼုမ်ႇလႄႈဢွၵ်ႇမႂ်ယူႇၼၼ်ႉၸိုင် သူႁူႉလွင်ႈဢၼ် ၸမ်တၵ်းႁွတ်ႈထိုင်ၶိင်ႇႁႅင်ႈဢေႃႈ။-

29မိူၼ်ၼင်ႇၼၼ် မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်၊ ႁူႉလွင်ႈဢၼ် ၶိင်ႇလုၵ်ႈၵူၼ်းႁွတ်ႈၸမ်မႃး ၵႃႈတီႈႁိမ်းၽၵ်းတူယဝ်ႉၼၼ်ႉတႃႉ။-

30ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ လွင်ႈတင်းသဵင်ႈတင်းလူင်ၸိူဝ်းၼႆႉ တၵ်းပဵၼ်မႃး ၸူဝ်ႈဢၼ်ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉ ဢမ်ႇပႆႇသဵင်ႈပႆႇမူတ်းဢေႃႈ။-

31ပိၵ်ႉသမ်ႉၽႃႉၵၢင်ႁၢဝ်တင်းလိၼ်မိူင်းၼႆႉ တၵ်းႁၢႆလၢႆသေၵေႃႈ၊ ၵႂၢမ်းၵဝ်ၼႆႉ တၵ်းဢမ်ႇႁၢႆလၢႆ။

32ၶိင်ႇၼႃႇရီႇဝၼ်းၼၼ်ႉၸမ်ႉ၊ ၽူႈလႂ်ဢမ်ႇႁူႉ။ တမၢၼ်ႇၵၢင်ႁၢဝ်တင်းလၢႆ ဢမ်ႇႁူႉ။ လုၵ်ႈၸဝ်ႈၵေႃႈဢမ်ႇႁူႉ။ ပေႃႈၸဝ်ႈၵူၺ်းႁူႉဢေႃႈ။-

33ပိူဝ်ႈဢၼ်သူဢမ်ႇႁူႉလွင်ႈဢၼ်ၶိင်ႇၵႃႇလႃႉၼၼ်ႉ တၵ်းႁွတ်ႈထိုင်မိူဝ်ႈလႂ်ၼၼ်ႉလႄႈ ႁဵတ်းသတီႉလႄႈ ပႂ်ႉထႃႈယူႇတႃႉ။-

34ဢူႉပမႃႇၸမ်ႉ၊ လုၵ်ႈၵူၼ်းမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈ ဢၼ်ဢဝ်တၼ်းၶူဝ်း ဢၢပ်ႈပၼ်တီႈၵူၼ်းဢွၼ်ႇတူဝ်ၸဝ်ႈၵဝ်ႇတင်းလၢႆလႄႈ ၶၢၼ်းဝႆႉပုၼ်ႈဢၼ်ၶဝ်တၵ်းလႆႈႁဵတ်း ႁင်းၽႂ်ႁင်းမၼ်းသေလႄႈ သင်ႇလၢတ်ႈဝႆႉတီႈၵေႃႉဢၼ်ပႂ်ႉၽၵ်းတူလႄႈဝႃႈ၊ ပႂ်ႉယူႇတႃႉ၊ ဝႃႈၼင်ႇၼႆယဝ်ႉၸင်ႇ၊ ၵႂႃႇယူႇတၢင်ႇဝၢၼ်ႈတၢင်ႇမိူင်းသေၼၼ်ႉဢေႃႈ။-

35ပိူဝ်ႈၼႆလႄႈ ပိူဝ်ႈဢၼ်သူ ဢမ်ႇႁူႉလွင်ႈ ဢၼ်ၸဝ်ႈႁိူၼ်းၼၼ်ႉ တၵ်းႁွတ်ႈမႃးၶိင်ႇလႂ်၊ တၵ်းပဵၼ်ၶိင်ႇႁူဝ်ၶမ်ႈႁိုဝ်။ တၵ်းပဵၼ်ၶိင်ႇတဵင်ႈၶိုၼ်းႁိုဝ်။ တၵ်းပဵၼ်ၶိင်ႇၵႆႇၶၼ်ႁိုဝ်။ တၵ်းပဵၼ်ၶိင်ႇၵၢင်ၼႂ်ႁိုဝ်ၼၼ်ႉလႄႈ ပႂ်ႉထႃႈယူႇတႃႉ။-

36ပေႃးဢမ်ႇၼၼ်ၸိုင် တၵ်းၽုတ်းၽၢတ်းပေႃႇမႃးလႄႈ ထူပ်းႁၼ်သူၼွၼ်းလပ်းယူႇဢေႃႈ။-

37ဢၼ်ၵဝ်လၢတ်ႈတီႈသူလႄႈဝႃႈ၊ ပႂ်ႉထႃႈယူႇတႃႉ၊ ဝႃႈၼင်ႇၼႆၼၼ်ႉၸိုင်၊ ၵဝ်ဝႃႈတီႈၵူၼ်းတင်းသဵင်ႈတင်းလူင်ဢေႃႈ၊ ဝႃႈၼင်ႇၼႆဢေႃႈ။

← Chapter 12 Jump to: Chapter 14 →