Mark 9 — Shan

1ၵဝ်ဝႃႈ တီႈၸိုဝ်ႈတီႈၸႂ်ႈၸမ်ႉ၊ ၵူၼ်းၵမ်ႈၽွင်ႈ ဢၼ်ၸုၵ်းယူႇၵႃႈတီႈၼႆႈ ၼႆႉ၊ ၸူဝ်ႈဢၼ်ၶဝ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈတႄႇပဵၼ် ဢိၵ်ႇတင်းတၼ်းၶူဝ်းၼၼ်ႉၸိုင်၊ တၵ်းဢမ်ႇလႆႈႁွတ်ႈထိုင်တၢင်းတၢႆ၊ ဝႃႈၼင်ႇၼႆဢေႃႈ။

2မိူဝ်ႈဢၼ် ပူၼ်ႉႁူၵ်းဝၼ်းယဝ်ႉ၊ ယေႇသူႉ ႁွင်ႉဢဝ် ပေႇတရူႉ၊ ယႃႇၵုပ်ႈ တင်း ယူဝ်းႁၢၼ်ႇ လႄႈ ဢဝ်ၵႂႃႇၵႃႈၼိူဝ်လွႆ ဢၼ်သုင်၊ ၵႃႈတီႈဢၼ်တၵ်းမီးၶဝ်ၵူၺ်းၼၼ်ႉဢေႃႈ။ ၵႃႈတီႈၽၢႆႇၼႃႈၶဝ်ၸိူဝ်းၼၼ်ႉ မၼ်းၸဝ်ႈမီးတင်းႁၢင်ႈၽၢင်ဢၼ်လၢၵ်ႇလၢႆးလႄႈ၊-

3ၶူဝ်းၼုင်ႈမၼ်းၸဝ်ႈၵေႃႈ ႁိူဝ်ႈႁိူင်းၽိူၵ်ႇၶၢဝ်ၼႃႇ တေႃႇထိုင်ႁွတ်ႈထၼ်ႈပေႃး ၵူၼ်းသၵ်ႉၶူဝ်းၵႃႈၼိူဝ်လိၼ်မိူင်းၼႆႉသေၵေႃႉသေၵူၼ်း ဢမ်ႇႁႂ်ႈၽိူၵ်ႇၶၢဝ်လႆႈ မိူၼ်ၸိူဝ်ႉၼင်ႇၼၼ်ၼၼ်ႉဢေႃႈ။-

4မူဝ်းသေႇ တင်း ဢေးလီႉယႃႉ ထၢင်ႇသႃးပေႃႇမႃး တီႈၶဝ်လႄႈ လၢတ်ႈၵႂၢမ်းတေႃႇၵၼ်တင်း ယေႇသူႉ ယူႇဢေႃႈ။-

5မိူဝ်ႈၼၼ်ႉ ပေႇတရူႉ ၵေႃႈ လဝ်ႊလၢတ်ႈတီႈ ယေႇသူႉ လႄႈဝႃႈ၊ ၸဝ်ႈႁဝ်း၊ ၵႃႈတီႈၼႆႈ ပုၼ်ႈဢၼ်ႁဝ်းၶႃႈ တၵ်းယူႇၸိုင်၊ လီၶႃႈဢေႃႈ။ ႁႂ်ႈႁဝ်းၶႃႈလႆႈ ႁဵတ်းသုမ်ႉသၢမ်လင်၊ ပုၼ်ႈၸဝ်ႈႁဝ်းလင်ၼိုင်ႈ၊ ပုၼ်ႈ မူဝ်းသေႇ လင်ၼိုင်ႈ၊ ပုၼ်ႈ ဢေးလီႉယႃႉ လင်ၼိုင်ႈ သေၵမ်းၶႃႈ၊ ဝႃႈၼင်ႇၼႆဢေႃႈ။-

6ပိူဝ်ႈဢၼ်ၵူဝ်ၼႃႇၵႂင်ၵႂႃႇလႄႈ မၼ်းၸင်ႇလဝ်ႊလၢတ်ႈၸိူဝ်ႉၼင်ႇၼႆဢေႃႈ။-

7မိူဝ်ႈၼၼ်ႉ မွၵ်ႇၵုမ်ႈမုင်းႁူမ်ႇၶဝ်လႄႈ သဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊ ၵေႃႉၼႆႉၸမ်ႉ၊ ပဵၼ်လုၵ်ႈ ဢၼ်ၵဝ်ႁၵ်ႉၼႃႇဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊ ဝႃႈၼင်ႇၼႆဢေႃႈ။-

8မိူဝ်ႈၼၼ်ႉၵမ်းလဵဝ်၊ ၶဝ်တူၺ်းလဵပ်ႈႁွပ်ႈ ၵႃႈတီႈႁိမ်းၼၼ်ႉလႄႈ လိူဝ်သေ ယေႇသူႉ ပႃးလဵဝ် ဢိၵ်ႇတင်းတူဝ်ၶဝ်ၼၼ်ႉၵူၺ်း၊ ဢမ်ႇႁၼ်ၽူႈလႂ် သေၵေႃႉသေၵူၼ်း။

9ၼႂ်းမိူဝ်ႈဢၼ် ၶဝ်လူင်းသေၵႃႈၼိူဝ်လွႆမႃးယူႇၼၼ်ႉ၊ ၼင်ႇႁိုဝ်ၶဝ်တၵ်း ဢမ်ႇမွၵ်ႇလၢတ်ႈလွင်ႈတၢင်းဢၼ်ၶဝ်လႆႈႁၼ်ၸိူဝ်းၼၼ်ႉ တီႈၽူႈလႂ်သေၵေႃႉသေၵူၼ်း ၸူဝ်ႈဢၼ်လုၵ်ႈၵူၼ်းဢမ်ႇပႆႇလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၸိုင် မၼ်းၸဝ်ႈပိင်းၺၢပ်ႈဝႆႉတီႈၶဝ်ဢေႃႈ။-

10ၶဝ်တွင်းဝႆႉၵႂၢမ်းၼၼ်ႉလႄႈ ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်လၢတ်ႈၵၼ်လႄႈဝႃႈ၊ တၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။

11ၵမ်းၼၼ်ႉ ၶဝ်လဝ်ႊထၢမ်လႄႈဝႃႈ၊ ဢေးလီႉယႃႉ တၵ်းလႆႈ မႃးဢွၼ်တၢင်းဝႃႈၼႆ၊ ႁဵတ်းသင်လႄႈ ၵူၼ်းထုတ်ႇၵျၢမ်းတင်းလၢႆဝႃႈၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

12မၼ်းၸဝ်ႈၵေႃႈ ၶိုၼ်းလၢတ်ႈတီႈၶဝ်လႄႈဝႃႈ၊ ဢေးလီႉယႃႉ တၵ်းလႆႈမႃးဢွၼ်တၢင်းလႄႈ မႄးႁဵတ်းဝႆႉတင်းသဵင်ႈတင်းလူင် ဢမၢၼ်ႇၶၼ်ပဵၼ်ဢေႃႈ။ လွင်ႈလုၵ်ႈၵူၼ်းၸိုင် တႅမ်ႈဝႆႉၵႃႈၼႂ်းၵျၢမ်းလိၵ်ႈၸိူဝ်ႉၼင်ႇႁိုဝ် ဝႃႈၼႆၸမ်ႉ၊ တၵ်းလႆႈၶၢမ်ႇတုၵ်ႉၶႃႉၼမ်ၼႃႇ ဢိၵ်ႇတင်းတၢင်းဢၼ်ပိူၼ်ႈသႄႉသွမ်းပႄႇပႅတ်ႈဢေႃႈ၊ မီးမႃးၼင်ႇၼႆဢေႃႈ။-

13ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ဢေးလီႉယႃႉ ႁွတ်ႈမႃးယဝ်ႉ။ မႅၼ်ႈၼင်ႇဢၼ်တႅမ်ႈဝႆႉလွင်ႈမၼ်း ၼႂ်းၵျၢမ်းလိၵ်ႈၼၼ်ႉ၊ ၵူၼ်းတင်းလၢႆ ႁဵတ်းတီႈမၼ်းၵႃႈဢၼ်ၶဝ်ၶႂ်ႈႁဵတ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။

14မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢၼ် တပႄးၸဝ်ႈတင်းလၢႆ မီးယူႇၼၼ်ႉၸိုင်၊ ၶဝ်ႁၼ်ၵူၼ်းဢၼ်ၸူႉဢၼ်တုမ်ၼမ်ၼႃႇ လွမ်ႉႁွပ်ႈၶဝ်ၼၼ်ႉယူႇသေလႄႈ ၵူၼ်းထုတ်ႇၵျၢမ်းတင်းလၢႆ တွင်ႈထၢမ်လၢတ်ႈၸႃၵၼ်တင်းၶဝ်ယူႇဢေႃႈ။-

15ၵူၼ်းဢၼ်ၸူႉဢၼ်တုမ် တင်းသဵင်ႈတင်းလူင်ၼၼ်ႉ၊ မိူဝ်ႈဢၼ်ႁၼ်မၼ်းၸဝ်ႈၸိုင်၊ ဢၢမ်းၼႃႇလူင်လၢင်ၵမ်းလဵဝ်လႄႈ လႅၼ်ႈမႃးတီႈမၼ်းၸဝ်ႈသေလႄႈ တၵ်ႉလၢတ်ႈဢေႃႈ။-

16မၼ်းၸဝ်ႈၵေႃႈ ထၢမ်တီႈၵူၼ်းထုတ်ႇၵျၢမ်းၸိူဝ်းၼၼ်ႉလႄႈဝႃႈ၊ သူတွင်ႈထၢမ်လၢတ်ႈၸႃၵၼ်တင်းၶဝ်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

17ၵူၼ်းဢၼ်ပႃးၼႂ်းၶဝ်ၸိူဝ်းဢၼ်ၸူႉဢၼ်တုမ်ၼၼ်ႉ ၵေႃႉၼိုင်ႈၵေႃႈ လဝ်ႊလၢတ်ႈလႄႈဝႃႈ၊ သြႃႇၸဝ်ႈ၊ ၵဝ်ၶႃႈဢဝ်လုၵ်ႈၸၢႆးၵဝ်ၶႃႈ ဢၼ်လႆႈၶၢမ်ႇတၢင်းဢၼ်ၽီဢႃႉၶဝ်ႈၼၼ်ႉ မႃးတီႈၸဝ်ႈႁဝ်းၶႃႈဢေႃႈ။-

18ၽီၼၼ်ႉ တီႉဢဝ်မၼ်း တီႈလႂ်တၼ်းလႂ်သေဢမ်ႇဝႃႈ၊ ႁႂ်ႈမၼ်းလူမ်ႉၵႃႈၼိူဝ်လိၼ်သေလႄႈ၊ မၼ်းၵေႃႈပူၵ်ႇဢွၵ်ႇၵႃႈၼႂ်းသူပ်းယူႇ၊ ၵတ်းၶဵဝ်ႈၵတ်းၽၼ်းယူႇသေလႄႈ ယွမ်ၵႂႃႇယူႇၶႃႈဢေႃႈ။ ၵဝ်ၶႃႈလဝ်ႊလၢတ်ႈတီႈတပႄးၸဝ်ႈတင်းလၢႆ ႁႂ်ႈၶဝ်ႁေႃႈၽီႁၢႆႉၼၼ်ႉဢွၵ်ႇပႅတ်ႈလႄႈ ၶဝ်ဢမ်ႇတၢတ်ႈၼိူင်ႇလႆႈၶႃႈ၊ ဝႃႈၼင်ႇၼႆယဝ်ႉၸင်ႇ၊-

19မၼ်းၸဝ်ႈၵေႃႈ ၶိုၼ်းလၢတ်ႈလႄႈဝႃႈ၊ ၵူၼ်းမဵဝ်းဢၼ်ဢမ်ႇမီးတၢင်းဢၼ်ယုမ်ႇမၢတ်ႈၼႆႉဢိူၺ်း၊ ၵဝ်တၵ်းလႆႈယူႇလူၺ်ႈၵၼ်တင်းသူလၢႆၶိင်ႇလၢႆမိူဝ်ႈ။ တၵ်းလႆႈယိူၼ်ႉၶၢမ်ႇသူလၢႆၶိင်ႇလၢႆမိူဝ်ႈ။ ဢဝ်လုၵ်ႈဢွၼ်ႇၼၼ်ႉ မႃးတီႈၵဝ်တႃႉ၊ ဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊-

20ၶဝ်ဢဝ်မႃး တီႈမၼ်းၸဝ်ႈဢေႃႈ။ ၽီၼၼ်ႉႁၼ်မၼ်းၸဝ်ႈသေယဝ်ႉ၊ ႁႂ်ႈလုၵ်ႈဢွၼ်ႇၼၼ်ႉ ၵႅၼ်ႇၶႅင်ၵႂႃႇၵမ်းလဵဝ်လႄႈ၊ လုၵ်ႈဢွၼ်ႇၵေႃႈ လူမ်ႉၵႃႈၼိူဝ်လိၼ်လႄႈ ပူၵ်ႇဢွၵ်ႇသူပ်းယူႇသေလႄႈ ၵိင်ႈၵႂႃႇၵိင်ႈမႃးယူႇဢေႃႈ။-

21မၼ်းၸဝ်ႈၵေႃႈ ထၢမ်တီႈပေႃႈမၼ်းလႄႈဝႃႈ၊ လွင်ႈဢၼ်ပဵၼ်တီႈမၼ်းၼႆႉၸမ်ႉ ႁိုင်ၵႃႈႁိုဝ်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ပေႃႈမၼ်းၵေႃႈလဝ်ႊလၢတ်ႈလႄႈဝႃႈ၊ ပဵၼ်မႃးၸႃႉၸဵမ်မိူဝ်ႈဢၼ်မၼ်းယင်းလဵၵ်ႉၶႃႈဢေႃႈ။-

22ၼင်ႇႁိုဝ်တၵ်းႁႂ်ႈမၼ်းလႆႈႁွတ်ႈထိုင်တၢင်းလူႉတၢင်းတၢႆၸိုင်၊ ႁႂ်ႈမၼ်း လူမ်ႉတူၵ်းၵႃႈၼႂ်းၽႆးလႂ်၊ ၵႃႈၼႂ်းၼမ်ႉလႂ်၊ ၶိူဝ်းၶိူဝ်းယႂ်းယႂ်းၶႃႈဢေႃႈ။ ၼႂ်းဝႃႈၼၼ်သေၵေႃႈ ပေႃးၸဝ်ႈႁဝ်းတၢတ်ႈၼိူင်ႇလႆႈသေဢိတ်းသေဢီႈၸိုင်၊ ဢဵတ်းလူႁဝ်းၶႃႈလႄႈ ၸွႆႈထႅမ်သေၵမ်းၶႃႈ၊ ဝႃႈၼင်ႇၼႆဢေႃႈ။-

23ယေႇသူႉ ၵေႃႈ လၢတ်ႈလႄႈဝႃႈ၊ မႂ်းဝႃႈ၊ ပေႃးတၢတ်ႈၼိူင်ႇလႆႈ၊ ဝႃႈၼင်ႇၼႆလူင်ပႄႇ။ တီႈၵေႃႉဢၼ်ယုမ်ႇမၢတ်ႈၼၼ်ႉၸမ်ႉ၊ တၢတ်ႈၼိူင်ႇလႆႈယူႇၵူႈၸိူဝ်ႉၵူႈပိူင်ဢေႃႈ၊ ဝႃႈၼင်ႇၼႆဢေႃႈ။-

24ပေႃႈလုၵ်ႈဢွၼ်ႇၼၼ်ႉၵေႃႈ ႁွင်ႉသႅၼ်ႇၵမ်းလဵဝ်လႄႈ ၶိုၼ်းလဝ်ႊလၢတ်ႈလႄႈဝႃႈ၊ ၵဝ်ၶႃႈယုမ်ႇမၢတ်ႈယူႇၶႃႈဢေႃႈ။ ၸွႆႈထႅမ်တၢင်းဢၼ်ၵဝ်ၶႃႈ ဢမ်ႇယုမ်ႇမၢတ်ႈၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။-

25ယေႇသူႉ ႁၼ်ၵူၼ်းၼမ်ၼႃႇ လႅၼ်ႈမႃးၸူႉၵၼ်တုမ်ၵၼ်ၼၼ်ႉသေယဝ်ႉ၊ သင်ႇသွၼ်ၽီဢၼ်ၵူဝ်ႈၵိူၵ်ႇၼၼ်ႉလႄႈဝႃႈ၊ ၽီဢၼ်ဢႃႉလႄႈ ႁူၼူၵ်ႇၼႆႉဢိူၺ်း၊ ဢွၵ်ႇသေၵႃႈၼႂ်း လုၵ်ႈဢွၼ်ႇၼႆႉၵႂႃႇတႃႉ။ ၵမ်းလိုၼ်းယႃႇပေၶဝ်ႈၼႂ်းမၼ်း၊ ၵဝ်မီးဢမိင်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

26ၽီၼၼ်ႉ ႁွင်ႉသႅၼ်ႇလႄႈ ႁႂ်ႈမၼ်းၵႅၼ်ႇၶႅင်ၵႂႃႇၼႃႇလူင်လၢင်ယဝ်ႉၸင်ႇ၊ ဢွၵ်ႇၵႂႃႇသေဢေႃႈ။ လုၵ်ႈဢွၼ်ႇၼၼ်ႉ ပဵၼ်ၸိူဝ်ႉၼင်ႇဢၼ်တၢႆယဝ်ႉၼၼ်ႉ တေႃႇထိုင်ႁွတ်ႈထၼ်ႈပေႃးၵူၼ်းၼမ်ၼႃႇလၢတ်ႈလႄႈဝႃႈ၊ မၼ်းတၢႆယဝ်ႉ၊ ဝႃႈၼင်ႇၼႆဢေႃႈ။-

27ယေႇသူႉ ယိပ်းဢဝ်မိုဝ်းမၼ်းသေယဝ်ႉ၊ ယုၵ်ႉယွင်ႈလႄႈ မၼ်းလုၵ်ႉမႃးဢေႃႈ။-

28မၼ်းၸဝ်ႈၶဝ်ႈၵႃႈၼႂ်းႁိူၼ်းယဝ်ႉၸင်ႇ၊ တပႄးၸဝ်ႈၸိူဝ်းၼၼ်ႉ တဵတ်ႇတဵတ်ႇလဝ်ႊထၢမ်လႄႈဝႃႈ၊ ႁဵတ်းသင်လႄႈ ႁဝ်းၶႃႈ ဢမ်ႇႁေႃႈၽီၼၼ်ႉ ဢွၵ်ႇပႅတ်ႈလႆႈၼင်ႇႁိုဝ်ၶႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

29မၼ်းၸဝ်ႈၵေႃႈလၢတ်ႈလႄႈဝႃႈ၊ လိူဝ်သေၵွပ်ႈပိူဝ်ႈတၢင်းဢၼ် သူးတွင်းလႄႈ ၵမ်တၢင်းၵိၼ်ၼၼ်ႉၵူၺ်း၊ ၵွပ်ႈပိူဝ်ႈၵႃႈသင်သေဢမ်ႇဝႃႈ၊ မဵဝ်းၼၼ်ႉဢမ်ႇဢွၵ်ႇလႆႈ၊ ဝႃႈၼင်ႇၼႆဢေႃႈ။

30ၼႂ်းမိူဝ်ႈဢၼ် ၶဝ်ဢွၵ်ႇသေၵႃႈတီႈၼၼ်ႈလႄႈ ၸွမ်းတၢင်းလတ်းၵႂႃႇ ၼႂ်းမိူင်း ၵႃႇလီႉလႄး ယူႇၼၼ်ႉ၊ မၼ်းၸဝ်ႈဢမ်ႇမီးဢလူဝ်ႇ ၶႂ်ႈႁႂ်ႈၽူႈလႂ်သေၵေႃႉသေၵူၼ်းလႆႈႁူႉ။-

31လွင်ႈမၼ်းၸမ်ႉ မၼ်းၸဝ်ႈသင်ႇသွၼ်ပၼ်တပႄးၸဝ်ႈ တင်းလၢႆလႄႈဝႃႈ၊ လုၵ်ႈၵူၼ်းတၵ်းလႆႈၶၢမ်ႇတၢင်းဢၼ် ဢၢပ်ႈၵႃႈၼႂ်းမိုဝ်းၵူၼ်းတင်းလၢႆဢေႃႈ။ ၶဝ်တၵ်းဢဝ်တၢႆဢေႃႈ။ ၶၢမ်ႇယဝ်ႉၸင်ႇ၊ တၵ်းလုၵ်ႉၶိုၼ်းလိပ်းၼႂ်းဝၼ်းဢၼ် ထူၼ်ႈထိုင်သၢမ်ဝၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

32ၶဝ်ၼၼ်ႉ ပိၵ်ႉသမ်ႉဢမ်ႇႁူႉဢထိၵ်ႈပႄႇၵႂၢမ်းၼၼ်ႉသေၵေႃႈ၊ ဢမ်ႇႁတ်းလဝ်ႊႁတ်းထၢမ် တီႈမၼ်းၸဝ်ႈ။

33ၶဝ်ႁွတ်ႈထိုင်ၵႃႈတီႈဝဵင်း ၵပိူဝ်ႇၼေႇဢုမ်ႇ ၼၼ်ႉသေယဝ်ႉ၊ မိူဝ်ႈဢၼ်မၼ်းၸဝ်ႈ မီးယူႇၵႃႈၼႂ်းႁိူၼ်းၸိုင်၊ မၼ်းၸဝ်ႈထၢမ်တီႈၶဝ်လႄႈဝႃႈ၊ သူၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်ထဵင်ၵၼ် ၵႃႈတၢင်းၼၼ်ႉလွင်ႈၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

34ၶဝ်ၼၼ်ႉ ဢမ်ႇတၵ်းသဵင်လႄႈယူႇဢေႃႈ။ လွင်ႈမၼ်းၸမ်ႉ ၶဝ်ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်ထဵင်ၵၼ် လူၺ်ႈလွင်ႈဢၼ် ၽူႈလႂ်တၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇသေပိူၼ်ႈၼၼ်ႉ ၵႃႈတီႈၵၢင်တၢင်းၼၼ်ႉဢေႃႈ။-

35မိူဝ်ႈၼၼ်ႉ မၼ်းၸဝ်ႈၼင်ႈယူႇသေယဝ်ႉ၊ ႁွင်ႉသိပ်းသွင်ပႃးမႃးလႄႈ လၢတ်ႈလႄႈဝႃႈ၊ ပေႃးသေၵေႃႉသေၵူၼ်း ၶႂ်ႈပဵၼ်ႁူဝ်ပိူၼ်ႈၸိုင်၊ မၼ်းတၵ်းလႆႈပဵၼ် ၵေႃႉဢၼ် လိုၼ်းလင်သုတ်းပိူၼ်ႈဢေႃႈ။ တၵ်းလႆႈပဵၼ် ၵူၼ်းၸႂ်ႉၵူၼ်းသွႆ တီႈၵူၼ်းတင်းသဵင်ႈတင်းလူင်ဢေႃႈ၊ ဝႃႈၼင်ႇၼႆဢေႃႈ။-

36မၼ်းၸဝ်ႈသမ်ႉဢဝ်လုၵ်ႈဢွၼ်ႇၵေႃႉၼိုင်ႈလႄႈ ဝႆႉၵႃႈၼႂ်းၵၢင်ၶဝ်ယဝ်ႉၸင်ႇ၊ ဢဝ်တင်းမိုဝ်းမၼ်းၸဝ်ႈႁွပ်ႇဢုမ်ႈသေလႄႈဝႃႈ၊-

37ၽူႈလႂ်သေဢမ်ႇဝႃႈ၊ ၵေႃႉဢၼ်ဢိင်ပိုင်ႈၸိုဝ်ႈသဵင်ၵဝ်သေလႄႈ ႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆ သေၵေႃႉသေၵူၼ်းၼၼ်ႉ၊ ၵေႃႉၼၼ်ႉ ႁပ်ႉတုင်းဢဝ်ၵဝ်ဢေႃႈ။ ၽူႈလႂ်သေဢမ်ႇဝႃႈ ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉၵေႃႈ ၵေႃႉၼၼ်ႉ ႁပ်ႉတုင်းဢဝ်ၵဝ်ၵူၺ်းဢမ်ႇၸႂ်ႈ၊ ႁပ်ႉတုင်းဢဝ်ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။

38ယူဝ်းႁၢၼ်ႇ ၵေႃႈလၢတ်ႈလႄႈဝႃႈ၊ သြႃႇၸဝ်ႈႁဝ်းၶႃႈ လႆႈထူပ်းၵူၼ်းဢၼ်ဢိင်ပိုင်ႈၸိုဝ်ႈသဵင်ၸဝ်ႈႁဝ်းသေလႄႈ ႁေႃႈၽီႁၢႆႉဢွၵ်ႇပႅတ်ႈယူႇလႄႈ ဢမ်ႇၸွမ်းလူၺ်ႈၵၼ်တင်းႁဝ်းၶႃႈၼၼ်ႉ ၵေႃႉၼိုင်ႈၶႃႈဢေႃႈ။ ပိူဝ်ႈဢၼ်မၼ်း ဢမ်ႇၸွမ်းလူၺ်ႈၵၼ်တင်းႁဝ်းၶႃႈလႄႈ၊ ႁဝ်းၶႃႈႁႄႉၶႅၼ်မၼ်းၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

39ယေႇသူႉ ၵေႃႈလၢတ်ႈလႄႈဝႃႈ၊ ယႃပေႁႄႉပေၶႅၼ်မၼ်း။ လွင်ႈမၼ်းၸမ်ႉ ၵူၼ်းဢၼ်ဢိင်ပိုင်ႈၸိုဝ်ႈသဵင်ၵဝ်သေလႄႈ ၼႄပျႃးတၼ်းၶူဝ်းယူႇလႄႈ သႄႉသွမ်းၵဝ်ငၢႆႈငၢႆႈၼၼ်ႉ ဢမ်ႇမီးသေၵေႃႉသေၵူၼ်း။-

40ၵေႃႉဢၼ်ဢမ်ႇမီးၽၢႆႇရၢၼ်ႇသူႇႁဝ်းၼၼ်ႉ မီးၽၢႆႇႁဝ်းဢေႃႈ။-

41ၽူႈလႂ်သေဢမ်ႇဝႃႈ၊ ၵေႃႉဢၼ် ဢိင်ပိုင်ႈၸိုဝ်ႈသဵင်ၵဝ်သေလႄႈဝႃႈ၊ သူၸၢပ်ႈသႅင်ႇၵၼ်တင်းၸဝ်ႈၶရိၸ်ႈဢေႃႈ၊ ဝႃႈၼင်ႇၼႆလႄႈ ပၼ်ၼမ်ႉၵွၵ်းၼိုင်ႈတီႈသူၼၼ်ႉ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵေႃႉၼၼ်ႉဢမ်ႇလႆႈဢၵျူဝ်းလႄႈ တၵ်းဢမ်ႇလႆႈယူႇ။

42ၽူႈလႂ်သေဢမ်ႇဝႃႈ၊ ၵေႃႉဢၼ်ႁႂ်ႈလုၵ်ႈဢွၼ်ႇဢၼ်ယုမ်ႇမၢတ်ႈၵဝ် သေၵေႃႉသေၵူၼ်းၼႆႉ ၶီႈလိုတ်းလႄႈလူမ်ႉၼၼ်ႉ၊ တီႈၵေႃႉၼၼ်ႉ၊ ပေႃးမၼ်းလႆႈၶၢမ်ႇတၢင်းဢၼ် ဢဝ်မၢၵ်ႇႁိၼ်လူၺ် ႁွႆႈသႂ်ႇၵႃႈတီႈၶေႃးသေလႄႈ ၶျႃးတူၵ်းၵႃႈၼႂ်းၼမ်ႉပၢင်ႇလၢႆႇၼၼ်ႉၸိုင်၊ ယဵင်ႈၶႅၼ်းတၵ်းလီဢေႃႈ။-

43မိုဝ်းမႂ်းၼၼ်ႉ၊ ပေႃးႁႂ်ႈမႂ်းၶီႈလိုတ်းလႄႈလူမ်ႉၸိုင်၊ တႅပ်းပႅတ်ႈသေတႃႉ။ တၢင်းဢၼ်မိုဝ်းလူႉလႄႈ လႆႈၶဝ်ႈၵႃႈၼႂ်းတၢင်းဢၼ်ဢသၢၵ်ႈလိပ်းပုၼ်ႉၼၼ်ႉ ယဵင်ႈၶႅၼ်းတၵ်းလီသေတၢင်းဢၼ်မီးမိုဝ်းသွင်ၶွၼ်လႄႈ လႆႈၶၢမ်ႇတၢင်းဢၼ် ၶျႃးတူၵ်းသႂ်ႇၵႃႈၼႂ်းငရၢႆး ၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်လႆႈ၊-

44တီႈဢၼ်မူင်ႈဢမ်ႇတၢႆ၊ ၽႆးဢမ်ႇမွတ်ႇၼၼ်ႉဢေႃႈ။-

45တိၼ်မႂ်းၵေႃႈ၊ ပေႃးႁႂ်ႈမႂ်းၶီႈလိုတ်းလႄႈလူမ်ႉၸိုင်၊ တႅပ်းပႅတ်ႈသေတႃႉ။ တၢင်းဢၼ်တိၼ်လူႉလႄႈ လႆႈၶဝ်ႈၵႃႈၼႂ်းတၢင်းဢၼ် ဢသၢၵ်ႈလိပ်းပုၼ်ႉၼၼ်ႉ ယဵင်ႈၶႅၼ်းတၵ်းလီသေ တၢင်းဢၼ်မီးတိၼ်သွင်ၶွၼ်လႄႈ လႆႈၶၢမ်ႇတၢင်းဢၼ် ၶျႃးတူၵ်းသႂ်ႇၵႃႈၼႂ်းငရၢႆး ၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်လႆႈ၊-

46တီႈဢၼ် မူင်ႈဢမ်ႇတၢႆ၊ ၽႆးဢမ်ႇမွတ်ႇၼၼ်ႉဢေႃႈ။-

47မၢၵ်ႇတႃမႂ်းၵေႃႈ၊ ပေႃးႁႂ်ႈမႂ်းၶီႈလိုတ်းလႄႈလူမ်ႉၸိုင်၊ ၶွၵ်းဢွၵ်ႇပႅတ်ႈသေတႃႉ။ တၢင်းဢၼ်မီးတႃၶွၼ်ၼိုင်ႈလႄႈ လႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉၼၼ်ႉ ယဵင်ႈၶႅၼ်းတၵ်းလီသေတၢင်းဢၼ် မီးတႃသွင်ၶွၼ်လႄႈ လႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းငရၢႆး၊-

48တီႈဢၼ်မူင်ႈဢမ်ႇတၢႆ၊ ၽႆးဢမ်ႇမွတ်ႇၼၼ်ႉဢေႃႈ။-

49ၵူၼ်းၵႃႈမီးတင်းသဵင်ႈတင်းလူင် တၵ်းလႆႈၶၢမ်ႇတၢင်းဢၼ် ဢဝ်ၵိူဝ်ၽႆးသႂ်ႇဢေႃႈ။ တူဝ်ယိတ်ႈဢၼ်ပုၵ်ႈၸေႃႇၵႃႈမီးတင်းသဵင်ႈတင်းလူင်ၵေႃႈ၊ တၵ်းလႆႈၶၢမ်ႇတၢင်းဢၼ် ဢဝ်ၵိူဝ်သႂ်ႇဢေႃႈ။-

50ၵိူဝ်ၸိုင်လီဢေႃႈ။ ၼႂ်းဝႃႈၼၼ်သေၵေႃႈ ပေႃးဢၼ်ၸဵမ်းမၼ်းၼၼ်ႉႁၢႆၵႂႃႇယဝ်ႉၸိုင်၊ တၵ်းၶိုၼ်းလႆႈဢၼ်ၸဵမ်းမၼ်းၸိူဝ်ႉၼင်ႇႁိုဝ်။ ၵႃႈၼႂ်းသူ ႁႂ်ႈမီးၵိူဝ်တႃႉ။ ၵေႃႉၼိုင်ႈလႄႈၵေႃႉၼိုင်ႈ ယူႇထုၵ်ႇထုၵ်ႇၵၼ်တႃႉ၊ ဝႃႈၼင်ႇၼႆဢေႃႈ။