2 Corinthians 13

Sidamo

← Chapter 12 Jump to:

1Ki'newa daa'yara tini sayikkite. Baalanka coye haa'nannihu lamu woy sasu naqqasihu gedensaanniiti.

2Layinkimeeshsho ki'newa dayummo yannara, qorophisiise coyi'roommo. Xaano xeertote hee're kunni albaanni cubbo loossinorenna woloota qorophisiiseemmo. Xa ki'newa galagale dayemmo woyite ayeno dimarareemmo.

3Ki'ne ane giddo hee're coyi'rannohu Kiristoosa ikkinota huwattinara hasidhinanni. Ki'ne giddo leeltannoti wolqasiiti ikkinnina wolqiweellesi di"ikkitino.

4Isi masiqalu aana sutame wolqiweelu gede ikke reyinoha ikkirono, xa Maganu wolqanni lubbotenni no. Ninkeno isi ledo wolqiweeloota ikkinoommo. Ki'ne ledo noonke xaadooshshinni kayinni isi ledo Maganu wolqanni hee'neemmo.

5Amma'natenni kaajjitine hee'ra'ne buuxate ki'nenee qonqolchitine la'e; ki'nenee fonqoltine la'e. Yesuusi Kiristoosi giddo'ne noota dibuuxxinoonni? Hakkunni ka'a kayinni fonqolote ubbinoonni yaate.

6Ninke fonqolote umboommokkita affinanni yine hexxineemmo.

7Busha coye assitinannikki gede Magano huucci'neemmo. Huucci'neemmohu ninke aye geeshshano seera guuntoommore ikka hoongummorono, ki'ne wo'manka woyite dancha looso loossinanni gedeeti ikkinnina ninke guunte leellishate di"ikkino.

8Ninke halaaleho uurrineemmo ikkinnina halaalu gobbaanni mittoreno diassineemmo.

9Ninke wolqiweeloota ikkineenna ki'ne jawaatoota ikkitiniro tashshi yaannonke. Ninke huuccatto ki'ne guuta manna ikkitinanni gedeeti.

10Tenne sokka ki'newiinni fafe hee're borreessoommo'nehu kunniraati. Kunni garinni ki'newa dayemmo yannara, Mootichu uyinoe roorrenni diqarriseemmo'ne. Mootichu roorre uyinoehu ki'ne dhaawammoraati ikkinnina diigammo'nera di"ikkino.

11Xaate roduuwa'ya keerunni heedhe! Heeshsho'ne biddi assidhe; seejjo'ya adhe. Mimmiti'ne ledo sumuu yiiyye. Keere heedhe; baxillunna keeru Magani ledo'ne hee'ranno.

12Qullaawa sunqamanni mimmito'ne keere haadhe.

13Ammanaano baala keere sokkino'ne.

14Mootichu Yesuusi Kiristoosi elto, Maganu baxilli, Qullaawu Ayyaani mittimma ki'ne baalunku ledo heedho.

← Chapter 12 Jump to: