2 Corinthians 5

Sidamo

← Chapter 4 Jump to: Chapter 6 →

1Hee'neemmohu baattote aani dukkani diigamiro, gordoho mannu mininoha ikkikkinni Maganu mininonkehu hegere mini noonketa egenninoommo.

2Gordu mine uddi'rate quqquxammanni kunni giddo hee'ne urranni hee'noommo.

3Uddi'ne hee'ne dikallineemmo.

4Reyannoha heeshsho egemmitanno gede, uddi'nammora ikkinnina mullootu hee'nammora halchineemmokki daafira, xa dukkanu giddo hee'neemmo ninke ayirreennanke urranni hee'noommo.

5Tennera qixxeessinonkehu Maganoho. Isi albillitte daara noorira Ayyaanasino taje asse uyinonke.

6Kunnira, baattote aani manninatinni hee'noommo yannara Mootichuwiinni xeerti'ne hee'noommota anfummorono, wo'manka woyite be'e yinummokkinni hee'neemmo.

7Ammanatenni ikkinnina la"atenni dihee'neemmo.

8Maalinkewiinni baxxine Mootichinke ledo hee'ra halchineemmo; kunnira hawaqi'ne hee'neemmo.

9Kunni maalinke ledo hee'nummoro woy baxxinummorono, halchonke iso hagiirsiisate.

10Mittu mittunku maalunni hee're loosinoha dancha woy busha loosisi guma adhate, baalunku Kiristoosi barcimi yoonnihu albira shinqeemmo.

11Mooticha waajjate yaa mayaatero anfe manna ammanchiinsheemmo. Ninke ewelummano Maganu egennino. Ki'ne wodanino afino yee hedeemmo.

12Wodanu giddo noo coyinni ikkikkinni, la'nanni coyinni naaxxitannorira dawaro qoltine ninkenni naaxxitinanni gede ki'nera doogo fanneemmo'ne ikkinnina galagalle ninkenee dijanjeemmo.

13Macharaaraamma ikkinummoro Maganoho yineeti. Wodana fayyo ikkinummoro ki'neraati.

14Kiristoosi mitte hige baalunkura yee reyinota egenninoommo daafira, baxillisi fula ho'linonke. Kunnira baalunku isi reyo gutamino.

15Lubbotenni noori, insa daafira yee ree, reyotenni kainohu daafira ikkinnina insaneete heedhannokki gede isi baalunkura yee reyino.

16Kunni ka'a ayeno mannu hedanno garinni dihendeemmo. Kiristoosano hakko garinni hendoommoha ikkiro, kunni ka'a hakko garinni dihendeemmo.

17Kunnira ayino Kiristoosinni hee'riro haaro kalaqamaati. Akkalu sae ha'reenna kune haaru dayino.

18Kuni baalunku, ninke isinii ledo Kiristoosi widoonni qole araarsihunna araarsate soqqansho uyinonke Maganiwiinni dayino.

19Hatto yaa, Maganu Kiristoosi widoonni qole kalqe isinii ledo araarsino yaate. Saonsa dikiirino; ninkerano araarsate sokka uyinonke.

20Kunnira, Maganu manna ninke widoonni qole woshshanno daafira, ninke Kiristoosi lekkaati. Kunni daafira, «Maganu ledo araaramme!» yine Kiristoosi su'minni huucci'neemmo'ne.

21Kiristoosinni Maganu keeraanchimma ikkineemmo gede, Maganu cubbo loose egenninokkiha Kiristoosa ninke daafira yee cubbaataamo asse kiirinosi.

← Chapter 4 Jump to: Chapter 6 →