2 Corinthians 9

Sidamo

← Chapter 8 Jump to: Chapter 10 →

1Yihudaho hee'rannoha qullaawa manna kaa'linanni kaa'lo daafira ani borrote sokka soyammo'nera dihasiisanno.

2Ki'ne kaa'late ka'ine heedhinoonnita afoommo daafira, sai dirinni kayissine Akayaho aate qixxaabbinoonnita hasaawanni, Meqedooniyu mannira ki'ne ku'leemmo. Ki'ne diinaggaawa lowo manna kakkayissino.

3Kunni garinni ki'ne ku'lanke mullawa gattannokki gede, konne roduuwa ki'newa soyemmo. Ki'neno alba kuloommo'ne garinni qixxaabbine agarre.

4Meqedooniyu manni ane ledo daye qixxaabbinoonnikkita afanno woyite, ki'ne calla ikkitinikkinni ninkeno ki'ne hexxankera hakko garinni saalleemmo.

5Kunnira uyitinara afoo fultinoonni afansha balaxxine qixxeessitinanni gede qaagiissita'nera kuni roduuwi ane balaxxe daa woyyitanno yee hedoommo. Kunni garinni uyitinanni afanshi balaxe qixxaawanno; ki'neno gadadinseenna ikkikkinni baxxine uyitinoonniti leeltanno.

6«Shiima wixi'rinohu, shiima mixxanno; lowoha wixi'rinohu lowoha mixxanno» yinanni maammaashsha qaagge!

7Maganu hagiidhe aannoha baxanno daafira, mittu mittunku wodanisinni baxe hagiidhanni oo ikkinnina, lamu wodaninni woy baxikkinni qarrame oonke.

8Duuchanka woyite baalanka coye ikkanno geeshshiha afidhine, danchu loosi baalunkura halashshitine uyitinanni gede Maganu baalankare batise aa'nera dandaanno.

9Kuni ikkannohu, «Fincino; buxanete beehino; keeraanchimmasi hegere geeshsha heedhanno» yine borreessinoonni garinniiti.

10Wixi'rannohura wixa, itannohura tima halashshe aanno Magani wixidhinanni wixano fakkanche aanno'ne. Keeraanchimma'ne gumano halashshanno'ne.

11Uyitinanniri ninke widoonni iillannonsa manni baalu Magano galatanno gede, wo'manka woyite hagiidhitine uyitinara Maganu baalunku coyinni dureeyye assanno'ne.

12Tini kaa'litinanni kaa'lo ammanaanote qarra tiratenni sa'e, mannu Maganoho lowo galata aanno gede assitanno.

13Kiristoosiha Dancha Duduwo ammantine, insaranna wolootaho leellishshinoonni shooshanqenna fonqolante sa'ino soqqansho'nenni kainohunni baalunku Magano galatanno.

14Maganu batise uyino'ne elto qaagganni, ki'nera Magano huuccate lowo geeshsha quqquxantanno.

15Kulle gundannikki eltosi daafira Maganoho galatu galosi!

← Chapter 8 Jump to: Chapter 10 →