2 Corinthians 8

Sidamo

← Chapter 7 Jump to: Chapter 9 →

1Roduuwa'ya, Maganu Meqedooniyaho heedhanno ammanaanora uyino elto egensiiseemmo'ne.

2Lowo gadadi amade hee'reennansanni, hagiirrinsa batinyinna buximansa takko shooshanqensa lowo geeshsha halashshitino.

3Wolqansa uyitu bikkinninna wolqansara aleenni hagiidhite uyitinota farci'reemmo.

4Yihudaho noo ammanaanora uyitanno kaa'lo hoollanninsakki gede kaajjishshe huuccidhinonke.

5Insa assitinohu, ninke hendoommohura aleenniiti. Balaxxe insanaa Mootichaho uyitino; hakkiinni aanchite Maganu hedo garinni insanaa ninkera uyitino.

6Konne looso balaxe hanafinohu Tiito ikkino daafira, xaano konne shooshanqete looso goofimarchu geeshsha iillishanno gede isonni huucci'noommo.

7Ki'ne baalunku coyinni: ammanatenni, coyi'rate qarummanni, egennotenni, hixamanyatenninna ninkera noo'ne baxillinni roortinanni. Shooshanqe'nennino roortinanni gede ikke.

8Togo yeemmo woyite hajajanni noommo'neha di"ikkino. Wolu manni diinaggaawa widoonni qole baxilli'ne halaalaancho ikkino gedeenni afammora yeeti.

9Ki'ne Mootichinke Yesuusi Kiristoosi elto egentinoonni; isi dureessa ikke hee'renni buxe, ki'ne duroo'mitinanni gede ki'ne daafira yee buxicho ikkino.

10Kunni coyira woyyanno mala eemmo'ne. Sai diro aa callate ikkikkinni, albanni balaxxine konne coye assate hedo noo'ne.

11Diinaggaawa'ne umo fultanno gede, assate heddinoonnire xa wonshe.

12Aate halchiniro, nookkihu aaninni ikkikkinni afi'noonnihu bikkinni aa danchate.

13Togo yeemmo woyite, baalunku taaltinara yee ikkinnina ki'ne mitii'mitinanna wolootu sammi yite heedhara di"ikkino.

14Ki'ne mitii'mitinanni yannara, insa jiro ki'ne qarra tirtanno gede, xa ki'ne jiro insa qarra tirtona. Kunni garinni baalunku taaltinanni.

15Kuni ikkannohu, «Lowoha gamba assi'rinohura wo'me digatino; shiima gamba assi'rinohurano dixeino» yine borreessinoonni garinniiti.

16Ani ki'ne daafira diinaggaawummonte gede, Tiito wodanirano hatte hedo worino Maganira galatu iillosi.

17Tiito ki'newa daannohu, umisinni hagiidheeti ikkinnina ninke kulloommosi daafira calla di"ikkino.

18Dancha Duduwo kulasinni beetekiristaanna baala galattino rodoo ledosi sonkeemmo.

19Hakkuyi aanano, isi ninke Mootichu ayirrinyiranna dancha hedonke leellishate soqqammeemmo soqqanshora badhe ikkannonke gede beetekiristaanna doortinosiho.

20Kuni elle uyinoonni woxi afimaleenna mishammeemmokki gede seekkine qorophineemmo.

21Hedonke Mootichu albaanni calla ikkikkinni, mannu albaannino dancha coye assateeti.

22Lowo yanna batinyu garinni fonqolle hixamanya ikkinota buunxoommo rodoono ledonsa sonkanni hee'noommo. Isi ki'ne lowo geeshsha addaxxino daafira, tenne kaa'lora lowo geeshsha diinaggaawino.

23Tiitore afa hasidhiniro, isi ki'ne kaa'late anera ledo miilaati. Ledosi dagganno roduuwi, beetekiristaannate lekkaatinna Kiristoosi ayirrinyira uurritinoreeti.

24Kunni daafira, baxille'nenna ninke ki'nenni naaxxinoommo naaxxa beetekiristaanna baalate leellishshe!

← Chapter 7 Jump to: Chapter 9 →