Proverbs 11

Sidamo

← Chapter 10 Jump to: Chapter 12 →

1Kaaliiqi hanaaqu keenaasincho giwanno; taalo keenaasincho kayinni baxanno.

2Boo'nate hoode shollinyu daanno; umo heeshshi assa egennote.

3Suwadda sumbensa massaggannonsa; shokkadda kayinni yawaawullensa huntannonsa.

4Maganu hanqanno barra jiro dikaa'litanno; keeraanchimma kayinni reyotenni gatissanno.

5Danchu manchira keeraanchimmasi doogo suwissannosi; bushu kayinni umisi cubbinni ba"anno.

6Keeraancho mancho halaalaanchimmasi gatissannosi; yawaawula kayinni busha yortosi woshshaaddannosi.

7Bushu reyanno woyite, hexxosino ledo reyitanno; hexxino jiro baala mullare ikkite gattanno.

8Keeraanchu qarrunni gatanno; bushu kayinni qarru aana uwanno.

9Bushu manchi arrawisinni olliichosi gawajjanno; danchu manchi kayinni egennosinni gatanno.

10Keeraanote qinaannonsa yannara katamu hagiidhanno; bushuullu reyitanno woyite ililleette ikkanno.

11Halaalaanchu maassamanni katamu lophanno; bushuullu arrawi kayinni bao abbanno.

12Wodancha xe'inohu, arrawisinni manna mishanno; wodancha noosihu kayinni afoosi eemadhanno.

13Hemaanchu maanxoonnire xawo fushshanno; ammanamino manchi kayinni fojo maaxanno.

14Mala afidhinokki gosa ubbanno; malanno manni haammatiro kayinni keere afi'nanni.

15Anfoonnikkihura waase ikka qarra abbitanno; waasete anga wodhannokkihu gatanno.

16Godowa shaqqado mancho ayirritanno; mararro noosekkiri kayinni jirolla gamba assidhanno.

17Wolootaho shaqqa meessanaa kaa'litanno; mararro hooga kayinni anna umosi gawajjitanno.

18Busha mancho gamba assi'rannori dikaa'lannosi; keeraanchu kayinni halaalu woxe afi'ranno.

19Keeraanchimma cu'mi're hee'rannohu, heeshsho afi'ranno; bunshete hoode ha'rannohu kayinni reyanno.

20Kaaliiqi busha hedo noonsare giwanno; halaalaancho doogo hadhannore kayinni baxanno.

21Bushu manchi horonta qorichishamikkinni digatanno; keeraano kayinni gattanno.

22Wodancha noosekki mancho afidhino xumme, manchaamete sanora worroonni cuuicho ledo mittete.

23Keeraanote halcho danchumma callate gawa'litanno; cubbaataammu halcho kayinni bao abbitanno.

24Mitu mitu manni shaqqillunni woxesi fincanno; ikkirono jirosi batidhanno. Deerrimale honqooqoo'mannohura kayinni, buxima lexxitannosi.

25Elannohu duroo'manno; wole duushshannohu duuwanno.

26Lexxara yee gide duu'nannoha mannu rumanno; fushshe hirannoha kayinni maassi'ranno.

27Dancha coye hasi'rannohu, dancha coye afi'ranno. Bunshe hasannohu kayinni, bushu coyinni xaadanno.

28Durummasi addaxxanno manchi darote gede giggilanno; keeraanchu kayinni danchu kaashshi gede latanno.

29Mini manna qarrisannohu insawiinni mittoreno diragi'ranno; gowwu egennaamoho soqqamannoha ikkanno.

30Keeraanchimma heeshsho uyitanno; haxawarrimma kayinni barra haransitanno.

31Keeraano loossinoha baattote aana heedhe mixxitannoha ikkiro, bushuullunna cubbaataammu loossino bunshera, mageeshshire mixxita ikka!

← Chapter 10 Jump to: Chapter 12 →