Proverbs 18

Sidamo

← Chapter 17 Jump to: Chapter 19 →

1Baxxara hasi'rannohu umosi calla baxanno; halaalaancho coye baala giwanno.

2Gowwu egenno afi'rate dibaxanno; umisi egenno calla kulara hasi'ranno.

3Bunshete hoode mishama dagganno; saalu ledo shollinyu daanno.

4Afiinni fulanno coyi diimete wayi gedeeho; egennote buichono burqanno waati.

5Keeraanote halaali dawanno gede, cubbaataammaho golama didanchate.

6Gowwa suumesi gibbote eessitannosi; afiisino gana abbannosi.

7Gowwa mancho afiisi hunannosi; suumesino lubbosira woshshaado ikkitannosi.

8Heme coommitanno sagale gede kushshi yitanni, manninatu ledo karsantanno.

9Looso cee'mannohu, jajja billaallisannohura rodooho.

10Kaaliiqi su'mi kinchu huxxaati; keeraanchu manchi hakkiira xooqe keere hee'ranno.

11Dureeyyete jironsa qiinshoonni katami gedeeti; giddine anfannikkiha kinchu huxxa labbannonsa.

12Naaxxaleessu wodani bao abbanno; umo heeshshi assa kayinni ayirrinye uyitanno.

13Macciishshinikkinni tumo qola, gowwimmatenna shollinyeho.

14Dhiwamanno yannara manna wodanisi irkisannosi; hiiqqamino wodana kayinni duha dandaannohu nooni?

15Egennaamu wodani egenno afi'ranno; maccasino egenno macciishshitara hasidhanno.

16Afansha aannohura doogo fa'nantannosi; jajjabbu albira shiqanno gede assitannosi.

17Baarigaarisi daa geeshsha balaxe ku'lannohu, halaalaancho lawanno.

18Hixa ga'na gibbo hooltanno; wolqisino manna araarsitanno.

19Rodiikki kaa'littosiro, qiinshoonni katama ikkannohe; isi ledo giwamittoro kayinni mine cufi'rannohe.

20Mannu arrawisi danchummanni godowa duuwanno; afiisinni coyi'rinore itanno.

21Reyonna heeshsho arrawu aana no; kunnira, mannu coyi'rinore adhanno.

22Galte afi'rinohu maasso afi'rino; Kaaliiqiwiinnino ayirrinye adhino.

23Buxichu shaqqillunni woxarate huucci'ranno; dureessu kayinni fenjeejje coyi'ranno.

24Mitu mitu jaali dikaa'lanno; mitu kayinni fiixunni roore gamba yaanno.

← Chapter 17 Jump to: Chapter 19 →