Proverbs 24

Sidamo

← Chapter 23 Jump to: Chapter 25 →

1Busha manna hinaassooti; ledonsa hosateno halchitooti.

2Wodaninsanni wole gawajjate heddanno; coyidhanno coyi baalu xagarrote.

3Mine hayyotenni minnanni; ogimmatenni uurrinsanni.

4Egenno heedhuro, wolambinaatu uduunninna jiro mine wo'mitanno.

5Wolqaataamo ikkantenni egennaamo ikka woyyate; wolqa egenno roortanno.

6Olaho fulate albaanni amaalama hasiisanno; lowo mali hee'riro qeelle afi'nanni.

7Gowwaho egenno xeertidhe no; danchare hasaambanni woyiteno yee afannori dino.

8Bunshe malannoha, xagaraamoho yinanni.

9Hawanyu malanno mali cubbo callaho; haariimaancho mannu baalu giwanno.

10Qarru barra wolqiweelittoro, jawaatte diafatto.

11Reyote widira bobbahanno manna gatisi; gorramate hadhanni noore gargari.

12«Ani diafoommo» yiittoro, wodana la"anno Magani diafanno? La"anni noohehu diegennino? Mannaho loosisi garinni aannohu di"isooti?

13Beetto'ya, malawu danchahona iti; malawu leono coommitannote.

14Egennono lubbokkira hattootena afi; ise afi'rittoro geedo biiffannohe; hexxokkino diba'anno.

15Bushu manchi gede keeraanchu mine duggooti; galannowano diiggooti.

16Keeraanchu 7 hige uwiro nafa ka"anno; bushu kayinni baote aana uwanno.

17Baarigaarikki qarrameenna hagiidhitooti; gufi'ranno woyiteno tashshi yoonkehe.

18Kaaliiqi konne coye dibaxanno; baarigaarikki aaninnino hanqosi hoolanno.

19Bushu manni ikkito la'e aarantooti; insa la'eno hinaassooti.

20Bushu geedo diafi'rino; caabbichisino xoanno.

21Beetto'ya, Kaaliiqa waajji; mooteno ayirrisi; insara hajajantannokkiri ledono sumuu yitooti.

22Hattoo manni hedeweelcho ba"anno; Maganu woy moote abbitanno qarra afinohu dinona.

23Aane noo maammaashshino egennaammu coyidhinoho. Yoo yaatto woyite, godowa hossooti.

24Busha, «Ati keeraanchoho» yaannoha, mannu rumannosi; gosano gibbannosi.

25Busha rufannohu kayinni, hagiirre afi'ranno; dancha maassono hoode hadhannosi.

26Suwashsho dawaro qola, baxillu malaateeti.

27Gobbayidire balaxxe biddi assi'ri; gatikki loosono guxxi; hakkunni gedensaanni mine mi'ni.

28Jaalikki aana beebbatenni naqqassooti; arrawikkinni doggooti.

29«Assinoeta asse qo'leemmo; rabba'yano qo'leemmo» yitooti.

30Cee'maleessu manchi gateenni hige saoommo; jallaagu manchi kaashshi widoonni hige ha'roommo.

31Baalankare utu amade no; baattono ishinu egemme no; huxxuno diigame baino.

32Anino konne coye heeshshi gotti asse lae, umi'yara seejjo adhoommo.

33Shiima geeshsha goxi; shiima yanna liphi assi; shiima geeshsha anga gamba assidhe fooliishshi'ri.

34Hatto ikkite heedheenna buxima mulqi'rannohu gede, hoongu bagado amaxxino manchi gede hedeweelcho daannohe.

← Chapter 23 Jump to: Chapter 25 →