Proverbs 12

Sidamo

← Chapter 11 Jump to: Chapter 13 →

1Seejjo baxannohu egenno baxanno; seejjamannokkihu kayinni jallaagaho.

2Keeraano Kaaliiqi baxanno; bunshe heddannore kayinni qorichishanno.

3Bunshe loosanno manchi dese'e yee hee're diafanno; keeraanchu kayinni noowa teese hee'ranno.

4Dancha mancho ayiddaannisera ba'lattote; saaliweelo galte kayinni ayiddaannisera miqichu dhibbaati.

5Danchu manni hedo suwashshote; bushuullu mali kayinni xagarrote.

6Bushu manni arrawi manna shaate malanno; danchu manni hasaawi kayinni reyotenni gatisanno.

7Bushu manni higannokki gede ikke ba"anno; keeraanote ilama kayinni hegerera heedhanno.

8Mannu egennosinni galatamanno; wodana shokkashshu kayinni mishamanno.

9Noori nookkiha afi'raamo lawe naaxxanno manchinni, umosi heeshshi asse loosi're hee'ranno manchi woyyate.

10Keeraanchu manchi saadasi nafa mararanno; bushu wodani kayinni mararro diafi'rino.

11Loosi'ranno manchi sagale duuwe itanno; mullawa hosannohu wodana ajinoho.

12Bushu manni wo'manka woyite bunshe assate halchanno; keeraano rumushsho seeddino haqqe gedeereeti.

13Busha mancho coyi'rino coyi amadannosi; keeraanchu manchi kayinni qarrunni gatanno.

14Mannu afiisi danchummanni atoote afi'ranno; loosi'rino garinni malinosire adhanno.

15Gowwaho umisi doogolla gara labbannosi; egennaamu kayinni amaallannire adhanno.

16Gowwu hanqi hakkawoyintenni leellanno; egennaamu manchi kayinni xonnoonnisi xono mishe aguranno.

17Halaalaanchu manchi afinore coyi'ranno; kapho naqqasannohu beebba coyi'ranno.

18Dayi gede coyi'nanni coyi manna urdete gede qasanno; egennaamu arrawi kayinni hursanno.

19Kaphu shiima yannalla keeshshanno; halaalu kayinni hegerera hee'ranno.

20Bunshe malanno manni wodanira xagarro no; keeru hee'rannota maltannori kayinni hagiirre afidhanno.

21Keeraano mitiimma diamaddannonsa; bushuulleho kayinni qarru bati'rannonsa.

22Kaaliiqi kapho coyidhannore giwanno; halaalaasine kayinni baxannonsa.

23Egennaamu manchi egennosi diku'lanno; hawanyu kayinni gowwimmasi leelliwa duduwanno.

24Jaate loosi'ra mannaho aliidiha assitanno; cee'ma kayinni borojjimmate tugganno.

25Wodanu yaaddo dadille abbitanno; danchu hasaawi kayinni hagiirsiisanno.

26Keeraanchu manchi jaalisira dancha mala aanno; bushu manchi kayinni halaaluwiinni xeertisanno.

27Cee'maleessu ugaaxe abbi'rinoha nafa du'rishi're di"itanno; jaate loosi'rannohu kayinni qiniite afi'ranno.

28Keeraanchimma heeshshote doogooti; cubbo loosa kayinni reyote massitanno.

← Chapter 11 Jump to: Chapter 13 →