Jeremiah 16

Sotho 1951 (BIBELE)

← Chapter 15 Jump to: Chapter 17 →

1Lentšu la Morena le kile la ntlela la re:

2O se ke wa tšea mosadi; o se ke wa tswala barwa le barwedi felo fa.

3Gobane barwa le ba tswalelwago felo fa, le botatabo ba ba ba tswalago nageng ye o ba boletše.

4Ba tlo hwa ka dinkhu tše di šiišago; ba ka se llelwe; ba ka se epelwe; ba tlo ba morole mašemong. Ba tlo lewa ke tšhoša le tlala; mme ditoto tša bona di tlo lewa ke manong a sebakeng le bata tša naga.

5Gobane Morena o mpoditše a re: O se ke wa tsena mo ngwakong wa mahlobogo, o se ke wa ya maemong; o se ke wa ba lediša; gobane kwano ya ka le setšhaba se ke e gomišitše. O realo Morena. Ke gomišitše botho le dikgaogelo.

6Ba bagolo le banyane ba tlo hwa lefaseng le, ba ka se epelwe, ba ka se llelwe, go ka se be ba iphatšago ka baka la bona, le ba ba dutulwago.

7Go ka se be le a ba solelago bogobe bja mahlobogo, le wa go re a ba homotše ka baka la mohu, le wa go ba tšhelela senwewa sa go ka homotša motho ge go hwile rragwe goba mmagwe.

8Le ngwakong wa monyanya o se ke wa tsena wa dulela go ja le go nwa nabo.

9Gobane Morena wa mašaba Modimo wa Isiraele o re: Tsebang, felo fa mehleng yeno ya lena le tlo bona ge ke tlo kgaotša lentšu la go thaba, le lentšu la tlhalalo, le lentšu la monyalwa le monyadi.

10E re ge o botša tšhaba se mantšu ao ohle, mme ba botšiša ba re: Ke ka baka lang ge Morena a re bolela ka mabošula a makaakaa? Molato ke eng? Bosenyi bja rena ke bofe? Dibe tše re senyeditšego Morena Modimo wa rena ka tšona ke dife?

11Ke mo o tlogo fetola wa re: Ke ka gobane borraweno ba ntlhadile. O realo Morena. Mme ba latetše medimo e šele ba hlankela yona, ba e khunamela. Nna ba ntahla, mme melao ya ka ba se e hlokomele.

12Mme lena le bile le phadile borraweno ka go dira bobe; ka gobane šedi, ka moka ga lena le ile le bonganga bja dipelo tša lena: Le gana go kwa nna.

13Ke gona ke tlo le raka nageng ye, ka le iša kua nageng ye lena le botataweno le sa e tsebego. Gona kua le yo hlankela medimo e šele mosegare le bošego; ka gobane nka se ke ka le gaogela.

14Le ge go tlo ba bjalo le tsebe gobane go tlo tla matšatši a ge go se sa tlo thwe: Ka bophelo bja Morena e a ntšhitšego Baisiraele nageng ya Egipita!

15Go tlo nape go thwe: Ka bophelo bja Morena e a ntšhitšego Baisiraele nageng ya leboa, le dinageng ka moka tše a bego a ba raketše go tšona! Ke tlo ba bušetša fa mašemong a bona, a ke a neilego botatabo.

16Le tsebe gore ke tlo roma baswari ba dihlapi ba bantši. O realo Morena. Bona ba tlo ba swara. Ka tsebo roma le batsomi ba bantši. Bona ba tlo ba tsoma, ba ba ntšha dithabeng ka moka, le mebotong ka moka, le mo mefatšeng ya maswika.

17Gobane mahlo a ka a bona ditsela tša bona ka moka; ga tša utagala pele ga ka; mme molato wa bona mahlo a ka a bona o le kgakala.

18Ke tlo thoma ka lefetša bokgopo bja bona gabedi, ka ge ba gobošitše naga ya ka ka ditoto tša makgapha a bona, ba e tlatša tša bohlola.

19Morena, maatla a ka, sebo sa ka le tšhabelo sa ka mohla wa tlalelo; ditšhaba di tlo tla go wene di etšwa kua lefase le gomago gona, mme di tlo re: Tše botatawešo ba bego ba na natšo ke maaka, ke lefela le le sa holego selo.

20A motho a ka kgona go itirela medimo? Yona yeo ga se medimo.

21Ge ba tlo realo, ke mo nna ke tlogo ba ruta go tseba atla sa ka le maatla a ka; ke mo ba tlo tseba ge ina la ka e le Morena.

← Chapter 15 Jump to: Chapter 17 →