Jeremiah 52

Sotho 1951 (BIBELE)

← Chapter 51 Jump to:

1Tsedekia o be a na le nywaga e masome a mabedi a motšo o tee ge a tšea bogoši. A fetša nywaga e lesome la motšo o tee a le kgoši ya Jerusalema. Leina la mmagwe e be e le Hamutala morwedi wa Jeremia wa Libina.

2O dirile tše di bego di befela Morena, bjalo ka tšohle tše di bego di dirwa ke Joyakima.

3Ka kgonthe, dilo tšeo ka moka di diregetše Jerusalema le Juda ka ge Morena a befetšwe, a ba a ba raka pele ga gagwe; mme Tsedekia a hlanogela kgoši ya Babele.

4Ka ngwaga wa senyane wa pušo ya gagwe, ka tšatši la lesome la kgwedi ya lesome, gwa tla yena Nebukadinetsara kgoši ya Babele, a lwa le motse wa Jerusalema a na le madira a gagwe ka moka; a o dulela, ba o rakelela ka meago ya dibo.

5Motse wa dula o rakeletšwe go iša ngwageng wa lesome la motšo o tee wa pušo ya kgoši Tsedekia.

6Ka la senyane la kgwedi ya bone tlala ya gola motseng; le go ba ba dutšego nageng yeo gwa hlokwa bogobe.

7Gomme motse wa šwahlelwa; banna ka moka ba bahlabani ba tšhaba bošego ka tsela ya kgoro e lego gare ga merako e mebedi e šikago le tšhemo ya kgoši. Ke ge Bakaladea ba dikile motse ka thoko tšohle, ge kgoši e tšhaba ka tsela e yago molaleng wa Jorodane.

8Sera sa Bakaladea sa hlomarela kgoši Tsedekia, sa mo swara molaleng wa Jeriko, bahlabani ba gagwe ka moka ba šwalalana ba mo lahla.

9Kgoši ya swarwa, ya išwa go kgoši ya Babele motseng wa Ribilathe nageng ya Hamathi, ya sekišwa gona.

10Kgoši ya Babele ya bolaya barwa ba Tsedekia pele ga mahlo a gagwe; a bolaya le bakgomana ba Juda moo Ribilathe.

11Yena Tsedekia a gonywa mahlo; ba mo tlema ka diketane; mme kgoši ya Babele ya ya nae Babele, ya mo iša kgolegong, a dula moo a ba a hwela gona.

12Ka tšatši la lesome la kgwedi ya bohlano, ka ngwaga wa lesome la metšo e senyane wa pušo ya Nebukadinetsara kgoši ya Babele, gwa tla Nebusaradani letona la dira tša mošate, lekala la Nebukadinetsara, a fihla Jerusalema.

13A tšhuma Ngwako wa Morena, le ngwako wa kgoši, le nywako ka moka ya Jerusalema. Nywako yohle e megolo a e tšhuma ka mollo.

14Merako ka moka ya motse wa Jerusalema ya phušolwa thoko tšohle ke madira ka moka a a bego a na le yena letona la madira a mošate.

15Batho ba bahumanegi ba setšhaba, le ba mašalela a setšhaba a a šaletšego mo motseng, le ba ba bego ba lobile kgoši ya Babele, le bontši bja ba ba šetšego, ba išwa Babele ke yena Nebusaradani letona la madira a mošate.

16Nebusaradani letona la madira a mošate a šadiša batho ba bangwe ba bahumanegi nageng, ya ba balemi ba dirapa tša merara le ba mašemo.

17Dikokwane tšela tša mphiri tša Ngwakong wa Morena, le dihlapelo, le legopo le legolo la mphiri la Ngwakong wa Morena, Bakaladea ba di phatlogantše, mme tshipi ya tšona ba e iša Babele.

18Ba tšea le dipitša, le mahwana, le mefaka, le megopo, le meruswi, le dibjana ka moka tša mphiri tša go dira Ngwakong wa Morena, ba tloga natšo.

19Letona la dikala la tšea le megopšana le mafišwana a go gokolela mollo, le meruswana ya diorelo, le meruswi e mengwe, le dipitša, le dihlomapone, le dibjana le dipitšana tša gauta e bohlokwa le tša silifera.

20Dikokwane tšela tše pedi, le legopo le legolo, le dipholo tše lesome la metšo e mebedi tša mphiri, tše di bego di le rwele, tše kgoši Salomo a bego a di diretše Ngwako wa Morena, tshipi ya tšona ya mphiri, le ya dibjana, ba šitilwe go e ela boima.

21Ge e le dikokwane boemo bja tšona e be e le meelo e lesome la metšo e seswai; bokoto bja tšona bo be bo elwa ka go di dikologa ka lenti la meelo e lesome la metšo e mebedi; bokoto bja tshipi ya mphiri e di bopilego, e be e le bja bophara bja seatla; ka teng e be e le phao.

22Kokwane e be e na le hlogo ya yona ya mphiri; boemo bja hlogo e be e le meelo e mehlano, e be e tatetšwe ka lokwa la motato le le gomilwego ka dikgokolwana tša mphiri tše kakago marapa. Le kokwane yela e nngwe e be e swana le yeno.

23Dikgokolwana tšeo tša mphiri e be e le tše masome a senyane a metšo e selelago, di lepeletše ka thoko tše go fela. Ka moka ga tšona mo lokweng letee e be e le tše lekgolo.

24Letona la madira a mošate le swere le Seraya moperisita e mogolo, le Tsefanya moperisita wa sehlopha sa bobedi, le ba bararo ba baletamejako.

25Motseng la swara e mongwe wa bagolo, molakabahlabani, le ditona tše šupago tša dikala tša mošate, tše di hweditšwego mo motseng, le mongwadi wa molakabahlabani yo e bego e le wa go rapa batho ba naga yeo, le banna ba masome a selelago ba ba hweditšwego mo motseng.

26Bona bao, Nebusaradani letona la madira mošate, o ba swere, a ba iša go kgoši ya Babele kua motseng wa Ribilathe.

27Gomme kgoši ya Babele ya ba bolaela gona moo Ribilathe nageng ya Hamathi. Ke tšona tša ge Juda a thopiwa nageng ya gabo.

28Batho bao, ba Nebukadinetsara a ba thopilego ka ngwaga wa go šupa, e be e le Bajuda ba dikete tše tharo di nago le masome a mabedi a metšo e meraro.

29Ka ngwaga wa lesome la metšo e seswai wa pušo ya Nebukadinetsara, o thopile batho ba makgolo a seswai a nago le masome a mararo a metšo e mebedi.

30Ka ngwaga wa masome a mabedi a metšo e meraro wa pušo ya Nebukadinetsara, Nebusaradani letona la madira a mošate o thopile Bajuda ba makgolo a šupago a nago le masome a mane a metšo e mehlano. Ka moka e be e le ba dikete tše nne tše di nago le makgolo a selelago.

31Ya re mola Joyakini kgoši ya Juda a feditše nywaga e masome a mararo a metšo e šupago a le kgolegong, ka letšatši la masome a mabedi a metšo e mehlano la kgwedi ya lesome la metšo e mebedi, Efila-Merodaka kgoši ya Babele a gaugela Joyakini kgoši ya Juda, a mo ntšha ngwakong wa kgolego. E be e le ka ngwaga wa pele wa pušo ya gagwe.

32A bolela le yena ka botho, a mo dudiša serena mo go dikgoši tše di bego di na nae Babele.

33A mo apola diaparo tša kgolego; a ja dijo kgošing mehla yohle a sa phela.

34Dijo tša gagwe ka moka, tša tšatši le lengwe le le lengwe, o be a di fiwa di etšwa go kgoši ya Babele mehla yohle a sa phela, go fihla ge a ehwa.

← Chapter 51 Jump to: