Jeremiah 32

Sotho 1951 (BIBELE)

← Chapter 31 Jump to: Chapter 33 →

1Šele lentšu le le tletšego Jeremia le etšwa go Morena. Ke la ngwaga wa lesome wa pušo ya Tsedekia kgoši ya Juda, e lego ngwaga wa lesome la metšo e seswai wa pušo ya Nebukadinetsara.

2Ke mola dira tša kgoši ya Babele di rakeletše motse wa Jerusalema, Jeremia a tswaleletšwe mo lapeng la kgolego ya mošate wa Juda.

3Gobane Tsedekia kgoši ya Juda o be a mo išitše kgolegong, a re: O reng o porofeta wa re: Morena wa mašaba o re: Tsebang! Motse wo ke o gafela matsogong a kgoši ya Babele, a tle a o tšee;

4Wa re: Tsedekia kgoši ya Juda a ka se ke a phonyokga Bakaladea, wa re: Sa gagwe ke go gafelwa matsogong a kgoši ya Babele o tlo fetolana nae ba lebane difahlgo.

5Wa re: Tsedekia o tlo išwa Babele a yo dula gona go fihla ge ke tlo mo hlola; wa re: O realo Morena; le ge le hlabana le Bakaladea, le ka se ke la bakgona?

6Ke mo Jeremia a itšego: Lentšu la Morena le ntletše la re:

7Tseba! Hanamiele morwa wa Salume rrangwanago o tlo tla go wene, a re: Reka tšhemo ya ka ya kua Anathothe, gobane go swanetše ge e rekollwa ke wene.

8Ke moka, Hanamiele morwa wa rrangwanake a tla go nna ke le moo lapeng la kgolego ka mo Morena a boletšego ka gona, a re: A ko reke tšhemo ya ka ya kua Anathothe nageng ya Benyamini, gobane go swanetše ge e rekollwa ke wene wa e hunolla. Reka, e be ya gago! Ke mo ke lemogilego ge e le lentšu la Morena.

9Ka reka tšhemo ya Hanamiele morwa wa rrangwanake ya kua Anathothe, ka mmalela tšhelete ya disekele tše lesome le metšo e šupago tša tshipi e tshehla.

10Ka ngwala le lengwalo la theko, ka le gatiša ka seka sa ka, ka bitša dihlatse ka mo elela ditšhelete tšeo ka seelo.

11Ka tšea lengwalo leo la theko le le gatišitšwego ka mokgwa wa molao, ka tšea le lengwe lengwalo le le se nago kgatišo,

12Mme lengwalo leo la theko ka le neela Baruke morwa wa Neriya morwa wa Mahaseya pele ga mahlo a Hanamiele rrangwanake le dihlatse tše di ngwadilego maina a tšona lengwalong leo, le pele ga mahlo a Bajuda bohle ba ba bego ba dutše lapeng la kgolego;

13ka laela Baruke re le moo pele ga bona, ka re:

14Morena wa mašaba Modimo wa Isiraele o re: Tšea mangwalo a a theko, le le gatišitšwego le le le sa gatišwago, o a boloke sebjaneng sa letsopa, a dule moo lebaka le letelele.

15Gobane Morena wa mašaba Modimo wa Isiraele o re: Go sa tlo fela go rekwa dintlo le mašemo le dirapa tša merara nageng yeno.

16Ya re ke neetše Baruke morwa wa Neriya lengwalo leo la theko, ka rapela Morena ka re:

17Morena mong wa ka! Ke wene e o dirilego magodimo le lefase ka maatla a gago a magolo, o emišitše letsogo la gago. Ga go selo se se kago go palela.

18Ba dikete o ba dira ka botho; mme molato wa botatagobana o o rweša bana ba bona ba ba tlago morago ga bona. O Modimo e mogolo, yo maatla, yo leina la gago e lego Morena wa mašaba.

19O wa merero e megolo o yo maatla medirong, wa mahlo a go šetša tsela tšohle tša bana ba batho, gore mang le mang o mmušetše se se swanetšego tsela tšagwe, le tše di tšweletšego ka mediro yagwe.

20Ke wene e o dirilego mehlolo le matete Egipita, wa e dira mo go Isiraele le go batho go fihla la lehono, wa retiša ina la gago ka mokgwa wo wa bolehono.

21Setšhaba sa gago sa Isiraele o se ntšhitše Egipita ka mehlolo le matete, le ka seatla se maatla o ntšhitše tsogo la gago ka mokgwa o šiišago kudu.

22Wa tla wa ba nea naga ye, ye o e enetšego botatabo, wa re o tlo ba fa yona, naga e elago maswi le dinose.

23Ba tla ba e tšea; mme ba se kwe ge o bolela, ba se ye ka melao yago; mme tšohle tše o ba laetšego tšona ba se ke ba di dira, wa ba wa ba lesa ba gahlana le mašula a ka moka.

24Šeba barakeledi, ba batamela motse gore ba o thube; mme o tlo gafelwa diatleng tša Bakaladea ba ba lwago le wona ka marumo le ka tlala le ka dinkhu. Go tšwelela tše o di boletšego. Šedi, o a di bona.

25Le ge go le bjalo, Wene Morena mong wa ka, o mpoditše wa re: Reka tšhemo ka tšhelete, o bee dihlatse etšwe motse o gafetšwe matsogong a Bakaladea.

26Ke mo lentšu la Morena le tletšego Jeremia la re:

27Tseba, nna Morena, ke nna Modimo wa nama yohle. A go ka ba le selo se se mpalelago?

28Ke ka baka leo Morena a rego: Ke nna e! Ke gafela motse wo matsogong a Bakaladea, matsogong a Nebukadinetsara kgoši ya Babele, gore a o thope.

29Mme Bakaladea ba ba lwago le motse wo, ba tlo tsena ba o tšhuma ka mollo; ba tlo o fiša, le nywako ya ba bego ba thuntšhetša Baali diorelo, ba ipega go medimo e šele ka dino, ya ba gona go nthumola.

30Gobane Baisiraele le Bajuda, go tloga bjaneng bja bona, sa bona e be e le go dira tše di mpefelago; se Baisiraele ba se dirilego ka diatla tša bona, e be e le go lwa le nna fela. O realo Morena.

31Motse wo, e sa le mola o agiwa, go fihla lehono, ke wa go tsoša kgalefo ya ka le pefelo ya ka; ka ba ka re ke o tloše pele ga ka.

32Molato ke dibe tšohle tša Baisiraele le Bajuda, tše ba di dirilego ba mpefela, bona le dikgoši le tša bona, le bakgoma ba bona, baperisita ba bona, le banna ba Juda, le baagi ba Jerusalema.

33Ba nneetše seetse e sego sefahlego; gomme le ge ke sa ka ka kgaotša go ba ruta, ba ganne go kwa le go laiwa.

34Dilo tša bona tša tšhila ba di bea mo Ngwakong wo o bitšwago ka leina la ka; ba o dira wa makgapha.

35Ba agetše Baali meboto, e lego moeding wa Bene-Hinomi. Moloko ba o fišetša barwa ba bona le barwedi ba bona ka laela tšona, tše di sa kego tša rotoga pelong ya ka. Ba dirile tšhila tšeo ba diriša Juda dibe.

36Gomme bjalo, le ge go eme ka mokgwa woo, le šetše le bolela motse wo la re o gafetšwe diatleng tša kgoši ya Babele ka marumo le ka tlala le ka dinkhu, -- Morena Modimo wa Isiraele o buša a re:

37Ke nna e! Ke tlo ba phutha ka ba ntšha dinageng ka moka tše ke ba leleketšego go tšona ke pelofetše ke galefile, ke goletšwe ke pefelo; ke tlo ba bušetša mono mo ba tlo aga ba iketla.

38E tlo ba setšhaba sa ka, mme nna ke tlo ba Modimo wa bona.

39Ke tlo ba nea pelo e tee le tsela e tee ya go boifa nna ka mehla, tsela e tlogo ba iša mahlatseng, bona le bana ba bona, ba ba tlo ba gona mehleng e tlago.

40Mme ke tlo dira kgwerano ye e sa felego le bona, ke se hlwe ke kgaogana nabo, ke fela ke ba setša. Dipelong tša bona ke tlo bea boi bja go boifa nna, ba se sa tlo ntlhanogela.

41Ke tlo ba thabela ke ba ekelela; ke tlo ba hloma nageng yeno ka go ba botegela ka pelo ya ka ka moka, ke rata fao ruri.

42Gobane Morena o re: Bjalo ka ge tšhaba se ke se tlišeditše mabošula a makaakaa, ka mokgwa o bjalo ke tlo ba tlišetša le tše botse tšohle tše ke ba boditšego tšona.

43Mo nageng ye le rego e senyetše, e hlokago batho le dikgomo, ye e gafetšwego matsogong a Bakaledea, go sa tlo rekwa mašemo.

44Mašemo a tlo rekwa ka tšhelete, gwa ngwalwa mangwalo a theko a a tlogo gatišwa, gwa bewa dihlatse, gona fa nageng ye ya Benyamini le tikologong ya Jerusalema, le metseng ya Juda, le metseng e lego dithabeng le ya melaleng, le metseng ya thoko ya borwa. Gobane mathopša a bona ke tlo a buša. O realo Morena.

← Chapter 31 Jump to: Chapter 33 →