Jeremiah 41

Sotho 1951 (BIBELE)

← Chapter 40 Jump to: Chapter 42 →

1Gomme ka kgwedi ya go šupa gwa tla yena Isimaele morwa wa Nethanya morwa wa Elisama wa moloko wa kgoši; a tla le ditona tša kgoši, a na le banna ba lesome; ba tla go Gedalia morwa wa Ahikama motseng wa Mitsipa, ba dula mmogo ba ja bogobe le yena.

2Ke mo go tsogilego Isimaele le banna bao ba lesome, ba bolaya Gedalia morwa wa Ahikama morwa wa Safani ka lerumo; ba bolaya yena monna yo kgoši ya Babele a bego a mmeile mmuši wa naga yeo.

3Isimaele a bolaya le Bajuda ka moka ba ba bego ba na le Gedalia gona moo Mitsipa, a bolaya le bahlabani ba Bakaladea ba ba bego ba le gona moo.

4Ka la go hlatlama leo Gedalia a bolailwego ka lona, go sešo gwa tseba motho selo,

5gwa rotoga banna ba masome a seswai ba etšwa Sikeme le Silo le Samaria, ba tla ba bootšwe maledu, ba gagotše diaparo, ba phatšitšwe, ba swere dibego le diorelo tša bona, ba di iša Ngwakong wa Morena.

6Isimaele morwa wa Nethanya a tšwa motseng wa Mitsipa a ba gahlanetša, a tšama a lla; a re go fihla go bona a re: Tlang go Gedalia morwa wa Ahikama.

7Ya re ge ba fihlile gare ga motse, Isimaele morwa wa Nethanya, a na le banna bala ba bego ba ema nae, a ba bolaya, a ba lahlela moleteng.

8Mo go bona go be go na le banna ba lesome; bona ba bolela le Isimaele ba re: Se re bolaye; re na le mahumo a a fihlilwego mašemong; ke mabele, le lootša, le makhura, le dinose! Isimaele a ba lesa, a se ba bolaye le ba gabobona.

9Molete wo a lahletšego ditoto tša ba a ba bolailego go wona gotee le setoto sa Gedalia, ke wola o epilwego ke kgoši Asa mola e elwa le Baesa kgoši ya Isiraele; ke wona wo Isimaele morwa wa Nethanya a o tladitšego ka ditoto.

10Bjale Isimaele a thopa mašalela ka moka a setšhaba a a bego a le motseng wa Mitsipa, e le barwedi ba kgoši, le setšhaba se se bego se šadišitšwe Mitsipa, se Nebusaradani letona la madira a mošate a bego a se laeletše Gedalia morwa wa Ahikama. Ke bona bao Isimaele morwa wa Nethanya a ba thopilego a wela tsela a re a selele go Baamoni. Dilo tše mpe tše ka moka, tše Isimaele morwa wa Nethanya a di dirilego, tša kwewa ke Johanane morwa wa Karea, le balaodi ba madira ba ba bego ba na nae.

11Bona ba ba rapa banna ka moka, ba yo lwa le Isimaele morwa wa Nethanya, ba mo hwetša a le letsheng le legolo la Gibeoni.

12Gomme batho ka moka bao ba Isimaele a bego a na nabo, ba thaba ge ba bona Johanane le balaodi ba dira ba a bego a na nabo.

13Bona batho bao ba Isimaele a bego a ba thopile Mitsipa, ba goma ba boela go Johanane morwa wa Karea.

14Yena Isimaele morwa wa Nethanya, ge go fihla Johanane, a tšhaba a na le banna ba seswai a ya go Baamoni.

15Johanane morwa wa Karea le balaodi ka moka ba dira ba ba bego ba na le yena, ba botha mašalela ka moka a batho, a ba a gomišitšego a thopilwe motseng wa Mitsipa ke Isimaele morwa wa Nethanya mola a bolaile Gedalia morwa wa Ahikama; e be e le banna ba bahlabani, le basadi, le bana, le ba bakgomana, bao a ba gomišitšego Gibeoni.

16Ba tloga moo ba ya ba dula makhutšong a Kimihama kgauswi le Betlehema, ba re ba ya Egipita.

17Ka gobane ba be ba boifa Bakaladea, ba re ba tlo tla ka ge Isimaele morwa wa Nethanya a bolaile Gedalia morwa wa Ahikama, yo kgoši ya Babele a bego a mmeile mokgoma wa naga yeo.

← Chapter 40 Jump to: Chapter 42 →