Luke 2

Sotho 1951 (BIBELE)

← Chapter 1 Jump to: Chapter 3 →

1Mehleng yeo gwa na gwa tšwa molao go Kesara Augusto, wa gore dilete ka moka di ngwalwe.

2Lengwalo leo la dirwa e le la pele; ke ge Kirenio a buša Siria.

3Batho ka moka ba ya go ngwalwa; e mongwe le e mongwe a ya motseng wa gabo.

4Josefa le yena a tloga Galilea motseng wa Natsaretha, a ya nageng ya Juda motseng wa Dafida o bitšwago Betlehema, gobane e be e le motho wa moloko wa Dafida, wa lešika leo.

5A ya go ngwalwa le Maria mosadi e a beeleditšwego ke yena, yo e bego e le moima.

6Ya re ge ba le moo, gwa fihla lebaka la gagwe le go belega.

7A belega morwa wa gagwe eo a itšibutšego ka yena, a mo phuthela ka mašela, a mo latša legopong, ka gobane ba sa ka ba hwetša sebaka ngwakong wa baeti.

8Gomme go be go na le badiši nageng yeo marakeng, ba letše ba letile mehlape ya bona.

9Ba bona Morongwa wa Morena a tlile go bona a ema, mme letago la Morena la ba phadimela ka mešo e go fela; bona ba boifa, poifo ya ba e kgolo.

10Morongwa wa Morena a bolela le bona a re: Se boifeng! Bonang, ke le botša taba e botse ya thabo e kgolo, e tlo go ba ya setšaba ka moka.

11Gobane lehono le tswaletšwe Mophološi, e lego Kriste Morena, mo motseng wa Dafida.

12Taetšo ya go le iša gona še: Le tlo hwetša lesea le le phuthetšwego ka mašela le letše legopong.

13A sa realo ke ge lešaba la dira tša legodimo le eme le yena Morongwa, le reta Modimo le re:

14Tumišo a e ye go Modimo magodimodimong; lefaseng go be le khutšo, kgahlišo bathong.

15Ya re ge Barongwa ba tlogile, ba boetše legodimong, badiši ba šala ba botšana ba re: A re yeng kwa Betlehema re yo bona taba ye e diregilego, ye Morena a re tsebišitšego yona.

16Ba hlaganela ba ya, ba hwetša Maria le Josefa, le lona lesea le letše legopong.

17Ya re ge ba bone, ba bolela tše bona ba di boditšwego di ela yena ngwane e.

18Ka moka ba ba di kwago ba tlabega ka tše badiši ba ba botšago tšona.

19Maria yena a boloka ditaba tše ka moka, a di akanya pelong ya gagwe.

20Badiši ba goma ba reta Modimo ba Mo tumiša ka tšohle tše ba di kwilego le tše ba di bonego, e le tšona tšela tše ba di boditšwego.

21Ge go fetile matšatši a seswai ngwana a bolotšwa, a rewa leina la Jesu, lonalela le a le reetšwego ke Morongwa a sešo a amogelwa mmeleng wa mmagwe.

22Ge go fetile lebaka la go tagafatšwa ga bona ka molao wa Moše ba mo iša Jerusalema, gore ba mmee pele ga Morena.

23E le go ya ka mo go ngwadilwego molaong wa Morena, wo o rego: Se setona se mmaso a kago itšibula ka sona, se tlo thwe ke sekgethwa sa Morena.

24Gore ka mo go laetšwego molaong wa Morena ba iše sedimo sa maebana a mabedi, le ge e le mekurwanyana e mebedi.

25Bjale mo motseng wa Jerusalema go be go na le motho e mongwe, leina la gagwe e be e le Simeone. Motho eo e be e le moloki, e le yo bolo, a letetše khomotšo ya Isiraele; mme Moya o mokgethwa o be o le go yena.

26O be a utolletšwe ke Moya o mokgethwa, gore a ka se ke a hwa a sešo a bona Motlotšwa wa Morena.

27Motho eo a tla Ntlongkgethwa a išwa ke Moya; a hwetša batswadi ba Jesu ba tliša ngwana wa bona, ba tlile go mo dira ka mokgwa wa Molao.

28Simeone a mo kuka ka matsogo, a leboga Modimo a re:

29Mong a ka! Ke gona ge o hunolla mohlanka wa gago, gore a ikele a wile pelo bjalo ka ge o boletše.

30Gobane mahlo a ka a bone phološo ya gago,

31Ye o e beilego ya tlo bonwa ke ditšhaba tšohle.

32E le seetša se-iša-kutollo-go-bantle, sa go retiša setšhaba sa gago sa Isiraele.

33Tatagwe le mmagwe ba tlabja ke tse a bolelwago ka tšona.

34Simeone a ba šegofatša, a bolela le Maria mmago ngwana a re: Tseba gore yo o beetšwe go ba seuši le setsoši sa ba bantši ba Isiraele, le go ba seka se tlo go ganetšwa.

35Le wena pelo ya gago e tlo phuloletšwa ke lerumo; gore go tle go utollwe megopolo ya dipelo tše di ntši.

36Le moporofeta wa mosadi o be a le gona moo, Anna morwedi wa Fanuele wa moloko wa Asere. E be e le wa kgale; a sa le kgarebe a tšewa a fetša nywaga e šupilego a na le monna wa gagwe;

37bjale e be e le mohlologadi wa nywaga e masome a seswai a metšo e mene; a sa tloge Ntlongkgethwa, a direla Modimo ka go ikona le ka go rapela Modimo bošego le mosegare.

38Le yena a batamela ka lona lebaka leo, a ema, a reta Morena, a bolela yena ngwana eo go bohle ba Jerusalema ba bego ba letetše khunologo.

39Ya re ge ba phetile tšohle tše di laetšwego molaong wa Morena, ba boela Galilea, ba ya motseng wa gabo wa Natsaretha.

40Ngwana yena a gola, a tia moyeng, a tlala bohlale a okametšwe ke botho bja Modimo.

41Batswadi ba gagwe, e be e le ba go ya Jerusalema monyanyeng wa Paseka ka nywaga.

42Ge e šetše a na le nywaga e lesome la metšo e mebedi ba rotogela Jerusalema ka mokgwa wa monyanya.

43Ya re ge be feditše matšatši a wona, ba boa; ngwana Jesu a šala, batswadi ba gagwe ba sa tsebe.

44Ge ba nagana ba re o na le ba ba sepedišanago nabo; ba sepela leeto la letšatši ba mo nyaka go metswalo le go ba ba tsebanago nabo.

45Ba mo hloka; ba buša ba boela Jerusalema ba fela ba mo nyaka.

46Gwa feta matšatši a mararo, ya ba gona ba mo hwetšago Ntlongkgethwa, a dutše gare ga baruti, a ba theetša, a ba botšiša;

47ba ba mo kwago bohle ba kgotsa tlhaologanyo ya gagwe le diphetolo tša gagwe.

48Ge ba mmona moo, ba tlabega; mmagwe a re: Ngwanaka! O reng o re dira tše? O ko bone, tatago le nna re go nyakile ka bohloko.

49Yena a fetola a re: Le be le reng le nnyaka? A le be le sa tsebe ge ke swanetše go ba mo go tše tša Tate?

50Lentšu leo a le boletšego ba se ke ba le kweša.

51Gomme a fologa le bona a ya Natsaretha, a dula e le e a ba kwago. Mmagwe ditaba tše ka moka a dula a di bolokile pelong ya gagwe.

52Jesu a tšwelela pele a hlalefa, a eya le nywaga, a kgahla Modimo le batho.

← Chapter 1 Jump to: Chapter 3 →