Luke 9 — Sotho 1951 (BIBELE)

1Gomme a bitša ba lesome le metšo e mebedi, ba tla, a ba fa matla a go buša meoya e mebe ka moka le go e leleka, le a go fodiša malwetši.

2A ba roma a re ba yo goelela tša mmušo wa Modimo, ba yo fodiša balwetši.

3A ba laela a re: Le se ye le rwele morwalo, le se sware lehlotlo le ge e le mokotla, le ge e le mefago, le ge e le tšhelete; le se ke la ba le dikobo tše pedi.

4Lapa leo le tsenago go lona le dule go lona, le be le wele tsela.

5Ba ba sa le amogelego, motseng, wa bona le tloge le hlohlora le lerole la dinaong tša lena, gore e be bohlatse go bona.

6Barutiwa ba tšwa ba ya le metse, ba iša ditaba tše botse, ba fodiša balwetši mo gohle.

7Herode Teterareka a kwa tšohle tše di dirwago ke yena, a phorophora ge ba bangwe ba mmolela ba re: Johane o tsogile bahung.

8Ba bangwe ba re: Go tšweletše Eliya. Ba bangwe ba re: Go tsogile e mongwe wa baporofeta ba kgale.

9Herode a re: Johane ke mo kgaotše hlogo; bjale ke mang yo ke kwago ba mmolela ka tše kaakaa? Mme a kganyoga go mmona.

10Baapostola bao, ba anegela Jesu tše kgolo tše ba di dirilego. Yena a tloga le bona, a ya nageng ya lešoka la kgaufsi le motse wa Betsaida.

11Mašaba a batho, ge ba lemogile fao, ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa.

12Ke ge letšatši le rapama. Ba lesome le metšo e mebedi ba tla go yena ba re: Gomiša lešaba le, gore ba phatlalale ba ye metsaneng le merakeng, ba inyakele tša go ja; gobane fa re dutše lešokeng.

13Jesu a fetola a re: A ba fiwe dijo ke bolena. Bona ba re: Ga re na selo ge e se dinkgwa tše tlhano le dihlapi tše pedi, ge o sa re re ye re rekele lešaba le lekaakaa le dijo.

14Gomme banna ba ba bego ba le moo e nyakile go ba ba dikete tše tlhano. Jesu a laela barutiwa ba gagwe a re: Ba dudišeng ka dihlopha tša ba masome a mahlano.

15Gomme ba dira bjalo; ba ba dudiša ka moka.

16Yena a tšea dinkgwa tše tlhano tšeo, le dihlapi tše pedi, a lelalela legodimong, a di šegofatša, a ngwatha a nea barutiwa, bona ba di bea pele wa lešaba.

17Bohle ba ja ba hora; gwa tšewa tše ba di šadišitšego, gwa tlala diroto tše lesome le metšo e mebedi ka maratha ao.

18Mohla a le thapelong, a na le barutiwa ba gagwe ba nnoši, a ba botšiša a re: Mašaba a re ke nna mang?

19Ba fetola ba re: Ba re o Johane Mokolobetši. Ba bangwe ba re o Eliya. Ba bangwe ba re o Moporofeta; ba re go tsogile e mongwe wa baporofeta ba kgale.

20A ba botšiša a re: Gomme lena le re ke mang? Gwa fetola Petro a re: O Kriste wa Modimo.

21Jesu a ba phegelela a ba iletša a re taba yeo ba se ke ba e botsa motho.

22A re: Morwa motho o swanetše go tlaišwa ka tše ntši, le go lahlwa ke ba bagolo le baperisita ba bagolo le ba mangwalo, le go bolawa le go tsošwa ka tšatši la boraro.

23A ba botša bohle a re: Ge motho a rata go ntšhala morago, a ikgafe, a rwale sefapano sa gagwe ka mehla, mme a ntatele.

24E a ratago go phološa bophelo bja gagwe o tlo bo lahla; gomme e a lahlago bophelo bja gagwe ka baka laka, yena o tlo bo phološa.

25Gomme motho go ka mo holang ge a ka rua lefase ka moka, mola a itahla a itshenya?

26Wa maseme ka nna le ka dipolelo tšaka, le Morwamotho o tlo mo gerula mohla a tlago ka letago la gagwe le la Tatagwe le la barongwa ba bakgethwa.

27Gomme ke a le botša ka go rereša, mo go ba ba emego fa go na le ba ka se kego ba kwa lehu ba sešo ba bona mmušo wa Modimo.

28Ge go fetile matšatši a e ka bago a seswai a boletše ditaba tše, a tloga a na la Petro le Johane le Jakobo, a rotogela thabeng a yo rapela.

29Ya re ge a sa rapela, sefahlago sa gagwe sa fetoga, le diaparo tša gagwe tša šweufala tša phadima.

30Ba bona banna ba babedi ba bolela le yena; e be e le Moshe le Eliya.

31Ba bonala ba le letagong; ba bolela tša pheletšo ya modiro wa gagwe wo a yago go o phetha Jerusalema.

32Petro le bao ba bego ba na nae ba be ba imetšwe ke boroko; ba re go phafoga, ba bona letago la gagwe, le banna bao ba babedi ba ba emego le yena.

33Ge bao ba tloga, Petro a bolela le Jesu a re: Morena, ke mo go botse re le fa; a re hlomeng mekutu e meraro; o mongwe e be wa gago; o mongwe e be wa Moše; o mongwe e be wa Eliya. A realo a sa tsebe se a se bolelago.

34A sa realo gwa tla leru, la ba apeša ka thiti; ba boifa ge banna ba babedi bao ba širogela lerung.

35Gwa kwala Lentšu le etšwa lerung le re: Yo ke yena Morwamoratwa waka; le mo kwe.

36Ge Lentšu le le kwala, ba hwetša Jesu a le nnoši. Bona ba homola; tše ba di bonego ba se di botše motho mehleng yeo.

37Ka la ka moswana ge ba fologa thabeng, ba gahlanetšwa ke lešaba le lentši.

38Ba bona monna e mongwe a le gare ga lešaba, a goa a re: Moruti, ke a Go rapela, a nke o lebelele morwa waka, gobane ke a lego nnoši go nna.

39Šo o a swarwe ke moya a nape a goeletše, ge o mo utlautla a ntšha mahulo; gomme o mo tlogela ka gothata ge o šetše o mo onne.

40Ke kgopetše, barutiwa ba gago gore ba o leleke; mme o ba paletše.

41Jesu a fetola a re: Aowii! Moloko wa ba ba sa dumelego wa ba kgopo! Ke tlo ba le lena go le gokae ke le kgotlelela? Morwa wa gago mo tliše fa.

42Ya re a sa tlišwa, moyamobe wa mo akgaakga o mo utlautla Jesu a kgalema moya woo wa ditšhila a fodiša mošemanyana eo, a mo gafela tatagwe.

43Ka moka ba tlabega ka bogolo bja Modimo. Ge batho ba sa kgotsa tšohle tše Jesu a bego a di dira, yena a bolela le barutiwa ba gagwe a re:

44Lentšu le a le tsene ditsebeng tša lena, ge ke re: Morwamotho o tloga a gafelwa matsogong a batho.

45Fela, lentsu leo bona ga ba ka ba le kweša, le be le ba utagetše ba se le lemoge; mme ba šia go mmotšiša taba yeo.

46Le gona ba be ba na le kgang ya bona, ya go re e mogolo mo go bona ke mang.

47Jesu ge a bona kgopolo ya dipelo tša bona, a tšea ngwana e mongwe a mo emiša hleng ga gagwe.

48A bolela le bona a re: Mang le mang e a amogelago ngwana yo leineng laka, o amogela nna; gomme e a amogelago nna, o amogela e a nthimilego. Gomme e a lego e monyenyane mo go lena bohle, ke yena a tlo go ba e mogolo.

49Johane a bolela a re: Morena, re bone motho e mongwe a leleka meoya e mebe ka Leina la gago, ra mo iletša ka gobane a sa go latele le rena.

50Jesu a re: Le se mo iletše; gobane e a sa lwego le rena o a re lwela.

51Ge go šetše go fihla mehla ya ge a tlo tlošwa, a wela tsela a lebile motse wa Jerusalema.

52A roma dimatlane kua pele ga gagwe. Ba ya ba tsena motseng o mongwe wa Basamaria, ba mo kgopelela bolao.

53Batho bao ba gana go mo amogela, ka gobane a lebišitše sefahlogo Jerusalema.

54Barutiwa ba gagwe, Jakobo le Johane, ge ba di bona, ba re: Morena, a o rata ge re ka re mollo o tšwago legodimong o ba fediše, re dire tše di dirilwego ke Eliya?

55Jesu a retologa a ba kgalema a re: Moya wo le lego ba wona, a ga le o tsebe?

56Morwamotho ga atla go senya meoya ya batho; o tlile go e phološa. -- Gomme ba ya motseng o mongwe.

57Ba le tseleng ba sepela, motho e mongwe a tla a re: Ke tlo go latela mo o kago ya!

58Jesu a re: Diphukubje di na le melete; le dinonyana tša sebakeng di na le dihlaga; ge e le Morwamotho ga a na mo a kago samiša hlogo.

59A bitša e mongwe a re: Ntatele! Eo a re: Morena, ntumelele ke thome go yo boloka tate.

60Jesu a re: Lesa bahu ba boloke bahu ba bona; mme wena o ye o kwalakwatše mmušo wa Modimo.

61E mongwe a tla a re: Ke tlo go latela, Morena; fela, o k'o ntumelelele ke thome go laela bešo.

62Jesu a re: E a išitšego seatla mogomeng, mme a retologela tša kwa nthago, ga a lokela mmušo wa Modimo.