bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
Mark 1
Mark 1
Sotho 1951 (BIBELE)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
1
Mathomo a Ebangedi ya Jesu Kriste Morwa wa Modimo.
2
A bile bjalo ka ge go ngwadilwe ke baporofeta ba itšego: Tseba, ke roma motseta wa ka a go ete pele, gore a go lokišetše tsela.
3
Lentšu la segoeledi lešokeng le re: Lekelelanyang tsela ya Morena, le lokiše mebila yagwe.
4
Johane a tšwelela lešokeng a kolobetša, a goelela kolobetšo ya tshokologo e išago tebalelong ya dibe.
5
Naga yohle ya Juda, le bohle ba Jerusalema ba tšwelela go yena, ka moka ba kolobetšwa ke yena nokeng ya Jorodane, ba bola dibe tša bona.
6
Mme yena Johane o be a apere kobo ya boya bja kamela, a itlemile matheka ka lerala, a eja ditšie le dinose tša naga.
7
A goelela a re: E a mphetago ka maatla o ntšhetše morago, yo ke sa swanelwago ke go inama pele ga gagwe ka hunolla lerala la dieta tša gagwe.
8
Nna ke kolobetša ka meetse; mme yena o tlo le kolobetša ka Moya o Mokgethwa.
9
Mehleng yeo Jesu a tla a etšwa Natsaretha kua Galilea, a kolobetšwa ke Johane nokeng ya Jorodane.
10
Ya re a sa tšwa meetseng a bona magodimo a ahlama mme Moya o mokgethwa o mo theogela bjalo ka leeba.
11
Lentšu le etšwa legodimong la re: O Morwamoratwa wa ka yo ke kgahlwago ke yena.
12
Moya wa tloga o mo gapeletša wa mo iša lešokeng.
13
Gona moo lešokeng a dula matšatši a masome a mane a lekwa ke Sathane, a le gare ga dibata; barongwa ba mo direla.
14
Mola Johane a golegilwe, Jesu o ile Galilea, a goelela Ebangedi ya mmušo wa Modimo.
15
A re: Lebaka le tlile; mmušo wa Modimo o batametše; sokologang le dumele Ebangedi.
16
Ya re ge a šika le lewatle, a bona Simone le Andrea ngwanabo, ba rea malokwa a bona lewatleng, gobane e be e le barei ba dihlapi.
17
Jesu a bolela nabo a re: Tlang le ntatele; ke tlo le dira barei ba go phutha batho.
18
Bona ba napa ba tlogela malokwa a bona, ba mo latela.
19
Ge a fetetše pejana, a hwetša Jakobo morwa wa Tsebedeo, le Johane ngwanabo, ba hunaganya malokwa a bona ba le leselawatleng;
20
A napa a ba bitša; bona, e sa le semeetseng, ba tlogela tatabo Tsebedeo gona moo leselawatleng a na le bathwalwa, ba tloga le Jesu ba mo šetše nthago.
21
Ba tsena Kaperenaume; ba sa tšo fihla, a ya phuthegong a ruta ka Sabatha.
22
Batho ba tlabega ka thuto ya gagwe, gobane o be a ba ruta boka e a nago le maatla, e sego bjalo ka bamangwalo.
23
Gona moo phuthegong ya bona go be go na le motho wa moya wa ditšhila; yena yoo a goa a re:
24
O na le taba mang le rena. Wena Jesu wa Natsaretha? A o tlile go re fediša? Nna ke a go tseba; o Mokgethwa wa Modimo.
25
Jesu a mo kgalema a re: Homola! Tšwaa go motho yo.
26
Moya wa ditšhila wa mo akgaakga, wa goa ka lentšu le legolo, wa tšwa go motho yoo.
27
Bohle ba tšhoga, ba botšišana ba re: Ke dilo mang tšeo? Ke thuto e mpsha e maatla. O buša meoya ya ditšhila, gomme e a mo kwa.
28
Gomme tumo ya gagwe ya akgofa ya tšwela thoko tšohle tša naga ya Galilea.
29
Ge ba tloga moo phuthegong, ba ya ngwakong wa Simone le Andrea, ba na le Jakobo le Johane.
30
Mme mogwegadi wa Simone o be a le dilaong a swerwe ke letadi; a sa fihla, ba tla ba mmolela.
31
Jesu a ya a mo tsoša a mo swere ka seatla; letadi la mo tloga, mme a ba apeela.
32
E šetše e le mantšiboa, letšatši le diketše, ba tliša balwetši bohle go yena, le ba ba nago le meoya e mebe.
33
Motse ka moka wa ba wa bokana moo mojakong.
34
Jesu a fodiša ba bantši ba ba babjago ka malwetši a mehutahuta, a leleka meoya e mebe e mentši, a se dumele ge meoya e mebe e bolela e re e a mo tseba.
35
Ka la ka moswana a tsoga e sa le bošego, a tšwa a ya felo mo gongwe lešokeng, a rapela gona.
36
Simone le ba ba bego ba na nae, ba mo šala nthago.
37
Ba mo hwetša ba re: Batho bohle ba a go nyaka.
38
Jesu a fetola a re: A re yeng metsaneng e lego fa kgauswi, ke yo ruta le gona, ka gobane ke sona se ke se tletšego.
39
A tšama a ruta diphuthegong tša bona nageng ka moka ya Galilea, a leleka meoya e mebe.
40
Gwa tla motho wa lephera, a mo kgopela, a mo khunamela ka matolo, a re: Morena, ge o ka rata, o ka kgona go mphodiša!
41
Jesu a mo kwela bohloko, a iša seatla a mo swara a re: Ke rata fao; fola!
42
A sa realo ke ge lephera le mo tloga, a fola.
43
Jesu a mo laela ka thata, a mo phegelela,
44
A re: O bone gore o se ke wa botša motho. Sepela o yo ipontšha go moperisita, o iše seleboga sa ba ba fodilego se se laetšwego ke Moshe, gore e be bohlatse go bona.
45
Motho yoo, ge a tloga moo, a tšama a bolela a gaša taba yeo gohle; Jesu a ba a šitwa go tsena motseng a bonwa; a dula ntle lešokeng, batho bona ba tla go yena ba etšwa thoko tšohle.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
All chapters:
1
2
3
4
5
6
7
8
9
10
11
12
13
14
15
16