Mark 3

Sotho 1951 (BIBELE)

← Chapter 2 Jump to: Chapter 4 →

1A buša a tsena phuthegong. Gona moo go be go na le monna wa seatla se se omeletšego.

2Ba mo šetša ba re re bone ge a tlo mo fodiša ka Sabatha, gore ba mmee molato.

3Jesu a bolela le motho yoo wa seatla se se omeletšego, a re: Tsoga, o tle mo gare.

4A tsebo botšiša batho bao a re: Se se swanetšego go ka dirwa ka Sabatha a ke botse goba bobe? A ke go phološa bophelo, goba ke go bolaya? Bona ba homola.

5Jesu a ba dikološa mahlo a befetšwe, a nyamišitšwe ke bothata bja dipelo tša bona, ya ba gona a bolelago le motho yoo a re: Otlolla seatla sa gago! A se otlolla, sa loka sa fola.

6Bafarisei, bona ba tšwa ba mo lakana ba na le bahlanka ba Herode, gore ba mmolaye.

7Jesu a tloga moo a na le barutiwa ba gagwe, a ya lewatleng, a latelwa ke bontši bjo bogolo bja ba Galilea, le ba ba tšwago nageng ya Juda.

8Le ba Jerusalema, le ba Idumea, le ba mošola wa noka ya Jorodane, le ba mathoko a Tiro le Sidone, bontši bjo bogolo bja ba ba kwelego tše a di dirago, ba tla go yena.

9A laela barutiwa ba gagwe a re, ba dule ba mo lokišeditše leselawatle la ge lešaba leo le ka mo pataganya.

10Ka gobane o be a fodiša ba bantši ba ba bego ba tlaišega, ba ba ba mo wela godimo gore ba mo kgwathe.

11Le meoya e mebe ge e mmona, ya wela fase pele ga gagwe, ya goa ya re: O Morwa wa Modimo.

12Yena a e kgalema ka thata a re e se mo tsebatše.

13Gomme a rotogela thabeng, a bitša ba a bego a ba rata; ba tla go yena.

14A bea ba lesome le metšo e mebedi, gore ba be le yena, le gore a ba rome ba yo ruta.

15Le gore ba be le maatla a go fodiša malwetši, le a go leleka meoya e mebe.

16A bea ba lesome le metšo a mebedi. Simone a mo reela la Petro.

17Le Jakobo morwa wa Tsebedeo, le Johane ngwanabo, a ba reela la Beneharageme, ke go re Boramedumo,

18le Andrea, le Filipi, le Baratholomeo, le Mateo, le Tomase, le Jakobo morwa wa Alifeo, le Thadeo, le Simone wa Kana,

19le Judase Isikariote, yola wa go mo eka.

20Ge ba boetše gae, lešaba la buša la bokana, la ba šitiša le go ja bogobe.

21Bagabo ge ba di kwa, ba tla gore ba mo sware, gobane ba be ba re: Ga a sa tseba se a se dirago.

22Gomme bamangwalo ba ba tlilego ba etšwa Jerusalema, ba re o na le Beletsebulu, ba re o leleka meoya e mebe ka yena mmuši wa yona meoya e mebe.

23Jesu a ba bitša a bolela nabo ka seswantšho a re: Sathane a ka kgona bjang go leleka Sathane?

24Ge mmušo o ka kgaogana seng, mmušo woo o ka se ke wa tia.

25Le ba lapa ge ba kgaogana seng, lapa leo le ka se ke la tia.

26Le Sathane ge a ka itsogela a ikgaoganya, a ka se ke a tia, e tlo ba bofelo bja gagwe.

27Ga go e a kgonago go tsena ngwakong wa monna wa mogale a thopa thoto ya gagwe, ge a sa thome ka go tlema mogale yoo, a kgona a thopa tša ngwakong wa gagwe.

28Ruri, ke a le botša, bana ba batho ba tlo lebalelwa sebe mang le mang, le yona thogako ge ba rogile Modimo.

29Fela, e a rogago Moyamogethwa, a ka se ke a lebalelwa neng le neng; o oba molato wo o sa felego.

30A realo ka ge ba re o na le moya wa ditšhila.

31Gwa tla mmagwe le bana babo, ba ema ntle, ba roma motho wa go yo mmitša.

32Ke ge lešaba le dutše le mmeile gare. Ba mmotša ba re: Mmago le bana beno šebao, ba a go nyaka.

33Yena a fetola a re: Mmane le bana bešo ke bomang?

34A dikološa mahlo a lebelela ba ba mmeilego gare, a re: Bommane le bana bešo šeba.

35Gobane e a dirago thato ya Modimo ke yena ngwana wešo, ke kgaetšedi ya ka, le mmane.

← Chapter 2 Jump to: Chapter 4 →