Mark 2

Sotho 1951 (BIBELE)

← Chapter 1 Jump to: Chapter 3 →

1Ge go fetile matšatši, a boela motseng wa Kaperenaume, gwa kwala gore o mo gae.

2Gwa bokana batho ba bantši, ba tlala pele ga mojako wa ntlo, yena a ba ruta lentšu.

3Gwa fihla ba ba tlišago motho e a rephilego ditho, ba mo rwele e le ba bane.

4Ge ba šitwa go batamela ka baka la lešaba la batho, ba rutla hlaka ya ngwako woo, ba phula ba fološa bolao bjoo bo letšego motho yoo wa go repha ditho.

5Jesu ge a bona tumelo ya bona, a re: Ngwanaka, o lebaletšwe dibe tša gago! A era morephaditho yoo.

6Bjale gona moo go be go dutše ba bangwe ba bamangwalo. Bona ba eleletša dipelong tša bona ba re:

7Motho yo o bolela dilo mang? O roga Modimo. Ke mang e a kgonago go lebalela dibe ge e se Modimo?

8Ke ge Jesu a šetše a ba lemogile moyeng wa gagwe ge ba eleletša tše bjalo; a ba botšiša a re: Le reng le eleletša tšeo dipelong tša lena?

9Se se bolelo ke se fe? A ke go botša morephaditho yo wa re: O lebaletšwe dibe tša gago; goba ke go re: Tsoga! Rwala malao a gago o sepele?

10Fela, le tlo lemoga gobane Morwamotho o na le maatla a go lebalela dibe mo lefaseng! Ya ba gona a bolelago le yo a rephilego ditho, a re:

11Ke ra wena ge ke re: Tsoga! Rwala malao a gago, o ye ngwakong wa gago.

12Motho yoo a tsoga a rwala malao a gagwe, a tšwa a bonwa ke bohle. Ka moka ba tlabega, ba tumiša Modimo ba re: Tše bjalo ga re ešo ra di bona.

13Jesu a buša a tšwela thoko ya lewatle; lešaba ka moka la tla go yena, mme a ba ruta.

14Ya re ge a feta, a bona Lefi morwa wa Alifeo a dutše ngwakong wa lekgetho. A mmitša a re: Ntatele! Lefi a ema a mo latela.

15Ya re ge Jesu a dutše dijong ngwakong wa Lefi gwa tla ba lekgetho ba bantši le badiradibe, ba dula dijong le Jesu le barutiwa ba gagwe, ka gobane ba be ba mo latetše e le ba bantši.

16Gomme bamangwalo le bafarisei ge ba mmona a eja le ba lekgetho le badiradibe, ba botšiša barutiwa ba gagwe ba re: O jelang le balekgetho le badiradibe? O nwelang le bona?

17Jesu ge a di kwa, a fetola a re: Ballangaka ga se ba thabilego, ke balwetši. Ba ke tlilego go ba biletša tshokokogong ga se ba ba lokilego, ke badiradibe.

18Barutiwa ba Johane le ba bafarisei e be e le ba go fela ba ikona dijo. Bona bao ba tla ba re: Ke go reng barutiwa ba Johane le ba bafarisei ba ikona dijo, mola barutiwa ba gago ba sa ikone?

19Jesu a fetola a re: A bagwera ba monyadi ba ka kgona go ikona ge monyadi a sa na le bona? Mehleng ya ge monyadi a sa na le bona, ba ka se kgone go ikona.

20A tlo tla matšatši ao monyadi a tlogo tlošwa go bona; ke mo ba tlogo ikona.

21Ga go e a beago setsiba sa lešela le lefsa seaparong se setala; setsiba seo sa go thiba se ka gagola seaparo se setala sa godiša lešoba.

22Le gona morara o mofsa ga o photlelwe mo nkgong e onetšego; nkgo yeo e ka palešwa ke morara; morara wa falala, le yona nkgo ya senyega. Morara o mofsa o tšhelwa mo nkgong e mpsha.

23Ka tšatši le lengwe la Sabatha ge a phatša ka mabeleng, barutiwa ba gagwe ba tšama ba ekga diako.

24Bafarisei ba tla go yena ba re: O nke bone; ba reng ba dira ka Sabatha se se sa swanelago?

25Yena a re: A ga lešo la bala tše Dafida a kilego a di dira mohla wola a hloka a swerwe ke tlala, a na le batho ba gagwe?

26Ka mo a tsenego Ngwakong wa Modimo, mehleng yela Abyathara e le yena moperisita e mogolo, a ja dinkgwa tša go bewa pele ga Modimo, tše di bego di sa swanela go ka lewa ke motho, ge e se moperisita, a nea le bao a bego a na nabo.

27Le gona Jesu a ba botša a re: Letšatši la Sabatha le diretšwe go hola motho; ga se motho e a diretšwego go hola letšatši la Sabatha.

28Le gona Morwamotho, le letšatši la Sabatha, Mong wa lona ke yena.

← Chapter 1 Jump to: Chapter 3 →