Matthew 26 — Sotho 1951 (BIBELE)

24Ge e le Morwamotho, yena sa gagwe ke go tloga ka mo mangwalo a mmolelago; fela, wa madimabe ke motho yoo Morwamotho a ekwago ke yena. Go ka be go le kaone ge motho yoo a ka be a sa tswalwa.

25Gwa bolela le Judase, yena wa go mo eka, a re: Moruti, a ke nna? Jesu a re: O boletše.

26Ge ba eja, Jesu a tšea senkgwa, a leboga, a se ngwathaganya, a se neela barutiwa, a re: Tšeang le je, ke mmele wa ka.

27A tšea senwelo, a leboga, a ba neela sona, a re: Nwang sona bohle.

28Ke madi a ka a kgwerano e mpsha, a tšhollwago ka baka la ba bantši, e be go lebalelwa dibe.

29Gomme ke a le botša, go tloga bjale nka se hlwe ke enwa seenywa se sa morara, go fihla mehleng yeo ke tlogo buša ke se nwa le lena mmušong wa Tate.

30Ge ba feditše go opela kopelo, ba tloga ba ya thabeng ya mehlware.

31Ya re ge ba sa ya. Jesu a bolela a re: Lena ka moka bošego bjo le tlo gakanega ka tše ke tlo go di dirwa; gobane go ngwadilwe gwa thwe: Ke tlo otla modiši, mme dinku tša mohlape di tlo gašanywa.

32Fela, e tlo re ge ke tsogile, ke tlo le eta pele ra ya Galilea.

33Gwa fetola Petro a re: Le ge bohle ba ka gakanega ka tše o tlogo di dirwa, nna nka se ke ka ba ka gakanega.

34Jesu a re: Ruri, ke a go botša, ka bjona bošego bjo, mogogonope o sešo wa lla, o tlo ba o latotše gararo wa re ga o ntsebe.

35Petro a re: Le ge nka thwe ke hwe nago, nka se latole ka realo. Le barutiwa ba bangwe bohle ba realo.

36Ya ba gona ba fihlago felo go bitšwago Getsemane; Jesu a bolela le barutiwa a re: Dulang mo, ge ke sa ya mola go rapela.

37A tloga le Petro le barwa bala ba babedi ba Tsebedeo, a ya le bona, mme a thoma go nyama le go tlalelwa.

38A bolela le bona a re: Moya wa ka o nyamile ka gogolo wa go iša lehung; dulang fa le itiše le nna.

39A fetela pejana, a wela fase ka sefahlogo, a rapela a re: Tata, ge go kgonega, a senwelo se se fete se ntloge. Fela, e se be ka mo go ratago nna, e be ka mo go ratago wena.

40A tla go barutiwa ba gagwe, a ba hwetša ba robetše; a bolela le Petro a re: Ea, ga la ka la kgona go itiša le nna nako e tee fela?

41Phakgamang le rapele, gore le se tsene melekong; gobane moya o mafolofolo, mme nama e a fokola.

42A buša a ya la bobedi, a rapela a re: Tata, ge go sa kgonege ge senwelo se se feta sa ntloga ke sa ka ka se nwa, gona a go dirwe thato ya gago.

43Ya re ge a boa, a ba hwetša gape ba robetše, gobane mahlo a bona a be a imela ka boroko.

44A ba tlogela gape, a ya a rapela la boraro, a boeletša mantšu ala.

45A boela go barutiwa ba gagwe, a bolela nabo a re: A le robetše la khutša? Bonang, le kgauswi lebaka la gore Morwamotho a gafelwe matsogong a badiradibe.

46Tsogang! Eriyeng! E a nkekago šo o fihlile.

47A sa realo ke ge go etla Judase, e le e mongwe wa ba lesome le metšo e mebedi a tla a na le lešaba le lentši la ba ba swerego marumo le melamo, ba etšwa go baperisita ba bagolo le go ba bagolo ba setšhaba.

48Gomme yena moeki o be a lakane le bona a re: Yo ke tlogo mo atla, ke yena! Le sware yena yoo!

49A napa a batamela Jesu, a re: Dumela, Moruti, mme a mo atla.

50Jesu a mmotšiša a re: Mogweraka! O tletšeng fa? Ke mo ba batametšego ba iša matsogo, ba swara Jesu.

51Ba bona e mongwe wa bao ba nago le Jesu, a khwamola tšhoša, a rema mohlanka wa moperisita e mogolo, a mo kgaola tsebe.

52Jesu a mo sola a re: Bušetša tšhoša ya gago bodulong bja yona; gobane e a swarago tšhoša, o tlo bolawa ka yona.

53A o re nka se kgone go kgopela Tate, a nthomela barongwa ba ba fetišago madira a lesome le metšo e mebedi?

54Fela, ge nka realo mangwalo a a rego go swanetše go direga tšona tše a ka phethega bjang?

55Ke yona nako ye Jesu a boletšego le lešaba leo a re: Le tšwile wa go tšwela mohlakodi ka marumo le melamo, e le go swara nna ke bego ke dutše le lena ka mehla ke ruta Ntlongkgethwa; fela, moo la se ntshware.

56Fela, tše ka moka di direga gore go phethege mangwalo. Ya ba gona barutiwa bohle ba mo tlogelago ba tšhaba.

57Ba ba swerego Jesu ba mo iša ga Kayafa moperisita e mogolo, mo go bego go phuthegetše bamangwalo le ba bagolo.

58Petro a latela a le kgole, a fihla lapeng la moperisita e mogolo, a tsena a dula le bahlanka gore a bone pheletšo.

59Baperisita ba bagolo, le ba lekgotla ka moka ba nyaka bohlatse bja maaka bja go bega Jesu gore ba mmolaye.

60Fela, ba bo hloka, le ge go tsoga dihlatse tše ntši tša maaka. Gwa ba gwa tsoga dihlatse tše pedi tša maaka,

61tša re: Motho e o itše: Nka phušola Ngwako wa Modimo, ka o tsoša ka matšatši a mararo.

62Moperisita e mogolo a ba a ema a mmotšiša a re: A ga o fetole ge batho ba ba go bea molato woo? Jesu a homola.

63Ke mo moperisita e mogolo a mmotšišitšego a re: Ke go eniša ka Modimo a phelago, gore o re botše ge o le Kriste Morwa wa Modimo.

64Jesu a fetola a re: O boletše gona; fela, ke a le botša go tloga bjale Morwamotho le tlo mmona a dutše ka letsogong le letona la Yomaatla, a etla ka maru a legodimo.

65Ya ba gona moperisita e mogolo a gagolago diaparo tša gagwe, a re: O rogile Modimo. Re sa nyaka dihlatse tšang? Šedi, le mo kwele ge a roga Modimo.

66Lena le reng? Ba fetola ba re: O swanetšwe ke go ahlolelwa polao.

67Bjale ba mo tshwela ka mare sefahlogong ba mo setla ka matswele; ba bangwe ba mo phasola dithama,

68Ba re: Kriste, porofeta re go kwe; ke mang e a go setlilego?

69Petro yena o be a dutše ka ntle lapeng. Gwa tla mosetsana a re: Le wena o be o na le Jesu wa Galilea.

70Petro a latola, ba mo kwa bohle ge a re: Tše o di bolelago, nna ga ke di tsebe.

71Ya re ge a re ke tšwela kgorong, e mongwe a mmona, a botša ba ba bego ba eme moo, a re: Motho yo o be a na le Jesu wa Natsaretha.

72Petro a buša a latola, a ba a ena a re: Nna motho yoo ga ke mo tsebe.

73Ka moragwanyana ba ba emego fao ba batamela, ba bolela le Petro ba re: Ka kgonthe le wena o wa bona, o ekwa ke mmolelo wa gago.

74Bjale Petro a thoma go ithoga le go ena, a re: Motho yoo ga ke mo tsebe. Gwa napa gwa lla mogogonope.

75Ke mo Petro a eletšwego tše Jesu a di boletšego mola a re: Mogogonope o tlo ba o sešo wa lla, wena o latotše gararo wa re ga o ntsebe. A tšwela ntle a lla o bohloko.