bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
Matthew 27
Matthew 27
Sotho 1951 (BIBELE)
← Chapter 26
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 28 →
1
Ge go esa baperisita ba bagolo ka moka le ba bagolo ba sethšaba ba lakana Jesu, gore ba mo iše polaong.
2
Ba mo tlema ba mo iša go mmuši Pontio Pilato, ba mo gafela yena.
3
Judase e a mo ekilego, ge a bona Jesu a tšwilwe, a itshola a bušetša mašeleng ala a masome a mararo go baperisita ba bagolo le go ba bagolo.
4
A re: Ke sentše. Ke ekile madi a se nago molato. Bona ba re: Re tlo di reng? Go tlo bona wena.
5
Judase a lahlela mašeleng ao Ntlongkgethwa, a ya a ikgama ka lerala.
6
Baperisita ba bagolo ba tšea mašeleng ao, ba re: Ga a swanela go ba sedimo, ka gobane ke theko ya madi.
7
Ba kwana, mme ba reka tšhemo ya mmopi wa dipitša ka ona, ya ba felo ga mabitla a baeng.
8
Ke gona le lehono ba rego ke yona tšhemo ya madi.
9
Moo go phethegile se se boletšwego ke moporofeta, ge a re: Ba tšere mašeleng a masome a mararo a theko ya morekwa, yo ba mo rekilego go Baisiraele.
10
Ba reka tšhemo ya mmopi wa dipitša, ka mo Morena a ntaetšego ka gona.
11
Jesu a ema pele ga mmuši. Mmuši a mmotšiša a re: A ke wena Kgoši ya Bajuda? Jesu a re: O boletše gona.
12
Gomme ge a begwa ke baperisita ba bagolo le ba bagolo, ga a ka a fetola selo.
13
Pilato a ba a re: A ga o kwe ge ba go bega ka tše kaakaa?
14
Jesu a se fetole le ka lentšu le tee; le mmuši a ba a kgotsa ka kudu.
15
Bjale mmuši o be a na le motlwae wa gagwe wa go gololela setšhaba mogolegwa ka monyanya; o be a golola yo ba mo ratago.
16
Gomme mehleng yeo ba be ba na le mogolegwa wa selalogi e a bitšwago Baraba.
17
Bjale ge ba phuthegile, Pilato a ba botšiša a re: Le rata ge nka le gololela ofe? A le rata Baraba? Goba le rata Jesu yo ba rego ke Kriste?
18
A realo ka gobane a tseba gore ge ba mo gafetše Jesu, ba be ba dirwa ke mona.
19
Ya re a dutše moo sedulong sa kahlolo, mogatšagwe a mo romela lentšu a re: O se ke wa ba le taba le moloki yoo, gobane bošego bjo ke kwele bohloko bjo bogolo ke mo lora.
20
Ke ge baperisita ba bagolo le bamangwalo ba hlohloleditše setšhaba, ba re ba kgopele Baraba, Jesu ba mmolaye.
21
Mmuši ge a ba botšiša a re: Le rata ge ke le lokollela mang go ba babedi bao? Ba re: Baraba!
22
Pilato a re: Gomme Jesu yo ba rego ke Kriste ke tlo mo dirang? Bohle ba re: A a bapolwe sefapanong!
23
Mmuši a re: Gomme bokgopo bjo a bo dirilego ke bofe? Bona ba fo tšholla legoa le legolo ba re: A a bapolwe sefapanong!
24
Pilato ge a bona a sa fenye selo lešata le fela le gola, a tšea meetse a hlapa diatla lešaba ka moka le mmona, a re: Nna ga ke ne molato ka madi a motho yo wa moloki; taba ye ke ya lena.
25
Gwa fetola setšhaba ka moka sa re: Madi a gagwe a a tle godimo ga rena le godimo ga bana ba rena!
26
Mmuši a ba gololela Baraba, a gafa Jesu, a re a otliwe mme a bapolwe sefapanong.
27
Bahlabani ba mmuši ba tšea Jesu, ba tsena nae ngwakong wa kahlolo, ba mmokela ba le sephohla ka moka,
28
Ba mo hlobodiša ba mo apeša kobo ya matsaka,
29
Ba loga mphapahlogo wa meetlwa, ba mo rweša hlogong; ba mo swariša lehlaka ka le letona; ba tla ba mo lotšha ba mo kwera, ba re: Re a lotšha, Kgoši ya Bajuda!
30
Ba mo tshwela ka mare, ba tšea lehlaka leo, ba mo itia hlogong.
31
Gomme ge ba mo kwerile, ba mo apola kobo yeo ya matsaka, ba mo apeša diaparo tša gagwe; ba tšwa nae gore ba yo mmapola sefapanong.
32
Ge ba sa tšwa, ba hlakana le monna e mongwe wa Kirene, yo leina la gagwe e lego Simone; ba mo gapeletša a rwalela Jesu sefapano.
33
Ge ba fihlile felo mo go bitšwago Gologotha, ke go re: Magateng a dihlogo,
34
ba mo nea mokgope wa morara o tswakilwego ka bohloko, ba re a nwe; yena a o leka, a gana go o nwa.
35
Ge ba feditše go mmapola, ba abelana diaparo tša gagwe ka go dira matengwa; ya ba gona go phethega se se boletšwego ke moporofeta ge a re: Ba abelane diaparo tša ka; mme kobo ya ka yona ba e direla matengwa.
36
Mme ba dula ba mo hlapetša ba le fao.
37
Godimo ga hlogo ya Jesu ba bea lengwalo la molato wa gagwe, la re: Yo ke Jesu Kgoši ya Bajuda.
38
Le bahlakodi ba babedi ba be ba bapotšwe mohla woo; e mongwe a ba ka letsogong le letona, e mongwe ka go le letshadi.
39
Ba ba fetago ka felo fao ba mo roga, ba šišinya dihlogo tša bona ba re:
40
Wena mophušola-Ntlokgethwa, wa re ke e aga ka matšatši a mararo, iphološe! Ge o le Morwamodimo, fologa fao sefapanong.
41
Le baperisita ba bagolo ba mo kwera ba na le bamangwalo le ba bagolo, ba re:
42
Ba bangwe o ba phološitše; bjale o šitwa go iphološa. Ge e le yena kgoši ya Isiraele, a a fologe bjale moo sefapanong, re kgone re mo dumela.
43
Ba re: O be a botile Modimo; a a mo phološe gee ge a mo rata; ka gobane o itše: Ke Morwa wa Modimo.
44
Le bahlakodi bala ba ba bapotšwego le yena, ba mo goboša ka mokgwa woo.
45
Ka nako ya go selela gwa ba le leswiswi nageng ka moka, gwa ba gwa tla nako ya senyane.
46
Ka yona nako ya senyane, Jesu a goeletša ka lentšu le legolo a re: Eli! Eli! Lama sabagthani? Ke go re: Modimo wa ka! Modimo wa ka! O ntlogeletšeng?
47
Ba bangwe ba go ema fao, ba kwa ge a realo, ba re: Motho yo o bitša Eliya.
48
E mongwe wa bona a kganyela a tšea motšitla, a o ina mokgopeng wa morara, a o hlomela lehlakeng, a mo noša.
49
Ba bangwe ba re: Lesang re bone ge Eliya a ka tla a mo phološa.
50
Gomme Jesu a buša a goeletša ka lentšu le legolo, ya ba gona a neelago moya.
51
Gomme ba bona sešireletšo sa Ngwakong wa Modimo se gagoga go tloga godimo go iša fase sa tšwa diripa tše pedi; lefase la šišinyega, le mantswe a pharoga.
52
Le mabitla a bulega, mme mebele e mentši ya bakgethwa ba ba robetšego ya tsoga.
53
Ba tšwa mabitleng, ba tla motseng o mokgethwa, ba bonwa ke ba bantši mehleng ya ge Jesu a šetše a tsogile.
54
Bala ba go hlapetša Jesu ba na le tona ya bona, ge ba bona tšhišinyego ya lefase le tše di diregilego, ba tšhoga gagolo, ba re: Ka kgonthe, yena yo e be e le Morwa wa Modimo.
55
Le basadi ba bantši ba be ba le gona moo, ba lebeletše ba le kgole, ke bala ba go latela Jesu ba etšwa Galilea, ba ba bego ba mo direla.
56
Go bona go be go le Maria Magdalena, le Maria mmago Jakobo le Jose, le mmago barwa ba Tsebedeo.
57
E šetše e le mantšiboa, gwa tla monna wa mohumi wa Arimathea; leina la gagwe e be e le Josefa; le yena e be e le morutiwa wa Jesu.
58
A ya go Pilato a mo kgopela mmele wa Jesu. Pilato a laela a re a newe.
59
Josefa a tšea mmele wa Jesu, a o phuthela ka mašela a mašweu.
60
A o bea lebitleng la gagwe le lefsa, le le bego le kgorilwe leswikeng; a kgokološetša leswika le legolo mojako wa lebitla a tloga.
61
Gona moo go be go na le Maria Magdalena, le Maria yola e mongwe, ba dutše ba lebane le lebitla.
62
Ka la ka moswana le le hlatlamago la tokišo, baperisita ba bagolo le bafarisei le bamangwalo ba phuthegela go Pilato,
63
Ba re: Morena, re gopotše tše moaroši yoo a di boletšego a sa phela, a re: Ke tlo tsoga ge go fetile matšatši a mararo.
64
Ke gona laela gore lebitla le hlapetšwe go be go fihle letšatši la boraro; e se re mohlomongwe barutiwa ba gagwe ba tla ba mo utswa, mme ba botša setšhaba ba re: O tsogile bahung. Ke mo maaka ao a tlogo fetiša a pele.
65
Pilato a fetola a re: Bahlapetši šebao! Yang, le hlapetše lebitla ka mo le tsebago.
66
Ba ya ba dišiša lebitla ka bahlapetši; mme leswika ba le beeletša ka leswao la bona.
← Chapter 26
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 28 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28