Numbers 18

Sotho 1951 (BIBELE)

← Chapter 17 Jump to: Chapter 19 →

1Gomme Morena a bolela le Arone a re: Wena le barwa ba gago, le ba leloko la gago, le ba go rwala molato o lebanego tše dikgethwa. Gomme wena le barwa ba gago le ba go rwala molato o lebanego boperisita bja lena.

2Ba geno, ba leloko la Lefi, ba lešika la tatago, ba lese ba batamele ba tle le lena, ba le tlatše, ba le direle, ge wena le barwa ba gago ba lebane le Ngwako wa Molao.

3Ba hlokomele madišo a gago, le madišo a mo Ntlong e kgethwa ka moka; fela ba se ke ba batamela dilo tše kgethwa le ge e le aletare, gore ba se hwe, bona le lena.

4A ba eme le wena mo madišong a go diša Ngwako wa Kgwerano, le mo medirong ya wona ka moka; go se ke gwa batamela o šele le lena.

5Le hlokomele madišo a sekgethweng le aletareng, gore Baisiraele ba se ke ba hlwa ba welwa ke kgalefo.

6Le tsebe gore ke nna ke hlaotšego bana ba bolena ba Balefi mo go Baisiraele; ke mpho ye e neilwego Morena ka baka la bona, gore ba dire mediro ya mo Ngwakong wa Kgwerano.

7Gomme wena le barwa ba gago le hlokomele tša boperisita bja lena dilong ka moka tša aletare, le tše di lego ka teng ga lešira, le dire tšona. Boperisita ke neile lena; ke le tsebafile ka go le fa boperisita; o šele e a kago batamela a bolawe.

8Morena a buša a bolela le Arone a re: Tseba gore ke go neile madišo a dineo tša ka; ka moka tše Baisiraele ba nkgethelago tšona di neilwe wena gore e be kabelo ya gago le ya barwa ba gago. Ke molao wa ka mehla.

9Tše kgethwakgethwa tše e lego tša gago, tše di sa yego mellong šidi: Ke dibego ka moka, le dibego ka moka tša dijo, le diloba ka moka, le dilefa ka moka, tše ba tlogo ntlišetša tšona. Tše kgethwakgethwa ke tša gago.

10Le di je felo gokgethwakgethwa; di lewe ke banna ka moka; le tsebe ge e le tše kgethwa.

11Tše e lego tša gago ke tše di tšwago go dineo le go diekaro ka moka tša Baisiraele. Ke di neile wena le barwa ba gago, le barwedi ba gago; e be molao wa ka mehla. Di lewe ke mang le mang wa lapeng la gago e a se nago seila.

12Ke go neile ona makhura a mabotse a mohlware, le tšona tše di botse tša morara le tša mabele, ka ge e le dithakangwaga tše ba tlogo di tlišetša Morena.

13Tša gago e tlo ba dithakangwaga tša tšohle tše di lego mašemong a bona tše ba tlogo di tlišetša Morena. Di ka lewa ke mang le mang e a lego lapeng la gago.

14Tšohle tše e lego digafiwakamoka mo go Baisiraele ke tša gago.

15Maitšibulo a tšohle tše di phelago, a ba tlogo a tlišetša Morena, a batho le a dikgomo, ke a gago. Fela, leitšibulo la motho o se ke wa lesa go le lopolla. O lopolle le leitšibulo la seruiwa se se ilago.

16Go lopollwa ga tšona, ke go re se se feditšego kgwedi o se lopolle ka go se rekolla ka silifera ya sekele tše tlhano ka kelo ya sekgethwa e nago le 'Gera tše masome a mabedi.

17Leitšibulo la kgomo le la nku, le ge e le la pudi, o se ke wa le lopolla, ke tše kgethwa. O fokele aletare ka madi a tšona, o fiše makhura a tšona, e be a mello ya Morena a monko o bose.

18Ge e le nama ya tšona ke ya gago, le leumo la seekaro; le serope sa le letona ke sa gago.

19Dineo ka moka tše kgethwa, tše Baisiraele ba di tlišetšago Morena, ke di neile wena le barwa ba gago, le barwedi ba gago. Ke molao wa ka mehla le kgwerano ye e sa senyegego neng le neng pele ga Morena, ye e dirilwego le wena le bana ba gago.

20Gomme Morena a bolela le Arone a re: Kua nageng ya bona wena o ka se ke wa ba le naga ye e tlogo ba ya gago le seabelwa mo go bona. Seabelwa sa gago le legae la gago mo go Baisiraele ke nna.

21O tsebe gore Balefi ke ba neile karolo ya lesome ya tšohle tša Isiraele. Ke yona karolo ya bona ka baka la modiro wo ba o dirago Ngwakong wa Kgwerano.

22Baisiraele ba ka se ke ba hlwa ba batamela Ngwako wa Kgwerano ba oba molato ba hwa.

23Modiro wa Ngwakong wa Kgwerano o dirwe ke Balefi; molato wa gona o rwalwa ke bona. Ke molao wa neng le neng go iša ditlogolong tša lena; le gore ba se ke ba ba le naga ya bona mo go Baisiraele.

24Karolo ya lesome ya tše Baisiraele ba di ntšhetšago Morena ke e neile Balefi gore e be tša bona. Ke ka baka leo ke ba boditšego ka re ba ka se ke ba ba le naga ya bona mo go Baisiraele.

25Morena o boletše le Moshe a re:

26Botša Balefi o re: Ge ba ntšhiša Baisiraele karolo ya lesome ye ke le neilego yona gore e be ya lena gona le ntšhe sa lesome go yona le se tlišetše Morena, gore e be neo ya lena.

27E tlo ba yona neo ya lena ye e tlogo le balelwa bjalo ka ya mabele le ya tše di tšwago dinkgong.

28Ka mokgwa wo le lena le tlo ntšha neo ya Morena e tšwago mo go karolo ya lesome ya lena ka moka ye le e newago ke Baisiraele. Neo ye ya lena le e neele Arone moperisita e be ya Morena.

29Neo ye ya Morena le e ntšhe mo go tše di neilwego lena; mo go tšona ka moka le ntšhe tše botse tša tšona, e be neo e kgethwa.

30O ba botše o re: Tše botse tše Balefi ba di ntšhago di etša motšhelo wola wa tše di tšwago seboeng le mo nkgong.

31Le ka di ja kua magaeng a lena, lena le ba malapa a lena, ka gobane ke wona moputso wa lena wa modiro wo le o dirago Ngwakong wa Kgwerano.

32Ge le ntšhitše tše botse mo go tšona, gona le ka se ke la oba molato ka tšona, le tlo ba le sa goboše tše kgethwa tša Baisiraele, mme le ka se ke la hwa.

← Chapter 17 Jump to: Chapter 19 →