Numbers 32

Sotho 1951 (BIBELE)

← Chapter 31 Jump to: Chapter 33 →

1Barubeni le Bagada ba be ba na le dikgomo tše ntši ka kudu. Ge ba bona naga ya Jasera le ya Gileada e le yona e swanetšego mehlape,

2Bagada le Barubeni ba tla ba bolela le Moshe le Eleasara moperisita le bagolo ba phuthego ba re:

3Atharothe, le Diboni, le Jasera, le Nimira, le Hesiboni, le Eleale, le Sebama, le Nebo le Beone,

4e lego naga ye Morena a e otlilego ge go fihla Baisiraele, ke naga ya dikgomo; gomme rena bahlanka ba gago re na le dikgomo.

5Ba iša pele ba re: A nke re hwetše mahlo a gago a re lebeletše ka botho, mme naga yeo e newe rena bahlanka ba gago, e be ya rena; gomme o se re sediše noka ya Jorodane.

6Moshe a bolela le bona Bagada le Barubeni, a re: A bana ba bolena ba tlo ya ntweng, mme lena la šala mo?

7Ke ka baka lang ge le rata go hlanoša dipelo tša Baisiraele, gore ba se ke ba selela nageng ye Morena a ba neilego yona?

8Ke tšona tše botataweno ba di dirilego mola Kadese-Barenea, mola ke ba romile go hlola naga yeno;

9ba rotoga ba fihla nokeng ya Esikolo, ba bona naga, ba napa ba hlanoša dipelo tša Baisiraele ba re, ba se ke ba ya nageng ye Morena a ba neilego yona;

10mohla woo bogale bja Morena bja tuka, a ena a re:

11Ruri, banna ba ba tšwilego Egipita ba nywaga e masome a mabedi le ba ba fetago bao, ba ka se ke ba bona naga ye ke e enetšego Aborahama le Isaka le Jakobo, ka gobane ga ba ntatele ka mokgwa o tletšego.

12Ge e se Kalebe morwa wa Jefune Mokenisi, le Joshua morwa wa Nuni, ka gobane ke bona ba ba latetšego Morena ka mokgwa o tletšego.

13Gomme bogale bja Morena bo tuketše Isiraele, a ba putlaputliša gare ga naga nywaga e masome a mane; gwa ba gwa fela thaka ya bao ka moka ba ba direlego bobe pele ga Morena.

14Bjale šedi, bakeng sa botataweno go tsoga bolena, matswinyana a disenyi tenang, ba go tlo re hlolela gape kgabo ya bogale bja Morena.

15Ka gobane ge le ka mo hlanogela, o tlo diegiša setšhaba se lešokeng; gomme le tlo se fediša.

16Bona ba mmatamela kgauswi ba re: Se re se nyakago ke go agela mehlape ya rena meraka, le metse ya bana ba rena.

17Rena ka noši re tlo itlhama ra eta Baisiraele pele, re be re ba fihliše madulong a bona. Ba ba tlogo šala mo metseng ya dibo ke bana ba rena ka baka la beng ba naga ye.

18Re ka se ke ra boela malapeng a rena, ge Baisiraele ba sešo ba gorogela magaeng bohle.

19Re ka se ke ra nyaka magae kua mošola wa noka ya Jorodane le kua pele, ka gobane re tlo ba re aroletšwe naga ya rena ka mošono, kgono ya bohlabela.

20Bjale Moshe a fetola a re: Ge le rata go dira ka mokgwa woo, ge le itlhama pele ga Morena la tšwa dira,

21ge ka moka ga lena ba ba itlhamilego le sela noka ya Jorodane pele ga Morena, go fihla ge a rakile manaba a gagwe pele ga gagwe,

22ge le tlo boa ge naga e šetše e tšerwe ke Morena, gona le ka se be le molato go Morena le go Baisiraele; gomme naga yeno e tlo ba ya lena pele ga Morena.

23Fela, ge le sa dire ka mokgwa woo, gona le tlo ba le rumotše Morena; gomme le tsebe gore sebe sa lena se tlo le swara.

24Agelang bana ba lena metse, le meraka ya dikgomo tša lena; gomme le dire se le se boletšego.

25Bagada le Barubeni ba fetola ba re: Rena bahlanka ba gago re tlo dira tšona tšego tše di boletšwego ke wena mong wa rena.

26Bana ba rena le basadi ba rena ba tlo šala mo metseng ya la Gileada, le mehlape ya rena le dikgomo tša rena ka moka.

27Gomme rena bahlanka ba gago re tlo sela, ka moka ra tšwa dira pele ga Morena re itlhamile, ka mo go boletšego wena mong wa rena.

28Bjalo ka baka la bona Moshe a laela Eleasara moperisita, le Joshua morwa wa Nuni, le bagolo ba meloko ya Baisiraele,

29Moshe a laya bona bao a re: Ge Bagada le Barubeni ba sela noka ya Jorodane ba na le lena pele ga Morena, ba tšwa dira ba itlhamile ka moka, la ba la tšea naga yeo e lego pele ga lena, gona le ba nee naga ya Gileada e be ya bona.

30Fela, ge ba ka lesa go itlhama le go sela le lena, gona ba arolelwe naga mo gare ga lena kua nageng ya Kanana.

31Bagada le Barubeni ba fetola ba re: Tše Morena a di boditšego rena bahlanka ba gagwe, re tlo di dira;

32re tlo sela re itlhamile pele ga Morena ra ya nageng ya Kanana; gomme ya rena naga e tlo ba ya mošono wa Jorodane.

33Gomme Moshe a nea Bagada le Barubeni le Bamanase morwa wa Josefa ka seripa, a ba nea naga ya Sihoni kgoši ya Baamori, le naga ya Ogo kgoši ya Basani; a ba nea naga le metse ya gona go iša dinakaneng, le metse e bego e le nageng tše di bataganego le yeo.

34Bagada ba aga Diboni, le Atharothe, le Aroere,

35le Aterothe-Sofani, le Jasera, le Jogobea,

36le Bethe-Nimira, le Bethe-Harane, ya ba metse ya dibo le meraka ya dinku.

37Barubeni ba aga Hesiboni, le Eleale, le Kiryathaima,

38le Nebo, le Baali-Meone, ba go reela leina le šele, la Sibima, gomme metse ye ba e agilego ba e reetše maina a bona.

39Bamakiri morwa wa Manase, ba ya Gileada, ba tšea naga yeo, ba raka Baamori ba ba bego ba dutše gona.

40Naga ya Gileada Moshe o e neile Bamakiri morwa wa Manase, a aga gona.

41Jairi morwa wa Manase o ile a thopa metse ya bona ya meraka, a e reela leina la meraka ya Jairi.

42Noba o ile a thopa Kenathe le metsana ya gona, a e reela leina la gagwe a re ke Noba.

← Chapter 31 Jump to: Chapter 33 →