Numbers 25

Sotho 1951 (BIBELE)

← Chapter 24 Jump to: Chapter 26 →

1Mehleng yeo ya ge Baisiraele ba dutše Sithima, setšhaba se thomile go dira bootswa le basadi ba Moaba.

2Ba laleditše setšhaba go tla didimong tša medimo ya bona; setšhaba sa tla sa ja sa khunamela medimo ya bona.

3Baisiraele ge ba latela Baali-Peoro ka mokgwa, wo, bogale bja Morena bja ba tukela.

4Morena a botša Moshe a re: Ntšha bagolo bohle ba setšhaba o ba fege letšatšing pele ga Morena, gore bogale bja Morena bo gomele Baisiraele.

5Moshe a botša baahlodi ba Isiraele a re: Ka moka bolayang ba geno ba ba latetšego Baali-Peoro.

6A sa realo gwa tla monna e mongwe wa Baisiraele, a tliša mosadi wa Momidiani go bana babo; Moshe le ba phuthego ka moka ya Isiraele ba mmone ba sa le go boboleng pele ga mojako wa Ngwako wa Kgwerano.

7Ya re Pinease morwa wa Eleasara motlogolo wa Arone moperisita ge a mmona, a nanoga a le gare ga phuthego a swere lerumo ka seatla;

8a latela monna eo wa Moisiraele, a ba hwetša dilaong, a ba hlaba bobedi bja bona, monna eo wa Moisiraele, le mosadi eo a mo hlaba mpeng. Ya ba gona go fela ga kotlo mo go Baisiraele.

9Ba ba hwilego ka kotlo yeo ke ba dikete tše masome a mabedi a metšo e mene.

10Bjale Morena a bolela le Moshe a re:

11Pinease morwa wa Eleasara motlogolo wa Arone moperisita o gomišitše bogale bja ka bjo bo bego bo tuketše Baisiraele ka ge a galefa a le mo gare ga bona; ka lesa go ba fetša ke galefile.

12Bjale mmotše o re: Tša ka šedi; ke dira kgwerano ya ka ya khutšo nae.

13Boperisita bja neng le neng e tlo ba bja gagwe le bja bana ba gagwe ba ba tlogo ba gona, ka baka la ge a galefile ka baka la Modimo wa gagwe, a direla Baisiraele poelanyo.

14Ge e le leina la Moisiraele e a hlabilwego a na le mosadi wa Momidiani, e be e le Simiri morwa wa Salu, letona la lešika la Basimeone.

15Leina la mosadi yeo wa Momidiani e a hlabilwego e be e le Kosibi morwedi wa Tsuri, kgošana e nngwe ya leloko la Bamidiani.

16Morena a bolela le Moshe a re:

17Bamidiani le ba dire manaba; le ba bolaye;

18ka gobane ba le dirile ka bonaba le ka maanomabe, a ba le logetšego ona ka dilo tša Baalipeoro, le ka tša Kosibi mosadi yola wa kgošana ya Bamidiani kgaetšedi ya bona, e a bolailwego ka tsatši la kotlo ka molato wa tša Baali-Peoro.

← Chapter 24 Jump to: Chapter 26 →