Numbers 29

Sotho 1951 (BIBELE)

← Chapter 28 Jump to: Chapter 30 →

1Ka la pele la kgwedi ya go šupa le be le pitšokgethwa; le se ke la ba le modiro wo le o dirago; le le dire tšatši la megobo.

2Le tliše sehlabelo sa monko wa go natefela Morena, powana, le kgapana, le dikwanyana tše di šupago tše di se nago bosodi tša ngwaga o tee.

3Di tlišwe le dibego tša tšona tša bupi bjo bo tšhetšwego makhura, seroto se tle le powana, ntlatla e tle le kgapana,

4ntlatlana le kwanyana e nngwe le e nngwe ya tšeo tše di šupago;

5le pudi ya sehlabelo gore le direlwe poelanyo.

6Tše ka moka le di tliše ka ntle ga sehlabelo sa kgwedi le sebego sa sona, le sehlabelo sa ka mehla le sebego sa sona sa dijo le sa dino tše di tlišwago ka mokgwa wa tšona gore e be sa monko o bose wa tša mello ya Morena.

7Ka 'tšatši la lesome la kgwedi yeo ya go šupa le be le pitšokgethwa; le ikokobetšeng meoyeng ya lena; le se ke la ba le modiro wo le o swarago.

8Le tlišetše Morena sehlabelo sa monko o bose, powana, le kgapana, le dikwanyana tše di šupago tša ngwaga o tee; e be tše le bonago di se na bosodi.

9Le tliše le dibego tša tšona tša bupi bjo bo tšhetšwego makhura; powana e tle le seroto kgapana e tle le ntlatla.

10Dikwanyana tše di šupago di tle le ntlatlana ntlatlana;

11le pudi e tee ya seloba, ka ntle ga seloba sa go dira poelanyo, le sehlabelo sa ka mehla le sebego sa sona sa dijo le sa dino.

12Ka 'tšatši la lesome le metšo e mehlano la kgwedi yeo ya go šupa le be le pitšokgethwa; le se ke la ba le modiro wo le o dirago; le binele Morena monyanya wa matšatši a šupago.

13Le tliše sehlabelo sa mello ya monko wa go natefela Morena; e be dipowana tše lesome le metšo e meraro, le dikgapana tše pedi, le dikwanyana tše lesome le metšo e mene; e be tše di se nago bosodi.

14Di tle le dibego tša tšona tša bupi bjo bo tšhetšwego makhura; dipowana tše lesome le metšo e meraro di tle le seroto seroto; dikgapana tše pedi di tle le ntlatla ntlatla;

15dikwanyana tše lesome le metšo e mene di tle le ntlatlana ntlatlana;

16le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

17Ka 'tšatši la bobedi le tliše dipowana tše lesome le metšo e mebedi, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

18Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

19le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

20Ka 'tšatši la boraro le tliše dipowana tše lesome le motšo o tee, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

21Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

22le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

23Ka 'tšatši la bone le tliše dipowana tše lesome, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

24Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

25le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

26Ka 'tšatši la bohlano le tliše dipowana tše senyane, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

27Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

28le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

29Ka 'tšatši la go selela le tliše powana tše seswai, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

30Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

31le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

32Ka 'tšatši la go šupa le tliše powana tše di šupago, le kgapana tše pedi, le dikwanyana tše lesome le metšo e mene tše di se nago bosodi, tša ngwaga o tee.

33Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona;

34le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

35'Tšatši la seswai le le dire la monyanya, le se ke la ba le modiro wo le o dirago.

36Le tliše sehlabelo sa mollo le sa monko wa go natefela Morena, powana e tee, le kgapana e tee, le dikwanyana tše di šupago, tše di se nago bosodi, tša ngwaga o tee.

37Le tliše le dibego tša tšona tša dijo le tša dino, tša powana, le tša kgapana le tša dikwanyana ka palo ya tšona le ka mokgwa wa tšona;

38le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

39Ke tšona tše le tlogo di direla Morena menyanyeng ya lena, ka ntle ga tša dikeno, le tša go ithapa, le dihlabelo tša lena, le dibego tša lena tša dijo le tša dino, le dileboga tša lena.

40Gomme Moshe a anegela Baisiraele tšohle tše Morena a mo laetšego tšona.

← Chapter 28 Jump to: Chapter 30 →