Numbers 34

Sotho 1951 (BIBELE)

← Chapter 33 Jump to: Chapter 35 →

1Gomme Morena o boletše le Moshe a re:

2Laela Baisiraele o ba botše o re: Ge le tsena nageng ya Kanana, gona e tlo ba lona lefase la magae a lena, la Kanana go goma ka mellwane ya lona.

3Ka thoko ya borwa e tlo ba la lena go goma ka lešoka la Sini, la tloga le batagane le la Edomo. Mollwane wa lena ka thoko yeo ya borwa e tlo ba mo go fihlago Lewatle la Letswai, wa phaya la bohlabela.

4Mollwane wa lena ka thoko yeo ya borwa e tlo ba mokonya wa diphepheng o leba Sini, wa phaya la borwa wa kgotla ka Kadese Baranea, wa leba Hatsara-Adara, wa fihla Atsimona.

5O tlo tloga Atsimona wa fologa le Noka ya Egipita wa yo kgotla ka lewatle.

6Thoko ya bodikela mollwane wa lena e tlo ba lewatle le legolo. Ke wona mollwane wa lena wa ka thoko ya bodikela.

7Thoko ya leboa mollwane wa lena o tlo tloga lewatleng wa leba thaba ya Hori.

8Go tloga thabeng ya Hori le kgaotše le lebe sefata sa Hamathi le yo kgotla ka Tsedada.

9Mollwane o tlo fetela pele wa tla Tsifirone wa goma ka Hatsara-Enane. Ke wona mollwane wa lena ka thoko ya leboa.

10Ka thoko ya bohlabela le bee mollwane wa lena go tloga Hatsara-Enane go iša Sefama.

11Go tloga Sefama mollwane o tlo fologela Ribila ka thoko ya bohlabela ya Aini; wa tlo fologa ka dithaba tša Lewatleng la Genetsareta ka thoko ya bohlabela.

12Mollwane o tlo fologa le noka ya Jorodane wa goma ka Lewatle la Letswai. Ke yona naga ya lena ka mellwane ya yona ka thoko tše go fela.

13Gomme Moshe a laela Baisiraele a re: Ke yona naga ye le tlogo e arolelana ka matengwa; ke yona ye Morena a laetšego a re e newa meloko e senyane le seripa sa moloko.

14Ka gobane moloko wa Barubeni, go ya ka mašika a bona, le moloko wa Bagada, go ya ka mašika a bona, le seripa sa moloko wa Bamanase ba šetše ba neilwe naga ya bona.

15Meloko e mebedi yeo le seripa sa ba moloko wa Bamanase ba neilwe naga ya bona ka mošono wa noka ya Jorodane go lebana le motse wa Jeriko, kgono ya bohlabela.

16Gomme Morena a bolela le Moshe a re:

17Maina a banna ba ba tlogo le arolela naga šea: Ke Eleasara moperisita, le Joshua morwa wa Nuni.

18Mo molokong o mongwe le o mongwe le ntšhe molaodi o tee wa go arola naga.

19Maina a banna bao šea: Wa moloko wa Juda ke Kalebe morwa wa Jefune.

20Wa moloko wa Basimeone ke Semuele morwa wa Amihudi.

21Wa moloko wa Babenyamini ke Elidada morwa wa Kisilone.

22Wa moloko wa Badani molaodi ke Buki morwa wa Jogoli.

23Wa moloko wa Josefa, wa leloko la Bamanase molaodi ke Haniele morwa wa Efodi.

24Wa moloko wa Baefuraimi molaodi ke Kemuele morwa wa Sifitane.

25Wa moloko wa Basebulone molaodi ke Elitsafane morwa Paranaga.

26Wa moloko wa Isashara molaodi ke Palatiele morwa wa Asane.

27Wa moloko wa Baasere molaodi ke Akihudi morwa wa Selomi.

28Wa moloko wa Banafutali molaodi ke Pedaele morwa wa Amihudi.

29Ke bona ba ba Morena a laetšego gore ba arolele Baisiraele naga ya Kanana.

← Chapter 33 Jump to: Chapter 35 →