Numbers 5

Sotho 1951 (BIBELE)

← Chapter 4 Jump to: Chapter 6 →

1Morena o boletše le Moshe a re:

2Botša Baisiraele o re: Ba ntšhe ba lephera ka moka mo mešašeng, le bohle ba ba edišago, le bohle ba ba tšhilafetšego ka setoto.

3E ka ba monna, e ka ba mosadi, le ba ntšhe. Le ba ntšhetše ka ntle ga mešaša gore ba se ke ba tšhilafatša mešaša ya bona, ye nna ke dulago le bona mo go yona.

4Gomme Baisiraele ba dira bjalo, ba ba ntšhetša ka ntle ga mešaša. Baisiraele ba dirile ka mo Morena a boditšego Moshe ka gona.

5Morena o boletše le Moshe a re:

6Botša Baisiraele o re: Ge monna goba mosadi a dirile sebe se sengwe se batho ba se dirago, ge a rumotše Morena ka sona, motho e mobjalo o na le molato.

7Ba tle ba bobole dibe tše ba di dirilego; gomme motho a lefe molato ka mo go tletšego, gomme a ekeletše ka sa bohlano sa wona, mme a neele mong wa molato woo.

8Ge monna eo a se na wa gabo e a kago lefelwa molato woo, gona molato woo o lefelwe Morena, o neelwe moperisita gotee le kgapa ya poelanyo ya go mo direla poelanyo.

9Le tše kgethwa tše mang le mang a di tlišetšago moperisita ke tša gagwe.

10Ke gore tše kgethwa ka moka ke tša gagwe, ka moka tše di neelwago moperisita.

11Morena o boletše le Moshe a re:

12Botša Baisiraele o re: Ge mosadi wa monna e mongwe a ka aroga a mo šitelwa,

13mme monna e mongwe a tsena dikobong tša gagwe; fela, a se tsebje ka ge go se hlatse ye e mmonego, mme a sa swarwa,

14e re ge monna a tsenwa ke moya wa lehufa, a hufega ka baka la mosadi wa gagwe a ne molato,

15gona monna eo a tliše mosadi wa gagwe go moperisita; go tlišwe le sebego sa mosadi eo, e lego ntlatlana ya bupi. A se ke a bo tšhela makhura, a se ke a nunetša diorelo, ka gobane ke sebego sa lehufa, ke sebego sa seeletši sa go utolla molato.

16Moperisita a batametše mosadi eo, a mo emiše pele ga Morena.

17Moperisita a tsebo tšea meetse a makgethwa ka sebjana sa letsopa; a tšee lerole la lebato la Ntlongkgethwa, a le nunetše meetseng ao.

18Bjale mosadi, a eme moo pele ga Morena, moperisita a mo apole hlogo, moperisita a bee sebego seo sa kutollo, sebego sa lehufa mo diatleng tša mosadi, yena a sware meetse ao a mahlolabohloko ka seatla.

19Bjale moperisita a mo eniše a re: Ge go se monna o šele a kilego a robala le wena, mme wa se ke wa aroga wa itšhilafatša ka ge o ne monna wa gago, gona meetse a a mahlolabohloko a ka se ke a go hlokofatša.

20Fela, ge o forile monna wa gago, mme dikobong tša gago go tsene monna o šele e sego monna wa gago,

21(gona moo moperisita a mo eniše ka keno yeo ya go rogwa, mme a botše mosadi eo a re:) gona Morena o tlo go dira serogiwa sa keno mo setšhabeng sa geno ka go momaraganya letheka la gago le go kokomoša mpa ya gago.

22Meetse a a mahlolabohloko a tlo tsena maleng a gago, a tlo kokomoša mpa ya gago, mme a momaraganya letheka la gago. A realo mme mosadi a re: A go be bjalo! A go be bjalo!

23Bjale moperisita a ngwale keno yeo letlakaleng, mme a le hlatswe ka meetse ao a bohloko,

24a tsebo noša mosadi meetse ao a mahlolabohloko; meetse ao a bohloko a mo tsene.

25Moperisita bjale a tšee sebego sa lehufa mo seatleng sa mosadi, a se ekare pele ga Morena, a se bee aletareng.

26Mo sebegong moperisita a tabole ka seatla, mme a fiše tša kgopotšo mo aletareng, a kgone go noša mosadi meetse ao.

27E tlo re ge a mo nošitše meetse ao a na le molato, a šitetšwe monna wa gagwe, gona meetse ao a mahlolabohloko a tlo mo tsena a mo hlokofatša; mpa ya gagwe e tlo kokomoga, mme letheka la gagwe le tlo momaragana. Gomme mosadi eo o tlo ba serogiwa mo setšhabeng sa gabo.

28Fela, ge mosadi eo a se ne ditšhila, a se ne molato, gona o tlo tšwa a iketlile, o tlo riboga.

29Ke wona molao wa lehufa, ge mosadi wa monna a arogile, a tšhilafetše.

30Le ge e le ge monna a tsenwe ke moya wa lehufa, a hufega ka baka la mosadi wa gagwe, a emiše mosadi wa gagwe pele ga Morena, gomme moperisita a mo dire ka molao woo ka moka.

31Monna yena a ka se ke a ba le molato bokgopong bjoo; e a tlogo ithwalela bokgopo bja gagwe ke mosadi.

← Chapter 4 Jump to: Chapter 6 →