2 Chronicles 21

Sotho 2000 (BIBELE Taba yea Botse)

← Chapter 20 Jump to: Chapter 22 →

1Joshafate a ithobalela le botatagwe, mme a bolokwa le bona motseng wa Dafida, gomme Joramo, morwa wa gagwe, a mo hlatlama bogošing.

2Joramo, morwa wa Kgoši Joshafate wa Juda, o be a na le bomorrwarragwe ba ba latelago: Asaria, Jehiele, Sakaria, Asariahu, Mikaele le Shefatia.

3Tatagobona o ile a ba fa gauta le silibera ye ntši le dilo tše dingwe tše ntši tše bohlokwa, gomme yo mongwe le yo mongwe wa bona a mmea mohlokomedi wa motse wa Juda wo o ageleditšwego ka morako. Eupša ka gobane Joramo e be e le leitšibolo, Joshafate a mo dira mohlatlami wa gagwe bogošing.

4Ge Joramo a tieletše bogošing, a bolaya bomorwarragwe ka moka le baetapele ba bangwe ba Baisraele.

5Joramo ya ba kgoši a na le mengwaga ye masome a mararo a metšo ye mebedi, gomme a buša a le Jerusalema mengwaga ye seswai.

6A latela mohlala wo mobe wa Kgoši Ahaba le dikgoši tše dingwe tša Israele, ka gobane o be a nyetše morwedi yo mongwe wa Ahaba. A dira dibe pele ga Morena,

7eupša Morena o be a sa nyake go fediša pušo ya ba lapa la Dafida, ka gobane a be a dirile kgwerano le Dafida gomme a mo holofeditše gore ditlogolo tša gagwe di tla buša go ya go ile.

8Ge go buša Joramo, Baedomo ba ile ba tsogela Bajuda maatla gomme ba ipeela kgoši ya bona.

9Ka gona Joramo a tloga le balaodi ba madira a gagwe ka dikoloi tša ntwa gomme ba hlasela Edomo. Moo bahlabani ba Edomo ba ba dikanetša, fela ya re bošego ba ba šwahla.

10Edomo ya se hlwe e bušwa ke Juda go tloga ka nako yeo. Yona mehleng yeo motse wa Libna le wona wa tsoša mpherefere ka gobane Joramo a be a tlogetše Morena, Modimo wa borakgolokhukhu ba gagwe.

11Le gona o be a kgobetše dintotoma tšeo go tšona go bego khunamelwa medimo ya diswantšho dithabeng tša Juda, gomme a dira gore batho ba Juda le ba Jerusalema ba se botegele Morena, a ba aroša go yena.

12Moprofeta Eliya a ngwalela Joramo lengwalo a re: “Morena, Modimo wa Dafida, rakgolokhukhu wa gago, o go tšwile ka gobane ga se wa latela mohlala wa tatago, Kgoši Joshafate, goba wa rakgolwago, Kgoši Asa.

13Bakeng sa seo wena o latetše mohlala wa magoši a Israele gomme wa dira gore batho ba Juda le ba Jerusalema ba se hlwe ba botegela Modimo, ka wona mokgwa wo Ahaba le ba ba mo hlatlamego bogošing ba dirilego gore Baisraele ba se ke ba hlwa ba botega. Ebile o bolaile bomorrwarrago ba e bego e le batho ba go go phala.

14Ka baka la taba yeo Morena o tla otla setšhaba sa gago le bana ba gago le basadi ba gago o šoro, gomme a senya dithoto tša gago.

15Wena ka bowena o tla swarwa ke bolwetši bjo bošoro bja mala bjo bo tlago gola letšatši ka letšatši go fihlela mala a gago a etšwa.”

16Morena a hlohleletša Bafilista le Baarabia ba ba bego ba dula kgauswi le moo go bego go dutše Baetopia ba bangwe gore ba yo lwa le Bajuda.

17Ba hlasela Bajuda, ba thopa dithoto ka moka tša mošate, ba thopa le basadi le barwa ba kgoši ka moka ntle le Ahasia, morwa wa gagwe wa mafelelo.

18Ka morago ga tšeo ka moka, Morena a otla kgoši ka bolwetši bjo bo sa alafegego bja mala.

19Bja tšea mengwaga ye mebedi bo golela pele go fihlela ge mala a gagwe a etšwa mme kgoši a hwa a ekwa bohloko bjo bošoro.

20Batho ba gagwe ba se ke ba gotša mollo wo mogolo wa go mo llela bjalo ka ge ba ile ba direla borakgolokhukhu ba gagwe.

21Joramo e be e bile kgoši a na le mengwaga ye masome a mararo a metšo ye mebedi, gomme a bušitše a le Jerusalema mengwaga ye seswai. Ga go yo a ilego a nyama ge a hwile. Ba mmoloka motseng wa Dafida, eupša e sego mabitleng a mošate.

← Chapter 20 Jump to: Chapter 22 →