2 Chronicles 25

Sotho 2000 (BIBELE Taba yea Botse)

← Chapter 24 Jump to: Chapter 26 →

1Amatsia e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema.

2O be a dira tše di kgahlago Morena, eupša a sa di dire ka pelo ya gagwe ka moka.

3Ge a seno tielela bogošing, o ile a bolaya bahlankedi bale ba go bolaya tatagwe.

4Eupša a se ke a bolaya bana ba bona, fela a phetha se Morena a se laetšego setšhaba melaong ya Moshe a re: “Batswadi ba se ke ba bolaelwa melato ya bana ba bona, bana le bona ba se ke ba bolaelwa melato ya batswadi ba bona; motho a bolaelwe fela molato wo o obilwego ke yena mong.”

5Kgoši Amatsia a kgobokanya banna ka moka ba kgoro ya Juda le ya Benjamene, a ba bea ka dihlophanahlophana tša madira go ya ka dikgorwana tša bona, gomme a ba beela balaodi ba bahlabani ba ba dikete le ba ba makgolo. O be a kgobokantše banna ka moka ba mengwaga ye masome a mabedi le go feta fao. Ka moka ya ba ba dikete tše makgolo a mararo. E be e le bahlabani ba ba kgethilwego, ba itokišeditše ntwa, ba rutilwe go lwa ka marumo le dikotse.

6Go ba oketša a thwala bahlabani ba dikete tše lekgolo ba Israele, a ba lefa ka silibera ya dikilokramo tše dikete tše tharo.

7Eupša moprofeta yo mongwe a ya go yena a re: “O se ke wa tšea bahlabani ba ba Israele. Morena ga a eme le banna ba ba Mmušo wa ka Leboa le bona Baefraime ba.

8Mohlomongwe o gopola gore ba tla go tiiša ntweng, eupša ke Modimo yo a nago le maatla a go dira gore motho a fenye goba a fenywe, gomme o tla dira gore manaba a gago a go fenye.”

9Amatsia a botšiša moprofeta a re: “Bjale silibera yela ke šetšego ke ba lefile yona?” Moprofeta a mo fetola a re: “Morena a ka go bušetša ya go feta yeo!”

10Ka gona Amatsia a hlaola madira ale a go a thwala, gomme a a botša gore a boele ga gaboona. Ba boela morago ba tuketše batho ba Juda bogale.

11Amatsia a itiiša maatla gomme a eta madira a gagwe pele ba ya Moeding wa Letswai. Fao ba lwa gomme ba bolaya bahlabani ba Baedomo ba dikete tše lesome,

12ba ba ba thopa ba bangwe ba dikete tše lesome. Ba iša mathopša godimo ga legaga motseng wa Sela, gomme ba ba kgoromeletša fase ba pšhatlaganywa ke maswika.

13Bahlabani bale ba Israele, bale Amatsia a go se ba dumelele go ya ntweng le yena, bona ba ile ba hlasela metse ya Juda gare ga Samaria le Bethe-Horone, ba bolaya banna ba dikete tše tharo, ba thopa le thoto ye ntši.

14Ge Amatsia a fentše Baedomo o ile a boa le medimo ya bona ya diswantšho, a e ipeela yona, a e tšhumela le diorelo.

15Taba yeo ya galefiša Morena, ka gona a roma moprofeta go Amatsia gore a mmotšiše a re: “Ke ka baka lang o khunamela medimo e šele ye e paletšwego le ke go phološa batho ba yona diatleng tša gago?”

16Amatsia a mo tsena ganong a re: “Kgane re go beile moeletši wa kgoši? Homola, go sego bjalo o tla bolawa!” Moprofeta yola pele ga ge a homola a re: “Bjale ke a tseba gore Modimo o rerile go go feleletša, ka ge o dirile taba ya mohuta wo mme wa hlokomologa keletšo ya ka.”

17Kgoši Amatsia wa Juda le baeletši ba gagwe ba kwana gore ba hlasele Israele. Ka gona a roma batseta go Kgoši Joase wa Israele yo e bego e le morwa wa Joahase le setlogolo sa Jehu, a mo hlohla a re: “Tlaa re lwe!”

18Joase a fetola Amatsia ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘A morwa wa ka a nyale morwedi wa gago.’ Gwa tla phoofolo ya naga gomme ya gatakanya mošwana wola.

19Bjale Amatsia, o ikgogomoša ka go re o fentše Baedomo, ka gona o na le makoko. Eupša nna ke re itulele moo lapeng la gago. Ke ka baka lang o tsoša mpherefere wo o tlago tlišetša wena le batho ba gago mahlomola?”

20Fela Amatsia a di tšeiša phefo. E be e le thato ya Morena gore Amatsia a fenywe, ka gobane yena le ba lapa la gagwe ba be ba khunamela medimo ya diswantšho ya Baedomo.

21Ka gona Kgoši Joase wa Israele a tšwa dira a yo lwa le Kgoši Amatsia wa Juda. Ba gahlana kua Bethe-Shemeshe nageng ya Juda,

22madira a Juda a fenywa, gomme yo mongwe le yo mongwe a tšhabela ga gagwe.

23Joase a thopa Amatsia gomme a mo iša Jerusalema. Moo a kgereša morako wa motse go tloga Lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi.

24A boela Samaria le gauta ka moka le silibera ya ka Tempeleng, le ditlabakelo ka moka tša ka Tempeleng tše di bego di hlokomelwa ke ditlogolo tša Obede-Edomo, le mahumo a mošate. A thopa le batho.

25Kgoši Amatsia wa Juda a phela mengwaga ye lesome le ye mehlano ka morago ga ge Kgoši Joase wa Israele a hwile.

26Tše dingwe tše Amatsia a di dirilego, go tloga mathomong go iša mafelelong a pušo ya gagwe, di ngwadilwe mo go Ditaba tša magoši a Juda le a Israele.

27Go tloga ka yona nako yela Amatsia a hlanogetšego Morena o ile a dula a logetšwe maanomabe Jerusalema. Mafelelong a tšhabela motseng wa Lakishe, eupša manaba a gagwe a mo latelela moo gomme a mmolaya.

28Setopo sa gagwe sa išwa Jerusalema ka koloi ya dipere, gomme sa bolokwa mabitleng a botatagwe motseng wa Dafida.

← Chapter 24 Jump to: Chapter 26 →