Ezekiel 20

Sotho 2000 (BIBELE Taba yea Botse)

← Chapter 19 Jump to: Chapter 21 →

1Ka letšatši la lesome la kgwedi ya bohlano ya ngwaga wa bošupa wa ge re le mathopša, bagolo ba bangwe ba setšhaba sa Israele ba ile ba tla ba kgopela maele go Morena, gomme ba fihla ba dula fase pele ga ka.

2Ke moka Morena a ntaela a re:

3“Wena motho wa nama, botša bagolo ba ba setšhaba gore nna, Morena, Mong wa bohle, ke re: A ke re le tlile go kgopela maele go nna? Fela nna, Morena, Mong wa bohle, ke ikana ke le Modimo yo a phelago gore nka se kgopelwe ke lena maele.

4“Na o itokišeditše go ba ahlola, wena motho wa nama? O itokišeditše go ba ahlola? Gona o ba gopotše tša go šišimiša tšela borakgolokhukhu ba bona ba bego ba di dira.

5O ba botše gore nna, Morena, Mong wa bohle, ke re: Mohla wola ke kgetha Baisraele ke ile ka ikana go ditlogolo tša Jakobo ke emišitše letsogo, ka ikutollela bona kua nageng ya Egepeta. Ka ba botša ke emišitše letsogo ka re: Ke nna Morena Modimo wa lena.

6Mohlang woo ke ile ka ikana go bona gore ke tla ba ntšha nageng ya Egepeta ka ba iša nageng ye ke ba nyaketšego yona, naga ya mokhora le monono, ya go di phala ka moka.

7Ka re go bona: Ka moka ga lena lahlang medimo yeo ya diswantšho ya go šišimiša ye le e botilego, le gona le se ke la itšhilafatša ka medingwana yeo ya Egepeta; Morena Modimo wa lena ke nna.

8Eupša bona ba ngangabala, ba gana go ntheeletša. Gwa se be le o tee yo a lahlago medimo ya gagwe ya go šišimiša ya diswantšho ye ba bego ba e botile, goba yo a lesago go khunamela medingwana ya Egepeta. Ke mo ke ilego ka nagana go tšhollela bogale bja ka godimo ga bona le go ba gakalela ka kgalefo ya ka gona kua Egepeta.

9Eupša ka se dire bjalo, ka gobane ke be ke tla ikgoboša ditšhabeng tše ba bego ba phela gare ga tšona, tšeo ke itsebagaditšego go Baisraele di mpona ka go ba ntšha nageng ya Egepeta.

10“Ka gona ke ile ka ba ntšha nageng ya Egepeta ka ba iša lešokeng la Sinai.

11Ka ba fa melao ya ka, ka ba ka ba begela ditaelo tša ka tše di phedišago yo a di phethago.

12Godimo ga moo ke ile ka ba fa le matšatši a Disabatha tša ka e le seka sa kgwerano ya ka le bona, gore ba tsebe ge e le nna, Morena, ke ba kgethwafatšago.

13Eupša le gona kua lešokeng setšhaba sa Israele se ile sa nngangabalela. Ba se phethe melao ya ka, ba gana le go phetha ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng ka ba fediša.

14Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele Egepeta.

15Le ge go le bjalo, ka ikana go bona kua lešokeng gore nka se ba iše nageng yela ke ba filego yona, naga ya mokhora le monono, ya go di phala ka moka.

16Ke ikanne bjalo, ka gore ba be ba ganne go phetha ditaelo tša ka le melao ya ka, ba nyaditše le matšatši a Disabatha tša ka – ba kganyoga go khunamela medingwana ya bona.

17“Le ge go le bjalo, ka ba šokela ka se ba bolaye, ka se ba fediše kua lešokeng.

18Ka re go bana ba bona kua lešokeng: Le se ke la phetha melao le ditaelo tša borakgolokhukhu ba lena, goba la itšhilafatša ka medingwana ya bona.

19Ke nna Morena Modimo wa lena; le phethe melao ya ka le ditaelo tša ka.

20Le kgethwafatše matšatši a Disabatha tša ka, gore e tle e be seka sa kgwerano ya ka le lena, gore le tsebe ge nna, Morena, ke le Modimo wa lena.

21“Eupša moloko woo le wona o ile wa nngangabalela. Ba se phethe melao ya ka le ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng.

22Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele nageng ya Egepeta.

23Godimo ga moo ka ikana go bona kua lešokeng gore ke tla ba šwalalanya le ditšhaba, ka ba phatlalatša le dinaga,

24ka gore ba be ba gana go phetha ditaelo tša ka, le melao ya ka, ba nyaditše le matšatši a Disabatha tša ka, mme ba kganyoga go khunamela medingwana ya borakgolokhukhu ba bona.

25“Ke ka baka leo ke ba filego melao ye e sego ya loka le ditaelo tše di sa ba phedišego.

26Ka ba lesa ba itšhilafatša ka dikabelo tša bona, ka ba ka ba lesa ba dira dihlabelo ka barwa bohle ba bona ba maitšibolo gore ke ba tšhoše. Ke mo ba tlago lemoga gore ke nna Morena.

27“Bjale ge, wena motho wa nama, botša setšhaba sa Israele gore nna, Morena, Mong wa bohle, ke re: Wo ke mokgwa wo mongwe wo borakgolokhukhu ba lena ba nnyefotšego ka wona ka go se botege ga bona.

28Ke ba išitše nageng ye ke bego ke ikanne go ba fa yona. Ya re ge ba bona meboto ye e phagamego le mehlare ya matlakala a mantši ba dira dihlabelo go yona, ba mpefediša ka dikabelo tša bona. Moo ba dira dihlabelo tša monkgo wo mobose, ba tšholla dikabelo tša bona tša dino.

29Nna ka ba botšiša ka re: Dintotoma tše le yago go tšona tše ke dilomang? Le lehono di sa bitšwa ‘Dintotoma’.

30Bjale botša setšhaba sa Israele gore nna, Morena, Mong wa bohle, ke re: Le reng le itšhilafatša ka mokgwa wo borakgolokhukhu ba lena ba bego ba itšhilafatša ka wona, le arogela medimong ya bona ya go šišimiša ya diswantšho?

31Ka ge le be le tliša dikabelo tša lena, le dira le dihlabelo ka bana ba lena, le itšhilafaditše ka medingwana yohle ya lena go fihlela le lehono. Bjale na nka nama ka kgopelwa ke lena maele, lena setšhaba sa Israele? Nna, Morena, Mong wa bohle, ke ikana ke le Modimo yo a phelago, gore maele nka se a kgopelwe ke lena.

32Le re: ‘Re nyaka go etša ditšhaba tše dingwe, ra swana le batho ba ba dulago dinageng tše dingwe ba khunamelago dikota le maswika.’ Eupša se le se naganago se ka se direge.”

33“Nna, Morena, Mong wa bohle, ke ikana ke le Modimo yo a phelago, gore ke tla ba kgoši ya lena ka maatla a ka a magolo le bonatla ge ke se sa le galefetše.

34Ka maatla a ka a magolo le bonatla ke tla le ntšha ditšhabeng ka le kgoboketša dinageng tše le šwalalanyeditšwego go tšona ke se sa le galefetše.

35Ke tla le tliša Lešokeng la Ditšhaba, gomme moo ka le ahlola ke lebane le lena.

36Ke tla le ahlola bjalo ka ge ke ile ka ahlola borakgolokhukhu ba lena lešokeng la Egepeta.” O realo, Morena, Mong wa bohle.

37“Ke tla le hlokomela bjalo ka modiša ge a hlokomela mohlape wa gagwe, ka dira gore le botegele kgwerano.

38Bao ba ganago go bušwa ke nna le ba go mphošetša ke tla ba tloša mo go lena. Ke tla ba ntšha dinageng tše ba falaletšego go tšona, fela nageng ya Israele gona ba ka se boele. Ke gona le tlago lemoga gore Morena ke nna.”

39Morena, Mong wa bohle, o re: “Bjale ge, lena setšhaba sa Israele, ka moka ga lena le ka no tšwela pele la khunamela medingwana ya lena! Ge le sa ntheeletše, le tla nkgopola ka morago, la se sa nnyatša ka dikabelo tša lena le medingwana ya lena.

40Gona kua nageng ya lena, thabeng ya ka ye kgethwa, thabeng ye e phagamego ya Israele, ke mo le tlago nkhunamela gona, lena setšhaba sohle sa Israele. Le tla be le nkgahla mme ke tla nyaka gore le ntlišetše dihlabelo le dikabelo tša lena tše dibotsebotse, gotee le dimpho tša lena tše dikgethwa.

41Mohla ke le ntšha ditšhabeng ke le kgoboketša dinageng tše le šwalalanyeditšwego go tšona, ke tla le amogela bjalo ka ge nke le monkgo wo mobose, ka ipontšha ke le mokgethwa gare ge lena ditšhaba di ntebeletše.

42Mohla ke le bušetša nageng ya Israele, nageng ye ke ikannego go e fa borakgolokhukhu ba lena, ke mo le tlago lemoga gore ke nna Morena.

43Moo le tla gopola maitshwaro ale a lena le ditiro tšohle tše le itšhilafaditšego ka tšona. Le tla inyatša ka baka la tšohle tše mpe tše le dirilego.

44Mohla ke le swara ka mo go lebanego tlhomphego ya ka, e sego maitshwaro a lena a mabe le ditiro tša lena tše kgopo, ke mo lena, setšhaba sa Israele, le tlago lemoga gore ke nna Morena.” O realo, Morena, Mong wa bohle.

← Chapter 19 Jump to: Chapter 21 →