Ezekiel 24

Sotho 2000 (BIBELE Taba yea Botse)

← Chapter 23 Jump to: Chapter 25 →

1Ya re ka letšatši la lesome la kgwedi ya lesome ya ngwaga wa senyane wa ge re le mathopša Morena a re go nna:

2“Wena motho wa nama, ngwala gore lehono ke letšatši la bokae kgweding, ka gobane le ke letšatši leo ka lona kgoši ya Babilonia e thomago go dikanetša Jerusalema.

3O botše setšhaba seo sa dingangele seswantšho, o se botše gore nna, Morena, Mong wa bohle, ke re: Bea pitša sebešong.

4O segelele digoba tšohle tše dibotse – tša dirope le tša matsogo – o e tlaleletše ka mašetla a mabotse.

5O kgabelele nama ye botsebotse ya dihuswane; o bešeletše pitša kudu ka dikgong. O apee nama, o e kgabakgabiše le mašetla.”

6Morena, Mong wa bohle, o re: “Wo madimabe ke motse woo wa go tlala dipolao! O swana le pitša ye e rusitšego ye e sa tlogego ruse. Ntšha nama pitšeng, segoba ka se tee ka se tee o sa di kgetholle.

7Go kile gwa bolawa batho moo motseng, eupša madi a se tšhollelwe fase moo a bego a ka khupetšwa ka mobu; a ile a tšhollelwa letlapeng.

8Ke a tšholotše moo gore a se khupetšege, gore ke tle ke a lefeletše ke galefile.”

9Ka gona Morena, Mong wa bohle, o re: “Motse wo madimabe ke woo wa go tlala dipolao! Le nna ke tla bešeletša mollo kudu ka dikgong.

10Oketša dikgong, o bešeletše mollo, o butšwiše nama pherephere, moro o be o felele, le marapo a swe.

11Bjale bea pitša yela ya go se be le selo magaleng, gore e fiše tšhiritšhiri mo tshipi ya yona e tlago hwibila, mme mešidi le ruse ka gare tša lorela,

12le ge ruse yeo e ka se tloge ka moka moo kgabong ya mollo.

13Wena Jerusalema, mediro ya gago ya bofebe e go tšhilafaditše. Le ge ke lekile go go hlwekiša, o no šala o sa tšhilafetše. O ka se hlweke gape go fihlela ke go gakalela ka kgalefo ya ka.

14Ke realo, nna, Morena. Bjale nako ya gore ke go otle e fihlile. Nka se hlokomologe dibe tša gago, goba ka go šokela, le ge e le go go gaugela. O tla ahlolwa go ya ka maitshwaro a gago le ka tše o di dirilego.” O realo, Morena, Mong wa bohle.

15Morena a re go nna:

16“Wena motho wa nama, ka bonakwana ke ya go go amoga motho yo o mo ratago kudu; fela o se ke wa mo ilela goba wa mo llela, goba wa sekiša meokgo.

17O fegelelwe teng; o se ilele mohu; o dule o rwele kuane le dieta. O se ipipe maledu goba wa ja nama ya mogoga.”

18Ke be ke tsogile ke botša batho molaetša woo. Mantšiboa a lona tšatši leo mosadi wa ka a hlokafala, gomme ka le le latelago ka dira ka moo ke bego ke laetšwe ka gona.

19Batho ba mpotšiša ba re: “Nke o re botše gore tše o di dirago tše rena di re ruta eng.”

20Ka gona ka re go bona: “Morena o boletše le nna a ntaela

21gore ke le botše, lena setšhaba sa Israele, gore yena Morena, Mong wa bohle, o re: ‘Ke kgauswi le go tšhilafatša felo ga ka mo gokgethwa – sona sebo se le ikgantšhago ka sona, se le ratago go se boga le go se etela. Gomme barwa le barwedi ba lena ba le ba tlogetšego morago Jerusalema ba tla bolawa ka tšhoša.’

22Ke gona le tlago dira se ke se dirilego. Le ka se ipipe maledu goba la ja nama ya mogoga.

23Le tla dula le rwele dikuane le dieta, ebile le ka se ilele goba la lla. Le tla otišwa ke go otlelwa dibe tša lena mme la balabala le le mmogo.

24Ke mo nna, Hesekiele, ke tlago ba sešupo go lena; le tla dira tšohle tše ke di dirilego. Morena o re mohla tšeo di direga le tla lemoga gore ke yena Morena, Mong wa bohle.”

25Morena a re: “Gomme wena motho wa nama, ke yo ba amoga sebo seo sa bona se se ba kgahlago mme ba ikgantšhago ka sona, se ba ratago go se bogela le go se etela. Ke tla ba ka ba amoga le barwa le barwedi ba bona.

26Mohla ke dira seo mothotsoko yo a tla bego a phonyokgile o tla tla a go anegela taba tšeo.

27Lona tšatšing leo o tla rarologelwa ke polelo, mme wa bolela le yena. O tla bolela, wa se sa homola. Ke ka moo o tlago ba sešupo go bona, gomme ba tla lemoga gore Morena ke nna.”

← Chapter 23 Jump to: Chapter 25 →