Ezekiel 5

Sotho 2000 (BIBELE Taba yea Botse)

← Chapter 4 Jump to: Chapter 6 →

1“Wena motho wa nama, tšea tšhoša ye bogale o e šomiše bjalo ka legare, o ipoole moriri le maledu. Ke moka o ele meriri yeo ka kelo, mme o e arole diphuthana tše tharo.

2Sephuthana sa mathomo o se tšhume ka motseng wa Jerusalema ge manaba a tlogetše go dikanetša motse. Sa bobedi o se tšee o se kgabetlele ka tšhoša o ntše o dikologa motse. Sa boraro o se gaše phefong, gomme nna ke tla se hlomara ka tšhoša.

3O šadiše merišana e se mekae mme o e phuthele ka morumo wa seaparo sa gago.

4O nape o tšee ye mengwenyana gape, o e tšhele mollong, o e fiše. Mollo wa go tšwa merišaneng yeo o tla kekela setšhabeng sohle sa Israele.”

5Morena, Mong wa bohle, a re: “Šoowe motse wa Jerusalema. Ke o hlomile gare ga ditšhaba, o dikologilwe ke dinaga.

6Eupša Jerusalema e hlanametše melao le ditaelo tša ka, e le ye kgopo go feta ditšhaba tše dingwe, e nnyatša go feta dinaga tše di bapilego nayo. Jerusalema e lahlile ditaelo tša ka gomme ya gana go phetha melao ya ka.

7Bjale ge, nna, Morena, Mong wa bohle, ke re: O ntsogetše maatla, wena Jerusalema, go feta ditšhaba tše di bapilego nago. O nyaditše melao ya ka, wa se phethe ditaelo tša ka, ditlwaedi tša ditšhaba tše di bapilego le wena le tšona wa se di latele.

8Ke ka baka leo nna, Morena, Mong wa bohle, ke rego: Ke nna ka sebele ke lwago nago. Ke tla go otla pele ga ditšhaba.

9Ka baka la tšohle tše di šišimišago tše o di dirago ke tla go dira tše ke se nke ka di dira motho, ke bile nka se tsogego ke di dirile motho.

10Ka baka leo, batswadi mo Jerusalema ba tla ja bana ba bona, le bana ba ja batswadi ba bona. Ke tla go otla, mme mašaledi a badudi ba gago ka a šwalalanyetša mathokong ohle.

11“Ka baka leo nna, Morena, Mong wa bohle, ke ikana ke le Modimo yo a phelago, ke re: Ka gobane le tšhilafaditše Tempele ya ka ka medimo yohle ya diswantšho ya go šišimiša le ka tšohle tše ke di hlaswago tše le di dirilego, ke tla go kgabetlela ka ntle le lešoko, ka se go lese.

12Karolo ya mathomo ya dikarolo tše tharo tša batho ba gago e tla hwa ka leuba la bolwetši goba ka tlala ka motseng; karolo ya bobedi e tla bolawa ka tšhoša ka ntle ga morako wa gago; karolo ya boraro ke tla e šwalalanyetša mathokong ohle, ka ba hlomara ka tšhoša.

13“Ya ba gona bogale bja ka bo felago, le kgalefo ya ka ya kokobela, gomme ka wa pelo. Ge bogale bja ka bo kgaotša ke mo o tlago lemoga gore go boletše nna, Morena, ka ge ke nyaka o mpotegela.

14Ke tla go fetoša mašope, ka go dira sekwero sa ditšhaba tše di bapilego le wena, le sa mang le mang yo a fetago ka tsela.

15“Ge ke go befeletšwe, ke go galefetše mme ke go otla o šoro, ditšhaba tše di bapilego le wena di tla go kwera, tša go roga. O tla ba segakgamatši le setšhošetšo go bona.

16Ke tla go okeletša tlala, ka go hlokiša dijo. O tla kwa bohloko bja tlala mo nkego ke mesebe ye ke e rometšego go go fediša.

17Ke tla romela tlala le dibata gore di tle di go bolaele bana; o tla welwa ke leuba la bolwetši le dipolayano, ka go bolaiša le manaba. Ke realo, nna, Morena.”

← Chapter 4 Jump to: Chapter 6 →