Ezekiel 27

Sotho 2000 (BIBELE Taba yea Botse)

← Chapter 26 Jump to: Chapter 28 →

1Morena a re go nna:

2“Wena motho wa nama, opela sefela sa go llela Tirose,

3motse wo o agilwego lebopong la lewatle mme o gwebago le ditšhaba tše dintši tše di agilego mabopong a lewatle. O o botše gore Morena, Mong wa bohle, o re: “Wena Tirose, o be o ikgantšha, o re o leselawatle la botse bjo bo phethegilego.

4Mellwane ya gago e be e fihla kgole ka gare ga mawatle. Ba ba go agilego ba go thakgile kudu.

5Ba go hlomile ka dikota tša mophaene wa thaba ya Hermone, le ka pinagare ya mosedere wa Lebanone.

6Ka meeike ya Bashane ba go direla mahuduo. Ba go direla lebato ka mosaeprese wa Saeprose, ba le manega ka nakatlou.

7Seila ya gago e be e le ya lešela, lešela le boletiana la mebalabala la go tšwa Egepeta, mme e le yona boitsebišo bja gago. Tlhaka ya mathudi a gago e be e le ya lešela la mmala wa botala bja leratadima, le wa bohwibidu bja moretele la go tšwa lebopong la Elisha.

8Basepetšamaselawatle ba gago e be e le ba go tšwa motseng wa Sidone le wa Arbade. Bakgoni ba gago e be e le bašikalemaselawatle.

9Balokišamaselawatle ba gago e be e le bakgoni ba go tšwa Biblose. Bašikalemaselawatle ba go tšwa maselawatleng ohle ba be ba etla go wena go rekišetšana le wena.

10“Bahlabani ba go tšwa Persia le Lidia le Libia ba be ba go hlabanela, bohle e le bagale. Ba be ba fega dikotse le dikuane tša bona ka mešašeng ya gago. Ke bona banna ba ba go tlišeditšego setumo.

11Bahlabani ba go tšwa Arbade le Geleke e be e le bona baleti ba merako ya gago ka gohle, gomme banna ba go tšwa Gamade bona ba leta dibo tša gago. Ba be ba fega dikotse tša bona go dikologa merako ya gago. Ke bona ba go tlaleletša bothakga bja gago.

12“Badudi ba Tarshishe ba be ba gweba le wena ba bona lehumo la gago le lentši. Ba be ba reka phahlo ya gago ka silibera le ka tshipi le ka thini le ka morodi.

13Badudi ba Gerike le ba Tubale le ba Mesheke ba be ba gweba le wena; ba reka diphahlo tša gago ka makgoba le ka dibjana tša mphiri.

14O be o rekiša phahlo tša gago ka dipere tša go goga, le ka tša ntwa, le ka dimeila tša Bethe-Togarma.

15Batho ba Rodose ba be ba rekelana le wena; batho ba dinageng tša lebopo la lewatle tše dintši le bona ba be ba rekelana le wena, mme ba go lefa ka manaka a ditlou, le dikota tša mohlare wa eponi.

16Baedomo ba be ba rekišetšana le wena ka ge o be o na le diphahlo tše dintši. Ba be ba di lefa ka magakabje a mahwibidu, le ka mašela a bohwibidu bja moretele le a mebalabala, le a boletiana, le ka magakabje a mmala wo moso, le a bohwibidu bja mohuta wo mongwe.

17Batho ba Juda le ba naga ya Israele ba be ba rekišetšana le wena. Ba reka diphahlo tša gago ka mabele a go tšwa Minite, le ka leotša, le ka todi, le ka makhura a mohlware, le ka dihlare.

18Batho ba Damaskose ba be ba rekišetšana le wena ka ge o be o na le diphahlo tše dintši tša mehutahuta. Ba be ba di lefela ka beine ya go tšwa Helbone le ka boya bja dinku bja go tšwa Tsahare.

19Batho ba Dedane le ba Jabane ba be ba rekišetšana le wena. Ba reka diphahlo tša gago ka tshipi ye e tološitšwego ya go tšwa Usale, le ka dinoko.

20Batho ba Dedane ba be ba reka diphahlo tša gago ka mašela a go saletša.

21Baarabia le mantona ohle a naga ya Kedara ba be ba gweba le wena ka dikwana le dikgapa le dipudi.

22Babapatši ba Sheba le ba Rama ba be ba reka diphahlo tša gago ka dinoko tše dibosebose tša mehutahuta, le ka magakabje a mehutahuta, le ka gauta.

23Ba motse wa Harane, le wa Kane, le wa Edene, le babapatši ba Sheba, le ba motse wa Ashure le wa Kilmade – ka moka ba be ba rekelana nago.

24Ba be ba go rekišetša diaparo tša botšhepi, le dipurapura tša mmala wa bohwibidu bja moretele le tša mebalabala, le magogwa a mebalabala, le dithapo tše di logilwego gabotse.

25“Diphahlo tša gago di be di rwalwa ka maselawatle a magolo. “O be o le bjalo ka leselawatle le le tletšego diphahlo ka gare ga lewatle mme le imelwa.

26E be e re ge basepetšamaselawatle ba gago ba go išitše ka gare ga phamphamadiba, ledimo la bohlabela le go robaganye o le kgole le naga.

27Lehumo la gago, le diphahlo tša gago tšohle, le bašikalemaselawatle bohle, le balokišamaselawatle ba gago, le babapatši ba gago, le bagale ba gago, le banamedi ba gago bohle ba ile ba sobelela ka lewatleng ge leselawatle la gago le robega.

28Mekgoši ya bašikalemaselawatle ba ba kgangwago ke meetse ya thothomediša naga.

29“Basepetšamaselawatle bohle ba tlogetše maselawatle a bona, le bašikalemaselawatle bohle ba eme lebopong.

30Ba a gotla, ba go llela gabohloko, ba itšhela ka marole dihlogong, ba pshikologa le meloreng.

31Ba ipoola dihlogo ka baka la gago, mme ba apara tša go ilela. Pelo tša bona di kwa bohloko ge ba go llela ba hlomogile.

32Ba go opelela sefela sa mahloko ba re: ‘Ke mang wa go swana le Tirose, Tirose ye bjale e ikhomoletšego ka lewatleng?

33Mola diphahlo tša gago di eya mošamawatle o be o khoriša ditšhabatšhaba. Magoši a be a humišwa ka humo la gago le lentši le ka diphahlo tša gago.

34Bjale o robagantšwe ke lewatle; o sobeletše ka bodibeng bja lona. Diphahlo tša gago le banamedi bohle ba ba bego ba le ka leselawatleng ba sobeletše nago.’

35“Bohle ba ba agilego lebopong la lewatle ba tšhošitšwe ke tše di go hlagetšego. Le magoši a bona a tšhogile, gomme mahlong a bona go bonala poifo fela.

36Babapatši ba go tšwa ditšhabeng ba go kgotsa ka molodi, batho ba a tšhoga ge ba go bona. Ke gona ge o ile.”

← Chapter 26 Jump to: Chapter 28 →