Ezekiel 4

Sotho 2000 (BIBELE Taba yea Botse)

← Chapter 3 Jump to: Chapter 5 →

1“Wena motho wa nama, tšea lekwate la go aga o le bee pele ga gago, o thale motse wa Jerusalema mo go lona.

2O swantšhe motse wo o dikaneditšwe, o age dithala tša go o hlola, o kgobele mokgobo wa mobu go o dikanetša, o hlome mešaša go bapela nawo, o bee dithubamerako go o dikologa.

3O tšee segadikelo o se hlome mokgahlo ga gago le motse, mo nkego ke morako wa tshipi, o dule o lebane le wona. Wona o dikaneditšwe, gomme ke wena o o dikaneditšego. E be sona sešupo go setšhaba sa Israele.

4“O nape o robale ka lehlakore la nngele, o ithweše molato wa setšhaba sa Israele. Molato woo wa bona o tla o rwala matšatši a a lekanago le a o a tšerego o robetše ka lehlakore leo.

5Ke beakantše gore o rwale molato wa Baisraele matšatši a makgolo a mararo le masome a senyane, ka gobane Baisraele ba ithwešitše molato mengwaga ye mekaalo.

6Ge o feditše matšatši ao bjale o robale ka la go ja, mme o rwale molato wa setšhaba sa Juda matšatši a masome a mane – letšatši le lengwe le le lengwe le emele ngwaga o tee wa molato wa bona.

7“O fele o lebeletše Jerusalema ye e dikaneditšwego. O e šupe ka monwana mme o e porofete.

8Ke tla go tlema gore o se kgone go fetogela ka lehlakoreng le lengwe go fihlela ge o feditše go swantšha go dikanetšwa ga motse.

9“Bjale o tšee mabele le garase le dinawa le dihlodi le leotša le mphogo. O di tswakanye ka sebjaneng se tee, mme o itirele senkgwa ka tšona. Ke sona sejo se o swanetšego go se ja matšatšing ao a makgolo a mararo le masome a senyane o robetše ka lehlakore la nngele.

10Ka letšatši o ikelele dijo tšeo, e be tša dikramo tše makgolo a mabedi le masome a mararo, mme o di je ka dinako tše o ipeetšego tšona.

11Le meetse a go nwa o ikelele a sego ka letšatši, mme o a nwe ka dinako tše o ipeetšego tšona.

12O beše senkgwa seo mollong wa dišu tša mantle a batho o bonwa ke batho, mee o se je boka motho a eja senkgwa sa garase.”

13Morena a re: “Ke ka mo Baisraele ba tlago ja dijo tše di tšhilafetšego ditšhabeng tše ke ba šwalalanyeditšego go tšona.”

14Ke mo nna ke fetotšego ka re: “Aowii, Morena, Mong wa ka! Ga se nke ka itšhilafatša. Go tloga bjaneng bja ka go fihla lehono ga se nke ka ja seruiwa se se ikhwetšego ka bosona, goba se gabutlilwego ke dibata. Ga se nke ka ja sejo se se tšhilafetšego.”

15Ke moka Morena a re: “Go lokile. Bakeng sa mantle a batho ke tla go dumelela dišu tša dikgomo, mme o beše senkgwa seo ka tšona.”

16A ba a tšwela pele a re: “Wena motho wa nama, ke tlilo bolaiša motse wa Jerusalema tlala. Batho ba gona ba tla ja pelo ba tsota ge ba ikelela dijo tše ba di jago le meetse a ba a nwago.

17Ba tla hlaelwa ke dijo le meetse; ba tla tsota mme ba otišwa ke go otlelwa dibe tša bona.

← Chapter 3 Jump to: Chapter 5 →